Read Wahau Kenyah MATIUS 14 Bible Online

MATIUS 14 - Wahau Kenyah bible

MATIUS 14

¹Dalau ina te Herudis, iaʹ paren tanaʹ Galilia, kenahan dau denga neng puyan Yesus.

²Un dau Herudis palaʹ diaʹ pengelataʹ neng upis ne: “Iaʹ lan ne Yaya Guru Batis ini, nai ie numpak mudip ne ini. Ina ukoʹ o senteng uyan puyan nyingan dini.”

³Lan lete Herudis ina ne iaʹ lepa cuk dulu mapo Yaya ngan lemeka ia, penco meput ia kaʹ dalem amin sepin. Herudis cuk dulu pekina ban tuman Herudias iaʹ leto Pilipus cenganak ke.

⁴Lemuto Yaya ngenca Herudis, kuma ha: “Abeʹ un teneng ngkoʹ ke pepeto ngan leto ina.”

⁵Herudis pekimet ubaʹ ke lematai Yaya. Abeʹ e makang moʹ o takut dulu diaʹ kadoʹ, moʹ de kuma Yaya ina ca pegawa Tuhan.

⁶Tegoʹ dulu nawai tau bulan Herudis nai pempet, dalau ina tai anak leto Herudias kancet neng juma mpun dulu, ngan pebangen tawai Herudis.

⁷Sulo ho pisiu ngan anak ina kuma ha: “Akeʹ pesantet dau ngan ncoʹ, mele inu iaʹ pengenyat coʹ, akeʹ ke naʹ lete mikoʹ.”

⁸Moʹ ueʹ e lemejen ia, sulo anak leto ina kuma ha: “Naʹ ne ulu Yaya Guru Batis makeʹ, neng usun ca daya naʹkini lete.”

⁹Dalau ina meba laleʹ kaʹ tawai Herudis, moʹ lepa ne ia patek dau ngan anak leto ina neng juma kelunan kadoʹ are, ina ukoʹ o cuk dulu naʹ mia bayaʹ dau pengenyat te.

¹⁰Pekina ne puyan Herudis cuk dulu ngulep batuk Yaya dalem amin sepin.

¹¹Sulo tai re ngkin ulu Yaya neng usun ca daya kaʹ dalem amin ina are, ngan naʹ a me anak leto ina. Penco ketai anak leto ina ngkin ne me ueʹ e.

¹²Lepa ina kenai diaʹ bayaʹ katuk Yaya, alaʹ patai ie, sulo tai re masek ia kaʹ liang. Uʹo ina penco tai re badaʹ puyan ina palaʹ Yesus.

¹³Tegoʹ Yesus kenahan dau denga ina, sulo ho mecin cen ukoʹ o kina neng ca laut, penco tai ie tengen le kukoʹ iaʹ lenga. Un sepuʹo tisen dulu diaʹ kadoʹ, penco tai re mecin lepoʹ de, ngan tai bayaʹ Yesus cen janan lepat.

¹⁴Dalau kenai Yesus pejakaʹ cen alut ina, penco ho taʹan kenai ca mpun kelunan kadoʹ. Bioʹ kaʹ pengelesau ue pekimet ida, sulo ho paget diaʹ sakit neng ahang ida.

¹⁵Tai tahup ina, nai kun diaʹ bayaʹ katuk Yesus palaʹ ia. Un dau re: “Tai ie tahup ne ini, ngan ukoʹ le kini pe lenga le. Tiga hoʹ cuk kelunan kadoʹ dina tai uleʹ ne, mele inu pe ida tai ngalang lepoʹ diaʹ iʹut dina, ngan tai lemeli penguman mida tengen.”

¹⁶Un dau Yesus mipa ida: “Inu iaʹ baʹin nte ketai kelap. Tiga hem tengen lemakan ida.”

¹⁷Un dau re mipa ia: “Bang iaʹ ameʹ un, lema re luʹung ruti paun, ngan dua re usa sihai atuk.”

¹⁸Un dau Yesus neng ida: “Nai ne ngkin ne makeʹ kini ading.”

¹⁹Uʹo ina kun ne cuk kelunan kadoʹ dina madung kaʹ udu metun dina. Sulo ho alaʹ lema luʹung ruti paun ngan sihai atuk dua dina are. Kun ne nekadaʹ kaʹ langit ngan nyuaʹ tiga saheʹ e me Tuhan Allah. Lepa ina kun ne mepeʹ ruti ngan atuk dina, penco naʹ a me diaʹ bayaʹ katuk ke, ngan ida penco patu ue me kelunan kadoʹ dina laʹa.

²⁰Mung nte uman pa beso tekaʹ re. Lepa re uman, tai kun diaʹ bayaʹ katuk Yesus nemo laʹa ruti ngan atuk dina, sangan puloʹ dua ingen kuʹun ban laʹa re.

²¹Toʹ ban kadoʹ laki diaʹ uman ruti ngan atuk dina un kihoʹ kihoʹ lema ibu usa, tengen pe anak ngan leto.

²²Lepa ina Yesus cuk diaʹ bayaʹ katuk ke tai kalut, ngan tai pelawat ading neng ia kaʹ dipa leteng ina, jinan ne cuk kelunan kadoʹ dina tai uleʹ.

²³Uʹo lepa ha cuk kelunan kadoʹ dina tai uleʹ, sulo tai ie tengen le pukat ca mudung kukoʹ o ke lemameʹ. Tai tahup ina, bang Yesus tengen le ngelineʹ kina.

²⁴Dalau tai alut idai abeʹ kaʹ beluaʹ leteng te, muʹo keligeng ne alut de kuʹun luyak, moʹ bahiu kasa nyelalang ida.

²⁵Dalau tekuʹuk iap, nai Yesus palaʹ ida, masat kempau sungai.

²⁶Dalau diaʹ bayaʹ katuk ke taʹan ia masat kempau sungai, takut kaʹ de ngan bisau. Un dau re lemikaʹ: “Ca bali ina,” kun nte.

²⁷Ngan nyelarai dau Yesus pisiu ida: “Denaʹ ne tawai hem ading. Akeʹ ini. Ayen ncem takut.”

²⁸Penco dau Peterus: “Ahaʹ Tuhan, buk ke lan ne ikoʹ, cuk ne akeʹ masat kempau sungai nai palaʹ ikoʹ.”

²⁹Un dau Yesus mipa: “Nai ne, bau ke.” Sulo Peterus mecin cen alut ina, ngan tai masat kempau sungai palaʹ Yesus.

³⁰Kun Peterus taʹan seʹ bahiu kasa, bisau ne tekaʹ a, nyahin ketai ia lenca. Sulo ho lemikaʹ: “Tuhan, pudip keʹ ading.”

³¹Penco Yesus mencai ujoʹ o ngan alaʹ ia. Un dau ue neng Peterus: “Adeʹ tepa ban pengelan ncoʹ. Moʹ inu hoʹ iʹut tawai?”

³²Tai re dua pejakaʹ kaʹ alut ina, penco tai bahiu ina pekenaʹ.

³³Un diaʹ bayaʹ katuk Yesus dina penco re nyelama ia. Un dau re: “Atek lan lete ikoʹ iaʹ Anak Allah.”

³⁴Tai re pelawat leteng ina, tai abeʹ kaʹ lepoʹ Genesarit.

³⁵Kina dulu nyituk Yesus, sulo re mengin mung diaʹ sakit teliling lepoʹ ina, ngan ngkin ida palaʹ Yesus.

³⁶Ngan ngelapen dau re nyat apan Yesus pedayo kelunan sakit dina ngkang sada sapai ie iaʹ dadoʹ ina. Ngan mung nte diaʹ ngkang sapai ie penco maget.