Read Wahau Kenyah MATIUS 16 Bible Online

MATIUS 16 - Wahau Kenyah bible

MATIUS 16

¹Nai kun palai kelunan Perisi ngan Seduki palaʹ Yesus. Moʹ kimet de ubaʹ ke ten Yesus, ida cuk ia uyan ca puyan nyingan mida apan nte ke tisen buk lan ne ke sihoʹ neng pengubaʹ Allah.

²Un dau Yesus mipa ida: “Dalau ketai lenca tau, un dau hem kuma ha: ‘Seʹ ke tagaʹ ne ini uban bala seʹ langit.’

³Pekina pe mempam mempam ne un dau hem kuma ha: ‘Ujan ʹo moʹ tau lirem.’ Mencam kem nekena badaʹ seʹ puyan awang uban ncem naʹat kaʹ langit, un sepuʹo tedanaʹ bulen iaʹ ikem taʹan ngajan udip ini, abeʹ kem mencam badaʹ sen ne.

⁴Kelunan diaʹ mudip ngajan ini un jaʹat kimet de, ngan puyan nte petaro Tuhan Allah. Seʹ kem ke cuk akeʹ uyan puyan nyingan? Naʹun. Bang ca le tedanaʹ nyingan iaʹ akeʹ ke naʹ mikem, iaʹ ina tedanaʹ nyingan pegawa Yunus.” Lepa ina sulo tai Yesus mecin ida.

⁵Dalau tai diaʹ bayaʹ katuk Yesus pelawat kaʹ dipa leteng te, abeʹ de ban petawai ngkin ruti re.

⁶Un dau Yesus neng ida: “Jagaʹ tiga le ikem neng ala lamut diaʹ Perisi ngan diaʹ Seduki.”

⁷Sulo dau re neng ida peselepeʹ: “Ia pisiu pekina dau uban le abeʹ un ngkin ruti.”

⁸Yesus tisen inu tiraʹ de, sulo un dau ue neng ida: “Inu adeʹ kem pisiu neng ata hem tengen uban ncem abeʹ un ngkin ruti tupe? Adeʹ tepa ban pengelan ncem.

⁹Kumpin, abeʹ kem tisen lepe, abeʹ ne ikem petawai kumpin seʹ puyan nceʹ pepeʹ lema re luʹung ruti paun ngan lemakan lema ibu usa kelunan? Kudaʹ ingen ban laʹa ruti iaʹ ikem nyangan dalau idai?

¹⁰Ngan kumpin puyan nceʹ lemakan pat ibu kelunan man tujoʹ de luʹung ruti, ngan kudaʹ ingen ban laʹa ruti iaʹ sangan kuʹun ncem?

¹¹Moʹ inu tepa ban penisen ncem. Abeʹ keʹ pisiu ikem neng puyan ruti. Jagaʹ tiga le neng puyan ala lamut diaʹ Perisi ngan diaʹ Seduki.”

¹²Ina le diaʹ bayaʹ katuk Yesus tisen moʹ abeʹ Yesus cuk ida jagaʹ neng puyan lamut man nte uyan ruti, di lareʹ ia pekata neng puyan katuk diaʹ Perisi ngan diaʹ Seduki.

¹³Tai abeʹ Yesus kaʹ dale iaʹ nyeng kaʹ lepoʹ Kaisaria Pilipi. Kina ia lemutu ida diaʹ bayaʹ katuk ke: “Aheʹ iaʹ dulu kuma Anak Sio ini tupe?”

¹⁴Un dau re mipa: “Un diaʹ kuma ikoʹ Yaya Guru Batis. Un diaʹ kuma ikoʹ Ilia. Un pe dau dulu diaʹ ca kuma ikoʹ Yeremia, ngan un pe diaʹ kuma ikoʹ pegawa diaʹ ca.”

¹⁵Un dau Yesus: “Aheʹ sepe akeʹ baʹan ncem?”

¹⁶Un dau Simun Peterus mipa ia: “Ikoʹ lete Keristus iaʹ ngkang pungu udip, Anak Allah iaʹ mudip.”

¹⁷Sulo dau Yesus mipa: “Luhaʹ ban un peniga Tuhan neng ikoʹ Simun anak Yaya, moʹ abeʹ e uban puyan kelunan iaʹ pungkaʹ a mikoʹ, di lareʹ Amai heʹ kaʹ surga iaʹ naʹ a mikoʹ.

¹⁸Tuman ina un dau heʹ mikoʹ, ban ne ikoʹ lete Peterus, ca utun batu, ngan neng usun puʹun batu ini lete akeʹ ke medeng mpun sidang ngkeʹ. Ngan naʹ pe puyan patai pe, abeʹ un puyan inu iaʹ senteng ke nyupeʹ e.

¹⁹Akeʹ ke naʹ alet pamen pengaren surga mikoʹ ʹo. Inu iaʹ ikoʹ ke mulen kusun tanaʹ ini ʹo, ina lete iaʹ Tuhan lepa ban mulen kaʹ surga ne. Ngan inu iaʹ ikoʹ ke pedayo kusun tanaʹ ini ʹo, ina lete iaʹ Tuhan lepa ban pedayo kaʹ surga te.”

²⁰Penco Yesus cuk diaʹ bayaʹ katuk ke, ayen peletoʹ tai badaʹ ban ia iaʹ Keristus me dulu.

²¹Ina ne tading Yesus peluhaʹ ca isiu iaʹ mading palaʹ diaʹ bayaʹ katuk ke. Un dau ue: “Tekep lete akeʹ tai kaʹ Yerusalim, ngan ke sihoʹ kadoʹ tuyen kuʹun diaʹ lataʹ lepoʹ, ngan diaʹ detaʹu lataʹ, ngan diaʹ guru Katuk Adet Musa. Dulu ke lematai heʹ ʹo. Un sepuʹo neng iaʹ ketelu tau ue, akeʹ kenai ngeliwet mudip laʹa.”

²²Ina ukoʹ Peterus tai ngkin Yesus tengen le kaʹ sada mpun, sulo ho ngenca ia, un dau ue: “Bioʹ lesau Allah neng ikoʹ Amai, nyahut ini ketai nuyan ne neng ikoʹ.”

²³Sulo Yesus pupa ngan un dau ue neng Peterus: “Tai ne ikoʹ kelap akeʹ, e Sitan. Ikoʹ ini iaʹ uyan ca pempeng neng asat ceʹ. Moʹ kimet coʹ ini bang kimet kelunan le, abeʹ e anun Tuhan Allah.”

²⁴Uʹo ina kun Yesus pisiu diaʹ bayaʹ katuk ke: “Buk aheʹ iaʹ ubaʹ kenai tugung akeʹ, tiga ha lepo pengubaʹ usa ha tengen, ngan nyuʹun tecek ke, iaʹ ukoʹ o ke matai, ngan nai bayaʹ akeʹ, ina le iaʹ senteng kenai tugung akeʹ.

²⁵Aheʹ iaʹ malaʹ ke pedemun udip pe palaʹ usa ha tengen, atek ke pesau lete udip pe ʹo. Un sepuʹo aheʹ iaʹ ke pesau udip pe tuman akeʹ, ia iaʹ ke alaʹ udip pe lete.

²⁶Kumpin buk ketoʹ usun tanaʹ ini ke nalan kuʹun ca usa kelunan, inu le ke bang nge buk udip pe pesau tupe? Nyahut ca bang nge ke un ne. Abeʹ un ca inu iaʹ kelunan ke mencai man ne ke alaʹ berua ha ngeliwet.

²⁷Ban ne nyeng le laʹa Anak Sio ini kenai luhaʹ ngan serema peniga Amai ie, peging ngan melikat te. Dalau ina ha ke nyuaʹ a singket usa kelunan bayaʹ ban pemuyan nte.

²⁸Nawai tiga le. Un palai me kelunan dini ʹo diaʹ abeʹ un ke matai pa re taʹan kenai Anak Sio ini, koʹ baʹan puyan kenai ie ngan pengaren ne.”