Read Wahau Kenyah MATIUS 2 Bible Online

MATIUS 2 - Wahau Kenyah bible

MATIUS 2

¹Herudis iaʹ paren bioʹ dalau Yesus nai pempet kaʹ lepoʹ Bitlahim kaʹ tanaʹ Yudia. Abeʹ majan ʹo ina nai palai kelunan iaʹ mencam ngetisen sen betuʹen, nai re cen sek tau kaʹ Yerusalim.

²Kun nte lemutu: “Kempi anak iaʹ nai pempet, iaʹ ke nuyan paren bioʹ lepoʹ Yahudi ini? Uban ne meʹ lepa taʹan betuʹen ne tahaʹ sek tau, ina iaʹ ukoʹ meʹ nai, ubaʹ ke tunuk ngan nyelama ia.”

³Dalau Herudis kenahan dau denga ina, tai maru ne kaʹ kimet te, pekina pe ketoʹ de diaʹ dalem lepoʹ Yerusalim.

⁴Sulo Herudis kelimpun mung detaʹu lataʹ, ngan diaʹ guru Katuk Adet, penco ho lemutu ida, un dau ue: “Lan Tuhan Allah petuket ke naʹ ca laki paren bioʹ milu. Kempi ukoʹ o kenai pempet baʹan dau ue?”

⁵Un dau re mipa Herudis: “Kaʹ lepoʹ Bitlahim kaʹ tanaʹ Yudia. Uban ne pekini dau iaʹ pegawa Tuhan nyurat are:

⁶‘Ahaʹ lepoʹ Bitlahim kaʹ tanaʹ Yudia: Ayen kuma ikoʹ iaʹ iʹut laleʹ neng ahang diaʹ paren Yudia, uban cen ikoʹ kenai ca tuʹa, iaʹ ke mampin pemanak keʹ lepoʹ Israil.’ ”

⁷Sulo Herudis nyelem petiraʹ ngan kelunan diaʹ mencam ngetisen sen betuʹen dina, apan ne tisen lan cen ida midan tading nte taʹan betuʹen ina.

⁸Sulo Herudis cuk ida tai kaʹ Bitlahim. Un dau ue: “Tai ne ikem nugen ngan ngetisen puyan anak ina. Buk kem tegoʹ ia ʹo, badaʹ lete makeʹ, apan nceʹ tisen tai tunuk ngan nyelama ia ʹo.”

⁹Sulo ketai diaʹ mencam ngetisen sen betuʹen dina puke. Neng ahang janan ida taʹan ne betuʹen iaʹ ida lepa taʹan tahaʹ sek tau ading nte. Betuʹen ina tai masat tahaʹ tena ida, penco ngelineʹ kempau kukoʹ anak ina un.

¹⁰Uʹo re taʹan betuʹen ina, bangen laleʹ ne tekaʹ kimet de dina.

¹¹Tai re kedalem amin ina, penco re taʹan anak ina, ngan ueʹ e Mariam. Sulo re sutlep nyelama anak ina. Sulo re mesik buhan inu re, penco re naʹ mia pengencai mas, kemenyan, ngan lisan tumu.

¹²Lepa ina Tuhan Allah badaʹ me kelunan diaʹ mencam ngetisen sen betuʹen dina dalem kenupi re, mulen ida tai uleʹ palaʹ Herudis laʹa. Ina ukoʹ tuman nte tai uleʹ kaʹ lepoʹ de cen janan diaʹ ca.

¹³Uʹo kelunan diaʹ mencam ngetisen sen betuʹen dina tai mecin, sulo nai ca melikat luhaʹ dalem kenupi Yusup, un dau ue: “Beteʹ ne ikoʹ, alaʹ anak ina ngan ueʹ e. Tai ne ikem kelap kaʹ lepoʹ Masir. Ngelineʹ ne ikem kina pa nai heʹ badaʹ isiu mikem laʹa, ban ne Herudis kenai pita anak ini, ubaʹ ke lematai ia.”

¹⁴Nai Yusup taga alem ina, penco ho alaʹ anak ina peging ngan ueʹ e, penco re mecin tai kaʹ lepoʹ Masir.

¹⁵Sulo ngelineʹ ne ida kaʹ lepoʹ Masir pa Herudis matai. Ini lepa nuyan kuʹun isiu Tuhan iaʹ ban pegawa Tuhan lepa badaʹ, pekini dau ue: “Cen lepoʹ Masir lete akeʹ ke mengin Anak keʹ.”

¹⁶Tisen ne Herudis ban kelunan diaʹ mencam ngetisen sen betuʹen dina ngaken ia, buseʹ laleʹ ne kaʹ a. Penco ho cuk dulu tai lematai ketoʹ anak laki diaʹ kaʹ lepoʹ Bitlahim peging ngan dale iaʹ pipa kina, diaʹ dua uman pengebioʹ de ngan diaʹ dumit kentaʹ kina. Herudis pekihoʹ pekina, ban lepa ne ia nugen kelunan diaʹ mencam ngetisen sen betuʹen dina midan tading nte taʹan nai betuʹen ina luhaʹ.

¹⁷Ngan puyan ini tai nuyan ne dau isiu pegawa Yeremia iaʹ kuma ha:

¹⁸“Kaʹ dale Rama dulu ke kenahan dau tuyau tidau ngan tange. Rakil ke nidau diaʹ anak ke. Abeʹ e ubaʹ dulu ke niga kimet te, uban ia nawai mung anak ke diaʹ lepa matai.”

¹⁹Uʹo Herudis matai, Yusup ngenupi kaʹ tanaʹ Masir, sulo nai ca melikat Tuhan luhaʹ palaʹ ia.

²⁰Un dau melikat ina neng ia: “Beteʹ ne, ngkin anak ina ngan ueʹ e ngeliwet kaʹ tanaʹ Israil, ban kelunan diaʹ ten ke lematai anak ina are, lepa ne ida matai.”

²¹Penco nai Yusup beteʹ, alaʹ anak ina ngan ueʹe, tai ngeliwet kaʹ tanaʹ Israil.

²²Dalau Yusup tisen puyan Akelaus anak Herudis tai nuyan paren bioʹ kaʹ tanaʹ Yudia saliu amai ie, takut ne tekaʹ kimet Yusup ke ngelineʹ kina. Mepit pelaʹa Tuhan badaʹ mia dalem kenupi ie. Ina ukoʹ o tai kaʹ tanaʹ Galilia,

²³ngan uyan amin ne kaʹ ca lepoʹ ngadan ne Nasarit. Yusup uyan puyan ina apan ne pekuaʹ ngan dau isiu diaʹ pegawa cen naʹaʹ kuma ha: “Dulu ke pisiu ia kelunan Nasarit.”