Read Wahau Kenyah MATIUS 20 Bible Online

MATIUS 20 - Wahau Kenyah bible

MATIUS 20

¹“Puyan pengaren Allah ke ngaren ilu kelunan koʹ baʹan ca kelunan iaʹ un banit buaʹ anggur are. Mempam ke tai ie kawang, ke pita kuli ke pegayeng neng banit te.

²Mayo dau kimet laki bioʹ ina ke naʹ ca ligit dinar bang nte ca tau. Uʹo ina sulo ho cuk kuli dina tai pegayeng kaʹ banit te.

³Tegoʹ jam piʹen neng mpam ina, tai laki bioʹ ina kaʹ pasen laʹa. Kina ha taʹan palai kelunan diaʹ mukoʹ tuaʹ le.

⁴Penco dau ue neng ida: ‘Tiga ne ikem tai pegayeng kaʹ banit ceʹ te, ngan akeʹ ke naʹ bang ngkem iaʹ tekep ʹo.’

⁵Lepa ina sulo ketai re. Uʹo ina tai laki bioʹ ina kaʹ awang pelaʹa, tegoʹ beluaʹ tau, ngan tegoʹ jam telu tai tahup, pekina ne puyan laki bioʹ ina.

⁶Kena jam lema tai tahup, tai laki bioʹ ina kaʹ pasen laʹa. Kun ne taʹan palai kelunan laʹa diaʹ bang mukoʹ le. Sulo ho lemutu ida, un dau ue: ‘Moʹ inu hem ngebura tau hem ngan abeʹ un pegayeng utung tau ini?’

⁷Un dau re mipa ia: ‘Moʹ abeʹ un aheʹ iaʹ alaʹ ameʹ pegayeng.’ Un dau laki bioʹ ina neng ida: ‘Buk ke pekina, tai ne ikem pegayeng kaʹ banit anggur nceʹ te.’

⁸“Tai tahup tau ina, un dau laki bioʹ ina neng mantun ne: ‘Tiga ne ikoʹ mengkin kuli dina ngan naʹ bang nte singket usa re, nading cen kuli diaʹ bayaʹ nai didai, pabeʹ ketai ie neng kuli diaʹ ading nai didai are.’

⁹Kuli diaʹ nading pegayeng cen jam lema tai tahup didai, alaʹ bang nte ca ligit dinar singket usa re.

¹⁰Tuman ina kuli diaʹ pegayeng cen mempam didai nebelum ke alaʹ bang nte suheʹ neng anun kuli diaʹ bayaʹ nai didai. Un sepuʹo ida alaʹ tahaʹ ca ligit dinar le.

¹¹Dalau re alaʹ ligit dinar ina, kuheng kuheng ke dau re neng laki bioʹ iaʹ un ida ina.

¹²Un dau re neng ia: ‘Kuli diaʹ nai bayaʹ didai, bang ca jam le ida pegayeng, un sepe ameʹ ʹo pegayeng cen mempam sihoʹ pahang tau pa tahup. Moʹ inu hoʹ naʹ bang nte pekuaʹ ngan anun meʹ?’

¹³Un dau laki ina neng ca mida: ‘Cenganak, tiga hoʹ ngimet tiga le. Abeʹ keʹ panyi neng ikoʹ. Ban ne lepa ne ikoʹ ngahaʹ ca ligit dinar bang ngkoʹ pegayeng ca tau.

¹⁴Alaʹ ne bang ngkoʹ ne, ngan tai ne uleʹ. Me kuli diaʹ nai bayaʹ dini are, akeʹ ke naʹ bang nte pekuaʹ kadoʹ ngan anun ncoʹ.

¹⁵Kumpin tupe? Moʹ abeʹ keʹ senteng ke uyan pengubaʹ keʹ neng ligit ceʹ tengen? Moʹ inu hoʹ miʹet tuman lebang penawai heʹ?’ ”

¹⁶Un dau Yesus pelepek katuk ina: “Ngan pekina lete kelunan diaʹ tahaʹ bayaʹ, ida iaʹ ke tai tahaʹ tena, ngan kelunan diaʹ tahaʹ tena, ida iaʹ ke tai tahaʹ bayaʹ.”

¹⁷Dalau ketai Yesus kaʹ Yerusalim kun ne nengen diaʹ puloʹ dua usa diaʹ bayaʹ katuk ke dina. Dalau tai re masat, un dau Yesus neng ida:

¹⁸“Ngimet tiga le dau isiu heʹ ne. Naʹkini telu ke tai kaʹ lepoʹ Yerusalim, ngan kina dulu kenaʹ Anak Sio ini palaʹ diaʹ detaʹu lataʹ, ngan diaʹ guru Katuk Adet. Ida ke pebetep ukum patai me ia ʹo.

¹⁹Sulo re naʹ ia me lepoʹ dulu diaʹ ca. Kelunan dina ke ngetepet ia, ngan lemeta ia, ngan lematai ia neng usun kayu tecek. Un sepuʹo neng iaʹ ketelu tau ʹo ina, Tuhan Allah ke pebeteʹ ia ngan pudip ia.”

²⁰Dalau ina ueʹ diaʹ anak Sapdi nai palaʹ Yesus peging ngan diaʹ anak ke. Sulo ho muʹup neng juma Yesus, mentung nge nyat lesau neng ia.

²¹Un dau Yesus lemutu ia: “Inu iaʹ pengubaʹ koʹ? Un dau ue mipa: “Patek ne, midan Amai ketai nuyan paren bioʹ, tiga hoʹ cuk anak keʹ dua dini madung ngan ncoʹ, ca tahaʹ taʹu hoʹ, ngan ca tahaʹ kabing ngkoʹ.”

²²Un dau Yesus neng ida: “Abeʹ kem tisen inu iaʹ pengenyat cem. Kumpin, un ncem senteng ke nisep sawan penuyen iaʹ akeʹ ke nisep ʹo?” Un dau re mipa: “Senteng.”

²³Un dau Yesus neng ida: “Ahaʹ, lan lete ikem ke nisep cen sawan penuyen nceʹ ina. Un sepuʹo abeʹ keʹ senteng ke patek aheʹ iaʹ ke madung tahaʹ taʹu akeʹ ngan pekina pe tahaʹ kabing akeʹ. Ban ne ladung dua dina Amai heʹ tengen iaʹ ke lemileʹ kelunan diaʹ tekep ke madung kidi.”

²⁴Midan diaʹ puloʹ usa diaʹ bayaʹ katuk ke diaʹ ca dina tisen puyan ini, miʹa ne tekaʹ de neng ida dua padeʹ.

²⁵Tuman ina Yesus mengin ida mung, sulo dau ue neng ida: “Ikem tisen ban neng ahang dulu diaʹ kadoʹ un diaʹ paren iaʹ un penyukat kempau ida, ngan diaʹ lataʹ lepoʹ dina ne iaʹ ngaren ida.

²⁶Un sepuʹo ca naʹan puyan ne neng ahang ikem. Buk ca usa ubaʹ ke bioʹ neng ahang ikem, atek ke ke tunuk ikem mung lete.

²⁷Buk ca usa ubaʹ ke tai ading neng ahang ikem, atek ke ke ngulaʹ ikem mung lete.

²⁸Alaʹ kimet cem kuaʹ koʹ baʹan kimet Anak Sio ini are. Abeʹ e nai apan dulu ke pubo ia, di lareʹ apan ne ke pubo kelunan, ngan ke mencai udip pe ca liwa tuman kelunan kadoʹ.”

²⁹Dalau tai re mecin cen lepoʹ Yeriko, kadoʹ kenai kelunan bayaʹ Yesus.

³⁰Un dua re kelunan butaʹ madung kaʹ sada janan, kenahan dau denga Yesus tai lapa ida. Sulo re ngelengap, un dau re: “Amai, ikoʹ iaʹ Anak Daut, lesau ne ameʹ ading.”

³¹Sulo dulu ngenca ida dua, mulen ida dua pisiu. Un sepuʹo bioʹ kuʹo dau re ngelengap: “Amai, ikoʹ iaʹ Anak Daut, lesau ne ameʹ ading.”

³²Sulo Yesus pekenaʹ, penco ho mengin ida dua. Un dau ue: “Inu iaʹ ikem ubaʹ akeʹ ke uyan neng ikem?”

³³Un dau re mipa ia: “Ahaʹ Amai, ameʹ nyat apan mata meʹ nai pesik.”

³⁴Un ne tekaʹ penyaheʹ kimet Yesus neng ida dua, penco ho napen ujoʹ o neng mata re dua, penco taʹan ne ida dua. Sulo tai re dua bayaʹ Yesus.