Read Wahau Kenyah MATIUS 23 Bible Online

MATIUS 23 - Wahau Kenyah bible

MATIUS 23

¹Sulo dau Yesus neng kelunan kadoʹ peging ngan diaʹ bayaʹ katuk ke:

²“Guru Katuk Adet, ngan kelunan Perisi, ida ne iaʹ tekep penco tiraʹ Katuk Adet.

³Tuman ina, tekep kem bayaʹ ketoʹ inu dau iaʹ ida cuk ikem uyan. Un sepuʹo ayen ncem katap seʹ pemuyan nte, ban ne abeʹ de bayaʹ inu iaʹ ida penco.

⁴Ida uyan mpin iaʹ bahat, ngan penco naʹ a neng likut kelunan. Un sepuʹo nyahut de ke mepo kelunan ke baʹ mpin ina are, idi pe man buaʹ ujoʹ de, abeʹ pe ida dayo.

⁵Ida uyan ketoʹ inu apan dulu taʹan ida. Naʹat ne seʹ bioʹ iʹuk jo Kitap iaʹ ida meka neng anang nte, ngan kaʹ lengen nte, ngan nugen seʹ dadoʹ sabu sapai re.

⁶Ngan ida malaʹ neng ukoʹ iaʹ tiga tegoʹ dulu pemung uman, ngan pekina pe kaʹ amin sebayang, ida lemileʹ adan iaʹ tiga kukoʹ de.

⁷Moʹ de ubaʹ dulu ke nyelama ida ngalang pasen, ngan pisiu ida ‘Guru.’

⁸Ayen ncem ubaʹ dulu ke pisiu ikem ‘Guru,’ uban ne ketoʹ kem pecenganak, ngan bang ca le Guru hem.

⁹Ngan pekina pe ayen ncem pisiu ca neng ahang ikem kusun tanaʹ ini ‘Amai,’ ban ne bang ca le Amai hem iaʹ kaʹ surga.

¹⁰Ngan ayen ncem ubaʹ dulu ke pisiu ikem iaʹ ‘Pengebioʹ,’ ban ne bang ca le iaʹ Pengebioʹ kem, iaʹ ina Keristus.

¹¹Aheʹ iaʹ bioʹ neng ahang ikem, atek tekep te ia ke ngulaʹ usa ha neng ikem.

¹²Ngan aheʹ iaʹ ke ngempau ngadan ne, ia ke tai libaʹ. Ngan aheʹ iaʹ ke ngelibaʹ ngadan ne, ia iaʹ ke tai mpau.”

¹³“Siʹau pe ikem diaʹ guru Katuk Adet ngan kelunan Perisi. Ikem diaʹ kelunan ngaloʹ. Ikem malet pamen puyan pengaren Allah ke ngaren ilu kelunan palaʹ dulu, un sepuʹo ikem tengen pe abeʹ un ubaʹ tai kidi. Ngan pelaʹa ikem mempeng kelunan diaʹ ubaʹ ketai kaʹ dalem me.

¹⁴“Siʹau pe ikem diaʹ guru Katuk Adet ngan kelunan Perisi. Ikem diaʹ kelunan ngaloʹ. Kun ncem ngaken leto balu ngan ngelau amin nte. Lepa ina kun ncem ngaloʹ ti temameʹ iaʹ dadoʹ dau. Uban pekini ne iaʹ ukoʹ ukum kem ke bahat laleʹ le ʹo.

¹⁵“Siʹau pe ikem diaʹ guru Katuk Adet ngan kelunan Perisi. Ikem diaʹ kelunan ngaloʹ. Tai hem pelawat banget ngan tai pelibut dale, ke cuk ca usa pupa kimet te. Uʹo ho lepa nai kaʹ dalem adet cem, kun ncem uyan ia utung ukum luten dua liwai lapa neng ʹo ikem.

¹⁶“Siʹau pe ikem diaʹ ke ajak kelunan petem kem butaʹ. Un dau katuk kem: ‘Buk ca usa ke mudoʹ man ngadan Umaʹ Palan Allah, abeʹ un inu baʹan ncem. Un sepuʹo buk ke ke mudoʹ man ngadan mat dalem Umaʹ Palan Allah, ke sihoʹ o neng pudoʹ o.’

¹⁷E ikem kelunan untau iaʹ butaʹ. Inu iaʹ lapa bioʹ baʹan ncem, mat ina mo, buk ke are Umaʹ Palan Allah iaʹ ke muheʹ mat ina?

¹⁸“Ngan pekina pe ikem kuma ha: ‘Buk ca usa ke mudoʹ man ngadan padung pengencai, abeʹ e ke sihoʹ neng pudoʹ o.’ Un sepuʹo buk ke ke mudoʹ man ngadan pengencai iaʹ neng usun padung pengencai ina, ke sihoʹ o neng pudoʹ o.’

¹⁹Adeʹ kem butaʹ. Inu iaʹ lapa bioʹ baʹan ncem, pengencai ina mo, buk ke are padung pengencai iaʹ ke muheʹ pengencai ina?

²⁰Ina tuman ne, buk ca usa ke mudoʹ man ngadan padung pengencai, seleket te ke mudoʹ man mung inu iaʹ un neng usun ne lete.

²¹Ngan aheʹ iaʹ ke mudoʹ man ngadan Umaʹ Palan Allah, seleket te ke mudoʹ man ngadan Allah iaʹ un kaʹ dalem me.

²²Ngan buk ca usa mudoʹ man ngadan langit, ina seleket te ke mudoʹ man ngadan adan pengaren Allah peging ngan ia iaʹ madung neng usun ne.

²³“Siʹau pe ikem diaʹ guru Katuk Adet ngan kelunan Perisi. Ikem diaʹ kelunan ngaloʹ. Ikem naʹ ca tulat puloʹ penalan ncem me Allah koʹ baʹan bekai, kujau, ngan lesayat. Un sepuʹo abeʹ kem pesingo Katuk Adet iaʹ teneng ngan bioʹ, koʹ baʹan puyan iaʹ teneng, ngan puyan pengelesau, ngan puyan iaʹ telit. Ini ne puyan iaʹ tekep ikem ke uyan, ngan ayen ncem lingo diaʹ ca dina.

²⁴Ikem diaʹ ajak kelunan petem kem butaʹ. Kun ncem nyibo langau cen dalem tisep kem, un sepuʹo ikem nyeloʹ pun untaʹ.

²⁵“Siʹau pe ikem diaʹ guru Katuk Adet ngan kelunan Perisi. Ikem diaʹ kelunan ngaloʹ. Kun ncem muheʹ tahaʹ awang sawan ncem ngan kiut cem, un sepuʹo dalem me sangan kuʹun inu iaʹ ikem alaʹ man puyan ti jaʹat ngan tutun seʹ.

²⁶E kelunan Perisi iaʹ butaʹ. Tiga hem muheʹ dalem sawan ina ading, ina le tahaʹ awang ke buheʹ.

²⁷“Siʹau pe ikem diaʹ guru Katuk Adet ngan kelunan Perisi. Ikem diaʹ kelunan ngaloʹ. Ikem ne iaʹ ukoʹ baʹan puyan ca liang iaʹ un kadeng puteʹ are, ngan tiga seʹ e cen awang. Un sepuʹo kaʹ dalem me sangan kuʹun tulang kelunan matai, ngan kuʹun inu diaʹ madam.

²⁸Pekina lete teneng seʹ puyan ncem ne dulu taʹan cen awang, un sepuʹo kaʹ dalem ikem sangan kuʹun puyan ngaloʹ ngan penyalaʹ.”

²⁹“Siʹau pe ikem diaʹ guru Katuk Adet ngan kelunan Perisi. Ikem diaʹ kelunan ngaloʹ. Kun ncem uyan lungun iaʹ tiga le me diaʹ pegawa, ngan pegelam liang nte, tedanaʹ kelunan diaʹ teneng udip cen naʹaʹ.

³⁰Ngan un dau hem: ‘Buk meʹ ke mudip dalau udip tepun meʹ cen naʹaʹ, nyahut meʹ ke uyan inu iaʹ ida ban uyan ne, koʹ baʹan lematai diaʹ pegawa.’

³¹Moʹ pekina dau hem ngahaʹ ikem diaʹ mela kelunan diaʹ lematai pegawa cen naʹaʹ.

³²Moʹ ina, mejo ne ngan pelepa ne puyan iaʹ ban tepun ncem nading are.

³³E ikem diaʹ mela ncung ulai, ayen ncem nebelum ke nakau usa hem cen ukum luten.

³⁴Tuman ina akeʹ badaʹ mikem, akeʹ ke cuk kudaʹ usa pegawa nai palaʹ ikem ngan pekina pe kelunan tudi, ngan kudaʹ usa guru. Un sepuʹo ikem ke lematai palai mida, ngan palai ikem ke napek kaʹ kayu tecek, ngan palai laʹa ikem ke lemeta dalem amin sebayang, mentung ngkem ke pekarap ida cen ca lepoʹ, tai kaʹ ca lepoʹ.

³⁵Ketai ke kuʹo ho, ukum ban tuman lematai kelunan diaʹ teneng pengudip cen naʹaʹ iaʹ ke pebaʹ le neng ikem, iaʹ ina cen patai Habil iaʹ teneng pengudip, pabeʹ patai Sakaria anak Berikia, iaʹ ikem ban lematai neng ahang ukoʹ iaʹ buheʹ ngan padung pengencai are.

³⁶Atek lan dau heʹ mikem, mung ukum neng puyan ini ke pebaʹ neng usun mela kelunan ngajan ini.”

³⁷“E Yerusalim, Yerusalim, ikoʹ iaʹ ban lematai diaʹ pegawa, ngan lemulo batu neng diaʹ lawa Allah diaʹ ia cuk nai palaʹ ikem are. Kudaʹ liwai ne akeʹ ubaʹ ke nyekapu mung anak lepoʹ koʹ, koʹ baʹan ca tuʹa iap iaʹ ke ngelidung anak ke neng ntaʹ kapit te are, un sepuʹo abeʹ kem dayo.

³⁸Naʹkini ketoʹ amin ncem ketai lenga.

³⁹Akeʹ badaʹ mikem, lepa ini abeʹ kem ke taʹan akeʹ laʹa pa hem ke kuma ha: ‘Allah iaʹ naʹ peniga me ia iaʹ nai dalem ngadan Tuhan.’ ”