Read Wahau Kenyah MATIUS 24 Bible Online

MATIUS 24 - Wahau Kenyah bible

MATIUS 24

¹Nai Yesus kawang cen Umaʹ Palan Allah. Sulo kenai diaʹ bayaʹ katuk ke palaʹ ia, ngan badaʹ seʹ puyan Umaʹ Palan ina.

²Un dau Yesus: “Lan lete. Naʹat ne ketoʹ seʹ e. Akeʹ badaʹ mikem, abeʹ un ca batu ue ke tekudek neng diaʹ ca iaʹ un neng ini ʹo. Di lareʹ mung nte ke tai pasi.”

³Dalau Yesus madung neng usun Mudung Ampang, sulo kenai diaʹ bayaʹ katuk ke tengen le palaʹ ia, ngan un dau re: “Badaʹ ne mameʹ ading, midan mung puyan ini ketai nuyan ʹo? Ngan inu tedanaʹ iaʹ ke badaʹ kena kenai hoʹ, ngan pekina pe kena ketai kuʹo udip ini ʹo?”

⁴Un dau Yesus mipa ida: “Jagaʹ ne tiga tiga. Ayen ncem dayo aheʹ aheʹ ke pelingu ikem.

⁵Moʹ kadoʹ kelunan diaʹ ke nai man ngadan nceʹ, ngan un dau re: ‘Akeʹ ini Keristus.’ Kadoʹ kelunan iaʹ ida ke pelingu.

⁶Ikem ke kenahan dau denga pepatai nyeng kata ikem, pekina pe denga diaʹ coʹ. Di lareʹ nawai ne dau heʹ, ayen ncem iʹut tawai. Ban ne ketoʹ puyan ini atek ke ketai nuyan lete, un sepuʹo abeʹ e ina iaʹ un badaʹ ketai pengelepa udip.

⁷Ca lepoʹ ke pepatai ngan ca lepoʹ, ngan pekina pe pengaren ke pepatai neng ida peselepeʹ. Ngan kempi kempi pe dulu ke lien, ngan laʹa tanaʹ ke liung.

⁸Ketoʹ puyan ini koʹ baʹan tading tekaʹ ca leto sakit nganak are.

⁹“Uʹo ina dulu ke dakep ikem, ngan petuyen ikem, ngan lematai ikem. Ketoʹ kelunan ke miʹa neng ikem uban tuman akeʹ.

¹⁰Dalau ina, kadoʹ kelunan diaʹ tai lemaʹ pengelan. Sulo ca usa ngaken ca usa, ngan pekina pe ca usa ke miʹi neng ca.

¹¹Ngan kadoʹ pegawa palo kenai luhaʹ ngan pelingu kelunan kadoʹ.

¹²Puyan iaʹ jaʹat kenai kadoʹ kuʹo, ina ukoʹ pengelesau kelunan kadoʹ ketai sengim.

¹³Un sepuʹo aheʹ iaʹ mihen pa tai kuʹo ho, ia lete iaʹ atek ke tisen puyan iaʹ ke pudip ia dalem Tuhan.

¹⁴Ngan Denga Injil neng puyan pengaren Allah ke ngaren ilu kelunan, atek ke tai denga pa tipo usun tanaʹ ini, apan mung kelunan ke tisen tugen neng idi. Uʹo ina le kenai pengelepa ha.”

¹⁵“Ikem ke taʹan ‘Puyan iaʹ Pelapa Jaʹat,’ baʹan dau pegawa Daniel, kenai ie beteʹ kukoʹ buheʹ. (Ikem diaʹ pecap surat ini, ayen tepa pekimet sen isiu ini.)

¹⁶Dalau ina, kelunan diaʹ un kaʹ tanaʹ Yudia, tiga re kelap kaʹ mudung.

¹⁷Aheʹ iaʹ un neng usun tekawan, ayen salau tai alaʹ inu cen amin.

¹⁸Aheʹ iaʹ un kaʹ uma ha, ayen tai uleʹ kaʹ amin ke alaʹ keluma ha.

¹⁹Dalau ina, siʹau pe leto iaʹ lemaleʹ, pekina pe leto diaʹ iteʹ anak.

²⁰Lemameʹ nyat neng Tuhan Allah apan ncem abeʹ un tai kelap jakaʹ awang sengim, buk are jakaʹ Tau Kelineʹ pe.

²¹Moʹ dalau ina ke un udip paleʹ iaʹ baran laleʹ, lapa neng ʹo puyan udip paleʹ cen naʹaʹ are, iaʹ ina cen tading udip kusun tanaʹ ini pabeʹ tau ini pe. Bayaʹ laʹa abeʹ un iaʹ kuaʹ ina.

²²Un sepuʹo Tuhan Allah iaʹ ngimet ke ngebuʹet tebuku dalau ina. Buk abeʹ un pekina, atek ca usa kelunan pe abeʹ nyatan ke mudip uʹo. Moʹ tuman kelunan diaʹ anun ne, Tuhan Allah ke ngebuʹet tebuku dalau ina.

²³“Dalau ina, buk kelunan ke badaʹ mikem, kuma ha: ‘Naʹat kini, ini ne Keristus,’ buk ke are pekini dau: ‘Naʹat kina, ina ne Keristus,’ ayen ncem ngelan ne.

²⁴Moʹ kudaʹ kudaʹ Keristus palo, ngan pegawa palo diaʹ kenai luhaʹ ʹo. Ida ke uyan tedanaʹ bulen bioʹ ngan puyan iaʹ ke pesalam dulu tuman ke pelingu kelunan diaʹ Tuhan Allah lepa lemileʹ dini. Seʹ de ten pekina mele re sukat pelingu ida ʹo.

²⁵Nawai tiga le. Seʹ keʹ nekena badaʹ mikem ne ini.

²⁶“Laʹa masaʹ ca naʹan dau dulu ke pisiu neng ikem: ‘Naʹat kaʹ tanaʹ lenga. Un te ia kina.’ Ayen ncem puke bayaʹ dau ina. Mele kun nte pe: ‘Naʹat ukoʹ o pekelem kini.’ Ayen ngelan dau ina.

²⁷Moʹ puyan ke nai Anak Sio ini ʹo, koʹ baʹan ca bekilet nai bekiluk pa tipo langit cen sek tau ke ngedema pabeʹ lenca tau.

²⁸“Kempi un patai, kina sui pelaki ngaba seʹ.”

²⁹Abeʹ un majan uʹo lepa taru ina, mata tau ketai lirem, ngan pekina pe bulan abeʹ un serema ha laʹa. Ngan betuʹen kenai laboʹ cen langit, pekina pe mung penyukat iaʹ un kaʹ langit kenai pasi cen ukoʹ de.

³⁰Lepa ina ne tedanaʹ Anak Sio ina kenai luhaʹ kaʹ langit. Ngan dalau ina pe mung puhoʹ kelunan kusun tanaʹ ini ke nange, ngan ida ke taʹan kenai Anak Sio ini kusun abun cen langit, peging ngan nyingan ne, ngan serema peniga ha iaʹ bioʹ.

³¹Tekepip ke nuyau nan tuyau iaʹ bioʹ dau, sulo ho cuk melikat te tai kaʹ singket tikung tanaʹ, ngan kelimpun mung kelunan diaʹ ia lemileʹ cen sada tanaʹ, pa libut usun tanaʹ.”

³²“Inan buaʹ abung ini nuyan ca kata katuk me ikem. Buk luhaʹ ne sapuk ke ngan tung nge diaʹ tumpak, tisen ne ikem ban nyeng le laʹa kenai tagaʹ.

³³Pekina lete buk kem taʹan mung puyan ini, ikem ne tisen ban tau ina lepa nyeng, ngan ina ne tading nge.

³⁴Nawai tiga le neng ini. Kelunan diaʹ mudip ngajan ini, abeʹ de ketai salai kena mung puyan ini ke nuyan.

³⁵Langit ngan tanaʹ ketai salai, un sepuʹo tiraʹ keʹ nyahut te abeʹ un ketai salai ne.”

³⁶“Naʹ pe pekina, nyahut ca usa kelunan pe abeʹ un tisen midan tau ngan jam me, naʹ pe melikat diaʹ kaʹ sruga, naʹ pe Anak Sio ini, pit bang Amai Bioʹ le iaʹ tisen kidi.

³⁷Koʹ baʹan iaʹ nuyan dalau udip Nuh cen naʹaʹ, pekina lete puyan ke nai Anak Sio ini ʹo.

³⁸Koʹ baʹan tau kena layap usun tanaʹ, kelunan uman ngan nisep, laki ngan leto ke pepeto pabeʹ tegoʹ tau Nuh tai kaʹ dalem alut bioʹ.

³⁹Abeʹ de tisen inu iaʹ ke nuyan pa kenai sungai layap ina pelempam ngan nyalai ida. Pekina ne puyan dulu tegoʹ Anak Sio ke nai ʹo.

⁴⁰Dalau ina un dua usa re pegayeng kaʹ uma, ca usa ia ke alaʹ, ngan ca usa ia ke mahung.

⁴¹Un pe dua re leto mecaʹ, ca usa ia ke alaʹ, ngan ca usa ia ke mahung.

⁴²Tuman ina, tiga hem lemuto jagaʹ, ban ne abeʹ kem tisen midan tau kenai Tuhan ncem ina.

⁴³Nawai tiga le neng ini. Buk laki bioʹ tisen midan laki bekelau kenai ngelau, abeʹ e ketai luntoʹ, ngan abeʹ e pele laki bekelau ina kenai kaʹ dalem amin ne.

⁴⁴Tuman ina, atek kem lemuto petenup, ban ne Anak Sio ina ke nai tegoʹ tau iaʹ ikem abeʹ un ke ngihoʹ.”

⁴⁵“Tuman ina, aheʹ ne ulaʹ iaʹ tudep ngan tudi ban tupe? Ia lete iaʹ laki bioʹ amin ina ke cuk pubo mung ulaʹ a diaʹ ca, ngan lemakan ida singket singket tau.

⁴⁶Bangen ne tekaʹ ulaʹ ina tegoʹ laki bioʹ ina kenai uleʹ ngan taʹan ia uyan mung puyan idai are.

⁴⁷Atek lan dau heʹ miken, laki bioʹ ina ke ngelan neng ulaʹ ina ke petubo mung amin ne.

⁴⁸Un sepuʹo buk ulaʹ ina ca kelunan jaʹat, ia ke pekimet neng ata ha tengen: ‘Atek majan lepe laki bioʹ abeʹ un kenai ngeliwet baʹan nceʹ.’

⁴⁹Cen ina ne tading nge nyakit ulaʹ diaʹ ca, sulo tai ie uman ngan nisep ngan kelunan mabuk.

⁵⁰Neng ca tau ue, tegoʹ ulaʹ ina abeʹ un ke ngihoʹ ngan abeʹ un tisen, sulo kenai laki bioʹ ina are uleʹ.

⁵¹Sulo laki bioʹ ina ke nyakit ulaʹ ina are, ngan petadan ia ngetisen tekaʹ ukum kelunan ngaloʹ. Kina ne ia ke nange ngan dau taret jipen ne.”