Read Wahau Kenyah MATIUS 25 Bible Online

MATIUS 25 - Wahau Kenyah bible

MATIUS 25

¹“Neng Tau Bioʹ ʹo, puyan pengaren Allah ilu pekata koʹ baʹan pekini. Nai puloʹ usa re dekiʹit leto kawang ngan ngkin titiu, moʹ de ubaʹ ke nyelalang laki iaʹ ke pepeto.

²Un lema usa re neng ahang ida diaʹ apaʹ, ngan lema usa laʹa diaʹ tudi pekimet.

³Lema usa diaʹ apaʹ dina are, ngkin titiu re, un sepuʹo abeʹ de petenup ngkin suheʹ telang nge.

⁴Un sepe lema usa diaʹ tudi pekimet dina, ngkin titiu re peging ngan suheʹ telang nge iaʹ kadoʹ.

⁵Moʹ laki iaʹ ke pepeto ina are duʹai nai, tai ngerungun ne ida mung, penco re luntoʹ.

⁶“Dalau beluaʹ alem, bekaʹ un ne dau kenai lengap kuma ha: ‘Ini ne kenai laki iaʹ ke pepeto. Baka. Nai ne nyelama ia.’

⁷Sulo kenai dekiʹit leto dina mung taga ngan pejiget titiu re.

⁸Un dau dekiʹit leto diaʹ apaʹ dina neng diaʹ tudi pekimet dina: ‘Naʹ ne kediʹut de telang ngkem mameʹ ading, moʹ titiu meʹ ketai pataʹ.’

⁹Un dau diaʹ tudi pekimet dina: ‘Masaʹ telang meʹ are un sukat ilu ke petulat. Tiga hem tai kaʹ kedai ngan meli mikem tengen.’

¹⁰Sulo ketai leto diaʹ apaʹ dina are lemeli telang mida. Dalau ketai re, abeʹ ne laki iaʹ ke pepeto ina are, ngan lema usa diaʹ petenup didai tai kaʹ dalem pemung ngan laki iaʹ ke pepeto ina, kaʹ amin kukoʹ dulu pemung uman, ngan penco pamen tai pekep.

¹¹“Lepa ina le kenai lema usa dekiʹit diaʹ apaʹ didai abeʹ. Un dau re ngelengap: ‘Mesik pamen mameʹ ading.’

¹²Kun laki iaʹ pepeto ina mipa ida, un dau ue: ‘Abeʹ keʹ tisen ikem.’ ”

¹³Tai kuʹo kata katuk ina, un dau Yesus: “Tuman ina, tiga hem lemuto jagaʹ, ban ne abeʹ kem tisen midan tau ue ngan jam me ke nai ʹo.”

¹⁴“Puyan pengaren Allah un ukoʹ baʹan ca kelunan iaʹ ubaʹ ke tai peselai kaʹ tanaʹ diaʹ ca. Kun ne mengin diaʹ ulaʹ a, ngan cuk ida nubo amin ne.

¹⁵Kun ne naʹ ligit mida bayaʹ ban pengencam singket singket usa re. Palaʹ ca usa ia naʹ lema ibu ligit. Palaʹ ca usa laʹa ia naʹ dua ibu ligit. Ngan palaʹ ca usa laʹa ia naʹ ca ibu ligit. Lepa ina sulo ketai ie mecin.

¹⁶Ulaʹ iaʹ alaʹ lema ibu ligit idai are jelarai ketai ie kanan ligit ina are, pa ha alaʹ pit te lema ibu ligit laʹa.

¹⁷Pekina pe ulaʹ iaʹ alaʹ dua ibu ligit idai alaʹ pit anun ne dua ibu ligit laʹa.

¹⁸Un sepe ulaʹ iaʹ alaʹ ca ibu ligit idai, tai ie mekat tanaʹ ngan nyuhuk ligit laki bioʹ ina are.

¹⁹“Majan ʹo ina, sulo kenai laki bioʹ ina uleʹ ngan pecap ligit te ngan nte.

²⁰Nai kun ulaʹ iaʹ alaʹ lema ibu ligit idai palaʹ ia, ngan naʹ lema ibu ligit pit te laʹa, iaʹ ban penalan ne. Un dau ue: ‘Amai, lepa hoʹ naʹ lema ibu ligit makeʹ. Naʹat ne, ban bang nge lema ibu ligit laʹa.’

²¹Un dau laki bioʹ ina: ‘Tiga ne buk pekina. Ikoʹ ca ulaʹ iaʹ tiga ngan tudep. Moʹ koʹ tudep ban neng puyan iaʹ iʹut, pekina lete akeʹ ke ngelan ikoʹ neng puyan iaʹ bioʹ. Nai ne ngetisen tekaʹ bangen dalem gayeng ngkeʹ.’

²²“Lepa ina, nai kun ulaʹ iaʹ alaʹ dua ibu ligit idai palaʹ ia, ngan un dau ue: ‘Amai, lepa hoʹ naʹ dua ibu ligit makeʹ. Naʹat ne, ban bang nge dua ibu ligit laʹa.’

²³Un dau laki bioʹ ina: ‘Tiga ne buk pekina. Ikoʹ ca ulaʹ iaʹ tiga ngan tudep. Moʹ koʹ tudep ban neng puyan iaʹ iʹut, pekina lete akeʹ ke ngelan ikoʹ neng puyan iaʹ bioʹ. Nai ne ngetisen tekaʹ banget dalem gayeng ngke.’

²⁴“Lepa ina laʹa, sulo kenai ulaʹ iaʹ alaʹ ca ibu ligit idai palaʹ ia, ngan un dau ue: ‘Ahaʹ amai, akeʹ tisen ikoʹ ca kelunan iaʹ mahing kimet, tai majau kukoʹ koʹ abeʹ un nugan, ngan tai pempun buaʹ kukoʹ koʹ abeʹ un mula.

²⁵Moʹ keʹ takut, ina tuman nceʹ tai nyuhuk ligit coʹ kaʹ dalem tanaʹ. Naʹat ne, ini ban anun ncoʹ lete.’

²⁶Un dau laki bioʹ ina neng ia: ‘E ulaʹ iaʹ jaʹat ngan leko tisen te ikoʹ akeʹ majau kukoʹ keʹ are un nugan, ngan tai pempun buaʹ kukoʹ keʹ abeʹ un mula.

²⁷Buk pekina, atek tekep koʹ naʹ ligit ini me kelunan diaʹ pasat ligit, apan midan nceʹ nai uleʹ, senteng keʹ alaʹ ligit ceʹ ngeliwet peging ngan pit te laʹa.

²⁸Alaʹ ne ligit ina cen ia, ngan naʹ a me ulaʹ iaʹ un puloʹ ibu ina.

²⁹Ban ne palaʹ kelunan diaʹ un, dulu ke naʹ lapa kadoʹ laʹa, ngan ia ke un lapa neng ʹo kadoʹ. Un sepuʹo aheʹ kelunan iaʹ abeʹ un inu, kenuen pe kediʹut de, inu iaʹ un neng ia, atek ke pesau cen ia.

³⁰Ngan ulaʹ iaʹ abeʹ un tuman ini, pet ne ia kaʹ dalem ntem kawang. Kina ha ke nange ngan dau taret jipen ne.’ ”

³¹“Tegoʹ Anak Sio ke nai koʹ baʹan ca paren bioʹ peging ngan mung melikat te, ia ke madung neng usun adan pengaren ne.

³²Ngan ia ke pempun mung kelunan kusun tanaʹ ini kaʹ juma ia. Uʹo ina ha ke petengen ida neng dua naʹan mpun, ukoʹ baʹan ca laki iaʹ manan pakan ke petengen dumba neng ahang kading.

³³Ngan ia ke pempun dumba dina tahaʹ taʹu ia, ngan kading dina tahaʹ kabing ia.

³⁴Lepa ina sulo dau laki paren ina ke pisiu ida diaʹ tahaʹ taʹu ia, kuma ha: ‘Ahaʹ ikem diaʹ ban un peniga kuʹun amai heʹ, nai ne, ngan alaʹ kebangen dalem peniga pengaren ne iaʹ ia lepa ban petenup mikem cen penading usun tanaʹ ini are.

³⁵Moʹ tegoʹ keʹ laʹu are, ikem naʹ penguman makeʹ, ngan tegoʹ keʹ muhang are, ikem naʹ tisep makeʹ. Akeʹ ban ca sakai, kun ncem nyelama ngkin akeʹ kaʹ amin ncem.

³⁶Tegoʹ ke ugai are, ikem iaʹ ban naʹ gelam makeʹ. Tegoʹ keʹ sakit are, nai kun ncem petubo akeʹ. Ngan pekina pe tegoʹ keʹ neng amin sepin, nai kun ncem naʹat akeʹ.’

³⁷“Sulo dau re diaʹ uyan pemuyan iaʹ teneng ke mipa ia, kuma ha: ‘Ahaʹ Tuhan, midan meʹ taʹan ikoʹ laʹu, ameʹ naʹ penguman mikoʹ, ngan buk koʹ muhang ameʹ naʹ tisep mikoʹ?

³⁸Ngan midan meʹ taʹan ikoʹ nai koʹ baʹan ca sakai, ameʹ nyelama ngkin ikoʹ kaʹ amin meʹ, ngan buk koʹ ugai, sulo meʹ naʹ pe gelam mikoʹ?

³⁹Midan meʹ taʹan ikoʹ sakit, ameʹ nai petubo ikoʹ, ngan buk koʹ dalem amin sepin, ameʹ nai naʹat ikoʹ?’

⁴⁰Un dau paren bioʹ ina ke mipa ida: ‘Atek lan dau heʹ mikem, dalau hem uyan puyan ini neng ca diaʹ cen anak keʹ diaʹ jaʹat dini, seleket cem uyan ne neng akeʹ lete ina.’

⁴¹“Lepa ina sulo dau paren bioʹ ina ke pisiu ida diaʹ tahaʹ kabing iaʹ, un dau ue: ‘E ikem diaʹ sihoʹ pudoʹ Allah, tai ne ikem kelap. Tai ne ikem kaʹ dalem ukum luten iaʹ abeʹ un tisen ketai pataʹ ina, iaʹ lepa tenup me Bali Sitan ngan ketoʹ bali diaʹ bayaʹ ia.

⁴²Ban ne tegoʹ keʹ laʹu, abeʹ kem naʹ penguman makeʹ, ngan tegoʹ keʹ muhang, abeʹ kem naʹ sungai makeʹ.

⁴³Akeʹ ca sakai, abeʹ kem nyelama ngkin akeʹ kaʹ amin ncem. Ngan tegoʹ keʹ ugai, abeʹ kem naʹ gelam makeʹ. Ngan tegoʹ keʹ kaʹ dalem amin sepin, ngan sakit, abeʹ kem ubaʹ nai nubo akeʹ.’

⁴⁴“Ida ke pisiu ia, kun dau re: ‘Ahaʹ Tuhan, midan meʹ taʹan Tuhan laʹu, ngan muhang, ngan koʹ baʹan ca sakai, ngan ugai, ngan sakit, ngan kaʹ dalem amin sepin sulo meʹ abeʹ un ubaʹ nai mepo ikoʹ?’

⁴⁵Sulo paren bioʹ ina ke mipa ida, un dau ue: ‘Atek lan dau heʹ mikem, midan ncem abeʹ un ubaʹ ke mepo ca usa neng ahang diaʹ jaʹat dini, seleket cem abeʹ un ubaʹ ke mepo akeʹ lete ina.’

⁴⁶“Pekini ne kelunan dini ke sihoʹ ukum tuyen iaʹ abeʹ un tai kuʹo ina. Un sepuʹo kelunan diaʹ uyan pemuyan iaʹ teneng, atek de ke tisen udip saheʹ kelineʹ iaʹ ngeriman.”