Read Wahau Kenyah MATIUS 4 Bible Online

MATIUS 4 - Wahau Kenyah bible

MATIUS 4

¹Lepa ina, Berua Buheʹ penco ngkin Yesus kaʹ tanaʹ lenga apan Bali ke ten ia.

²Pat puloʹ tau ngan pat puloʹ alem Yesus abeʹ un uman. Uʹo ina, laʹu ne tekaʹ a.

³Un dau kenai Bali neng ia: “Buk koʹ Anak Tuhan Allah, tiga hoʹ cuk batu dini ngaliu kanen.”

⁴Un dau ipa Yesus neng Bali ina: “Un ca jo isiu dalem Kitap iaʹ kuma ha: ‘Abeʹ e kuʹun penguman tuaʹ le kelunan senteng ke mudip, un sepuʹo kuʹun singket luʹung tiraʹ iaʹ Tuhan Allah pisiu milu.’ ”

⁵Uʹo ina tai Bali ngkin Yesus kaʹ Yerusalim, naʹ ia kukoʹ iaʹ mpau kaʹ belubung Umaʹ Palan Allah.

⁶Kun dau Bali mia: “Buk lan ncoʹ Anak Tuhan Allah, nai ne ikoʹ petuhun kentaʹ, moʹ un dau isiu dalem Kitap iaʹ kuma ha: ‘Un Tuhan Allah ke cuk melikat te ke jagaʹ ikoʹ, ngan ke nahek ikoʹ man ujoʹ de, apan taket coʹ abeʹ un ke pegoʹ neng batu.”

⁷Un dau Yesus mipa ia: “Un pe laʹa dau isiu dalem Kitap iaʹ kuma ha: ‘Ayen ncoʹ ten Allah, Tuhan ncoʹ.’ ”

⁸Lepa ina tai Bali ngkin Yesus neng usun ca mudung iaʹ atek mpau. Kina ha badaʹ mia mung seʹ puyan pengaren usun tanaʹ ini, ngan seʹ pengebioʹ de.

⁹Sulo dau Bali neng Yesus: “Mung dini akeʹ ke naʹ mikoʹ buk koʹ sutlep ngan lemameʹ palaʹ akeʹ.”

¹⁰Dau Yesus mipa ia: “E Sitan, tai nikoʹ kelap. Un dau isiu dalem Kitap: ‘Tekep koʹ lemameʹ palaʹ Allah iaʹ Tuhan ncoʹ. Bang tunuk ne palaʹ ia tengen le.’ ”

¹¹Uʹo ina ne Bali tai mecin Yesus, sulo nai kudaʹ kadoʹ melikat mepo ia.

¹²Tegoʹ Yesus kenahan dau denga dulu nyepin Yaya, penco ketai ie kaʹ tanaʹ Galilia.

¹³Abeʹ e majan ngelineʹ kaʹ lepoʹ Nasarit, un sepuʹo penco tai ie ngelineʹ kaʹ lepoʹ Kapernaum, ca lepoʹ bioʹ kaʹ sada bahi leteng Galilia dalem dale Sebulun ngan Naptali.

¹⁴Puyan ini tai nuyan apan isiu pegawa Yesaya cen naʹaʹ ketai palup, iaʹ pekini dau:

¹⁵“Ahaʹ tanaʹ Sebulun ngan tanaʹ Naptali, iaʹ jo sileʹ tahaʹ leteng bioʹ, ngan tahaʹ dipa sungai Yardin, tanaʹ Galilia, dulu diaʹ ca iaʹ nganun ne.

¹⁶Kelunan diaʹ mudip dalau ntem ke taʹan ca serema iaʹ bioʹ. Neng usunida diaʹ mudip dalau ntem neng tanaʹ jaka, serema inaʹ iaʹ ke ngedema ida.”

¹⁷Cen dalau ina Yesus nading ke penco badaʹ katuk ke, pekini dau ue: “Nyepuleʹ ne kimet cem cen penyalaʹ kem, ban abeʹ majan laʹa kenai luhaʹ ne puyan pengaren Tuhan Allah ke ngaren ilu kelunan.”

¹⁸Tegoʹ tai Yesus masat kaʹ sada bahi leteng Galilia, kun ne taʹan dua re padeʹ diaʹ pegayeng mita atuk. Simun iaʹ dulu pisiu Peterus, ngan Anderias iaʹ sadin ne. Dalau re nejalaʹ,

¹⁹un dau Yesus neng ida dua: “Nai ne ikem dua tugung akeʹ. Akeʹ ke pekatuk ikem kumpin puyan ke nejalaʹ kelunan.”

²⁰Sulo re dua padeʹ mahung tejalaʹ re dua, penco tai bayaʹ Yesus.

²¹Tai Yesus penco asat te laʹa, kun ne taʹan dua re padeʹ pelaʹa, ngadan nte dua Yakup ngan Yaya anak Sapdi, kaʹ dalem alut lepe ida dua peging ngan amai re dua, dalau seʹ re petenup tejalaʹ de. Sulo Yesus mengin ida.

²²Dalau ina lete ida dua mecin alut de ngan amai re dua, penco tai bayaʹ Yesus.

²³Yesus tai masat pa tipo tanaʹ Galilia, mentung nge pekatuk dalem singket amin sebayang. Kun Yesus badaʹ denga tiga neng puyan pengaren Tuhan Allah ke ngaren ilu kelunan. Sulo Yesus paget dulu neng ketoʹ naʹan penyakit.

²⁴Purat ne denga Yesus pa libut tanaʹ Siria, pabeʹ kenai dulu ngkin kadoʹ kelunan diaʹ sihoʹ kadoʹ naʹan penyakit palaʹ ia. Un palai diaʹ keta ngan tuyen. Un palai diaʹ bali nelasek. Un palai sepen. Un palai diaʹ sakit uhat. Sulo Yesus paget ida mung.

²⁵Kadoʹ dulu nai bayaʹ ia cen tanaʹ Galilia ngan cen dale puloʹ lepoʹ, cen Yerusalim, cen Yudia, ngan cen tanaʹ tahaʹ dipa sungai Yardin.