Read Wahau Kenyah MATIUS 7 Bible Online

MATIUS 7 - Wahau Kenyah bible

MATIUS 7

¹“Ayen ncem pebetep dau salaʹ neng dulu, idi Tuhan Allah abeʹ un ke pebetep dau salaʹ neng ikem.

²Ban ne Allah ke pebetep dau salaʹ kem koʹ baʹan ncem pebetep dau salaʹ dulu diaʹ ca are. Ngan tukaʹ iaʹ ikem ke man pebetep dau salaʹ dulu, man ina lete Allah ke pebetep dau salaʹ kem.

³Moʹ inu hoʹ nugen pelem kaʹ mata cenganak koʹ, un sepuʹo abeʹ koʹ pesingo ca batang kayu iaʹ un neng mata hoʹ tengen?

⁴Adeʹ koʹ makang kuma dau neng cenganak koʹ: ‘Talan ne akeʹ sau pelem iaʹ un neng mata hoʹ ina,’ petem me un ca batang kayu neng mata hoʹ tengen?

⁵E kelunan ngaloʹ, sau ne batang kayu cen mata hoʹ ading, ina le ikoʹ ke taʹan dema, ngan senteng ke sau pelem iaʹ un neng mata cenganak koʹ ina.

⁶“Ayen ncem naʹ inu iaʹ buheʹ me asu, ban ne ida ke pupa penco lemerit ikem. Ngan pekina pe, ayen ncem naʹ inoʹ puʹun ncem me buʹin, ban ne ida ke cut te bareng le.”

⁷“Nyat ne, ina le ikem ke alaʹ a. Mita ne, ina le ikem ke un ne. Megoʹ ne pamen, ina le pamen kenai pesik mikem.

⁸Ban ne aheʹ iaʹ ke nyat, ia lete iaʹ ke alaʹ a. Ngan aheʹ iaʹ mita, ia lete iaʹ ke un ne. Ngan aheʹ iaʹ ke megoʹ pamen, me ia lete pamen ke pesik.

⁹Amai iaʹ mpi iaʹ ke naʹ batu me anak ke buk anak ke ke nyat kanen?

¹⁰Buk anak ke ke nyat atuk, kun amai ie ke naʹ ncung ulai me ia?

¹¹Naʹ pe kumpin jaʹat cem, ina hem tisen ke naʹ inu iaʹ tiga me anak kem lete. Nco ne pelaʹa Amai hem iaʹ kaʹ surga ke naʹ inu iaʹ tiga me ikem buk kem nyat neng ia.

¹²“Puyan iaʹ ikem ubaʹ dulu ke uyan neng ikem, tekep lete ikem ke uyan puyan ina neng dulu. Ini ne atek sen Katuk Adet Musa, ngan sen katuk diaʹ pegawa cen naʹaʹ.”

¹³“Tai ne ikem kaʹ dalem cen pamen iaʹ singen, uban nawa pamen ngan bioʹ janan iaʹ tai ngkin kelunan palaʹ ukum luten. Ngan kadoʹ kelunan diaʹ tai bayaʹ janan ina.

¹⁴Un sepuʹo singen pamen iaʹ tai ngkin kelunan palaʹ udip, ngan mahan masat neng idi. Bang kediʹut le kelunan diaʹ dapit neng janan inaʹ.”

¹⁵“Jagaʹ ne ikem neng pegawa palo. Ban ne ida ke nai palaʹ ikem koʹ baʹan diseʹ puyan dumba are tahaʹ awang, un sepuʹo iaʹ tahaʹ dalem, ida ne atek lencau iaʹ minget.

¹⁶Kuʹun ban puyan pemuyan nte, ikem ke tisen ida. Ban ne abeʹ inan suhaʹ ke un buʹan buaʹ anggur, ngan kelukun suhaʹ abeʹ e ke un buʹan buaʹ abung.

¹⁷Pekina lete inan buaʹ iaʹ tiga ke un buʹan iaʹ tiga, ngan inan buaʹ iaʹ jaʹat ke un buʹan iaʹ jaʹat.

¹⁸Inan buaʹ iaʹ tiga, abeʹ e senteng ke un buʹan iaʹ jaʹat, ngan pekina pe inan buaʹ iaʹ jaʹat, abeʹ e senteng ke un buʹan iaʹ tiga.

¹⁹Tuman ina, inan buaʹ iaʹ abeʹ un ke un buʹan iaʹ tiga, dulu ke nepeng ngan nutung nge.

²⁰Pekina lete kuʹun ban puyan pemuyan nte, ikem ke tisen pegawa palo dina.”

²¹“Abeʹ e mung kelunan diaʹ pisiu akeʹ ‘Tuhan, Tuhan,’ iaʹ ke tisen puyan pengaren Allah ke ngaren ida, di lareʹ bang kelunan diaʹ uyan pengubaʹ Amai heʹ iaʹ kaʹ surga ina le diaʹ ketai kidi.

²²Tegoʹ Tau Bioʹ ʹo, kadoʹ kelunan diaʹ ke pisiu akeʹ: ‘Ahaʹ Tuhan, ahaʹ Tuhan, man ngadan ncoʹ ameʹ lepa badaʹ tiraʹ Allah, ngan man ngadan ncoʹ pe ameʹ lepa pekarap bali jaʹat, ngan uyan kadoʹ tedanaʹ nyingan.’

²³Un sepuʹo dau heʹ ke mipa ida: ‘Peletoʹ keʹ are un tisen ikem ne. E ikem diaʹ uyan jaʹat, kelap ne ikem cen akeʹ.’ ”

²⁴“Tuman ina, aheʹ kelunan iaʹ ngeringa dau tiraʹ keʹ ini, mentung nge bayaʹ a, ia pekuaʹ koʹ baʹan ca kelunan iaʹ mencam, iaʹ medeng amin ne neng usun batu.

²⁵Naʹ pe ujan kasa, ngan sungai layap, ngan bahiu kasa kenai nantaʹ amin ina, abeʹ e tai kasing, moʹ o pedeng neng usun batu.

²⁶“Ngan aheʹ iaʹ ngeringa dau tiraʹ keʹ ini, ngan abeʹ un bayaʹ dau ue, kelunan ina pekuaʹ koʹ baʹan ca kelunan iaʹ mabi, iaʹ uyan amin ne neng usun ahit.

²⁷Nai kun ujan kasa, ngan sungai layap, ngan bahiu kasa ke nantaʹ amin ina, sulo ketai amin ina are kasing. Ngan baran laleʹ le ketai kapeʹ amin ina.”

²⁸Lepa Yesus badaʹ mung puyan dina are, salam ne kelunan kadoʹ neng seʹ puyan ne pekatuk.

²⁹Ban ne ia pekatuk ngan seʹ puyan nyingan ne. Abeʹ e koʹ baʹan seʹ diaʹ guru adet lepoʹ de pekatuk are.