Read Wahau Kenyah MARKUS 10 Bible Online

MARKUS 10 - Wahau Kenyah bible

MARKUS 10

¹Tai kun Yesus puke, sulo tai ie masat kaʹ tanaʹ Yudia, kaʹ dipa sungai Yardin. Kadoʹ nai kelunan pempun kata ia laʹa, sulo ho pekatuk ida koʹ baʹan kelayan ne cen kena re.

²Sulo nai kudaʹ usa kelunan Perisi ubaʹ ke ngelabak isiu Yesus. Un dau re lemutu ia: “Kumpin puyan adet le tupe? Un ca laki senteng ke petat leto ho mo?”

³Un dau Yesus mipa ida: “Kumpin dau Musa cuk ikem tupe?”

⁴Un dau re laʹa: “Musa pedayo kelunan uyan surat petat puleʹ ngan leto ho.”

⁵Un dau Yesus neng ida laʹa: “Moʹ kimet cem mahing, ina ukoʹ Musa naʹ katuk ukum iaʹ pekina mikem.

⁶Iaʹ lan ne, tading Allah uyan kelunan, un dau isiu ue: ‘Allah uyan kelunan laki ngan leto.

⁷Tuman ina tekep lete laki tai mecin amai ngan ueʹ e, tai pemung ngan leto ho,

⁸ngan ida dua tai nuyan ca le usa.’ Pekina ne seʹ de, abeʹ de tai dua re laʹa, di lareʹ bang ca le usa.

⁹Tuman ina, ayen kelunan metat inu iaʹ Allah lepa pemung.”

¹⁰Dalau tai re telu diaʹ bayaʹ katuk Yesus uleʹ kedalem amin, sulo re lemutu ia neng puyan ina are.

¹¹Un dau Yesus neng ida: “Laki iaʹ patat ngan leto ho ngan pepeto ngan ca leto diaʹ ca laʹa, atek seʹ e ti puyan pemung nyelem iaʹ ngesa adet pepeto ngan leto ho ne ina.

¹²Pekina pe leto iaʹ petat ngan laki ie, ngan pepeto ngan laki iaʹ ca laʹa, atek seʹ e ti puyan pemung nyelem iaʹ ngesa adet pepeto ngan laki ie lete ina pe.”

¹³Nai dulu ngkin anak de palaʹ Yesus apan ne ke napoʹ ujoʹ o neng ida. Un sepuʹo ida diaʹ bayaʹ katuk Yesus mulen kelunan dina are.

¹⁴Dalau Yesus tisen seʹ puyan ina, sulo ho ngenca ida. Un dau ue neng ida: “Pawang ne anak dina nai palaʹ akeʹ. Ayen mulen ida, ban ne kelunan diaʹ koʹ baʹan anak dumit dini are, ida ne iaʹ atek marung neng puyan pengaren Allah ke ngaren ilu kelunan.

¹⁵Nawai tiga le neng ini aheʹ diaʹ abeʹ un ubaʹ ke alaʹ puyan pengaren Allah ke ngaren ida koʹ baʹan seʹ puyan anak dumit dini are, nyahut de senteng ketai kaʹ dalem pengaren ina ne.”

¹⁶Sulo Yesus alaʹ anak dina, nyekapu ida, ngan napoʹ ujoʹ o neng singket singket usa re, ngan naʹ peniga mida.

¹⁷Tai Yesus mecin cen ina moʹ o ubaʹ ketai masat laʹa. Dalau ina lete sulo kenai ca laki ngasa ngan sutlep dudo ia, penco ho lemutu ia, kun dau ue: “Ahaʹ guru iaʹ tiga, kudaʹ pe ikoʹ badaʹ makeʹ ading. Inu puyan iaʹ tekep akeʹ uyan apan nceʹ un udip saheʹ kelineʹ iaʹ ngeriman ʹo?”

¹⁸Kun Yesus lemutu ia: “Moʹ inu hoʹ pisiu akeʹ iaʹ tiga tupe? Kelunan aheʹ pe, abeʹ de un tiga. Bang Tuhan Allah tengen le iaʹ tiga.

¹⁹Ikoʹ lepa tisen katuk ukum: ‘Ayen lematai kelunan, ayen ti puyan pemung nyelem, ayen ngelau, ayen badaʹ palo, ayen panyi, iaʹa nyelama ne amai ngan ueʹ koʹ.’ ”

²⁰Un dau laki ina neng Yesus laʹa: “Ahaʹ guru, lepa ne akeʹ bayaʹ mung katuk ukum dina cen tading iʹut ceʹ te.”

²¹Yesus naʹat seʹ silung laki ina, ngan tekaʹ pengemalaʹ kimet te neng ia. Sulo dau ue neng ia: “Bang ca le puyan iaʹ tepa neng ikoʹ laʹa. Tiga ne ikoʹ tai uleʹ, ngan pebeli ketoʹ inu hoʹ, ngan naʹ ligit suaʹ a me kelunan kasip. Ina le ikoʹ ke kayaʹ kaʹ dalem surga ʹo. Uʹo ina hoʹ nai bayaʹ akeʹ.”

²²Lepa ha kenahan dau isiu ina, tai meba ne seʹ silung nge, sulo tai ie uleʹ ngan bahat tekaʹ kimet te, moʹ o kayaʹ laleʹ.

²³Kun Yesus naʹat ida diaʹ bayaʹ katuk ke diaʹ un pipa ia kina. Un dau ue neng ida: “Mahan laleʹ le kelunan diaʹ kayaʹ ketai kedalem puyan pengaren Allah ke ngaren ilu kelunan.”

²⁴Salam ne tekaʹ de diaʹ bayaʹ katuk ke dina kenahan dau isiu ina. Sulo dau Yesus neng ida laʹa: “Ahaʹ anak keʹ, atek mahan lete kelunan ketai kaʹ dalem puyan pengaren Allah ke ngaren ilu kelunan.

²⁵Masaʹ melai pe ca pun untaʹ ketai kaʹ dalem lubang lo, neng ʹo ca kelunan kayaʹ ketai kedalem puyan pengaren Allah ke ngaren ilu kelunan.”

²⁶Salam kuʹo ne tekaʹ de kuʹun isiu ina, sulo re lemutu ida selepeʹ: “Buk ke pekina, aheʹ le iaʹ senteng ke alaʹ udip dalem Tuhan ʹo?”

²⁷Kun Yesus naʹat ida. Un dau ue mipa ida: “Puyan ini abeʹ nyatan kelunan tengen le ke uyan ne, pit Tuhan Allah tuaʹ iaʹ senteng. Ban ne ketoʹ naʹan puyan inu, senteng te Tuhan Allah uyan ne.”

²⁸Lepa ina sulo Peterus pisiu, un dau ue: “Kumpin meʹ dini? Lepa ne ameʹ mahun ketoʹ inu meʹ, ngan penco nai bayaʹ ikoʹ.”

²⁹Un dau Yesus laʹa: “Ahaʹ lan te, ngan ca dau heʹ laʹa, aheʹ iaʹ mecin amin ne, pekina pe cenganak laki ie, pekina pe cenganak leto ho, pekina pe ueʹ e ngan amai ie, pekina pe anak ke, ngan uma ha ban tuman akeʹ ngan denga Injil,

³⁰atek kelunan ina ke alaʹ liwet lete bang nge iaʹ pelapa kadoʹ ceng kajan udip ini ʹo. Lan te, ia ke un mato kadoʹ amin, ngan cenganak laki, ngan cenganak leto, ngan ueʹ, ngan anak, ngan uma, ngan mepit pelaʹa puyan dulu ke nyakit ia. Laʹa dalau udip bayaʹ ʹo atek ke ke alaʹ udip saheʹ kelineʹ iaʹ ngeriman.

³¹Un sepuʹo naʹkini, kadoʹ kelunan diaʹ tahaʹ tena ketai tahaʹ bayaʹ, ngan diaʹ tahaʹ bayaʹ ketai tahaʹ tena.”

³²Tai re masat ngalang janan iaʹ tai kaʹ Yerusalim. Tai kun Yesus tahaʹ tena ida diaʹ bayaʹ katuk ke dina. Miat tekaʹ de. Pekina pe takut tekaʹ dulu diaʹ masat tahaʹ bayaʹ lan. Ca liwai laʹa kun Yesus nengen ida puloʹ dua usa didai, apan ne pisiu ida neng puyan iaʹ ke nuyan neng ia ʹo.

³³Un dau ue: “Pekimet tiga le neng isiu heʹ ini. Ini seʹ telu tai kusun kaʹ Yerusalim. Kina dulu ke naʹ Anak Sio ini palaʹ diaʹ detaʹu lataʹ ngan diaʹ guru Adet Yahudi. Ida ke mekem salaʹ mia pa re lematai ia, sulo re ke naʹ ia me dulu diaʹ ca.

³⁴Ngan kelunan dina ke panyi ia, ngan nyemulaʹ ia, ngan lemeta ia, ngan lematai ia. Uʹo ina, neng iaʹ ketelu tau ue, nai ie numpak mudip laʹa.”

³⁵Nai Yakup de dua Yaya anak Sapdi palaʹ Yesus, un dau re dua: “Ahaʹ guru, un ca puyan iaʹ ameʹ dua nyat ikoʹ ke uyan mameʹ dua.”

³⁶Kun Yesus lemutu ida dua: “Inu puyan iaʹ ikem dua nyat akeʹ ke uyan mikem dua tupe?”

³⁷Un dau re dua mipa ia: “Dalau puyan pengaren ncoʹ kenai luhaʹ ngan serema peniga ha, ngan ikoʹ ke madung neng adan pengaren ncoʹ, ameʹ dua nyat pemung ladung ngan ncoʹ, ca usa tahaʹ taʹu, ngan ca usa tahaʹ kabing.”

³⁸Un dau Yesus: “Abeʹ kem tisen inu iaʹ pengenyat cem. Senteng ngkem nisep sawan iaʹ akeʹ ke nisep ʹo tupe, seleket le ke ngihen keta? Ngan un ncem senteng alaʹ batis koʹ baʹan layan iaʹ ngebatis akeʹ tupe?”

³⁹Un dau re dua: “Ahaʹ, senteng.” Kun Yesus pisiu ida dua laʹa: “Ahaʹ lan te, atek kem ke nisep sawan iaʹ akeʹ ke nisep ʹo, ngan alaʹ batis koʹ baʹan layan iaʹ ke ngebatis akeʹ.

⁴⁰Un sepuʹo abeʹ keʹ un penyukat ke lemileʹ kelunan iaʹ ke madung tahaʹ taʹu akeʹ ngan tahaʹ kabing akeʹ. Bang Tuhan Allah le iaʹ petenup ladung ini, ngan ia iaʹ ke naʹ a me kelunan diaʹ marung kidi.”

⁴¹Tegoʹ diaʹ puloʹ usa diaʹ ca dina kenahan dau isiu ina are, tai miʹa ne tekaʹ re neng Yakup de dua Yaya.

⁴²Ina tuman Yesus mengin ida telu mung nai kata ia, penco dau ue neng ida: “Ikem lepa tisen neng puyan iaʹ dulu pisiu paren lepoʹ. Seʹ de un penyukat ke ngkang kelunan. Ngan ida diaʹ pengelataʹ ke ngaren dulu.

⁴³Un sepuʹo abeʹ e pekina neng ahang ikem. Buk ca usa iaʹ ubaʹ ketai mpau neng ahang ikem, atek ke ke tunuk usa ha neng ikem mung.

⁴⁴Ngan laʹa buk ca usa iaʹ ubaʹ ke nuyan iaʹ ading, atek ke ngulaʹ usa ha neng ikem mung.

⁴⁵Pekina lete Anak Sio ini, abeʹ e nai apan kelunan ke pubo ia, di lareʹ ia nai apan ne pubo kelunan, ngan mencai udip pe ca liwa tuman kelunan kadoʹ.”

⁴⁶Abeʹ ne Yesus de telu diaʹ bayaʹ katuk ke kaʹ lepoʹ Yeriko. Dalau ketai re mecin lepoʹ ina, kadoʹ kenai kelunan pempun. Dalau ina un ca laki iaʹ butaʹ, ngadan ne Batimius anak Timius, madung kaʹ sada janan, nyat inu tuaʹ neng dulu.

⁴⁷Dalau ue tisen kenai Yesus lepoʹ Nasarit, sulo ho ngelengap, kun dau ue: “Yesus Anak Daut, kudaʹ pe ikoʹ un saheʹ neng akeʹ ading.”

⁴⁸Kadoʹ dulu diaʹ ngenca ia, ngan cuk ia pekenaʹ pisiu. Un sepuʹo bioʹ dau ue: “Anak Daut, naʹ penyaheʹ koʹ me akeʹ ading.”

⁴⁹Sulo Yesus pekenaʹ ngan un dau ue: “Mengin ne kini.” Penco ketai re mengin laki butaʹ ina. Un dau re: “Tiga ne tawai hoʹ. Beteʹ ne. Ina seʹe mengin ikoʹ.”

⁵⁰Sulo ho mesau sapai ie, ngan nepejuk nai palaʹ Yesus.

⁵¹Un dau Yesus lemutu ia: “Inu iaʹ ikoʹ ubaʹ akeʹ ke uyan mikoʹ tupe?” Un dau laki butaʹ ina: “Ahaʹ guru, akeʹ nyat kenai taʹan laʹa.”

⁵²Un dau Yesus: “Tai ne, pengelan ncoʹ lepa paget ikoʹ.” Dalau ina lete nai ie taʹan, ngan penco tai ie bayaʹ Yesus neng janan ina.