Read Wahau Kenyah MARKUS 11 Bible Online

MARKUS 11 - Wahau Kenyah bible

MARKUS 11

¹Kenai re nyeng kaʹ Yerusalim, abeʹ ne ida kaʹ lepoʹ Bit-pagi, ngan Bitani, kata Mudung Ampang. Kun Yesus cuk dua usa neng ahang ida diaʹ bayaʹ katuk ke dina tai masat tahaʹ tena.

²Ngan un dau ue neng ida dua: “Tiga hem dua tai kaʹ lepoʹ iaʹ un tahaʹ tena ikem dua ina. Ketai abeʹ kem ʹo, ikem ke taʹan ca anak pun keledai tenelu. Abeʹ lepe kelunan un tai ngedung kaʹ likut te. Mesau ne telu ue ngan ngkin ia kini.

³Buk dulu ke lemutu ikem: ‘Moʹ inu hem pekina,’ un dau hem dua neng ida: ‘Tuhan ubaʹ ke kanan ne ading. Ia ke ngkin ne uleʹ kini laho laʹa ʹo.’ ”

⁴Sulo tai re dua taʹan ca anak pun keledai kaʹ janan, tenelu kaʹ lung pamen ca amin. Dalau re ke mubai telu ue,

⁵dulu pisiu ida dua: “Moʹ inu hem mubai telu anak pun keledai ini tupe?”

⁶Kun nte dua mipa ida koʹ baʹan dau isiu iaʹ Yesus cuk idai are, sulo re pawang ida.

⁷Sulo tai re ngkin anak keledai ina palaʹ Yesus, ngan naʹ sapai re neng usun likut te, ngan penco tai Yesus ngedung kidi.

⁸Kadoʹ dulu diaʹ medat sapai re neng janan. Un pe diaʹ miting daʹan kayu neng bekan, ngan naʹ a senap kaʹ janan, ban nte ke nyelama kenai Yesus.

⁹Kelunan dia tahaʹ tena ngan diaʹ tahaʹ bayaʹ, bioʹ dau re ngelalo kuma ha: “Pempau Tuhan Allah, Allah iaʹ naʹ peniga ha me laki iaʹ nai dalem ngadan Tuhan.

¹⁰Kudaʹ pe Allah naʹ peniga ha me pengaren tepun le Daut iaʹ nai luhaʹ naʹkini. Pempau Tuhan Allah.”

¹¹Tai sabeʹ Yesus kaʹ Yerusalim, penco tai ie pejakaʹ kaʹ Umaʹ Palan ngan naʹat ketoʹ naʹan iaʹ un pipa ia kina. Nyeng ketai tahup ne tau ina, ina ukoʹ o tai uleʹ kaʹ Bitani, peging ngan puloʹ dua usa diaʹ bayaʹ katuk ke dina.

¹²Neng kenempam me, nai re telu uleʹ cen lepoʹ Bitani laʹa. Dalau kenai ra masat, laʹu ne tekaʹ Yesus.

¹³Cen coʹ ne Yesus taʹan ca inan buaʹ abung iaʹ sahu seʹ tung. Sulo ketai Yesus mita buʹan ne. Lepa ha abeʹ kidi, bang tung nge tuaʹ le iaʹ ia taʹan, moʹ abeʹ lepe un jakaʹ a ke un buʹan.

¹⁴Un dau Yesus neng inan abung ina: “Nyahut ca kelunan ke uman buʹan cen ikoʹ ne laʹa.” Ida diaʹ bayaʹ katuk Yesus kenahan dau isiu ina are.

¹⁵Tai re nyabeʹ kaʹ Yerusalim, penco tai Yesus kaʹ dalem Umaʹ Palan, sulo ho pekarap kelunan diaʹ pebeli kaʹ dalem Umaʹ Palan ina, cuk ida kelap. Kun Yesus nubang bijaʹ kelunan diaʹ pesaliu ligit, ngan pekina pe neng adan dulu diaʹ matu sui garaʹ.

¹⁶Abeʹ e dayo kelunan tai peliwai inu inu ngalang use Umaʹ Palan ina.

¹⁷Lepa ina kun Yesus pekatuk dulu, un dau ue: “Lepa un ne dalem Kitap, un dau Tuhan Allah: ‘Amin nceʹ dulu ke pisiu kukoʹ lemameʹ me kelunan mung.’ Un sepuʹo ikem uyan ne kukoʹ diaʹ bekelau tai pekelem.”

¹⁸Diaʹ detaʹu lataʹ ngan diaʹ guru Adet Yahudi kenahan dau isiu ina are, sulo re mita janan ubaʹ ke lematai Yesus. Un sepuʹo takut tekaʹ de ia, moʹ mung kelunan kadoʹ dina muʹo tawai neng katuk ke.

¹⁹Dalau ketai tahup tau ina, sulo tai Yesus peging ngan diaʹ bayaʹ katuk ke mecin lepoʹ ina.

²⁰Laho neng kenempam me, ngajan nte masat ngalang janan ina are, kun nte taʹan buaʹ abung idai are lepa matai, moʹ o maʹang pabeʹ pakat te.

²¹Sulo Peterus petawai puyan ina are. Un dau ue neng Yesus: “Guru, naʹat ne seʹ buaʹ abung iaʹ ikoʹ pejaʹat idai, matai ne uban ne.”

²²Un dau Yesus mipa ida mung: “Nawai tiga le neng ini. Buk kem ngelan neng Tuhan Allah,

²³senteng kem kuma ha neng mudung ini: ‘Beteʹ ne ikoʹ, ngan pet ikoʹ kaʹ banget.’ Buk are un kawaʹ tekaʹ dalem kimet cem, ngan bang ngelan neng isiu hem iaʹ ketai nuyan ʹo, atek ke nuyan lete neng ikem ʹo.

²⁴Tuman ina, dau heʹ mikem laʹa, buk kem lemameʹ nyat ca inu, ngelan ikem lepa alaʹ a. Ina le ikem ke un ne ʹo.

²⁵Buk kem jeng lemameʹ, sau ne inu tekaʹ penyalaʹ kem neng dulu ading, apan Amai hem iaʹ kaʹ surga ke mesau penyalaʹ pe. [

²⁶Ban ne buk kem are un ke sau penyalaʹ dulu neng ikem, pekina lete Amai hem iaʹ kaʹ surga abeʹ un sau penyalaʹ kem.]”

²⁷Nai abeʹ de kaʹ Yerusalim laʹa. Dalau tai Yesus masat ngalang Umaʹ Palan ina, sulo diaʹ detaʹu lataʹ ngan diaʹ guru Adet Yahudi, ngan diaʹ pengelataʹ kaʹ lepoʹ nai palaʹ ia.

²⁸Sulo re lemutu ia: “Man penyukat inu hoʹ uyan puyan ini tupe? Ngan aheʹ iaʹ naʹ penyukat ini mikoʹ?”

²⁹Un dau Yesus mipa ida: “Ake ke lemutu hem telu man ca putu ading. Buk kem mipa akeʹ, ina le akeʹ ke badaʹ man penyukat inu heʹ uyan puyan ini are.

³⁰Badaʹ ne makeʹ, cen mpi kenai penyukat Yaya ngebatis kelunan tupe? Cen Tuhan Allah moʹ, buk are cen kelunan?”

³¹Sulo re peseket neng ahang ida semaheʹ, un dau re: “Kumpin ne isiu telu ini tupe? Buk le ke mipa ia: ‘Cen Tuhan Allah,’ atek ke kuma ha neng telu: ‘Buk pekina, moʹ inu hem are un ngelan dau Yaya?’

³²Ngan buk telu ke kuma ha: ‘Cen kelunan . . . .’ ” (Luhaʹ ban nte takut dulu diaʹ kadoʹ dina, moʹ mung dulu tisen Yaya ina atek ca pegawa Tuhan.)

³³Ina tuman nte telu mipa Yesus: “Abeʹ meʹ tisen.” Un dau Yesus neng ida: “Pekina pe akeʹ abeʹ un ke badaʹ mikem man penyukat inu heʹ uyan puyan ini.”