Read Wahau Kenyah MARKUS 12 Bible Online

MARKUS 12 - Wahau Kenyah bible

MARKUS 12

¹Kun Yesus alaʹ ca kata katuk iaʹ marung neng ida dina. Un dau ue: “Un ca laki iaʹ kadoʹ pula buaʹ anggur. Kun ne uyan liwang teliling pula ina, ngan ngelubang batu kukoʹ o mema buaʹ anggur ina ngan alaʹ teleng nge. Ngan laʹa kun ne uyan ca lepau iaʹ mpau kukoʹ o mengau ketoʹ pula ha ina. Lepa ina, kun ne naʹ pula ina me kudaʹ usa diaʹ ke petubo ho kena, moʹ o ketai peselai.

²Tegoʹ buaʹ anggur dina ke ngebuʹan, kun laki bioʹ ina cuk ca ulaʹ a tai palaʹ diaʹ petubo pula dina are, apan ne alaʹ tulat te.

³Un sepuʹo diaʹ petubo pula dina are meseng ulaʹ ina, lemeta ia, ngan cuk ia tai uleʹ kelangan.

⁴Lepa ina, kun laki iaʹ un pula ina cuk ca ulaʹ laʹa. Kun diaʹ petubo pula dina are metung ulu ulaʹ ina, ngan petaro ia.

⁵Lepa ina, kun laki bioʹ ina cuk ca ulaʹ pe laʹa. Sulo re lematai ia. Kudaʹ kudaʹ pe diaʹ ia cuk laʹa. Pekina te ida lemeta palai, ngan lematai palai.

⁶“Bang ca le laʹa iaʹ ia senteng ke cuk, iaʹ ina anak pengemalaʹ a. Tai kuʹo ho, kun ne cuk anak ke tai naʹat diaʹ petubo pula ha dina are. Un kaʹ kimet te: ‘Masaʹ ida ke nyelama lete anak keʹ ne ʹo.’

⁷Un sepuʹo ida diaʹ petubo pula dina are, pisiu ida semaheʹ, un dau re: ‘Ini ne anak ke, iaʹ atek un ne. Baka, tai ne ilu lematai ia. Idi ilu iaʹ un pula ini ʹo.’

⁸Sulo re mapo anak ina, lematai ia, ngan penco pet patai ie tahaʹ awang pula ina.”

⁹Un dau Yesus: “Kumpin ne tekaʹ kimet cem? Inu ne iaʹ laki iaʹ un pula ina ke uyan laʹa tupe? Atek ke ke nai lematai kelunan dina are, penco ho naʹ pula ina me kelunan diaʹ ca, iaʹ ke petubo ho ʹo.

¹⁰Masaʹ kem lepa baca isiu dalem Kitap Tuhan iaʹ pekini dau: ‘Un sukaʹ iaʹ tukang amin ban pet kuma ha jaʹat, asin idi iaʹ ban tai nuyan sukaʹ tekedeng penyalet amin.

¹¹Ini ne atek pemuyan Tuhan. Muʹo ne tekaʹ tawai le pekimet te.’ ”

¹²Dalau diaʹ lataʹ lepoʹ Yahudi tisen ban kata katuk ina marung neng ida, sulo re ubaʹ ke dakep Yesus. Un sepuʹo takut tekaʹ de neng dulu diaʹ kadoʹ dina, sulo re mecin ia ngan tai kelap.

¹³Sulo kudaʹ usa kelunan Perisi ngan kelunan tudi pulitik Herudis tai pelawa naʹat Yesus, moʹ de ubaʹ ke ngelabak isiu ue.

¹⁴Sulo kenai re palaʹ ia, ngan un dau re: “Ahaʹ guru, ameʹ tisen ikoʹ ca kelunan iaʹ telit penawai, ngan abeʹ koʹ pesingo tekaʹ kimet kelunan neng ikoʹ. Ngan pekina pe abeʹ kimet coʹ selepeʹ neng diaʹ paren ngan diaʹ panyen. Ngan ikoʹ pe iaʹ mejo katuk iaʹ telit iaʹ ke badaʹ kimet Allah me mung kelunan. Kudaʹ pe ikoʹ badaʹ mameʹ ading, kumpin buk le nyuaʹ pupu me Laja Kaisar, un ne ngesa adet le mo? Tekep le naʹ suaʹ ina taʹin? Salaʹ taʹin?”

¹⁵Yesus tisen kelunan dina are, ten ke ngelabak isiu ue, sulo ho mipa ida: “Moʹ inu hem nesek ke ngelabak isiu heʹ tupe? Nai ngkin ca liʹap ligit palaʹ akeʹ ading.”

¹⁶Sulo re naʹ ca liʹap mia, penco Yesus lemutu ida: “Silung ngan ngadan aheʹ ini tupe?” Un dau re mipa ia: “Laja Kaisar.”

¹⁷Sulo dau Yesus laʹa: “Buk pekina, nyuaʹ ne palaʹ Laja Kaisar inu iaʹ anun Laja Kaisar, ngan nyuaʹ pe palaʹ Tuhan Allah inu iaʹ anun Tuhan Allah.” Muʹo ne tekaʹ tawai de neng ia.

¹⁸Nai kudaʹ usa kelunan Seduki palaʹ Yesus. Un dau katuk kelunan Seduki dina: “Nyahut kelunan ke nai ngeliwet mudip ne laʹa cen patai re.”

¹⁹Un dau re neng Yesus: “Ahaʹ guru, Musa lepa nyurat katuk iaʹ pekini dau milu: ‘Buk ca leto tai balu moʹ laki ie matai, ngan abeʹ de dua un anak, tekep iaʹ cenganak laki ina are, alaʹ leto balu ina pepeto ngan ne, apan ne un anak me laki iaʹ matai ina are.’

²⁰Un ca liwai ie un tujoʹ de laki diaʹ pepadeʹ. Iaʹ seken mida pepeto, penco ho matai ngan are un anak.

²¹Lepa ina iaʹ kedua mida pepeto ngan balu ina are, penco laki ina matai pe ngan are un anak. Pekina pe cenganak ke iaʹ ketelu,

²²ngan pekina ketai re mung. Ketoʹ de tujoʹ usa neng pemadeʹ lepa pepeto ngan leto ina are. Ketoʹ de matai ngan abeʹ un anak. Kebayaʹ a ina le tai leto ina matai.

²³Kumpin ne tegoʹ Tau Bioʹ, ngan mung kelunan matai kenai ngeliwet mudip? Aheʹ ne iaʹ ke un leto ina ʹo? Moʹ mung diaʹ tujoʹ usa didai lepa pepeto ngan ne.”

²⁴Sulo Yesus mipa ida, un dau ue: “Inu lingu ban kimet cem? Moʹ kem abeʹ un tisen isiu iaʹ un dalem Kitap, ngan abeʹ un tisen penyukat Tuhan Allah mo?

²⁵Ban ne buk diaʹ matai kenai ngeliwet mudip ʹo, abeʹ un laki ngan leto ke pepeto laʹa, di lareʹ ida koʹ baʹan melikat iaʹ un kaʹ dalem surga.

²⁶Neng puyan diaʹ matai numpak mudip, abeʹ lepe ikem ban baca neng puyan aʹut iaʹ tutung dalem Kitap musa idai tupe? Ban ne dalem surat ina un dau tebadaʹ Tuhan Allah neng Musa, un dau ue: ‘Akeʹ ne Allah iaʹ anun Ibrahim, ngan iaʹ anun Isak, ngan iaʹ anun Yakup naʹkini.’

²⁷Iaʹ sen isiu ina, Allah ina atek Allah anun kelunan iaʹ mudip. Abeʹ e Allah anun kelunan diaʹ matai. Lingu laleʹ le kimet cem.”

²⁸Un ca usa guru Adet Yahudi iaʹ kenahan dau tiraʹ ina are. Tisen ne ia ban Yesus lepa nyapet isiu Seduki dina are, sulo tai ie ngenyeng Yesus Yesus ngan lemutu ia. Un dau ue: “Kudaʹ pe ikoʹ badaʹ makeʹ ading, katuk ukum iaʹ mpi iaʹ atek bioʹ tupe?”

²⁹Un dau Yesus mipa ia: “Ahaʹ, ini ne katuk ukum iaʹ atek bioʹ: ‘Nawai tiga le lepoʹ Israil, moʹ Tuhan ina iaʹ Tuhan Allah le, bang ia le iaʹ atek Tuhan.

³⁰Atek tekep koʹ malaʹ Tuhan iaʹ Tuhan Allah hoʹ man ketoʹ tekaʹ keluʹung kimet coʹ, ngan ketoʹ tekaʹ penawai hoʹ, ngan ketoʹ tekaʹ pengencam kimet coʹ, ngan ketoʹ tekaʹ pengali hoʹ.’

³¹Ngan katuk ukum iaʹ kedua, pekini dau ue: ‘Tiga hoʹ malaʹ neng ikem kelunan pekuaʹ ko baʹan ncoʹ malaʹ neng usa hoʹ tengen are.’ Abeʹ un katuk ukum iaʹ lapa bioʹ neng ʹo dua dini are.”

³²Un dau guru Adet Yahudi ina neng Yesus: “Ahaʹ guru, lan dau hoʹ, telit ban isiu hoʹ ne. Bang Tuhan tengen iaʹ Tuhan Allah. Abeʹ un diaʹ ca iaʹ pit ia laʹa.

³³Tuman ina, kelunan atek tekep ke malaʹ Tuhan Allah ngan ketoʹ tekaʹ keluʹung kimet de, ngan ketoʹ tekaʹ pengencam kimet de, ngan ketoʹ pengali re. Ngan laʹa, atek tekep de ke malaʹ neng ida pekuaʹ kelunan, koʹ baʹan nte malaʹ neng usa re tengen are. Ngan puyan nte bayaʹ katuk ukum dua dina are, lapa bioʹ neng ʹo puyan le ke mencai liwa pun, pekina pe pengencai le diaʹ ca iaʹ ilu naʹ me Tuhan Allah.”

³⁴Tisen ne Yesus tudi dau ipa ha, ina tuman ne pisiu ia, un dau ue: “Abeʹ koʹ un kumpin coʹ neng puyan pengaren Allah ke ngaren ilu kelunan laʹa.” Lepa ina, abeʹ un aheʹ iaʹ makang tekaʹ ke lemutu Yesus ne laʹa.

³⁵Dalau Yesus pekatuk kaʹ Umaʹ Palan, sulo ho lemutu dulu, un dau ue: “Moʹ inu diaʹ guru Adet Yahudi kuma ha Keristus iaʹ ngkang pungu udip ina kenai luhaʹ cen mela Daut tupe?

³⁶Ban ne un dau Berua Buheʹ iaʹ ngkin Daut pisiu kuma ha: ‘Tuhan Allah iaʹ cuk Tuhan nceʹ: Madung ne ikoʹ tahaʹ taʹu akeʹ, pa heʹ ke naʹ ketoʹ bunoʹ koʹ tahaʹ ntaʹ taket coʹ.’

³⁷Daut pisiu ia ‘Tuhan.’ Buk ke pekina, kumpin ne Keristus iaʹ ngkang pungu udip le ina senteng ketai nuyan mela Daut tupe?” Bangen tekaʹ kelunan kadoʹ dina ngeringa dau Yesus.

³⁸Dalau Yesus penco katuk ke, un dau ue: “Jagaʹ tiga le ikem neng ida diaʹ guru Adet Yahudi, moʹ de ubaʹ tai masat ngan un gelam sapai dadoʹ, nga ubaʹ dulu ke nyelama ida ngalang pasen.

³⁹Dalem amin sebayang ida lemileʹ adan iaʹ ngejuma mpun dulu. Ngan pekina pe ida tai kukoʹ ladung iaʹ tiga tegoʹ dulu pemung uman.

⁴⁰Ida ngaken leto balu, ngan ngelau amin nte. Uʹo ina sulo re ti temameʹ iaʹ dadoʹ dau ke ngelaham neng ata kelunan. Atek lapa bahat ukum iaʹ ke sihoʹ ida ʹo.”

⁴¹Yesus madung kaʹ use Umaʹ Palan nyeng kata buhan pengencai, mentung nge nugen seʹ dulu naʹ ligit pengencai re kedalem buhan pengencai ina. Kadoʹ kelunan kayaʹ diaʹ naʹ bioʹ pengencai re.

⁴²Lepa ina sulo kenai ca leto balu iaʹ kasip le ngkin pengencai ie. Kun ne naʹ dua re liʹap sin bala.

⁴³Sulo Yesus mengin diaʹ bayaʹ katuk ke dina, un dau ue neng ida: “Akeʹ badaʹ mikem, leto balu iaʹ kasip ini, pelapa kadoʹ pengencai ia naʹ kaʹ dalem buhan pengencai neng ʹo diaʹ ca dina.

⁴⁴Ban ne mung nte diaʹ ca dina naʹ cen suheʹ pengekayaʹ de. Un sepe leto balu ini, ia naʹ ketoʹ inu iaʹ ia un, kenuen pe ia kasip. Ban ne ketoʹ pengudip pe iaʹ ia naʹ kaʹ dalem buhan pengencai ina are.”