Read Wahau Kenyah MARKUS 13 Bible Online

MARKUS 13 - Wahau Kenyah bible

MARKUS 13

¹Tai Yesus mecin Umaʹ Palan ina. Dalau tai ie masat, un dau diaʹ bayaʹ katuk ke neng ia: “E guru, tiga laleʹ le ban batu dini ko? Mung amin dini selawan kaʹ le taʹan ne.”

²Un dau Yesus mipa ida: “Ahaʹ, selawan lete kaʹ le taʹan mung amin dini. Dulu ke ngejaʹat dini mung ʹo, ngan nyahut batu dini ke petekuduk laʹa, di lareʹ ketai re pasi mung.”

³Dalau Yesus medung kaʹ Mudung Ampang kaʹ dipa Umaʹ Palan ina are, nai Peterus, Yakup, Yaya, ngan Anderias ubaʹ kejahi ia.

⁴Un dau re: “Kudaʹ pe ikoʹ badaʹ mameʹ ading, midan puyan ina ketai nuyan ʹo tupe? Ngan inu tedanaʹ iaʹ ke badaʹ midan puyan ina ke nuyan ʹo?”

⁵Sulo Yesus nading ca katuk, un dau ue: “Jagaʹ le ikem. Ayen ncem buhaʹ ca kelunan pelingu ikem.

⁶Ban ne kadoʹ kelunan kenai man ngadan nceʹ ngan kuma ha: ‘Akeʹ lete ia.’ Kadoʹ dulu diaʹ tai lingu kuʹun nte.

⁷Ngan laʹa ayen ncem bisau tekaʹ tegoʹ kem kenahan dau denga dulu pepatai, naʹ pe nyeng kata ikem, ngan pekina pe coʹ kata ikem. Moʹ sematu puyan ina ke nuyan lete ʹo. Ayen ncem kuma ha ina ne tai kuʹo udip kusun tanaʹ ini.

⁸Atek dulu ke pepatai lete. Ca tanaʹ ke ti ngan dulu kaʹ tanaʹ diaʹ ca. Ngan pekina pe dulu dalem gaham ca laja ke ti ngan dulu dalem gaham laja diaʹ ca. Ngan tanaʹ ke liung ʹo, mele kempi kempi pe. Ngan kelunan pe ke lien ʹo. Ketoʹ puyan dina are koʹ baʹan tading tekaʹ ca leto sakit nganak are.

⁹“Jagaʹ le ikem neng singket singket usa hem. Ban ne dulu ke dakep ikem, ngan tai ngkin ikem palaʹ ukoʹ diaʹ lataʹ pebetep tiraʹ. Ngan dulu ke lemeta ikem dalem amin sebayang. Dulu ke naʹ ikem kaʹ juma diaʹ lataʹ perinta, ngan diaʹ lajaʹ, ban tuman akeʹ. Pekina puyan ncem ke badaʹ denga Injil mida.

¹⁰Ban ne denga Injil ini atek le ke pedenga me ketoʹ naʹan lepoʹ kena tai kuʹo udip kusun tanaʹ ini.

¹¹Buk dulu ke dakep ikem, ngan tai ngkin ikem palaʹ ukoʹ diaʹ lataʹ pebetep tiraʹ, ayen janga ke pekimet inu iaʹ ikem ke pisiu. Tegoʹ kenai jakaʹ iaʹ tekep, mejo ne isiu iaʹ Tuhan naʹ mikem ina. Ban ne isiu iaʹ ikem ke pisiu ʹo, abeʹ e un isiu hem tengen, di lareʹ isiu ina nai cen Berua Buheʹ.

¹²Kelunan ke mencai cenganak usa re pa dulu lematai ida. Pekina pe amai ke ti nga anak de, ngan anak pe ke ti ngan tuʹa re pa re matai.

¹³Mung dulu ke miʹi neng ikem ban tuman ncem mahu ngadan anun nceʹ. Un sepuʹo aheʹ iaʹ mihen pa tai kuʹo ho, ia lete iaʹ atek ke tisen puyan iaʹ pudip ia dalem Tuhan.”

¹⁴“Ikem ke taʹan puyan iaʹ pelapa jaʹat ke nai beteʹ neng ukoʹ iaʹ abeʹ un tekep ke nai ie ke beteʹ.” (Ikem diaʹ baca ini, ayen ncem talu neng isiu ini ʹo.) “Kelunan diaʹ mudip kaʹ tanaʹ Yudia dalau ina, tiga re tai kelap kaʹ mudung.

¹⁵Kelunan iaʹ un neng usun tekawan, ayen salau naʹat kedalem amin. Pekina pe ayen salau alaʹ inu ue, bang tai ne penco kelap.

¹⁶Kelunan iaʹ un kaʹ uma ha dalau ina, ayen tai uleʹ kaʹ amin nte ke alaʹ sapai ie, bang tai ne kelap.

¹⁷Siʹau pe leto diaʹ lemaleʹ dalau ina, ngan pekina pe diaʹ iteʹ anak de.

¹⁸Lemameʹ ne palaʹ Tuhan Allah apan puyan ini abeʹ un ke nuyan tegoʹ jakaʹ awang sengim ʹo.

¹⁹Ban ne pengudip taru dalau ina ketai jaʹat kuʹo. Nyaut un jaʹat iaʹ lapa neng ʹo ina ne, naʹ pe cen tading Allah uyan tanaʹ ini pa abeʹ naʹkini. Bayaʹ abeʹ un jaʹat iaʹ lapa neng ʹo ina laʹa.

²⁰Un sepuʹo Tuhan iaʹ ngebuʹet tebuku tau neng idi. Buk abeʹ un pekina, nyahut un ca usa kelunan iaʹ caʹ ke mudip pe laʹa. Ban tuman kelunan diaʹ Tuhan lemileʹ, ina ukoʹ o ngebuʹet tebuku tau ina.

²¹“Buk un aheʹ iaʹ badaʹ mikem kuma ha: ‘Naʹat kini, ini ne Keristus,’ buk ke are pekini ida badaʹ: ‘Naʹat kina, ina ne Keristus,’ ayen ncem ngelan dau re.

²²Ban ne atek kenai lete kudaʹ kudaʹ Keristus palo, ngan pekina pe pegawa palo. Ida ke uyan tedanaʹ bulen, ngan puyan nyingan iaʹ nenganan ke pelingu kelunan iaʹ Allah ban lemileʹ, ina buk de senteng ke pelingu ida.

²³Tuman ina jagaʹ ne ikem. Ini ne seʹ keʹ nekena badaʹ puyan iaʹ ke nuyan mikem.”

²⁴“Lepa taru bioʹ ina, mata tau tai lirem, ngan abeʹ un serema bulan laʹa.

²⁵Ngan betuʹen nai laboʹ cen langit, ngan ketoʹ penyukat kaʹ langit ke tai pasi.

²⁶Lepa ina Anak Sio ini kenai luhaʹ dalau abun. Bioʹ nyingan ne ngan serema peniga ha.

²⁷Sulo ho ke cuk melikat te tai kaʹ singket tikung tanaʹ ke alaʹ kelunan diaʹ Tuhan allah lepa ban lemileʹ, cen sada tanaʹ pa libut usun tanaʹ ia ke nai ngkin ida pempun.”

²⁸“Buaʹ abung ini nuyan ca kata katuk mikem. Buk luhaʹ ne sapuk ke ngan tung nge diaʹ tumpak, tisen ne ikem ban nyeng le laʹa kenai tagaʹ.

²⁹Pekina lete buk kem taʹan puyan didai are ketai nuyan, ikem ke ngetisen ban nyeng ne tau bioʹ ina kenai abeʹ.

³⁰Nawai tiga le neng ini. Kelunan diaʹ mudip ngajan ini abeʹ de ketai salai kena mung puyan ini ke nuyan.

³¹Ke salai pe langit ngan tanaʹ, un sepuʹo tiraʹ keʹ nyahut te abeʹ un ketai salai ne.”

³²“Buk le lemutu neng tau ngan jam ina are, nyahut ca kelunan abeʹ un tisen kidi ne. Melikat kaʹ surga pe abeʹ un tisen, ngan Anak Sio ini pe abeʹ un tisen, pit bang Amai Bioʹ le iaʹ tisen kidi.

³³Mengaʹ ngan jagaʹ tiga le, moʹ abeʹ kem tisen midan tau ue ke nai.

³⁴Buk le pekata ha koʹ baʹan ca laki iaʹ mecin amin ne, tai peselai. Kun ne cuk diaʹ ulaʹ a petubo amin ne, singket usa re, ia petulat gayeng mida. Kun laki bioʹ ina cuk ca usa mengau pamen ne lemuto.

³⁵Pekina lete tiga hem jagaʹ, moʹ abeʹ kem tisen midan laki bioʹ iaʹ tuʹa amin ina kenai ngeliwet. Masaʹ tegoʹ tai tahup taʹin. Masaʹ beluaʹ alem taʹin, tegoʹ tekuʹuk iap taʹin, tegoʹ kenai dema taʹin.

³⁶Ayen ne taʹan ikem luntoʹ tegoʹ kenai ie abeʹ.

³⁷Isiu heʹ neng ikem dini, isiu ina lete iaʹ akeʹ ke badaʹ me mung kelunan, iaʹ ina: Tiga hem lemuto jagaʹ.”