Read Wahau Kenyah MARKUS 14 Bible Online

MARKUS 14 - Wahau Kenyah bible

MARKUS 14

¹Dalau dua tau kena Adet Malan Ruti Lamut, ngan Bunut Paska, (iaʹ ina pemung uman neng Adet Menting Patai), kun diaʹ detaʹu lataʹ ngan diaʹ guru Adet Yahudi mita janan nyelem ke mapo Yesus, moʹ de ubaʹ ke lematai ia.

²Un dau re: “Ayen ti tegoʹ adet bunut, malap le dulu bisau ʹo.”

³Yesus ngelineʹ kaʹ lepoʹ Bitani kedalem amin Simun iaʹ sakit bekayen idai. Dalau ue uman, sulo nai ca leto ngkin ca tajau dumit, iaʹ ina tajau “ala-basta”, koʹ seʹ mening ca kelingai are, ngan sangan kuʹun telang kenyo iaʹ baran aleʹ suaʹ a. Kun ne masi batuk tajau ina, penco ho mubeʹ e neng ulu Yesus.

⁴Miʹa ne tekaʹ palai kelunan dina, sulo re pisiu ida selepeʹ, un dau re: “Adeʹ e ngebura telang kenyo ina tupe?

⁵Buk ke abeʹ un bura pekina, senteng te matu kenyo ina suaʹ telu ato ligit man lesau kelunan kasip.” Pekina ne dau re pejaʹat leto ina.

⁶Sulo dau Yesus neng ida: “Pekena ne ading. Ayen ncem pemiat ia. Marung lete pemuyan ne iaʹ tiga ini neng akeʹ.

⁷Kelunan kasip lemuto un ngan ncem, ngan senteng ngkem lesau ida mele midan kimet cem ubaʹ. Un sepuʹo abeʹ keʹ lemuto un ngan ncem.

⁸Pemuyan iaʹ ia senteng uyan, ia uyan te. Ban ini ne seʹ e nekena petenup usa heʹ man kenyo, kena dulu ke masek akeʹ dalem liang.

⁹Nawai tiga le neng ini. Moʹ mele kempi kempi le ke penco badaʹ denga Injil kusun tanaʹ ini. Pekina lete ilu petawai ke badaʹ pemuyan leto ini ʹo.”

¹⁰Yudas Iskariut, iaʹ ina ca usa mida diaʹ puloʹ dua diaʹ bayaʹ katuk Yesus didai, sulo tai ie palaʹ diaʹ detaʹu lataʹ, moʹ o ubaʹ ke mencai Yesus mida.

¹¹Bangen laleʹ ne tekaʹ de kenahan dau isiu Yudas ina, sulo re petuket ke naʹ ligit mia. Cen dalau ina ne tading Yudas mita janan ke mencai Yesus mida.

¹²Tau iaʹ ading ading dalem Adet Bunut Ruti iaʹ are un lamut, ina ne tau dulu ke nebek anak dumba man pemung uman neng Adet Paska. Sulo diaʹ bayaʹ katuk Yesus dina lemutu ia, un dau re: “Kempi hoʹ ubaʹ ameʹ tai petenup penguman Paska tupe?”

¹³Sulo ho cuk dua usa re, ngan un dau ue neng ida dua: “Tai ne ikem masat dalau lepoʹ ina. Ikem ke petegoʹ ngan ca laki iaʹ ngkin sung sungai.

¹⁴Kun ncem tai bayaʹ ia pa hem tai kedalem amin. Kun ncem pisiu laki iaʹ un amin ina, un dau hem: ‘Un dau guru, kempi amin nceʹ, iaʹ ukoʹ diaʹ bayaʹ katuk keʹ ke uman Paska pemung ngan nceʹ ʹo?’

¹⁵Sulo laki bioʹ iaʹ un amin ina ke badaʹ amin kempau mikem. Lepek tenup ne ketoʹ gelam iaʹ un neng amin ina. Kina hem ke petenup penguman milu.”

¹⁶Penco tai re dua diaʹ bayaʹ katuk Yesus idai kedalem lepoʹ ina, ngan taʹan mung inu iaʹ Yesus lepa badaʹ mida dua. Sulo re petenup Paska ina.

¹⁷Dalau ketai tahup tau ina, sulo nai Yesus peging ngan diaʹ puloʹ dua usa diaʹ bayaʹ katuk ke dina are.

¹⁸Dalau re uman neng bijaʹ ina, un dau Yesus neng ida: “Lan dau heʹ mikem, un ca usa mikem iaʹ ke naʹ akeʹ me dulu ʹo, ca usa iaʹ pemung uman ngan nceʹ lete.”

¹⁹Miat laleʹ ne tekaʹ kimet de, sulo re lemutu ia tahaʹ ca, tahaʹ ca: “Abeʹ e akeʹ mo?”

²⁰Un dau Yesus mipa ida: “Atek ke ca usa mikem diaʹ puloʹ dua usa lete, ca usa iaʹ metin ruti kedalem kiut ngan nceʹ.

²¹Moʹ Anak Sio ini ke matai koʹ baʹan dau Kitap lepa badaʹ neng puyan ia are, un sepuʹo siʹau pe kelunan iaʹ ke naʹ Anak Sio ini me dulu ʹo. Pulang tiga kelunan ina abeʹ un nai pempet cen kena.”

²²Dalau re uman, kun Yesus alaʹ ca luʹung ruti. Sulo ho lemameʹ nyuaʹ tiga saheʹ e, penco ho mepeʹ e, ngan naʹ a mida diaʹ bayaʹ katuk ke, kun dau ue: “Alaʹ ne, ini ne usa heʹ.”

²³Lepa ina kun ne alaʹ sawan, sulo ho nyuaʹ tiga saheʹ e palaʹ Tuhan Allah, penco ho naʹ a mida, sulo re mung nisep cen sawan ina lete.

²⁴Un dau Yesus: “Ini ne dahaʹ keʹ, dahaʹ iaʹ musa ban tuman kelunan kadoʹ, dahaʹ petutung iaʹ ke pedapit ilu kelunan neng tuket Tuhan Allah.

²⁵Lan dau heʹ mikem, nyahut ceʹ abeʹ un ke nisep telang buaʹ anggur ini laʹa, kena heʹ ke nisep iaʹ mading kaʹ dalem puyan pengaren Allah ke ngaren ilu kelunan.”

²⁶Uʹo lepa re ngentau, sulo nai re kawang, ngan penco tai re pabeʹ Mudung Ampang.

²⁷Un dau Yesus neng ida: “Mung ikem ke leko akeʹ ngan kelap akeʹ ʹo. Ban Kitap lepa badaʹ: ‘Tuhan Allah ke lematai Laki iaʹ manan dumba ina, ngan penco purat ne mung dumba ha.’

²⁸Un sepuʹo uʹo lepa heʹ nai ngeliwet mudip laʹa, akeʹ ke tai kaʹ Galilia tahaʹ tena neng ikem.”

²⁹Un dau Peterus mipa ia: “Nyahut ceʹ ke leko ikoʹ ne, naʹ pe mung nte ke kelap.”

³⁰Un dau Yesus neng Peterus: “Nawai tiga le neng ini. Kena tekuʹuk iap iaʹ kedua liwai alem ini, ikoʹ nyepati akeʹ telu liwai.”

³¹Tai pali kuʹo dau Peterus: “Nyahut ceʹ abeʹ un ke nyepati ikoʹ ne, naʹ pe akeʹ ke matai pemung ngan ncoʹ.” Mung nte diaʹ bayaʹ katuk Yesus pekina lete dau isiu re.

³²Nai re abeʹ neng ca lasan tanaʹ ngadan ne Gesemani. Sulo dau Yesus neng diaʹ bayaʹ katuk ke dina: “Tiga hem madung kini ading, jinan neʹ tai lemameʹ.”

³³Kun Yesus ngkin Peterus, Yakup, ngan Yaya serengan ia. Bihe ne tekaʹ a, ngan meba tekaʹ kimet te.

³⁴Un dau ue neng ida: “Bahat laleʹ tekaʹ penawai heʹ. Ke matai ne tekaʹ keʹ ngimet ini. Ngelineʹ ne ikem kini, ngan jagaʹ tiga le.”

³⁵Kun ne tai tahaʹ tena ida kediʹut, sulo ho nubang usa ha kaʹ tanaʹ, ngan penco ho lemameʹ nyat bahoʹ pe ia sukat abeʹ un sihoʹ tuyen bioʹ.

³⁶Kun dau Yesus lemameʹ: “Amai, Amai heʹ, ketoʹ puyan atek sukat neng ikoʹ. Kudaʹ pe ikoʹ ngecoʹ sawan tuyen ini neng akeʹ. Abeʹ keʹ nyat bayaʹ pengubaʹ keʹ tengen, di lareʹ bang bayaʹ pengubaʹ koʹ tuaʹ le.”

³⁷Uʹo ina nai Yesus uleʹ taʹan ida telu diaʹ bayaʹ katuk ke are luntoʹ. Un dau ue neng Peterus: “E Simun, luntoʹ koʹ mo? Adeʹ koʹ abeʹ un senteng maga ca jam le?”

³⁸Un dau ue neng ida: “Nengayet cem telu, jagaʹ ngan lemameʹ ne, apan ncem abeʹ un laboʹ neng penyalaʹ tegoʹ pengeten ʹo. Lan te berua hem pali, un sepuʹo lemaʹ usa hem.”

³⁹Tai Yesus mecin ida ca liwai laʹa. Sulo ho lemameʹ koʹ baʹan dau isiu idai are.

⁴⁰Uʹo ina nai ie ngeliwet palaʹ ida diaʹ bayaʹ katuk ke are. Kun ne taʹan ida luntoʹ laʹa, moʹ abeʹ nyatan seʹ de ke maga. Abeʹ de mencam tekaʹ ke pisiu ia.

⁴¹Neng iaʹ ketelu liwai nai ie ngeliwet naʹat ida. Un dau ue neng ida: “Caʹ luntoʹ lepe ikem. Penteng nyara hem mo? Sukat ne ini, moʹ lepa abeʹ ne jakaʹ idai. Naʹat, dulu ke naʹ Anak Sio neng ujoʹ kelunan diaʹ sangan kuʹun penyalaʹ naʹkini.

⁴²Beteʹ ne, tai ne telu naʹkini. Naʹat ne seʹ kenai laki iaʹ ke naʹ akeʹ me dulu.”

⁴³Dalau Yesus pisiu ida telu lepe, abeʹ ne Yudas. Yudas pe ca mida diaʹ puloʹ dua usa diaʹ bayaʹ katuk Yesus are. Kadoʹ kelunan diaʹ ngkang bahing, ngan petung kayu nai serengan Yudas, moʹ pengecuk diaʹ detaʹu lataʹ, ngan diaʹ guru Adet, ngan diaʹ lataʹ lepoʹ.

⁴⁴Laki iaʹ ke pebeli Yesus ina lepa badaʹ ca tedanaʹ me diaʹ kadoʹ dina, un dau ue: “Laki iaʹ ikem ke mita ina, akeʹ ke maʹoʹ ia. Lepa ina hem mapo ia, ngkin ia, ngan meput ia.”

⁴⁵Nai abeʹ Yudas neng lasan tanaʹ ina, penco tai ie ngenyeng Yesus, un dau ue: “Amai.” Sulo ho maʹoʹ ia.

⁴⁶Pekina ne seʹ puyan nte mapo Yesus ngan salet seʹ e.

⁴⁷Un sepuʹo ca usa iaʹ jeng kina menat bahing nge, sulo ho pelajap telinga ca laki iaʹ ulaʹ neng iaʹ Pengebioʹ Detaʹu ina are.

⁴⁸Kun Yesus pisiu ida: “Moʹ inu hem ngkin bahing ngan petung man ncem ke peput akeʹ tupe? Masaʹ kem kuma ha akeʹ koʹ baʹan kelunan iaʹ nyakat perinta are.

⁴⁹Malai heʹ ngan ncem singket singket tau, dalau heʹ pekatuk dulu kedalem Umaʹ Palan. Abeʹ pe ikem mapo akeʹ dalau ina. Un sepuʹo puyan ini tai nuyan apan tai palup ne isiu dalem Kitap.”

⁵⁰Lepa ina mung nte diaʹ bayaʹ katuk Yesus didai are penco tai kelap.

⁵¹Un ca usa demanai, gelam me bang ca keluma belasoʹ le. Moʹ ia ketai bayaʹ Yesus, kun dulu ten ke mapo demanai ina.

⁵²Un sepuʹo sulo tai ie ngasa kelap ugai, moʹ ia nahung keluma belasoʹ ina are.

⁵³Sulo re ngkin Yesus kaʹ amin laki iaʹ Pengebioʹ Detaʹu ina are. Pempun ne mung diaʹ detaʹu lataʹ, ngan diaʹ lataʹ lepoʹ, ngan diaʹ guru Adet Yahudi dalau ina.

⁵⁴Nai Peterus bayaʹ ia cen coʹ, sulo ho ngelineʹ kaʹ use amin Pengebioʹ Detaʹu ina. Madung ne Peterus mentu kata luten ngan pulis diaʹ mengau amin ina.

⁵⁵Ketoʹ diaʹ detaʹu lataʹ peging ngan Mpun diaʹ Lataʹ dina naten seʹ ke mekem salaʹ neng Yesus, moʹ de ubaʹ ke lematai ia. Un sepuʹo abeʹ e un salaʹ.

⁵⁶Naʹ pe kadoʹ kelunan nugen badaʹ isiu neng Yesus, abeʹ tiraʹ de tai sihoʹ un, moʹ tiraʹ de palo.

⁵⁷Nai palai beteʹ laʹa, moʹ de ke palo dau neng Yesus. Un dau re:

⁵⁸“Ameʹ tisen isiu laki ini, un dau ue: ‘Akeʹ ke ngasing Amin Palan iaʹ ban nuyan kuʹun kelunan ini ʹo, ngan sulo hoʹ medeng ca iaʹ mading laʹa dalem telu tau ʹo. Iaʹ mading ina abeʹ e nuyan kuʹun kelunan.’ ”

⁵⁹Naʹ pe pekina, tai tekajaʹ muʹo ne dau tiraʹ de. Abeʹ kuaʹ dau isiu re un.

⁶⁰Sulo nai laki Pengebioʹ Detaʹu ina jeng, ngan nyeripa ida mung. Un dau ue lemutu Yesus: “Moʹ inu hoʹ are un ubaʹ mipa kelunan diaʹ pesalaʹ ikoʹ tupe?”

⁶¹Tiem ne Yesus. Ca luʹung isiu pe ia are un pisiu. Kun laki Pengebioʹ Detaʹu ina lemutu Yesus ceng liwai laʹa, un dau ue: “Un ncoʹ Keristus iaʹ ngkang pungu udip, iaʹ Anak Allah Peniga le kelunan tupe?”

⁶²Un dau Yesus mipa ia: “Akeʹ ne ia, ngan ikem mung ke taʹan Anak Sio ini madung tahaʹ taʹu Allah iaʹ Nyingan ina, ngan puyan ke nai ie dalem abun surga ʹo.”

⁶³Kun laki Pengebioʹ Detaʹu ina lemerit sapai ie, mentung nge kuma ha: “Inu baʹin le ke mita isiu tugen laʹa.

⁶⁴Ikem lepa tisen pengejaʹat isiu ue. Kumpin ne tekaʹ kimet cem?” Sulo re mung mekem salaʹ neng Yesus iaʹ ukoʹ o tekep ke matai.

⁶⁵Sulo palai mida dina nyemulaʹ Yesus. Kun nte mekep mata ha man apeʹ, penco re mepan ia. Un dau re: “Badaʹ ne mameʹ. Aheʹ iaʹ mepan ikoʹ?” Kun pulis dina menat ia mentung nte nepap ia.

⁶⁶Peterus caʹ un ngelineʹ kaʹ use. Dalau ina nai ca leto iaʹ ulaʹ amin laki Pengebioʹ Detaʹu ina.

⁶⁷Kun leto ina taʹan Peterus mentu, sulo ho nekeneng naʹat ia, un dau ue: “Ikoʹ lete ca iaʹ pemung ngan Yesus lepoʹ Nasarit idai.”

⁶⁸Sulo Peterus nyakat isiu leto ina: “Nyahut ceʹ tisen. Abeʹ keʹ tisen sen isiu hoʹ ne.” Penco Peterus mecin ida dina, tai kajoʹ. Dalau ina sulo ca iap paʹung nekuʹuk.

⁶⁹Dalau leto idai are taʹan Peterus tai kajoʹ, sulo ho badaʹ me dulu laʹa, un dau ue: “Atek ke ca mida telu, laki ina.”

⁷⁰Kun Peterus mipa ngan nyakat ia laʹa. Abeʹ majan ʹo ina laʹa, sulo dulu diaʹ nekejeng kina nujoʹ Peterus, ngan un dau re neng ia: “Adeʹ koʹ nyakat dulu? Luhaʹ ban ncoʹ ca usa mida telu, moʹ koʹ lepoʹ Galilia.”

⁷¹Sulo Peterus mudoʹ, un dau ue: “Ahaʹ Allah ke ngukum akeʹ buk keʹ palo. Nyahut ceʹ tisen laki iaʹ kun ncem ina ne.”

⁷²Dalau ina sulo iap paʹung nekuʹuk kedua liwai ie. Sulo Peterus petawai isiu Yesus ia kuma ha: “Kena tekuʹuk iap kedua liwai, ikoʹ ke nyepati akeʹ telu liwai.” Tai metan ne tekaʹ Peterus ngimet, mentung nge nange.