Read Wahau Kenyah MARKUS 16 Bible Online

MARKUS 16 - Wahau Kenyah bible

MARKUS 16

¹Tai tahup Tau Kelineʹ ina, iaʹ ina tai tahup tau kenem, tai Mariam, Madalina, ngan Mariam ue Yakup, ngan Salume lemeli kemenyan, ubaʹ ke muso ho neng patai Yesus.

²Mempam mempam Tau Mingku, sulo tai re telu kaʹ liang ina are.

³Dalau tai re telu masat, un dau re neng ida semaheʹ: “Kumpin puyan le neng batu iaʹ kep paʹ liang idai taʹin? Aheʹ iaʹ ke pelubit te milu taʹin?” (

⁴Moʹ o bioʹ laleʹ batu idai are.) Kun nte naʹat kempau, taʹan lepa lubit ne ban batu idai.

⁵Penco re tai kedalem liang ina, bekaʹ taʹan ca laki, iʹut lepe seʹ udip pe, madung tahaʹ taʹu ukoʹ patai ina ne, ngan gelam me sapai dadoʹ puteʹ. Salam laleʹ tekaʹ de telu taʹan ia.

⁶Un dau ue: “Ayen ncem bisau. Akeʹ tisen ikem mita Yesus lepoʹ Nasarit iaʹ dulu lepa napek kaʹ kayu tecek idai are. Abeʹ e un kini. Lepa ne Tuhan meteʹ ia. Naʹat seʹ ban kukoʹ dulu peken ia.

⁷Tiga hem telu tai palaʹ ida diaʹ bayaʹ katuk ke, ngan nawai Peterus. Badaʹ denga ini mida naʹkini. Pekini dau hem mida: ‘Yesus ke tai kaʹ Galilia, nekena neng ikem. Kina hem ke taʹan ia, koʹ baʹan iaʹ ia lepa badaʹ mikem ading nte.’ ”

⁸Sulo ketai re telu ngasa mecin liang ina, mentung ngeregen tekaʹ de bisau. Dalau ketai re, abeʹ de pisiu inu inu me kelunan, moʹ de takut. [

⁹Mempam mempam Tau Mingku, uʹo lepa Yesus ngeliwet mudip cen patai ie, nai ie luhaʹ ading ading neng ata Mariam Madalina. Cem Mariam ina ne Yesus lepa pekarap tujoʹ de bali ading are.

¹⁰Dalau tai Mariam badaʹ denga Yesus palaʹ ida diaʹ malai ngan ne cen kena, kun ne taʹan ida ngelumo ngan nange dalau ina.

¹¹Tegoʹ de tisen isiu Mariam badaʹ ban Yesus un mudip, ngan laʹa ia lepa taʹan Yesus, abeʹ de ngelan dau ue.

¹²Lepa ina laʹa, un dua usa diaʹ tai masat kaʹ daya, ngan ca naʹan pe layan Yesus nai luhaʹ palaʹ ida dua.

¹³Penco re tai uleʹ ngan badaʹ denga ina palaʹ ida diaʹ ca diaʹ bayaʹ katuk Yesus dina are. Un sepuʹo abeʹ de ngelan dau re.

¹⁴Kaʹ bayaʹ laʹa, pempun ne puloʹ ca usa diaʹ bayaʹ katuk Yesus. Dalau re uman, sulo nai Yesus luhaʹ neng ata ida. Kun ne ngenca ida, moʹ de abeʹ un ngelan, ngan laʹa moʹ mahing kimet de leko ke ngelan dau kelunan diaʹ badaʹ ida taʹan ia mudip.

¹⁵Un dau Yesus neng ida: “Tai ne ikem penco badaʹ denga Injil me ketoʹ kelunan pa tipo usun tanaʹ ini.

¹⁶Aheʹ iaʹ ngelan, ngan alaʹ batis, ia lete iaʹ atek ke tisen puyan iaʹ ke pudip ia dalem Tuhan. Aheʹ iaʹ abeʹ un ngelan, atek penyalaʹ a iaʹ ke mekem ngkin ia neng penaru.

¹⁷Tuhan ke naʹ kudaʹ tedanaʹ nyingan dini me kelunan diaʹ ngelan: ida ke pekarap bali man ngadan nceʹ; ida ke pisiu man naʹan naʹan isiu iaʹ bulen;

¹⁸pekina pe buk de ngkang ncung ulai, ngan nisep telang kayat, abeʹ de tai jaʹat kuʹun ne; ida ke napoʹ ujoʹ de neng kelunan sakit, sulo re maget.”

¹⁹Lepa Yesus petiraʹ ngan nte, sulo tai ie pejung kaʹ surga, ngan madung tahaʹ taʹu Tuhan Allah.

²⁰Sulo tai diaʹ bayaʹ katuk ke penco badaʹ denga Injil mele kempi kempi ketai re. Mentung Tuhan iaʹ pegayeng ngan nte, peluhaʹ puyan nyingan iaʹ nedanaʹ ban katuk de telit.] [ DAU CA NAʹ AN TAI KUʹO ISIU SURAT MARKUS Tai leto dina palaʹ Peterus de telu, penco re badaʹ mung isiu ina are. Lepa ina Yesus tengen iaʹ cuk ida diaʹ bayaʹ katuk ke tai pelawa katuk iaʹ buheʹ, iaʹ mudip, iaʹ ke pudip kelunan dalem Tuhan pa abeʹ bayaʹ. Sulo tai re pa libut tanaʹ tahaʹ sek tau, ngan tahaʹ lenca tau.] 22