Read Wahau Kenyah MARKUS 3 Bible Online

MARKUS 3 - Wahau Kenyah bible

MARKUS 3

¹Tai Yesus kaʹ amin sebayang Yahudi ca liwai ie laʹa. Un pe ca laki iaʹ uping ujoʹ kina.

²Un palai dulu diaʹ nesek seʹ puyan Yesus, selu ue ke paget kelunan tegoʹ Tau Kelineʹ, moʹ kimet de ubaʹ ke pita ca ukan ke uyan salaʹ me ia.

³Sulo Yesus pisiu ngan laki iaʹ uping ujoʹ ina, un dau ue: “Beteʹ ne, nai ne kaʹ beluaʹ mpun kini.”

⁴Penco Yesus lemutu kelunan kadoʹ dina: “Dalem adet le, kumpin puyan iaʹ ilu senteng uyan tegoʹ Tau Kelineʹ? Ti puyan iaʹ tiga taʹin, buk are ti puyan jaʹat? Kumpin, pudip usa kelunan taʹin, buk are ngejaʹat ida?” Un sepuʹo abeʹ de pisiu.

⁵Miʹa diseʹ Yesus naʹat kelunan dina mung, moʹ janga laleʹ tekaʹ a ke pekimet ban kelunan dina mahing seʹ kimet de. Sulo dau ue pisiu laki idai are: “Mejo ne ujoʹ koʹ.” Kun ne mejo ho. Serengan ina lete ujoʹ laki ina penco tiga.

⁶Uʹo ina tai diaʹ Perisi dina petegoʹ ngan kudaʹ usa diaʹ kahum ngan pati pulitik Herudis. Sulo re peket ubaʹ ke lematai Yesus.

⁷Tai Yesus serengan diaʹ bayaʹ katuk ke, tai abeʹ kaʹ leteng Galilia. Kadoʹ kelunan pempun nai bayaʹ ia pelaʹa. Palai nai cen tanaʹ Galilia, un pe palai nai cen tanaʹ Yudia,

⁸pekina pe cen Yerusalim, pekina pe cen tanaʹ Idumia, pekina pe cen tanaʹ be tahaʹ dipa sungai Yardin. Un pe palai cen dale diaʹ pipa Tirus ngan Sidun. Nuyan ca mpun bioʹ ne kina, uban nte lepa kenahan dau denga ban pemuyan Yesus.

⁹Kadoʹ kelunan pempun kina, sulo Yesus cuk diaʹ bayaʹ katuk ke tai petenup ca alut, uban ne malap dulu ke ngesen ia.

¹⁰Kadoʹ dulu diaʹ Yesus paget kina. Un pe diaʹ sakit petem diseʹ pesuntung pita janan apan nte sukat tai man ia.

¹¹Un pe diaʹ bali nelasek. Dalau re taʹan Yesus, sulo re muʹup kata ia ngan ngelengap kuma ha: “Ikoʹ iaʹ Anak Allah.”

¹²Miʹa dau Yesus payen bali dina tai pedenga ia me dulu.

¹³Tai Yesus kusun ca apau, sulo ho mengin kudaʹ usa diaʹ ia ubaʹ. Sulo nai re palaʹ ia,

¹⁴ngan ia lemileʹ puloʹ dua usa ke ngadan lawa Injil. Un dau Yesus: “Akeʹ lemileʹ ikem apan ncem ke ngelineʹ ngan nceʹ.

¹⁵Laʹa akeʹ ke cuk ikem tai badaʹ denga tiga, ngan akeʹ ke naʹ nyingan man ncem pekarap bali.”

¹⁶Dini ne puloʹ dua usa diaʹ ia lemileʹ didai: Simun (iaʹ Yesus naʹ pit ngadan ne Peterus);

¹⁷Yakup ngan iaʹ cenganak ke Yaya, diaʹ ban anak Sapdi, (Yesus naʹ pit ngadan Buanigis mida dua. Un sen ngadan ina: “Kelunan baloʹ koʹ baʹan puyan dau langit are”);

¹⁸ngan Anderias, ngan Pilipus, ngan Batulumius, ngan Matius, ngan Tumas, ngan Yakup anak Alpius, ngan Tadius, ngan Simun iaʹ dulu naʹ laki sanget uban ne sanget pasat pulitik ading nte,

¹⁹ngan Yudas Iskariut iaʹ ban mencai Yesus me bunoʹ o.

²⁰Tai Yesus kaʹ dalem ca amin. Kadoʹ kenai kelunan pempun, pa Yesus ngan ida telu diaʹ bayaʹ katuk ke dina, abeʹ un biʹen ke uman.

²¹Dalau diaʹ pengamin Yesus kenahan dau denga puyan ina, tai re ke mulen ia, moʹ un dulu diaʹ pisiu kuma ha: “Seʹ e buling pekele.”

²²Un pe kudaʹ usa guru Adet Yahudi diaʹ ban nai cen Yerusalim, dau re: “Un bali Balsibul neng ia.” Un pe dau palai kuma ha: “Uban tuʹa bali bioʹ iaʹ naʹ nyingan me ia, ina ukoʹ o senteng pekarap bali.”

²³Tuman ina Yesus mengin kelunan kadoʹ dina ngenyeng ia, sulo ho pekatuk ida man kata katuk diaʹ pekini dau: “Kumpin puyan bali Sitan ke pekarap bali Sitan tupe?

²⁴Buk kelunan neng ca tanaʹ ke pepatai neng ahang ida selepeʹ, atek ketai pasi lete kelunan neng tanaʹ ina.

²⁵Ca kata laʹa, buk ca pemanak de neng ca amin muʹo ke pepatai neng ahang ida selepeʹ, atek de ketai pasi lete neng pemanak de.

²⁶Pekina lete buk diaʹ dalem gaham bali Sitan muʹo ke pepatai neng ahang ida selepeʹ, abeʹ nyatan nte ke un pa majan. Ketai kuʹo ho ke pasi lete.

²⁷“Ca kata neng ca kelunan iaʹ pali. Abeʹ un aheʹ iaʹ senteng ke ngelau amin ne ngan ke magang inu ue, buk ke are un ke ngaput laki iaʹ pali ina ading. Uʹo ina le ida senteng ke ngelau amin ne.

²⁸“Nawai tiga le ikem neng dau heʹ ini. Naʹ pe kudaʹ naʹan penyalaʹ kelunan, nga kudaʹ naʹan isiu re iaʹ jaʹat ngan pejaʹat Allah pe, senteng te mung penyalaʹ dina ke pesau cen ida.

²⁹Tengeca neng kelunan diaʹ pejaʹat Berua Tuhan iaʹ Buheʹ, nyahut penyalaʹ de senteng ke pesau cen ida pa majan ngan pabeʹ bayaʹ.”

³⁰(Pekina dau Yesus moʹ palai dulu kuma ha: “Berua bali Sitan iaʹ dalem ia.”)

³¹Dalau ina nai ueʹ Yesus ngan diaʹ cenganak ke nekejeng tahaʹ awang amin ina. Sulo re cuk ca usa tai palaʹ Yesus ngan mengin ia kawang.

³²Kadoʹ kelunan pempun madung pipa Yesus. Kun nte badaʹ mia kuma ha: “Naʹat coʹ ading. Un ueʹ koʹ ngan diaʹ cenganak koʹ nekejeng kawang ne. Nai re mengin ikoʹ.”

³³Un dau Yesus mipa: “Aheʹ ueʹ keʹ tupe? Ngan aheʹ diaʹ cenganak keʹ tupe?

³⁴Sulo Yesus nyileʹ naʹat mung kelunan diaʹ madung pipa ia kina, penco dau ue: “Naʹat cem ading. Dini ne diaʹ ueʹ keʹ ngan diaʹ cenganak keʹ.

³⁵Ban ne aheʹ iaʹ ti pengubaʹ kimet Tuhan Allah, ia iaʹ cenganak laki heʹ ngan cenganak leto heʹ, ngan ueʹ keʹ pe.”