Read Wahau Kenyah MARKUS 4 Bible Online

MARKUS 4 - Wahau Kenyah bible

MARKUS 4

¹Un pe ca liwai laʹa Yesus pekatuk kelunan kaʹ sada bahi leteng Galilia. Bioʹ laleʹ mpun kelunan kadoʹ dina, ina ukoʹ Yesus tai neng ca alut ngan madung kidi. Alut ina un kaʹ beluaʹ kediʹut de, ngan dulu diaʹ kadoʹ dina nekejeng kaʹ tanaʹ, abeʹ kaʹ sada bahi sungai ina.

²Kadoʹ naʹan kata katuk man Yesus pekatuk kelunan dina. Dalau ue pekatuk, un dau ue:

³“Tiga hem ngeringa ading. Un ca kelunan iaʹ tai mula beneʹ.

⁴Dalau ue miwet beneʹ ina neng uma ha, un palai beneʹ diaʹ laboʹ kaʹ janan, sulo kenai sui uman ne.

⁵Un pe palai diaʹ laboʹ kaʹ tanaʹ bere, kukoʹ tanaʹ a nyipe. Sangkit kenai ie mudip moʹ abeʹ tanaʹ a kapan.

⁶Dalau kenai mpau tau, sulo tai ie kuko moʹ abeʹ pakat te dalem. Ina ukoʹ o laho maʹang.

⁷Un palai luang dina laboʹ dalau suhaʹ. Nai ie mudip, penco suhaʹ ina mampun inan padai ina, sulo ho abeʹ un buʹan.

⁸Un pe palai beneʹ dina laboʹ kaʹ tanaʹ diaʹ tiga. Nai ie mudip, ngan teto kenai ie un buʹan. Un pe diaʹ telu puloʹ, un pe diaʹ nem puloʹ, un pe mato pengekadoʹ o neng ʹo beneʹ e.”

⁹Kun dau Yesus neng kebayaʹ a: “Aheʹ diaʹ un telinga, tiga re ngeringa.”

¹⁰Dalau Yesus ngelineʹ neng ata ha tengen, nai kun palai me dulu diaʹ lepa kenahan dau ue. Un pe diaʹ puloʹ dua usa diaʹ bayaʹ katuk ke, nai re lemutu Yesus kumpin puyan kata katuk ina are.

¹¹Un dau Yesus mipa ida: “Puyan iaʹ linget dalem puyan pengaren Allah, lepa ne Allah naʹ a mikem. Un sepuʹo dulu diaʹ tahaʹ awang, ida diaʹ ke kenahan puyan ini man kata katuk,

¹²apan tai nuyan bayaʹ isiu pegawa iaʹ kuma ha: ‘Naʹat, naʹat te ida, abeʹ pe ida taʹan. Ngeringa, ngeringa te ida, ia iaʹ abeʹ pe ida tisen. Buk are pekina, masaʹ de nyepuleʹ kimet de cen penyalaʹ de, ngan penco nai palaʹ Allah, ina le Allah ke sau penyalaʹ de.’ ”

¹³Sulo Yesus lemutu ida telu: “Abeʹ lepe ikem ban tisen kata katuk ina tupe? Kumpin ncem ke ngetisen puyan diaʹ ca nuʹo tupe?

¹⁴Laki iaʹ mula beneʹ ina seleket te mula katuk Tuhan.

¹⁵Tahaʹ palai ie, katuk ina laboʹ kaʹ janan, koʹ baʹan puyan kelunan diaʹ kenahan dau ue, sulo kenai Bali Jaʹat magang katuk iaʹ Tuhan lepa mula dalem kimet de.

¹⁶Un pe diaʹ ca laʹa, koʹ baʹan beneʹ diaʹ laboʹ neng tanaʹ bere. Dalau re kenahan dau katuk ina, seʹ de alaʹ a ngan bangen.

¹⁷Di abeʹ e tai detem dalem kimet de tengen, bang seʹ de kanan ne nuat tuaʹ le. Dalau re sihoʹ taru ngan dulu nyakit ida ban tuman katuk ina, penco luʹap ne kimet de.

¹⁸Un pe kelunan diaʹ ca laʹa koʹ baʹan beneʹ iaʹ dalau suhaʹ. Lan te ida kenahan dau katuk ina,

¹⁹un sepuʹo tawai re ngawaʹ puyan usun tanaʹ ini, ngan malaʹ kimet de neng kayaʹ, pincaʹ pe kadoʹ naʹan diaʹ ca iaʹ ke pekaseng kimet de, pa ha ke nampun katuk ina. Ina ukoʹ o abeʹ un buʹan.

²⁰Un pe kelunan diaʹ ca laʹa, koʹ baʹan beneʹ diaʹ laboʹ neng tanaʹ iaʹ tiga. Ida kenahan dau katuk ina, mentung nte ngetisen sen ne, pa kenai ie un buʹan. Neng palai un telu puloʹ, palai laʹa un nem puloʹ, palai laʹa un mato pengekadoʹ o neng ʹo beneʹ ina are.”

²¹Un dau Yesus laʹa: “Mpi un aheʹ kelunan iaʹ ngkin ca pelitaʹ kaʹ amin ngan mekep pe man ca tukaʹ, buk are naʹ a kentaʹ tilung nge? Di lareʹ ia ke mahung nge neng mpau padung pelitaʹ lete.

²²Inu inu iaʹ suhuk, atek kenai lete luhaʹ ʹo, ngan inu inu iaʹ pekep, atek ke luhaʹ lete kata iaʹ dema.

²³Aheʹ iaʹ un telinga, tiga ha ngeringa dau isiu ini, ngan nawai kidi.”

²⁴Un dau Yesus pisiu ida laʹa: “Nugen tiga le neng inu iaʹ ikem ke kenahan. Kuaʹ baʹan puyan ncem nyuaʹ puyan dulu, Tuhan Allah lete ke nyuaʹ ikem kuaʹ puyan ina laʹa, ngan ia ke naʹ pit te mikem puʹo.

²⁵Kelunan iaʹ un ca puyan inu, palaʹ ia lete Tuhan Allah ke naʹ pit puyan inu mia laʹa. Kelunan iaʹ abeʹ un ca puyan inu, cen ia lete Tuhan ke sau inu iaʹ ia un, naʹ pe iaʹ kediʹut le.”

²⁶Un dau Yesus laʹa: “Puyan pengaren Allah ke ngaren ilu kelunan un koʹ baʹan ca kelunan iaʹ mula beneʹ neng uma are.

²⁷Luntoʹ o tegoʹ ngahu, taga ngan tai nyitau ue naʹ tau. Mentung kenai luang ina nelecuk, ngan nai dadoʹ, ngan abeʹ laki ina tisen moʹ kumpin ban kenai luang ina mudip.

²⁸Kuʹun tanaʹ ina tengen kenai pula ina mudip, ngan nai un buʹan. Iaʹ ading nai inan ne, ʹo ina nai sapuk ke, bayaʹ ina kenai ulo ho iaʹ sangan kuʹun luang nge.

²⁹Dalau tai padai ina mesak, penco kenai laki ina ke ngkin puʹe ajau ue, uban jakaʹ ajau lepek un.”

³⁰Un dau Yesus: “Kumpin le ke pisiu seʹ puyan pengaren Allah ke ngaren ilu kelunan tupe? Inu kata katuk man le ke badaʹ puyan ne tupe?

³¹Koʹ baʹan ca luang ampeʹ, iaʹ atek iʹut neng ʹo ketoʹ naʹan beneʹ kusun tanaʹ ini.

³²Uʹo le mula ha, nai ie mudip ngan tai nuyan ca inan kujau iaʹ bioʹ neng ʹo kujau diaʹ ca. Daʹan ne pe lataʹ, pa ketai sui uyan sala kentaʹ lingau ue.”

³³Kadoʹ kata katuk koʹ baʹan ina are man Yesus penco katuk ke me dulu. Ia badaʹ a mida pa re tisen ke pekimet te.

³⁴Abeʹ e pekatuk dulu buk ke abeʹ un kanan kata katuk. Un sepuʹo dalau ue tengen un ngan ida telu diaʹ bayaʹ katuk ke, ia badaʹ puyan sen katuk ina mida.

³⁵Tai tahup tau ina, kun Yesus pisiu diaʹ bayaʹ katuk ke dina, un dau ue: “Tiga ne tepat tai pelawat kaʹ dipa leteng ini te.

³⁶Sulo tai re ne mecin kelunan kadoʹ dina. Tai re pat diaʹ bayaʹ katuk ke peging ngan Yesus ngedung neng alut ina, penco tai re puke. Un pe alut diaʹ ca ngan nte kina.

³⁷Kenai bahiu kasa, ngan luyak nai nyeludung kedalem alut ina, pa alut ina nyeng ke sangan kuʹun sungai.

³⁸Dalau ina luntoʹ Yesus, ngan meken neng ca nten ulu tahaʹ mudi alut ina. Kun nte telu naga ia, un dau re: “Guru, adeʹ koʹ abeʹ un nyingo ameʹ ne? Tai le ke kaham ne ini.”

³⁹Sulo nai Yesus beteʹ, penco ho cuk bahiu ina are, kuma: “Pekenaʹ ne,” ngan un dau ue neng luyak: “Pelenteng ne.” Sulo pekenaʹ ne bahiu, ngan pelenteng lan ne sungai ina.

⁴⁰Penco Yesus pisiu ida pat: “Inu ukoʹ kem bisau tupe? Abeʹ lepe ikem ban ngelan tupe?”

⁴¹Bisau laleʹ tekaʹ de. Kun nte pisiu ida selepeʹ: “Aheʹ kelunan ini taʹin? Adeʹ pabeʹ bahiu ngan luyak pe iaʹ bayaʹ dau ue cuk.”