Read Wahau Kenyah LUKAS 1 Bible Online

LUKAS 1 - Wahau Kenyah bible

LUKAS 1

¹Surat katu me Tiupilus, paren meʹ: Kadoʹ dulu ban nyurat pa mpi penisen nte, neng puyan iaʹ ban nuyan lan neng ahang ilu.

²Lepa ne ida nyurat te koʹ baʹan dau iaʹ dulu nai badaʹ milu are. Moʹ diaʹ badaʹ a dina, lepa ne ida taʹan puyan Yesus man mata re tengen, dina, lepa ne ida taʹan puyan Yesus man mata re tengen, cen penading nge. Ida lete diaʹ ban penco katuk ina.

³Ahaʹ Tiupilus, lepa ne akeʹ nyituk ngetisen mung puyan dina, pa tai heʹ tisen ne cen penading nte. Ina ukoʹ keʹ ubaʹ nyurat te mikoʹ ngan tepuʹun le dau tai ie.

⁴Idi hoʹ tai tisen sen ne iaʹ lan dalem mung katuk diaʹ ban dulu badaʹ mikoʹ idai are.

⁵Dalau udip Laja Herudis, paren tanaʹ Yudia, un ca laki diaʹ detaʹu, ngadan ne Sakaria, iaʹ ban cen mpun Abia. Un ngadan leto ho Ilisabet. Ia ne ban cen mela diaʹ detaʹu lete.

⁶Un nte dua dina kuaʹ teneng puyan pengudip de kata Allah. Tudep lan seʹ de dua bayaʹ mung katuk ukum ngan adet Tuhan.

⁷Un ʹo abeʹ de dua un anak, moʹ Ilisabet ne lua, un pelaʹa kaya laleʹ ne ida dua.

⁸Un ca tau ue Sakaria ngkang gayeng detaʹu, iaʹ ida ngelayan uyan singket tau ne.

⁹Un adet diaʹ detaʹu dina, ida pegan ti tenung lemileʹ kelunan. Bayaʹ adet ina Sakaria iaʹ ban sihoʹ tenung tau ina. Ina ukoʹ Sakaria tai nutung lisan kemanyan kaʹ padung pengencai dalem Umaʹ Palan Allah.

¹⁰Kadoʹ dulu pempun sebayang tahaʹ awang, dalau Sakaria nutung lisan kemanyan ina.

¹¹Belekaʹ kenai ca usa melikat Tuhan kata Sakaria, nekejeng tahaʹ taʹu neng padung pengencai, iaʹ ukoʹ o nutung kemanyan ina.

¹²Kecet ngan bisau tekaʹ Sakaria taʹan ia.

¹³Di lareʹ un dau melikat ina neng ia: “Ayen bisau Sakaria, moʹ lepa ne Allah kenahan dau temameʹ koʹ. Un leto hoʹ Ilisabet ne, ke nganak ke ca anak laki mikoʹ ʹo. Tiga hoʹ uyan ngadan ne Yaya ʹo.

¹⁴Ia iaʹ ke pebangan tawai hem, ngan ngkin tiga saheʹ mikem dua. Pekina pe kadoʹ dulu diaʹ ke bangen neng kenai ie luhaʹ ʹo.

¹⁵Ia ke nuyan ca kelunan iaʹ bioʹ dalem penaʹat Tuhan ʹo. Ngan nyahut te ke nisep telang anggur ngan jakan nuʹo. Ia ʹo sangan kuʹun Berua Buheʹ cen tading iʹut te.

¹⁶Ngan kadoʹ lepoʹ Israil ia ke ngkin uleʹ palaʹ Tuhan, ina Tuhan Allah re.

¹⁷Ia ke tai nekena badaʹ tiraʹ Allah ngan sanget ngan tempa dau ue, koʹ baʹan puyan pegawa Ilia cen naʹaʹ are. Ia ke payo kimet diaʹ amai ngan diaʹ anak neng ca le kimet laʹa. Ia ke pupa diaʹ muau, cuk ida ngeliwet alaʹ kimet de mayo diaʹ teneng. Ia ke cuk diaʹ anun Tuhan ke petenup mengaʹ ke nai Tuhan ʹo.”

¹⁸Un dau Sakaria neng melikat ina: “Kumpin nceʹ ke ngetisen puyan ini lan ʹo? Kaya ne akeʹ, ngan leto heʹ kaya pe ia.”

¹⁹Un dau melikat ina mipa ia: “Akeʹ ini Gibrail. Akeʹ iaʹ nekejeng nyeripa Allah, ngan akeʹ iaʹ Allah cuk nai pisiu ikoʹ, ngan nai badaʹ denga puyan tiga ini.

²⁰Un sepuʹo abeʹ koʹ ngelan dau tiraʹ keʹ. Cen naʹkini, ameng ne ikoʹ ʹo, pa ketai ie palup dau tiraʹ iaʹ akeʹ ban badaʹ mikoʹ ʹo re. Mung tiraʹ keʹ ne tai palup lete, tegoʹ o ketai abeʹ neng tuket te ʹo.”

²¹Un dalau ina, dulu diaʹ kadoʹ dina pekena kenai Sakaria kawang. Salam tekaʹ de pekimet, moʹ majan laleʹ ne ia dalem Umaʹ Palan ina.

²²Nai ie kawang, abeʹ e mencam ke pisiu ngan nte ne laʹa. Cen ina ne tekaʹ de tisen ban un ca penaʹat Sakaria kedalem Umaʹ Palan ina. Kun ne pekata pekata man ujoʹ o, moʹ ban ameng ne ia.

²³Uʹo ho pesukung toʹ majan ne neng gayeng nge dalem Umaʹ Palan ina, tai kun Sakaria uleʹ ne kaʹ amin nte nuʹo.

²⁴Abeʹ e majan uʹo ina, lemaleʹ ne leto ho Ilisabet ne. Dalem lema bulan majan ne are tai puke cen amin nte.

²⁵Un dau Ilisabet: “Pekini ne ban puyan Tuhan lesau akeʹ, moʹ o ke sau penyaʹe heʹ neng dulu.”

²⁶Tai ie sihoʹ nem bulan majan temaleʹ Ilisabet ne, kun Tuhan Allah cuk melikat Gibrail tai neng ca lepoʹ kaʹ tanaʹ Galilia, ngadan lepoʹ ina Nasarit.

²⁷Tai kun ne badaʹ tiraʹ palaʹ ca dikiʹit leto, ngadan ne Mariam. Un ca laki, ngadan ne Yusup, iaʹ ban mela cen Laja Daut, ia iaʹ ban matep dekiʹit leto ina.

²⁸Tai kun melikat ina pisiu ia, kun dau ue: “Tadan ne tekaʹ koʹ, moʹ Tuhan un ngan ncoʹ, ngan bioʹ ban peniga ha mikoʹ.”

²⁹Bisau tekaʹ Mariam kenahan dau melikat ina, mentung nge miat tekaʹ pekimet dau sen tiraʹ ina.

³⁰Un dau melikat ina neng Mariam: “Ayen ncoʹ bisau diseʹ Mariam, moʹ Allah iaʹ ban malaʹ ikoʹ.

³¹Ke lemaleʹ koʹ ʹo, ngan un ne ʹo ca anak laki. Yesus ngadan ne kuʹun ncoʹ ʹo.

³²Ia atek ke bioʹ ʹo, ngan dulu ke naʹ ia Anak Allah iaʹ Atek Mpau. Moʹ Tuhan Allah le ke uyan ia ca laja koʹ baʹan tepun ne Daut cen naʹaʹ are.

³³Ia ketai nuyan laja neng diaʹ ban mela Yakup, pa abeʹ bayaʹ ʹo. Nyahut pengaren ne ketai kuʹo.”

³⁴Un dau Mariam neng melikat ina: “Kumpin puyan ini ketai nuyan ʹo tupe, moʹ abeʹ keʹ un laki lepe?”

³⁵Un dau melikat mipa ia: “Berua Buheʹ iaʹ kenai mesun neng ikoʹ, ngan penyukat Allah ke nyaʹung ngelidung ikoʹ ʹo. Ina ukoʹ anak iaʹ buheʹ ina, dulu ke naʹ Anak Allah ha ʹo.

³⁶Ikoʹ pekimet cenganak sak koʹ Ilisabet, iaʹ dulu naʹ lua idai. Naʹ pe ia kaya laleʹ lene, naʹkini nem bulan pengajan ne lemaleʹ.

³⁷Uban neng Allah ketoʹ isiu abeʹ un iaʹ are palup.”

³⁸Un dau Mariam: “Ahaʹ lan ne, ban ca kelunan ulaʹ Tuhan pe akeʹ ne. Tiga pe ia nuyan pekina koʹ baʹan dau hoʹ makeʹ ne.” Uʹo ina tai melikat ina mecin ia.

³⁹Abeʹ e majan uʹo ina, kun Mariam pedepa inu ue, ngan pera ketai ie masat bayaʹ janan ngalang mudung, pa abeʹ ca lepoʹ kaʹ tanaʹ Yudia.

⁴⁰Penco tai ie kaʹ amin Sakaria, ngan badaʹ tiga saheʹ e me Ilisabet.

⁴¹Dalau Ilisabet kenahan dau isiu Mariam nyelama ia, belekaʹ anak ina nepejuk dalem batek ke. Dalau ina sangan ne Ilisabet kuʹun Berua Buheʹ.

⁴²Bioʹ dau ue kuma neng Mariam: “Ikoʹ ne iaʹ ban sihoʹ peniga iaʹ bioʹ neng ahang ilu leto, ngan anak iaʹ ikoʹ ke nganak ina ʹo, ia iaʹ un peniga iaʹ bioʹ ina lete.

⁴³Ca puyan iaʹ bioʹ tegoʹ akeʹ ne ini, moʹ ueʹ Tuhan nceʹ iaʹ nai naʹat akeʹ.

⁴⁴Tegoʹ keʹ kenahan dau selama hoʹ are, lan lan ne anak ini nepejuk dalem batek keʹ moʹ o bangen.

⁴⁵Bioʹ saheʹ koʹ Mariam, moʹ koʹ ban ngelan tiraʹ Tuhan iaʹ nai palaʹ ikoʹ, iaʹ ban palup ini.”

⁴⁶Kun dau Mariam: “Bangen tekaʹ kimet ceʹ pempau Tuhan,

⁴⁷bangen tekaʹ tawai heʹ kuʹun Allah iaʹ Keniga Udip keʹ,

⁴⁸moʹ Allah petawai ulaʹ a iaʹ libaʹ ini. Cen naʹkini nuʹo mung dulu ke kuma akeʹ bangen,

⁴⁹moʹ Allah iaʹ bioʹ kuasa ban uyan puyan iaʹ bioʹ neng akeʹ. Atek buheʹ ne ngadan ne.

⁵⁰Luhaʹ ban lesau ue neng mung kelunan diaʹ takut ia, singket sun udip ne.

⁵¹Man pengali ie, ia nekeli lengen ne, ia iaʹ ban lepa lemasi kelunan diaʹ mpau kimet, ngan ngasing puyan peseket de.

⁵²Ia pelaboʹ kelunan paren bioʹ cen adan pengaren nte, ia mejung diaʹ libaʹ kimet.

⁵³Ia pebeso kelunan diaʹ laʹu man peniga ha, ngan ia cuk dulu diaʹ kayaʹ tai uleʹ kelangan.

⁵⁴Ia kanan dau tuket te ngan tepun le, ngan nai mepo ida diaʹ panyen ne, Israil dina.

⁵⁵Lemuto ho nawai ke lesau Ibrahim, ngan diaʹ mela ha pabeʹ bayaʹ ʹo.” Pekina dau Mariam.

⁵⁶Masaʹ pe telu bulan pengajan Mariam mukoʹ ngan Ilisabet kaʹ amin nte. Uʹo ina le ketai ie uleʹ.

⁵⁷Tai sukung ne bulan ukoʹ Ilisabet ke mempet anak ke, sulo ho muga ca anak laki.

⁵⁸Mung dulu dalem lepoʹ ina, ngan diaʹ cenganak ke, kenahan dau denga ban bioʹ pengelesau Tuhan neng ia. Tai kun nte naʹat Ilisabet, penco re mung bangen ngan ne.

⁵⁹Neng iaʹ ke aya tau anak ina, kenai dulu ke uyan adet sunat mia. Kun nte ke naʹ ngadan Sakaria mia, bayaʹ ban ngadan amai ie.

⁶⁰Un dau ueʹ e neng ida: “Abeʹ e pekina, moʹ Yaya iaʹ ke ngadan ne ʹo.”

⁶¹Un dau re neng ia pelaʹa: “Abeʹ un ngadan ca cenganak kem ne iaʹ pekina dau.”

⁶²Uʹo ina, sulo re pekata me Sakaria, lemutu inu ngadan ia ubaʹ ke naʹ anak ke ne.

⁶³Kun Sakaria nyat ca utun uʹu, penco ho nyurat kidi. Un dau ue: “Ngadan ne Yaya.” Salam ne dulu neng ia.

⁶⁴Dalau ina lete Sakaria mencam pisiu ne laʹa ʹo, sulo ketai ie pempau Allah.

⁶⁵Tai takut ne lepoʹ ina. Ngan puyan ina tai denga nipo lepoʹ ngalang dale mudung tanaʹ Yudia ne.

⁶⁶Mung dulu diaʹ kenahan dau denga ina, ida pekimet dalem tawai re, ngan lemutu neng ida selepeʹ: “Kumpin ketai ubo anak ini ʹo taʹin?” Moʹ luhaʹ lan seʹ ban puyan nyingan Tuhan neng ia.

⁶⁷Un Sakaria, amai Yaya ne, sangan ne kuʹun Berua Buheʹ, penco ho badaʹ dau Allah, kun dau ue:

⁶⁸“Tiga le pempau Tuhan iaʹ Allah lepoʹ Israil, moʹ o ban nai mepo diaʹ anun ne, ngan nakau ida cen keta re.

⁶⁹Allah ban naʹ milu ca laki iaʹ pali, iaʹ Keniga udip le. Ia ban mela cen Daut iaʹ panyen ne are.

⁷⁰Moʹ pekini dau diaʹ pegawa Allah diaʹ buheʹ, penco dau ue cen naʹaʹ are.

⁷¹Kun dau re: Allah patek ke pudip ilu cen ketoʹ puyan ayau le, pekina pe cen penyukat mung diaʹ miʹi neng ilu.

⁷²Cen kena ne ia badaʹ a me tepun le, dau ue ke peluhaʹ pengelesau ue mida, ngan kanan tiraʹ tuket te iaʹ buheʹ.

⁷³Ia patek tiraʹ ngan lan dau ue me tepun le

⁷⁴Ibrahim are, ngan mudoʹ dau ue badaʹ ia ke nakau ilu cen ujoʹ ayau le, ngan pedayo ilu pegayeng mia, abeʹ un mentam tekaʹ laʹa,

⁷⁵apan le tai buheʹ ngan teneng nyeripa ia utung udip le.

⁷⁶Ahaʹ anak keʹ Yaya, dulu ke pisiu ikoʹ ca pegawa Allah. Allah iaʹ Atek Mpau. Ikoʹ iaʹ ke tai nekena Tuhan, ke petenup janan

⁷⁷mia, ngan badaʹ me dulu diaʹ anun Allah, dau ue ke pudip ida kuʹun puyan ne iaʹ ke sau penyalaʹ de.

⁷⁸Moʹ bioʹ lesau, ngan denaʹ saheʹ Tuhan Allah le. Iaʹ ke peluhaʹ milu udip iaʹ ke pudip ilu, koʹ baʹan kenai dema tau nyelat are.

⁷⁹Cen surga ha ngedema mung dulu diaʹ mudip dalau ntem, diaʹ pencit kuʹun patai. Ia ke peteneng jeng taket le bayaʹ janan udip tadan.” Pekina ne dau Sakaria.

⁸⁰Kenai anak ina bioʹ, ngan pali ne seʹ usa ha, pekina pe diseʹ kimet te. Tai ie mudip kaʹ tanaʹ apau iaʹ lenga, pa ketai ie sihoʹ tau ue kenai luhaʹ palaʹ lepoʹ Israil.