Read Wahau Kenyah LUKAS 10 Bible Online

LUKAS 10 - Wahau Kenyah bible

LUKAS 10

¹Uʹo ina kun Tuhan lemileʹ tujoʹ puloʹ dua usa laʹa. Penco ho cuk ida tai tahaʹ dua tahaʹ dua nekena ia neng singket lepoʹ ngan umaʹ, kukoʹ o ubaʹ ke nyabeʹ ʹo.

²Un dau Yesus neng ida: “Bioʹ laleʹ ajau ini, un sepuʹo diaʹ ketai majau ue, kediʹut le. Moʹ ina lemameʹ ne ikem neng Amai Bioʹ iaʹ un ajau ini, apan ia ke cuk palai laʹa tai majau kaʹ ajau ue te.

³Tai ne ikem, ayen turan le. Seʹ keʹ cuk ikem koʹ baʹan cuk anak dumba tai dalau asu lajam.

⁴Ayen ngkin bahan ligit, ngan belanyat, pekina pe sepatu. Ngan ayen pekajoʹ mipa dulu kaʹ janan.

⁵Buk kem tai nyabeʹ amin dulu, tiga hem badaʹ peniga saheʹ neng penyabeʹ kem.

⁶Buk un ca usa iaʹ malaʹ tadan neng penyaheʹ e kina, atek kem ke naʹ tadan penyaheʹ kem mia lete. Un sepuʹo buk are un pekina, tiga hem alaʹ tadan penyaheʹ kem ina ngeliwet laʹa.

⁷Ngelineʹ ne ikem dalem amin iaʹ un tadan penyaheʹ ina. Uman ngan nisep ne inu iaʹ ia naʹ mikem. Moʹ aheʹ iaʹ pegayeng, atek tekep lete ia ke un bang nge. Ayen ncem tai kaso kaso keneng ca lubang amin.

⁸“Buk kem tai abeʹ neng ca lepoʹ, ngan selama dau re alaʹ ikem, uman ne inu iaʹ ida naʹ mikem,

⁹ngan paget diaʹ sakit kaʹ lepoʹ ina, mentung badaʹ mida: ‘Puyan pengaren Allah lepa nai ngenyeng ikem.’

¹⁰“Midan midan ncem tai nyabeʹ ca lepoʹ iaʹ abeʹ un nyelama alaʹ ikem, tai ne ikem kaʹ janan ngalang lepoʹ ina, ngan pekini dau hem:

¹¹‘Abeʹ un ca inu iaʹ ukoʹ meʹ ke pebulung ngan ncem, pabeʹ abu lepoʹ kem iaʹ nyalit neng taket meʹ ini, ameʹ ke lemasa naʹ kaʹ ikem. Ayen ncem lingu, ban puyan pengaren Allah lepa nai ngenyeng ikem.’

¹²Ca laʹa akeʹ badaʹ mikem, tegoʹ Tau Ukum Bioʹ ʹo, bioʹ laleʹ lesau Allah neng lepoʹ Sudum neng ʹo lepoʹ ina.”

¹³Un dau Yesus laʹa: “Siʹau pe ikem lepoʹ Kurasim. Siʹau pe ikem lepoʹ Bit-saida. Ke kelesau hem ʹo. Moʹ buk cen kena are, dalem lepoʹ Tirus ngan Sidun, lepa nuyan puyan nyingan koʹ baʹan iaʹ lepa nuyan dalem ikem, atek de laho ke un gelam talun, sulo madung ngabu usa re badaʹ ban nte nesen ngan nyepuleʹ kimet de cen penyalaʹ de.

¹⁴Tegoʹ Tau Ukum Bioʹ ʹo, sukat nyiʹan penuyen neng lepoʹ Tirus ngan lepoʹ Sidun neng ʹo penuyen ncem.

¹⁵Ngan ikem lepoʹ Kapernaum, seʹ kem ubaʹ ketai kempau pabeʹ kaʹ surga mo? Idi ie ikem iaʹ dulu ke lemintet kedalem ukum luten ʹo.”

¹⁶Un dau Yesus neng diaʹ bayaʹ katuk ke pelaʹa: “Aheʹ iaʹ ngeringa dau hem, ia lete ngeringa dau heʹ. Ngan aheʹ iaʹ muau ikem, ia lete iaʹ muau akeʹ. Ngan aheʹ iaʹ muau akeʹ, ia lete iaʹ muau ia iaʹ cuk akeʹ nai.”

¹⁷Un diaʹ tujoʹ puloʹ dua usa didai nai uleʹ ngeliwet ngan bangen laleʹ tekaʹ de. Kun dau re: “Ahaʹ Tuhan, toʹ bali tunuk bayaʹ dau meʹ, buk meʹ cuk ida kelap man ngadan ncoʹ.”

¹⁸Un dau Yesus neng ida, kun ne: “Lepa ne akeʹ taʹan Sitan, iaʹ tuʹa bali, laboʹ cen surga koʹ baʹan seʹ bekilet are.

¹⁹Petawai le ikem neng dau ini: Lepa ne akeʹ naʹ penyukat mikem, idi hem senteng cuk ncung ulai ngan lipa busung, ngan penyukat neng usun ketoʹ pengali Bali Bioʹ iaʹ bunoʹ le, ngan abeʹ un ca inu iaʹ senteng ke ngejaʹat ikem ʹo.

²⁰Naʹ pe bali lepa tunuk bayaʹ dau hem, abeʹ ina iaʹ ukoʹ kem ke bangen, di lareʹ bangen tawai hem moʹ un ngadan ncem neng surat dalem surga.”

²¹Dalau laho ina lete, Berua Buheʹ nyangan bangen neng penawai Yesus, kun dau ue: “Ahaʹ Amai, ikoʹ iaʹ Tuʹa Bioʹ neng usun langit ngan tanaʹ. Akeʹ nyuaʹ tiga saheʹ neng ikoʹ Amai, moʹ un puyan iaʹ ikoʹ nyuhuk neng diaʹ penudi ngan pengencam lepoʹ, seʹ koʹ peluhaʹ a keneng diaʹ un tebelum, koʹ baʹan anak dumit neng amai. Ahaʹ Amai, moʹ puyan diaʹ pekina marung neng pengubaʹ koʹ, ngan dengkep neng penaʹat coʹ.

²²“Moʹ Amai heʹ lepa mencai mung inu makeʹ. Abeʹ un aheʹ iaʹ dapit kimet te ke ngetisen Anak ini, bang Amai Bioʹ tuaʹ le. Ngan abeʹ un aheʹ iaʹ dapit kimet te ke ngetisen Amai Bioʹ ina, bang Anak ke le, ngan neng aheʹ iaʹ Anak ini ubaʹ ke peluhaʹ Amai Bioʹ laʹa.”

²³Uʹo Yesus pekina dau, kun ne pupa palaʹ diaʹ bayaʹ katuk ke, moʹ o ubaʹ ke pisiu ida tengen le, kun dau ue: “Tiga lan ban ncem taʹan puyan diaʹ ikem taʹan ne.

²⁴Lan dau heʹ badaʹ mikem, cen naʹaʹ kadoʹ pegawa ngan paren diaʹ ubaʹ ke taʹan puyan iaʹ ikem taʹan ini; abeʹ de senteng puʹo. Ngan pekina pe ida ubaʹ ke ngeringa dau tiraʹ iaʹ ikem kenahan naʹkini; abeʹ pe ida senteng ke kenahan puʹo.”

²⁵Un ca usa guru Adet Yahudi nekejeng ubaʹ ke ten Yesus, kun ne: “Ahaʹ Guru, inu iaʹ tekep akeʹ ke uyan apan nceʹ sukat ke alaʹudip saheʹ kelineʹ iaʹ ngeriman tupe?”

²⁶Kun dau Yesus mipa ia: “Inu iaʹ ban un dalem Kitap Tuhan tupe? Kumpin kaʹ penisen ncoʹ dalau hoʹ baca ha?”

²⁷Un dau guru ina mipa ia: “Pekini dau dalem Kitap: ‘Atek tekep koʹ ke malaʹ Tuhan iaʹ Tuhan Allah hoʹ man ketoʹ tekaʹ keluʹung kimet coʹ, ngan ketoʹ tekaʹ penawai hoʹ, ngan ketoʹ pengali hoʹ, ngan ketoʹ tekaʹ pengencam kimet coʹ;’ ngan pekina pe: ‘Atek tekep koʹ ke malaʹ lete neng aheʹ aheʹ iaʹ penyeng ngan ncoʹ, koʹ baʹan coʹ malaʹ usa hoʹ tengen.’ ”

²⁸Un dau Yesus neng ia: “Teneng te dau ipa hoʹ ne. Uyan ne pekina, atek koʹ ke un udip lete ʹo.”

²⁹Un guru Adet Yahudi ina ubaʹ ke peteneng usa ha tengen le, ina ukoʹ o lemutu neng Yesus, kun dau ue: “Aheʹ iaʹ penyeng ngan nceʹ tupe?”

³⁰Un dau Yesus mipa ia: “Ban un ca usa iaʹ nai puno cen lepoʹ Yerusalim tai kaʹ lepoʹ Yeriko. Kun diaʹ bekelau mabang ia, sulo re nyudup ia, magang gelam me, mentung nte nyakit ia. Sulo tai re kelap ia, pekece seʹ e ke matai.

³¹Asin un ban ca laki detaʹu nai puno bayaʹ janan ina. Tegoʹ o taʹan ia, kun ne nyelipat ia, penco tai pelapa ia.

³²Pekina pelaʹa ca diaʹ lepoʹ Liwi. Tegoʹ laki lepoʹ Liwi ina abeʹ kina, kun ne numau ia, penco ho nyelipat ia, tai pelapa ia tuaʹ le.

³³“Nai kun ca diaʹ lepoʹ Samaria masat bayaʹ janan ina. Tegoʹ o taʹan ia, kelesau laleʹ le tekaʹ a neng ia.

³⁴Penco tai ie ngenyeng ia, kun ne naʹ taban ngan telang anggur neng suhat te, ngan lemino suhat te. Lepa ina kun ne mejung ia neng usun likut keledai ie, ngan tai ngkin ia kaʹ ukoʹ ca amin sakai, sulo pubo ia kina.

³⁵Neng kenempam me, kun ne naʹ dua liʹap ligit pirak me laki iaʹ mengau amin sakai ina. Un dau ue: ‘Pubo ne ia, ngan inu iaʹ ikoʹ lemeli mia ʹo, buk ke lapa neng ini, akeʹ nyaliu te, buk midan nceʹ nai ngeliwet ʹo.’ ”

³⁶Un dau Yesus laʹa neng guru idai are: “Kumpin baʹan ncoʹ, neng ahang ida telu usa dina are, aheʹ iaʹ penyeng neng ia iaʹ tegoʹ dulu diaʹ bekelau didai tupe?”

³⁷Kun dau guru Adet Yahudi ina: “Ia iaʹ un tekaʹ pengelesau neng ia.” Un dau Yesus neng ia: “Buk ke pekina, tai ne ikoʹ, uyan koʹ baʹan ina are.”

³⁸Dalau ketai Yesus masat serengan diaʹ bayaʹ katuk ke are, tai re abeʹ neng ca lepoʹ iaʹ kukoʹ amin ca leto iaʹ ngadan ne Marta. Kun Marta ne alaʹ Yesus ngan selama dau ue kedalem amin ne.

³⁹Un Marta ne, un ca sadin leto ho, ngadan ne Mariam. Ia iaʹ madung nusau taket Tuhan, ngeringa dau katuk ke.

⁴⁰Un sepuʹo Marta ne bubo seʹ e, moʹ kadoʹ laleʹ gayeng nge pubo penguman nte. Ina ukoʹ o nai pisiu: “Tuhan, inu hoʹ are nyingo akeʹ. Inu sadin nceʹ pedayo akeʹ pegayeng tengen tupe? Cuk ne ia nai mepo akeʹ ading.”

⁴¹Un dau Tuhan mipa ia: “Marta, Marta, lesau tekaʹ keʹ ikoʹ, moʹ janga tawai hoʹ, ngan bubo seʹ koʹ neng kadoʹ puyan.

⁴²Bang ca tuaʹ le puyan iaʹ tekep lan. Moʹ un Mariam, lepa ne ia lemileʹ be iaʹ tiga, abeʹ keʹ ke sau ue neng ia.”