Read Wahau Kenyah LUKAS 16 Bible Online

LUKAS 16 - Wahau Kenyah bible

LUKAS 16

¹Un dau Yesus pelaʹa neng diaʹ bayaʹ katuk ke: “Un ca laki kayaʹ iaʹ un ca usa mantun, iaʹ ngkang amin ne. Kun dulu badaʹ me laki bioʹ ina moʹ iaʹ mantun ina ngebura ligit laki bioʹ ina.

²Kun laki bioʹ ina mengin iaʹ mantun ina are, kun dau ue neng ia: ‘Adeʹ ban pekini denga hoʹ iaʹ akeʹ kenahan? Peluhaʹ ne makeʹ surat ligit iaʹ badaʹ ban puyan gayeng ngkoʹ, moʹ abeʹ ne ikoʹ sukat ngkang amin nceʹ laʹa.’

³Kun iaʹ mantun ina pekimet neng ata ha tengen: ‘Buk laki bioʹ ini ke sau akeʹ neng gayeng ngkang amin ini, inu ke gayeng ngkeʹ uʹo ina nuʹo? Abeʹ keʹ pali ke macun. Saʹe pe akeʹ ke tai nyat tuaʹ le neng dulu.

⁴Ahaʹ pekini ne akeʹ ia ʹo, tisen te akeʹ pe inu iaʹ akeʹ ke uyan, apan kadoʹ dulu ke pepanak ngan nceʹ ʹo, ngan alaʹ akeʹ kedalem amin nte buk keʹ ke pesau neng gayeng amin ini ʹo.’

⁵“Sulo kun ne mengin mung diaʹ un utang neng laki bioʹ idai. Un dau ue neng iaʹ ading ading: ‘Kudaʹ kadoʹ utang ngkoʹ neng laki bioʹ ini are?’

⁶Un dau ina mpia ia: ‘Ca ato tubeng kenyo ampang.’ Penco dau ue neng ia: ‘Alaʹ ne surat utang ngkoʹ ne, madung ne ngan nyurat bang lema puloʹ le.’

⁷Lepa ina un dau ue neng ca laʹa: ‘Ikoʹ ini, kudaʹ utang ngkoʹ are?’ Un dau ina mipa ia: ‘Jelai gandum ca ato pikun.’ Un dau ue neng ia: ‘Alaʹ surat utang ngkoʹ ne, nyurat ne aya puloʹ le.’

⁸Kun laki bioʹ amin ina pada laki mantun iaʹ palui kimet ina kuʹun ban penudi ie. Moʹ dulu kusun tanaʹ ini tai pelapa tudi re neng pemuyan nte neng ʹo diaʹ mudip dalem dema.”

⁹Kun Yesus metuk tiraʹ ina laʹa: “Moʹ cen diaʹ pekina, dau heʹ mikem, kanan ne ligit ngan inu hem man ncem ke pepanak ngan dulu, apan ne buk inu hem tai muʹo cen ikem ʹo, Tuhan Allah ke nyelama alaʹ ikem kedalem surga ʹo.

¹⁰“Aheʹ iaʹ tudep neng puyan iaʹ iʹut, atek tudep lete ia keneng puyan iaʹ bioʹ. Aheʹ iaʹ are un penelit neng puyan iaʹ iʹut, atek ke are ke un penelit lete neng puyan iaʹ bioʹ.

¹¹Moʹ ina, buk kem are tudep diseʹ ke kanan kayaʹ kem kusun tanaʹ ini, aheʹ iaʹ ke ngelan ikem ke kanan pengekayaʹ iaʹ atek lan ina uʹo?

¹²Buk kem are tudep ke petubo inu dulu diaʹ ca, aheʹ iaʹ ke naʹ mikem inu iaʹ ikem ke un tengen ʹo?

¹³“Abeʹ ca usa ulaʹ senteng ke payo neng dua re tuʹa amin. Atek ke ke miʹi neng ca, ngan ke malaʹ a neng iaʹ ca mida dua. Buk ke ke kanan dau ca, atek ke ke muau dau ca. Abeʹ nyatan ncem ke ngulaʹ usa hem palaʹ Tuhan Allah peserengan ke ngulaʹ usa hem palaʹ ligit.”

¹⁴Uʹo Perisi dina kenahan ketoʹ dau katuk Yesus are, penco dau re ngetepet ia, moʹ ida tengen pe malaʹ laleʹ kaʹ neng ligit.

¹⁵Kun Yesus neng ida: “Mencam seʹ kem uyan diseʹ puyan ncem tai teneng kata taʹat kelunan, un sepuʹo Allah, ia tisen mung seʹ dalem kimet cem. Moʹ un iaʹ pelapa tiga dalem penaʹat kelunan, kuaʹ koʹ baʹan ca nek kata penaʹat Allah.

¹⁶“Un Katuk Adet Musa ngan surat mung pegawa Tuhan, idi senawan kelunan mudip pa kenai abeʹ Yaya Batis are. Uʹo ina nai luhaʹ Denga Injil neng puyan pengaren Allah ke ngaren kelunan, ngan mung dulu naseʹ ketai kedalem me.

¹⁷Melai laleʹ langit ngan tanaʹ ini ketai salai neng ʹo ca bute neng Katuk Adet Musa ketai pesau.

¹⁸“Aheʹ iaʹ petat ngan leto ho, ngan alaʹ leto diaʹ ca laʹa, atek ke petaro lete ina. Ngan aheʹ iaʹ ban alaʹ leto iaʹ ban petat ngan laki ie, atek ke petaro lete ina.”

¹⁹“Un ca laki kayaʹ iaʹ lemuto maren seʹ gelam me, ngan mudip lento dalem ketoʹ naʹan ne singket tau ne.

²⁰Un pelaʹa ca laki taru neng pengudip pe, mengaʹ lemuto-uto, ngadan ne Lasarus, iaʹ adoʹ puhu pa tipo usa ha. Ngan neng kelayan ne, dulu mahung ia tahaʹ awang neng lung pamen laki kayaʹ ina,

²¹moʹ o nebelum ke uman bute iaʹ laboʹ cen bijaʹ laki kayaʹ ina. Pincaʹ pe kenai asu nyilaʹ puhu ue pelaʹa.

²²“Ketai laki iaʹ taru ina matai, penco melikat ngkin ia kaʹ ukoʹ ladung Ibrahim pemung ngan ne. Un laki kayaʹ idai, matai pe ia laʹa. Penco tai re masek ia kaʹ liang nge.

²³Tuyen laleʹ ne tekaʹ laki kayaʹ idai kedalem lepoʹ kelunan matai. Cen penuyen ina kun ne nekadaʹ, penco ho taʹan seʹ Ibrahim cen coʹ, ngan Lasarus pata ngan ne.

²⁴Kun ne ngelengap: ‘Amai heʹ Ibrahim, lesau ne akeʹ ading, ngan cuk ne Lasarus apan ne mejep bulan ujoʹ o kedalem sungai, nidoʹ o dalem paʹ keʹ, idi ie sengim tekaʹ jelaʹ keʹ, moʹ tuyen laleʹ tekaʹ keʹ dalem aʹang luten ini.’

²⁵“Un sepuʹo dau Ibrahim: ‘Ahaʹ anak keʹ, petawai ne. Lepa ne ikoʹ alaʹ tulat iaʹ tiga dalau hoʹ mudip are. Dalau ina lete Lasarus lepa alaʹ tulat iaʹ jaʹat. Naʹkini nuʹo, bang bangen ngan saheʹ ne ia. Un sepe ikoʹ sihoʹ tuyen ne.

²⁶Pit pelaʹa un ca asep bioʹ neng ahang ilu, idi diaʹ tahaʹ ini, diaʹ ubaʹ ketai kina, abeʹ de senteng. Pekina pe diaʹ tahaʹ ina, abeʹ senteng kenai tahaʹ ini.’

²⁷“Un dau laki kayaʹ ina: ‘Buk pekina, dau heʹ ke lemameʹ palaʹ amai, kudaʹ pe ikoʹ cuk Lasarus tai kaʹ amin heʹ de,

²⁸moʹ lema re cenganak keʹ laki kina. Un baʹan le, ia badaʹ tugen le mida, malap ida kenai kaʹ ukoʹ iaʹ tuyen ini tegoʹ de matai ʹo.’

²⁹“Un dau Ibrahim: ‘Un te Kitap Musa ngan Kitap Pegawa Tuhan kata ida, ina iaʹ senteng ke mulen diaʹ cenganak koʹ dina. Tiga pe buk de kanan dau ue.’

³⁰Un dau laki kayaʹ ina pelaʹa: ‘Abeʹ nyatan ne ke pekina amai heʹ Ibrahim. Tugen ca usa iaʹ numpak mudip cen patai ie ketai palaʹ ida, ina le ida ke nesen, ngan nyepuleʹ kimet de ʹo.’

³¹“Un dau Ibrahim: ‘Buk de are dayo kanan dau Musa ngan diaʹ pegawa dina, abeʹ pe ida ke ngelan, naʹ pe ca usa ke numpak mudip cen patai ie.’ ”