Read Wahau Kenyah LUKAS 17 Bible Online

LUKAS 17 - Wahau Kenyah bible

LUKAS 17

¹Kun Yesus pisiu diaʹ bayaʹ katuk ke, kun ne: “Sematu un lete inu iaʹ ke pelaboʹ dulu kedalem penyalaʹ. Un sepuʹo, buk ca usa, mele aheʹ pe, iaʹ uyan kukoʹ dulu laboʹ dalem penyalaʹ, siʹau pe ia.

²Pelapa tiga neng kelunan ina buk dulu ke nelu ca batu piling iaʹ bioʹ neng batuk ke, penco pet ia kaʹ beluaʹ banget, cen ʹo ho ke pelaboʹ ca usa diaʹ lemaʹ pengudip pe kedalem penyalaʹ.

³Jagaʹ ne, singket usa hem. “Buk cenganak kem uyan penyalaʹ, pekatuk ke. Buk ke nyepuleʹ kimet, sau ue cen penyalaʹ a are.

⁴Buk ke yan penyalaʹ neng ikem tujoʹ liwai ca tau, ngan tujoʹ liwai lete nai ie ngeliwet palaʹ ikem, mentung kuma ha: ‘Akeʹ nyat lesau moʹ nesen tekaʹ keʹ,’ tekep kem sau ue cen penyalaʹ a.”

⁵Un dau diaʹ lawa Injil dina neng Tuhan: “Kudaʹ pe ikoʹ naʹ pit penyalet pengelan meʹ.”

⁶Kun dau Yesus: “Buk kem un puʹun pengelan koʹ bioʹ ca luang ampeʹ are, sukat cem kuma ha neng ca inan abung ini: ‘Pubit ne ikoʹ, tai mudip kaʹ banget.’ Atek ia ke bayaʹ te dau hem cuk.”

⁷“Buk aheʹ neng ahang ikem iaʹ un ca usa ulaʹ iaʹ macun tanaʹ, buk ke are mengau pakan ncem pe, masaʹ buk ulaʹ ina nai uleʹ cen uma, pamoʹ pe ikem kuma ha neng ia: ‘Baka, madung ne, uman ading.’

⁸Nyahut cem ke pekina dau ne, di lareʹ masaʹ kem ke kuma neng ia: ‘Mana makeʹ ading. Un ne sapai hoʹ, ngan pubo ne akeʹ, pa heʹ lepa uman ngan nisep. Uʹo ina le ikoʹ ke uman ngan nisep ʹo.’

⁹Abeʹ dulu titin nyuaʹ saheʹ neng ulaʹ de, moʹ tekep te ulaʹ bayaʹ dau iaʹ un ia.

¹⁰Pekina te ikem, buk kem uyan toʹ naʹan inu iaʹ akeʹ ke cuk, tekep lete ikem ke pekini dau: ‘Ameʹ dini bang ulaʹ tuaʹ le. Seʹ meʹ ti inu iaʹ tekep ameʹ ke uyan.’ ”

¹¹Dalem pengaset Yesus tai kaʹ Yerusalim, abeʹ e neng sahang tanaʹ Samaria ngan tanaʹ Galilia.

¹²Kina un ca lepoʹ iʹut. Dalau ketai ie kidi, un puloʹ usa diaʹ sakit bekayen petegoʹ ngan ne, diaʹ nekejeng cen coʹ.

¹³Kun nte ngelengap, Kun dau re: “Yesus, Guru, kudaʹ pe ikoʹ lesau ameʹ ading.”

¹⁴Kun Yesus taʹan ida, un dau ue neng ida: “Tai ne ikem palaʹ diaʹ detaʹu. Cuk ida nugen seʹ usa hem te.” Dalau ketai re masat, nyahin tai maget ne ida mung.

¹⁵Un ca mida, tegoʹ o tisen tekaʹ usa ha maget, penco kenai ie ngeliwet, mentung bioʹ dau ue pempau Allah.

¹⁶Sulo nai ie muʹup kata taket Yesus, mentung nge nyuaʹ tekaʹ saheʹ kimet te neng ia. Laki ina ca lepoʹ Samaria ha.

¹⁷Un dau Yesus: “Un puloʹ usa iaʹ lepa maget are. Kempi tai iaʹ piʹen usa laʹa?

¹⁸Adeʹ bang ca usa lepoʹ dulu ini le iaʹ nai ngeliwet ubaʹ ke pempau Allah?”

¹⁹Un dau Yesus neng laki ina laʹa: “Beteʹ ne, tai ne ikoʹ, moʹ pengelan ncoʹ lepa paget ikoʹ.”

²⁰Kun Perisi dina lemutu Yesus midan puyan pengaren Allah kenai luhaʹ. Penco ho mipa ida, kun dau ue: “Abeʹ le taʹan kenai puyan pengaren Allah dalem kelayan penaʹat le kelunan.

²¹Abeʹ un aheʹ tisen ke kuma ha: ‘Naʹat ne. Ini ban ne kini!’ buk are: Ina ha kina!’ moʹ naʹkini un te puyan pengaren Allah neng ahang ikem.”

²²Kun Yesus pisiu ida diaʹ bayaʹ katuk ke dina: “Atek un te tau ue ʹo, iaʹ ikem bampa tekaʹ ubaʹ ke taʹan kenai Anak Sio ini ʹo. Abeʹ nyatan, inu pia ca tau le.

²³Kun dulu badaʹ mikem ʹo: ‘Tai naʹat kina,’ ngan: ‘Nai naʹat kini,’ ayen ncem puke. Ayen bayaʹ dau re.

²⁴Moʹ koʹ baʹan dema bekilet pa tipo langit, pekina puyan Anak Sio ini neng tegoʹ tau ue ʹo.

²⁵Un sepuʹo kena ha ke nuyan ʹo, atek ke ke sihoʹ kadoʹ penuyen, ngan lepoʹ ini ke nyekang ia.

²⁶“Koʹ baʹan dalau tegoʹ sun udip Nuh cen naʹaʹ are, pekina lete tegoʹ ke kenai Anak Sio ini ʹo.

²⁷Pesulo tuaʹ ne dulu uman ngan nisep, ngiban ngan pekiban pa tegoʹ tau tai Nuh ngedung kedalem alut bioʹ o, penco kenai sungai pelempam nyalai mung kelunan dina.

²⁸Pekina pe, koʹ baʹan dalau sun udip Lut cen naʹaʹ, pesulo uman ngan nisep pe dulu, lemeli ngan pebeli, mula ngan medeng amin,

²⁹pa abeʹ neng tau kenai Lut kawang cen lepoʹ Sudum. Dalau ina kenai luten laboʹ, ngan baha luten diaʹ ngelanyau, koʹ baʹan ujan cen langit, pesalai ketoʹ kelunan dina.

³⁰Koʹ baʹan ina are lete neng tegoʹ tau Anak Sio ini ke nai luhaʹ ʹo.

³¹“Tegoʹ tau ina ʹo, aheʹ iaʹ un kusun sapau amin nte, ayen nai kentaʹ ke alaʹ inu ue iaʹ un kedalem amin. Ngan pekina pe diaʹ kaʹ uma te, ayen nai uleʹ.

³²Petawai ne leto Lut are.

³³Aheʹ iaʹ naten ke pedemun udip pe neng usun tanaʹ ini, udip pe ina te iaʹ durat ʹo. Ngan aheʹ iaʹ ke lebang ke pedurat udip pe, ia iaʹ ke un udip pe pabeʹ bayaʹ.

³⁴“Dau heʹ mikem, tegoʹ alem ina lete ʹo, un dua re usa luntoʹ dalem tilung. Un ca usa iaʹ Tuhan Allah ke magang, un ca iaʹ ke tenahung.

³⁵Un pelaʹa dua usa leto pemung mecaʹ. Un ca iaʹ Tuhan Allah ke magang, un ca iaʹ ke tenahung.

³⁶Un pe dua usa kaʹ uma te. Un ca iaʹ Tuhan Allah ke magang, un ca iaʹ ke tenahung.”

³⁷Lepa ne Yesus pisiu pekina, un dau diaʹ bayaʹ katuk ke lemutu ia, kun dau re: “Kaʹ mpi ina Tuhan?” Kun dau ue mipa ida: “Kempi un patai, kina sui pelaki ngaba seʹ.”