Read Wahau Kenyah LUKAS 18 Bible Online

LUKAS 18 - Wahau Kenyah bible

LUKAS 18

¹Kun Yesus ti ca kata katuk mida kina, apan nte lemameʹ lemuto, nga ayen tai puʹek tawai.

²Un dau ue: “Dalem ca lepoʹ, un ca laki iaʹ pebetep ukum. Abeʹ e takut neng Allah. Abeʹ pe ia nyingo kelunan.

³Dalem lepoʹ ina un ca leto balu iaʹ nai tesep tesep palaʹ ia, mentung dau ue nyat lesau: ‘Peteneng ne puyan nceʹ ading, neng ia iaʹ ubaʹ ke munan inu heʹ.’

⁴Majan laleʹ le laki pebetep ukum ina are nyingo dau ue. Tai kebayaʹ a, un dau ue kedalem kimet te selem: ‘Naʹ pe akeʹ abeʹ un takut neng Allah, ngan abeʹ pe akeʹ pesingo kelunan,

⁵un sepuʹo moʹ un leto balu ini, bayet nai le ia pemiat akeʹ, inu pia akeʹ peteneng ne ia ading, malap ketai kuʹo ho ia ke pelelat ceʹ ʹo.’ ”

⁶Kun dau Tuhan laʹa: “Ikem pekimet kumpin dau laki iaʹ pebetep ukum, iaʹ are telit ina.

⁷Moʹ abeʹ Allah iaʹ ke peteneng puyan kelunan diaʹ anun ne, diaʹ lemuto lemameʹ neng ia utung tau utung alem ne? Kumpin baʹan ncem, malun kaʹ a kenai mepo ida?

⁸Lan dau heʹ mikem, atek ke ke nyelarai ke peteneng puyan nte dina. Un sepuʹo, kumpin Anak Sio ini, un ne ke taʹan seʹ pengelan kusun tanaʹ ini tegoʹ ke kenai ie ʹo taʹin?”

⁹Kun Yesus badaʹ ca kata katuk laʹa me dulu diaʹ naʹ ida tengen le kaʹ teneng, mentung nte muau neng dulu diaʹ ca.

¹⁰Un dau Yesus: “Tai kun dua usa laki kedalem Umaʹ Palan Allah, tai re ke lemameʹ. Un ca usa Perisi, iaʹ tuʹa re neng Adet Yahudi, ngan un laʹa ca usa iaʹ jaʹat baʹan dau dulu, moʹ o nemo pupu.

¹¹Un laki Perisi ina nekejeng ngan lemameʹ mia tengen, un dau ue: ‘Ahaʹ Tuhan Allah, akeʹ nyuaʹ tiga saheʹ keʹ palaʹ ikoʹ, moʹ abeʹ keʹ koʹ baʹan kelunan diaʹ ca are, diaʹ tutun, ngan diaʹ are telit, ngan diaʹ pemung nyelem, pekina pe koʹ baʹan kelunan diaʹ nemo pupu ini are.

¹²Ake lemalan abeʹ un uman dua tau dalem ca mingku. Akeʹ naʹ ca tulat puloʹ penalan nceʹ mikoʹ.’

¹³Un sepuʹo laki iaʹ nemo pupu ina nekejeng cen coʹ te. Abeʹ e makang ke nekadaʹ kaʹ langit, bang seʹ e mepan usuk ke, mentung dau ue: ‘Ahaʹ Tuhan Allah, lesau ne akeʹ iaʹ kelunan penyalaʹ ini.’ ”

¹⁴Un dau Yesus laʹa: “Un iaʹ nemo pupu ina, tai ie uleʹ kaʹ amin ne, lepa tai teneng ne ia kuʹun Allah. Tengeca laleʹ laki Perisi ina. Moʹ mung dulu diaʹ ngempau ngadan nte tengen, ida iaʹ tai libaʹ ʹo. Un sepuʹo diaʹ ngelibaʹ ngadan nte tengen, ida iaʹ ke tai mpau ʹo.”

¹⁵Un palai nai ngkin anak dumit de palaʹ Yesus, moʹ de ubaʹ ia ke napoʹ ujoʹ o neng anak de. Kun diaʹ bayaʹ katuk Yesus taʹan seʹ puyan nte, penco re ngenca ida.

¹⁶Sulo Yesus mengin anak dina nai palaʹ ia. Un dau ue: “Pawang nai anak dina palaʹ akeʹ. Ayen mulen ida, moʹ aheʹ diaʹ koʹ baʹan dini are, ida diaʹ ke un puyan pengaren Allah ngaren ida.

¹⁷Lan dau heʹ mikem, aheʹ diaʹ abeʹ un ke alaʹ puyan pengaren Allah ngkang ida pekuaʹ koʹ baʹan ca anak dumit ina are, nyahut de senteng ketai kedalem puyan pengaren Allah ne.”

¹⁸Un ca laki paren Yahudi lemutu Yesus, un dau ue: “Ahaʹ Guru iaʹ tiga, inu iaʹ tekep akeʹ ke uyan, idi heʹ keʹ un udip saheʹ kelineʹ ʹo?”

¹⁹Kun Yesus neng ia: “Inu hoʹ naʹ akeʹ tiga tupe? Abeʹ un aheʹ tiga, pit Allah.

²⁰Lan lete ikoʹ tisen neng katuk ukum Allah iaʹ kuma ha: ‘Ayen nco petaro, ayen ncoʹ lematai kelunan, ayen ncoʹ ngelau, ayen ncoʹ palo, tunuk ne neng ueʹ ngan amai hoʹ.’ ”

²¹Un dau laki paren ina: “Mung katuk dina lepa ne akeʹ kanan ne cen tading iʹut ceʹ te.”

²²Uʹo Yesus kenahan dau ue ina, penco dau ue: “Un lepe ca puyan iaʹ tepa neng ikoʹ. Pebeli ne ketoʹ inu iaʹ un neng ikoʹ, ngan naʹ ne suaʹ a me diaʹ taru mudip, apan ncoʹ ke un kayaʹ dalem surga. Uʹo ina nai hoʹ bayaʹ akeʹ.”

²³Dalau ue kenahan dau pekina, bahat laleʹ ne tekaʹ kimet te, moʹ o kayaʹ laleʹ.

²⁴Yesus taʹan seʹ pengebahat tawai ie, un dau ue: “Mahan laleʹ le diaʹ kayaʹ ketai kedalem puyan pengaren Allah.

²⁵Masaʹ melai ca usa untaʹ tai kedalem lubang lo, neng ʹo ca kelunan kayaʹ ketai kedalem puyan pengaren Allah.”

²⁶Un diaʹ ngeringa dau Yesus kina lemutu ia: “Buk pekina, aheʹ le iaʹ sukat ke un udip dalem Tuhan ʹo?”

²⁷Kun dau Yesus: “Inu iaʹ kelunan are senteng ke uyan, senteng te ina neng Allah.”

²⁸Un dau Peterus: “Kumpin ne ameʹ dini ʹo, lepa ne ameʹ mecin amin meʹ moʹ nai bayaʹ ikoʹ?”

²⁹Dau Yesus mida: “Lan dau heʹ mikem, aheʹ diaʹ mecin amin nte, mecin leto re ngan cenganak de, pekina pe ueʹ de ngan amai re, ngan anak de; mecin ida suaʹ puyan pengaren Allah,

³⁰atek de ke alaʹ kadoʹ tempan suaʹ a neng pengudip de ini, ngan udip saheʹ kelineʹ iaʹ ngeriman dalem udip iaʹ kenai ʹo.”

³¹Kun Yesus ngkin puloʹ dua usa diaʹ bayaʹ katuk ke didai tai nengen. Un dau ue neng ida: “Ayen ncem tai talu. Ini ketai le kaʹ Yerusalim ini. Mung puyan iaʹ ban pegawa Tuhan lepa nyurat suaʹ akeʹ iaʹ Anak Sio ini, ketai ie palup lete kaʹ Yerusalim ʹo.

³²Moʹ dulu ke mencai heʹ me lepoʹ diaʹ ca, diaʹ ke pelunyeʹ akeʹ, ngan diaʹ ke ngejaʹat dau neng akeʹ, ngan lemulaʹ akeʹ ʹo.

³³Un pelaʹa ida ke lemeta heʹ ʹo, ngan ke lematai akeʹ. Un sepuʹo neng tau iaʹ ketelu ue, kenai heʹ numpak mudip pelaʹa.”

³⁴Un nte diaʹ bayaʹ katuk ke dina, peletoʹ de are tisen sen tiraʹ ina. Sen tiraʹ ina suhuk neng ida. Nyahut de tisen dau Yesus ne.

³⁵Dalau nai Yesus nyeng kata lepoʹ Yeriko, un ca laki butaʹ madung kaʹ sada janan, iaʹ nyat nyat inu.

³⁶Kun ne kenahan dau kahi kahi dulu tai lapa ia, kun ne lemutu: “Inu ne tupe?”

³⁷Un dau dulu mipa ia: “Moʹ Yesus lepoʹ Nasarit kenai lapa kini.”

³⁸Penco ho ngelengap, un dau ue: “Yesus Anak Daut, lesau ne akeʹ ading.”

³⁹Un diaʹ masat tahaʹ tena Yesus penceng ia, cuk ia pekenaʹ pisiu. Bang uyan ukoʹ o bioʹ kuʹo dau ngelengap: “Anak Daut, lesau ne akeʹ ading.”

⁴⁰Ina ukoʹ Yesus pekenaʹ, mentung nge cuk dulu nai ngkin laki butaʹ ina palaʹ ia. Lepa nyeng ne ia, kun Yesus lemutu ia:

⁴¹“Inu iaʹ ikoʹ ubaʹ akeʹ ke uyan neng ikoʹ?” Un dau ue: “Ahaʹ Tuhan, pengenyat ceʹ ke taʹan laʹa.”

⁴²Un dau Yesus neng ia: “Naʹat ne. Pengelan ncoʹ iaʹ paget ikoʹ.”

⁴³Dalau ina lete ia taʹan, penco tai ie bayaʹ Yesus, mentung nge nyuaʹ tiga saheʹ palaʹ Allah. Dalau dulu diaʹ kadoʹ dina taʹan puyan ina, mung nte pempau Allah.