Read Wahau Kenyah LUKAS 19 Bible Online

LUKAS 19 - Wahau Kenyah bible

LUKAS 19

¹Tai Yesus abeʹ kaʹ lepoʹ Yeriko, ubaʹ ke menco asat te dalau lepoʹ ina.

²Un ca laki ngadan ne Sakius, pengebioʹ diaʹ nemo pupu, ngan kayaʹ pe ia.

³Kun ne ten ke nyekeduk kumpin seʹ Yesus ina. Abeʹ e senteng taʹan ia, moʹ o buʹet, ngan kadoʹ dulu tahaʹ tena.

⁴Penco tai ie ngasa mabat tahaʹ tena, ngan laket ca inan abung, apan ne taʹan Yesus, moʹ cen ina ketai Yesus lapa ʹo.

⁵Dalau ketai Yesus abeʹ kukoʹ o kina, kun ne nekadaʹ naʹat Sakius, penco dau ue neng ia: “Sakius, nai ne kentaʹ nyelarai. Moʹ tegoʹ tau ini atek keʹ ke ngelineʹ kaʹ amin ncoʹ.”

⁶Sangkit kenai Sakius kentaʹ, selama dau ue alaʹ Yesus ngan bangen tawai.

⁷Mung dulu diaʹ taʹan seʹ puyan ina, kuheng kuheng ke dau re: “Adeʹ e tai tudo neng amin kelunan penyalaʹ.”

⁸Dalau ina kenai Sakius beteʹ, penco dau ue neng Tuhan: “Ahaʹ Tuhan, kuaʹ tulat inu heʹ akeʹ kenaʹ me diaʹ taru mudip. Buk keʹ ban ngebuyuk inu dulu, akeʹ ke naʹ ngeliwet pat liwai pengekadoʹ o.”

⁹Un dau Yesus neng ia: “Tau ini, udip iaʹ keniga udip dalem Tuhan un palaʹ amin ini, moʹ ia ini ca usa iaʹ cen mela Ibrahim iaʹ ban lingu.

¹⁰Moʹ ini iaʹ ukoʹ Anak Sio ini ban nai, tuman ubaʹ ke mita ngan pudip iaʹ lingu.”

¹¹Ketai nyeng Yesus kaʹ lepoʹ Yerusalim. Un tekaʹ diaʹ kadoʹ dina ngihoʹ kena ke kenai puyan pengaren Allah luhaʹ ke ngaren kelunan tegoʹ ina. Ina ukoʹ Yesus badaʹ ca kata katuk me diaʹ ngeringa didai.

¹²Pekini dau Yesus: “Un ca laki paren iaʹ ketai neng ca lepoʹ iaʹ coʹ, apan ne nuyan paren bioʹ kina. Uʹo ina, nai kun ne uleʹ pelaʹa ʹo.

¹³Kena ke ketai laki paren ina puke tai kaʹ lepoʹ iaʹ coʹ, kun ne mengin puloʹ usa ulaʹ a, penco ho naʹ ca liʹap ligit mat me singket usa re. Un dau ue neng ida: ‘Ngajan nceʹ are un, ikem kanan ne, mele kudaʹ kenai pit te, iaʹ ikem ke alaʹ ban kuʹun ne.’

¹⁴Uʹo tai ie mecin, un diaʹ atek lepoʹ o miʹi re neng ia. Ina ukoʹ de cuk kudaʹ usa lawa re tai bayaʹ ia, ke kuma ha: ‘Abeʹ meʹ ubaʹ laki ini ke ngaren ameʹ laʹa.’

¹⁵“Tai lepa laki paren ina nuyan paren bioʹ, nai kun ne uleʹ. Penco ho mengin mung nte diaʹ ulaʹ a dina, iaʹ ukoʹ o mahung ligit mat te are, nai palaʹ ia apan ne tisen kudaʹ ban bang nte neng ʹo ligit mat didai.

¹⁶Nai kun iaʹ ading kata ia. Un dau ue: ‘Ahaʹ amai, ligit mat coʹ iaʹ ca liʹap idai, un ban nai pit te ca puloʹ liʹap.’

¹⁷Kun dau laki paren ina: ‘Tiga te, ikoʹ ca ulaʹ iaʹ tiga. Moʹ ikoʹ iaʹ tudep dalem puyan iaʹ iʹut, akeʹ ke cuk koʹ ke ngkang ca puloʹ lepoʹ ʹo.’

¹⁸“Nai kun ulaʹ iaʹ kedua kata ia. Un dau ue: ‘Ahaʹ amai, ligit mat coʹ iaʹ ca liʹap idai, un ban nai pit te lema liʹap.’

¹⁹Un dau laki paren ina neng ia: ‘Ikoʹ lete ke ngkang lema lepoʹ puʹo.’

²⁰“Nai kun ca laʹa kata ia, un dau ue: ‘Ahaʹ amai, ini ligit mat coʹ iaʹ ca liʹap idai. Akeʹ pedemun ne dalem bireng ini, moʹ keʹ nyuhuk ke.

²¹Moʹ keʹ takut ikoʹ, uban ncoʹ ca laki iaʹ tutun, ngan ikoʹ alaʹ inu iaʹ are anun ncoʹ, ngan majau iaʹ ikoʹ are mula.’

²²Kun dau laki paren ina neng ia: ‘Ikoʹ ulaʹ iaʹ jaʹat. Cen dau isiu hoʹ tengen ne akeʹ ke pebetep ukum me ikoʹ. Un te ikoʹ tisen, akeʹ ca laki iaʹ tutun, iaʹ ke alaʹ inu iaʹ are anun nceʹ, ngan ke majau iaʹ akeʹ are ban mula.

²³Moʹ inu hoʹ are mahung ligit ceʹ kukoʹ dulu pasat ligit te, idi tegoʹ keʹ nai uleʹ, sukat ceʹ alaʹ a ngeliwet peging ngan ban bang nge.’

²⁴Penco dau laki paren ina neng diaʹ nekejeng pipa ia kina: ‘Tai ne ikem alaʹ ligit mat ina neng ia. Naʹ a me laki iaʹ un ca puloʹ liʹap ina.’

²⁵Un dau re neng ia: ‘Kumpin amai, lepa un ne ca puloʹ liʹap anun ne.’

²⁶“Un dau laki paren ina: ‘Lan dau heʹ mikem, aheʹ iaʹ mencam petubo inu, atek ke un pit te pelaʹa. Un sepuʹo aheʹ iaʹ are mencam petubo inu, atek ke pesau inu iaʹ ban un neng ia.

²⁷Naʹkini ubaʹ keʹ ke tisen mung bunoʹ keʹ diaʹ are ubaʹ akeʹ ke ngaren ida. Ngkin nte kaʹ ini, ngan lematai re kata akeʹ ne.’ ”

²⁸Lepa Yesus pekina dau, tai kun ne kaʹ Yerusalim nekena neng ida.

²⁹Dalau ketai re nyeng abeʹ lepoʹ Bit-pagi, ngan lepoʹ Bitani kata Mudung Ampang, kun ne cuk dua usa diaʹ bayaʹ katuk ke dina tai tahaʹ tena.

³⁰Un dau ue: “Tai ne ikem dua kaʹ lepoʹ iaʹ tahaʹ tena ikem kina. Tegoʹ kem tai kedalem lepoʹ ina, ikem ke taʹan ca anak keledai manai iaʹ tenelu. Abeʹ lepe dulu tai ngedung neng ia. Tiga hem mubai telu ue, ngkin ne kaʹ ini.

³¹Buk dulu lemutu ikem: ‘Moʹ inu hem tai mubai telu ue tupe?’ pekini dau hem: ‘Moʹ Tuhan iaʹ ubaʹ ke kanan ia.’ ”

³²Tai kun diaʹ ia cuk didai, penco re taʹan lan koʹ baʹan dau Yesus are.

³³Dalau re mubai telu anak keledai ina, un dau diaʹ un ia: “Moʹ inu hem mubai telu anak keledai ina tupe?”

³⁴Un dau re neng ida: “Moʹ Tuhan iaʹ ubaʹ ke kanan ia.”

³⁵Penco re ngkin anak keledai ina palaʹ Yesus. Kun nte medat sapai re neng usun likut pun ina. Kun nte padung Yesus neng usun ia.

³⁶Dalau ketai Yesus masat, kun dulu medat sapai re neng usun janan, senap pe tai.

³⁷Dalau ketai ie nyeng ke abeʹ kaʹ Yerusalim, kaʹ janan puno neng ihang Mudung Ampang, kadoʹ laleʹ ban diaʹ bayaʹ katuk Yesus kina. Dalau ina lete tading tai bioʹ dau re nyuaʹ tiga saheʹ de palaʹ Allah, ngan bangen tawai re pempau Allah kuʹun mung puyan nyingan iaʹ ida taʹan.

³⁸Mentung dau re: “Pempau ne laki paren iaʹ nai dalem ngadan Tuhan. Un udip tadan dalem surga, ngan serema peniga Allah kukoʹ iaʹ atek mpau.”

³⁹Neng ahang dulu diaʹ kadoʹ dina un pe palai Perisi diaʹ bioʹ dau pisiu Yesus, un dau re: “Guru, penceng ne ida diaʹ bayaʹ katuk koʹ.”

⁴⁰Un dau Yesus mipa ida kuma: “Lan dau heʹ mikem, buk de ke pekenaʹ, atek batu dini iaʹ ke lemaloʹ.”

⁴¹Dalau ketai ie nyeng kaʹ lepoʹ Yerusalim, penco ho nange taʹan diseʹ e.

⁴²Mentung dau ue: “Awaʹ ne buk ke tau ini te ikoʹ tisen puyan iaʹ ke ngkin tadan udip mikoʹ. Un sepuʹo naʹkini, abeʹ koʹ senteng dapit kidi.

⁴³Moʹ ke un te tau iaʹ kenai sihoʹ ikoʹ. Dalau ina diaʹ bunoʹ koʹ ke ngawen teliling ikoʹ, iaʹ ke meput ikoʹ. Ida ke ngesen ncoʹ ʹo.

⁴⁴Ida ke lemasi hoʹ, pa hoʹ salai peging ngan kelunan diaʹ tahaʹ dalem kerahan ncoʹ. Pabeʹ ca batu pe abeʹ un tekuduk dalem ikoʹ oʹ, uban ncoʹ abeʹ un putuk jakaʹ kenai Allah ngkin udip mikoʹ.”

⁴⁵Ketai Yesus kedalem Umaʹ Palan Allah, penco ho pekarap dulu diaʹ pebeli ngan lemeli kina,

⁴⁶mentung dau ue neng ida: “Dau Allah iaʹ ban un dalem Kitap: ‘Amin nceʹ tekep kukoʹ dulu lemameʹ akeʹ.’ Belekaʹ ikem uyan ne ukoʹ bekelau tai pekelem.”

⁴⁷Singket tau ne Yesus pekatuk kedalem Umaʹ Palan Allah ina. Un diaʹ detaʹu lataʹ ngan guru Adet Yahudi, peging ngan diaʹ pengencam lepoʹ ina, mita janan ke lematai ia.

⁴⁸Un sepuʹo abeʹ de mencam, moʹ ketoʹ dulu ubaʹ ngelenep ke ngeringa dau Yesus, moʹ de ubaʹ ke kanan singket luʹung isiu ue.