Read Wahau Kenyah LUKAS 23 Bible Online

LUKAS 23 - Wahau Kenyah bible

LUKAS 23

¹Mung nte neng Mpun diaʹ Lataʹ dina beteʹ, penco tai ngkin Yesus palaʹ Pilatus.

²Kina ne tading nte mekem salaʹ neng ia, kun dau re: “Un laki ini, ameʹ dakep ia moʹ o pelingu lepoʹ meʹ. Ia mulen pe dulu naʹ ligit pupu me Laja Kaisar, ngan ia badaʹ usa ha tengen ca laja iaʹ atek ngkang pungu udip kelunan.”

³Un dau Pilatus lemutu Yesus, kun ne: “Ikoʹ iaʹ laja lepoʹ Yahudi tupe?” Un dau Yesus mipa ia: “Ahaʹ, koʹ baʹan dau hoʹ ne lete.”

⁴Tai kun Pilatus pisiu ida detaʹu lataʹ peging mpun dulu kina: “Lepa ne akeʹ nugen laki ini. Abeʹ un tekep le ke mekem salaʹ neng ia.”

⁵Un sepuʹo taten laleʹ dau re neng Pilatus, kun nte: “Ia kepekasing lepoʹ ini man katuk ke. Tading nge ia uyan kaʹ Galilia. Uʹo ina tai ie abeʹ kaʹ Yudia. Naʹkini abeʹ kaʹ ini ne.”

⁶Dalau Pilatus kenahan dau re pekina, penco ho lemutu, un dau ue: “Lan te laki ini lepoʹ Galilia tupe?”

⁷Cen ina tading Pilatus tisen ban Yesus nai cen tanaʹ iaʹ dalem gaham Herudis, sulo ho cuk ida ngkin Yesus tai palaʹ Herudis, iaʹ dalau ina un kaʹ Yerusalim.

⁸Dalau Herudis taʹan Yesus, bangen laleʹ tekaʹ a moʹ lepa majan ne ia kenahan dau denga ha, ngan ubaʹ kaʹ a ke taʹan ia. Ngan un tebelum pe Herudis ke taʹan ca puyan nyingan cen Yesus.

⁹Ina ukoʹ kadoʹ naʹan dau Herudis lemutu Yesus. Pabeʹ ca luʹung isiu pe, Yesus are mipa dau ue.

¹⁰Nai kun diaʹ detaʹu lataʹ dina beteʹ, pekina pe diaʹ guru Adet Yahudi nekejeng, ngan miʹa dau re mekem salaʹ me Yesus.

¹¹Kun Herudis ngan diaʹ sedadu ue nekaheʹ dau neng Yesus, ngan taro dau re neng ia puʹo. Kun nte cuk ia un sapai diaʹ maren diseʹ, sulo re ngkin ia ngeliwet palaʹ Pilatus.

¹²Tegoʹ tau ina ne Herudis ngan Pilatus tading un tiga saheʹ neng ida selepeʹ. Cen kena ida dua pekesuk bulu.

¹³Kun Pilatus mengin diaʹ detaʹu lataʹ, ngan diaʹ lataʹ lepoʹ, peging ngan dulu diaʹ kadoʹ, nai pempun kina.

¹⁴Un dau Pilatus mida: “Ikem ngkin laki ini palaʹ akeʹ, ngan kuma ia pelingu lepoʹ ini. Naʹkini lepa ne akeʹ nugen dau ue kata ikem mung. Abeʹ un ca penyalaʹ a iaʹ akeʹ tisen neng laki ini, koʹ baʹan dau salaʹ iaʹ ikem mekem neng ia are.

¹⁵Pekina pe Herudis abeʹ pia tisen penyalaʹ Yesus. Ina ukoʹ Herudis naʹ ia ngeliwet palaʹ ilu. Abeʹ un ca inu iaʹ tekep kukoʹ laki ini ke matai.

¹⁶Moʹ ina, naʹkini akeʹ ke lemeta ha, penco nakau ia.” [

¹⁷Moʹ singket tegoʹ tau bioʹ adet Paska, iaʹ ina adet Menting Patai, kelayan ne Pilatus nakau ca usa iaʹ ban sepin mida lete.]

¹⁸Mung dulu ina ngelengap, kun nte: “Lematai ne ia. Nakau Barabas mameʹ.”

¹⁹(Moʹ un Barabas ina ca laki iaʹ ban sepin suaʹ a ngkin dulu kasing dalem lepoʹ, ngan moʹ o ban lematai kelunan.)

²⁰Moʹ Pilatus ubaʹ ke nakau Yesus, ina ukoʹ o ti dau ue me diaʹ kadoʹ kina ca liwai laʹa.

²¹Un sepuʹo bioʹ dau re kuma ha: “Lematai ne ia neng kayu tecek.”

²²Neng ketelu liwai ie Pilatus pisiu ida: “Inu penyalaʹ laki ini tupe? Nyahut ceʹ taʹan ia un ca penyalaʹ iaʹ tekep ukoʹ o ke matai ne. Seʹ keʹ ke lemeta ia ne ini, penco nakau ia.”

²³Bioʹ kuʹo ke dau re nyat ke napek Yesus neng kayu tecek. Abeʹ un tai beto dau re lemikaʹ, ina ukoʹ tai kuʹo ho Pilatus mayo ida re.

²⁴Kun Pilatus pebetep bayaʹ dau pengubaʹ de.

²⁵Sulo Pilatus nakau Barabas bayaʹ dau pengenyat de, laki iaʹ ban sepin suaʹ ban ngkin dulu kasing dalem lepoʹ, ngan ban lematai kelunan. Un sepuʹo Yesus ne, Pilatus naʹ ia bayaʹ dau pengubaʹ dulu kina.

²⁶Dalau ketai re masat ngkin Yesus, ida selalang ngan ca laki lepoʹ Kirini, ngadan ne Simun, iaʹ ban nai cen tanaʹ coʹ, nai nyakai lepoʹ ina. Kun nte mapo ia, sulo re cuk ia nyuʹun kayu tecek ina, ngan tai ngkin ne bayaʹ Yesus.

²⁷Kadoʹ laleʹ le dulu pempun tai bayaʹ Yesus. Un pe kudaʹ usa leto neng ahang ida diaʹ nange ngan nyidau ia.

²⁸Kun Yesus nyileʹ palaʹ leto dina. Un dau ue: “Ahaʹ anak leto lepoʹ Yerusalim ayen ncem nange bampa akeʹ. Nange ne mikem tengen, ngan me anak kem.

²⁹Moʹ atek ke un te tau ue kenai uʹo, iaʹ dulu ke kuma ha: ‘Saheʹ tawai ne leto diaʹ lua diaʹ abeʹ un tisen lemaleʹ, ngan iteʹ diaʹ abeʹ un ngiteʹ anak.’

³⁰Dalau ina dulu ke lemikaʹ neng mudung bila batu ke kuma ha: ‘Nai ne mencit ameʹ.’ Ngan pekina pe dau re neng mudung: ‘Nai ne nampun ameʹ.’

³¹Buk ne pekini puyan nte neng akeʹ iaʹ ukoʹ baʹan inan kayu mudip, laleʹ pelaʹa neng ikem diaʹ ukoʹ baʹan kayu maʹang ʹo.”

³²Un pe dulu ngkin dua usa laki diaʹ ca, diaʹ ban pepuk penyalaʹ, ke lematai ida dua serengan ngan Yesus.

³³Lepa re abeʹ kukoʹ iaʹ ngadan ne Tekahing, kina re napek Yesus neng kayu tecek, serengan ngan dua usa diaʹ ban pepuk kuʹun penyalaʹ didai, ca usa tahaʹ taʹu ia, ngan ca usa tahaʹ kabing ia.

³⁴Sulo dau Yesus lemameʹ: “Amai, sau ne penyalaʹ kelunan dini, moʹ abeʹ de tisen inu iaʹ ida uyan. Kun nte pegan petulat gelam Yesus.

³⁵Kadoʹ diaʹ lepoʹ ina nekejeng naʹat, mentung diaʹ lataʹ lepoʹ Yahudi dina pelunyeʹ Yesus, un dau re: “Un dulu diaʹ ca, ia pudip de. Mele pe kumpin seʹ e pudip usa ha tengen, buk lan ne Keristus iaʹ ngkang pungu udip, iaʹ atek tenileʹ Tuhan Allah.”

³⁶Un pelaʹa sedadu kina pelunyeʹ Yesus, mentung nte naʹ telang anggur mesem mia.

³⁷Un dau re: “Buk koʹ laja lepoʹ Yahudi, pudip ne usa hoʹ tengen.”

³⁸Un pe ban nte nyurat tahaʹ mpau ia, iaʹ pekini dau ue: “Ini ne laja lepoʹ Yahudi.”

³⁹Un ca usa mida dua diaʹ pepuk kuʹun penyalaʹ, iaʹ kediding kina, ngejaʹat dau neng Yesus, kun ne: “Moʹ abeʹ ikoʹ ini Keristus iaʹ ngkang pungu udip tupe? Pudip ne usa hoʹ tengen peging nan meʹ.”

⁴⁰Un dau iaʹ ca mida dua mulen ia, kun dau ue: “Moʹ abeʹ koʹ takut Allah tupe? Moʹ mung telu te iaʹ sihoʹ ukum ini.

⁴¹Tekep te tua sihoʹ ukum moʹ suaʹ ban puyan jaʹat tua. Un sepuʹo laki ini, nyahut un puyan ne iaʹ salaʹ.”

⁴²Un dau ue neng Yesus pelaʹa: “Ahaʹ Yesus, kudaʹ pe ikoʹ petawai akeʹ tegoʹ koʹ nai dalem pengaren ncoʹ ʹo.”

⁴³Un dau Yesus neng ia: “Lan dau heʹ mikoʹ, tau ini lete ikoʹ ke pemung ngan nceʹ kaʹ lasan selawan te.”

⁴⁴Tegoʹ beluaʹ tau ina, tai pataʹ mata tau, sulo ho mentem pa tipo tanaʹ ina, pa abeʹ jam telu tai tahup.

⁴⁵Un nting sahang, iaʹ ngediding dalem Umaʹ Palan Allah, pepak dua.

⁴⁶Sulo kun Yesus ngelengap ngan bioʹ dau ue: “Ahaʹ Amai, kedalem gaham ngkoʹ akeʹ pelek berua heʹ.” Lepa ha pekina dau, ina tai tepo laset te.

⁴⁷Dalau pengebioʹ sedadu ina taʹan seʹ puyan ina, kun ne pempau Allah, un dau ue: “Lan laleʹ laki ina iaʹ atek buheʹ.”

⁴⁸Ketoʹ dulu diaʹ lepa ban pempun ngan naʹat puyan ina, lepa re taʹan ne ina, tai re uleʹ mung, mentung nte mepan usuk de cen salam tekaʹ de.

⁴⁹Ketoʹ de diaʹ malai ngan Yesus, peging ngan kudaʹ usa leto diaʹ ban nai bayaʹ ia cen Galilia are, bang nekejeng cen coʹ ne, naʹat mung seʹ puyan ina.

⁵⁰Un ca laki ngadan ne Yusup, ca usa Yahudi lepoʹ Arimatia. Un Yusup ina ca laki iaʹ tiga ngan telit kimet, iaʹ mengaʹ ke kenai puyan pengaren Allah. Naʹ pe Yusup ca usa iaʹ neng Mpun diaʹ Lataʹ are, un sepuʹo abeʹ e payo ngan nte dalau re pebetep puyan nte dina.

⁵¹

⁵²Tai kun Yusup kata Pilatus nyat patai Yesus.

⁵³Sulo tai ie alaʹ patai ina kentaʹ, ngan lemino ia man apeʹ puteʹ iaʹ memut. Uʹo ina, kun ne mahung patai ina kedalem liang batu, iaʹ ban dulu lepa ngelubang man pengepoʹ. Abeʹ un aheʹ iaʹ kanan ne lepe.

⁵⁴Un tau ina Tau Kelema, dalau dulu petenup keneng Tau Kelineʹ.

⁵⁵Dalau ina, nai pe ketoʹ leto diaʹ ban nai tugung Yesus cen Galilia are, nai bayaʹ Yusup naʹat liang ina, ngan kumpin seʹ de ke mahung patai Yesus kedalem me.

⁵⁶Tai re ngeliwet kaʹ amin nte, ngan petenup kudaʹ naʹan kemanyan, ngan naʹan naʹan kenyo diaʹ me baʹoʹ, ke naʹ a neng patai Yesus. Ketai ie sihoʹ Tau Kelineʹ, ina re mukoʹ bayaʹ dau ban Katuk Adet Musa.