Read Wahau Kenyah LUKAS 4 Bible Online

LUKAS 4 - Wahau Kenyah bible

LUKAS 4

¹Nai Yesus uleʹ cen sungai Yardin. Sangan ne kuʹun Berua Buheʹ. Penco Berua ina tai ngkin ia kaʹ tanaʹ lenga.

²Pat puloʹ tau majan ne Bali ten Yesus kaʹ ina. Toʹ majan ina abeʹ un ca inu ia uman. Laʹu ne ia.

³Un dau Bali ina neng ia: “Buk lan ncoʹ Anak Allah, cuk batu ini ngaliu penguman.”

⁴Kun Yesus mipa ia: “Un dau dalem Kitap iaʹ kuma ha: ‘Abeʹ e bang kuʹun penguman tuaʹ le kelunan ke senteng mudip.’ ”

⁵Tai kun Bali ina ngkin Yesus neng ukoʹ iaʹ tumau. Kidi ie peluhaʹ mia mung puyan pengaren kaʹ usun tanaʹ ne nuat le.

⁶Un dau Bali neng ia: “Me ikoʹ keʹ ubaʹ kenaʹ mung penyukat ini peging peniga ha. Moʹ mung dini pelek palaʹ akeʹ are. Sukat ceʹ ke naʹ a me aheʹ iaʹ ukoʹ keʹ ubaʹ ke naʹ a.

⁷Ketoʹ dini, ikoʹ ke un ne, buk koʹ ke sutlep palaʹ akeʹ.”

⁸Un Yesus mipa ia: “Dau dalem Kitap: ‘Nyelama palaʹ Tuhan iaʹ Tuhan Allah hem. Bang palaʹ ia le ikem ke tunuk.’ ”

⁹Tai kun Bali ngkin Yesus kaʹ Yerusalim, ngkin ia kaʹ belubung Umaʹ Palan Allah. Un dau ue neng ia: “Buk lan ncoʹ Anak Allah, pelaboʹ ne usa hoʹ cen mpau ne.

¹⁰Moʹ un dau dalem Kitap: ‘Allah ke cuk melikat te kenai petubo ikoʹ tiga le.’

¹¹Ngan laʹa dau dalem Kitap: ‘Melikat dina ke nahak ikoʹ man ujoʹ de, malap taket coʹ ketai pegoʹ neng batu.’ ”

¹²Un dau Yesus mipa ia: “Un dau dalem Kitap: ‘Ayen ncem ten Tuhan iaʹ Tuhan Allah hem.’ ”

¹³Lepa Bali ina pesukung ketoʹ naʹan pengeten ne neng Yesus, tai ie ngerada Yesus pawang kediʹut de.

¹⁴Uʹo ina tai Yesus ngeliwet kaʹ tanaʹ Galilia. Un ban penyukat Berua Buheʹ tugung ia. Tai libut ne denga ha pa tipo dale ina.

¹⁵Kun ne pekatuk singket amin sebayang Yahudi kaʹ dale ina, ngan mung dulu pempau Yesus ne.

¹⁶Uʹo ina tai kun Yesus abeʹ kaʹ lepoʹ Nasarit, kukoʹ o ban mudip cen dalau ue iʹut te. Tegoʹ Tau Kelineʹ, tai ie kedalem amin sebayang Yahudi, koʹ baʹan kelayan ne. Kun ne nekejeng ke baca surat.

¹⁷Kun ca laki mencai Kitap Pegawaʹ Yesaya mia. Kun Yesus mesik Kitap ina, mita isiu surat iaʹ pekini dau ue:

¹⁸“Un Berua Tuhan neng akeʹ. Lepa ne ia nedanaʹ akeʹ, cuk akeʹ badaʹ Denga Tiga palaʹ dulu diaʹ taru mudip. Ngan pekina pe cuk akeʹ nai badaʹ denga nakau dulu diaʹ salut, ngan mesik mata diaʹ butaʹ, ngan sau dulu diaʹ ban pencit,

¹⁹ngan badaʹ ca awang iaʹ tiga, ukoʹ dulu nai alaʹ udip dalem Tuhan.”

²⁰Kun Yesus lemelen Kitap ina, naʹ a uleʹ palaʹ laki iaʹ nubo surat ina, kun ne madung pelaʹa. Mung dulu dalem amin sebayang Yahudi ina menu naʹat ia.

²¹Un dau Yesus laʹa: “Tau ini palup ne dau isiu Kitap ini, dalau hem ngeringa ha ʹo re.”

²²Ketoʹ dulu kina alaʹ dau ue, ngan muʹo tawai ne ida kenahan dau peniga isiu ue. Kedau re: “Moʹ abeʹ ini anak Yusup tupe?”

²³Un dau Yesus neng ida: “Masaʹ kem ke kuma ha neng akeʹ, alaʹ kata pekini dau: ‘Duktun, paget ne usa hoʹ.’ Masaʹ kem pekini dau neng akeʹ pelaʹa: ‘Inu iaʹ ameʹ kenahan ikoʹ ban uyan kaʹ Kapernaum ina, ikoʹ uyan pelaʹa kedalem lepoʹ koʹ ne.’ ”

²⁴Un pelaʹa dau Yesus: “Lan dau heʹ badaʹ mikem, cen kena ne dulu are nyelama pegawa diaʹ dalem lepoʹ o tengen.

²⁵Lan te, kadoʹ leto balu neng ahang diaʹ lepoʹ Israil dalau udip Ilia, jinan tagaʹ dalem telu uman nem bulan are, pa kenai ca lien bioʹ pa tipo tanaʹ ini.

²⁶Naʹ pia pekina, abeʹ Tuhan cuk Ilia tai palaʹ leto balu lepoʹ Israil, bang palaʹ ca leto balu kaʹ lepoʹ Saripat kaʹ tanaʹ Sidun tai ie.

²⁷Dalau udip pegawa Ilisa pelaʹa, kadoʹ dulu diaʹ sakit bekayen kaʹ lepoʹ Israil, ngan abeʹ un ca usa iaʹ tai maget, bang Naaman lepoʹ Siria ina le.”

²⁸Ketoʹ diaʹ dalem amin sebayang Yahudi ina are, miʹa laleʹ ne ida kenahan dau tiraʹ Yesus ne.

²⁹Sulo re beteʹ pampo Yesus menat ia, ngkin ia kaʹ awang lepoʹ neng ca ulu bila, kukoʹ lepoʹ ina. Un ban kimet de ubaʹ ke pelaboʹ ia cen idi.

³⁰Belekaʹ sulo Yesus nyiʹa pelapa ida, penco ho mecin ida.

³¹Uʹo ina tai kun Yesus kaʹ lepoʹ Kapernaum, ca lepoʹ kaʹ dale Galilia. Kina ha pekatuk dulu tegoʹ Tau Kelineʹ ne.

³²Pasak salam ne ida dina mung kenahan dau katuk ke, moʹ tiraʹ a un penyukat.

³³Un dalem amin sebayang Yahudi ina, idi ca laki iaʹ bali nelasek. Lemikaʹ tuaʹ ne ia ngan bioʹ dau ue:

³⁴“Inu pengeloʹ koʹ neng ameʹ, Yesus lepoʹ Nasarit. Ikoʹ nai ubaʹ ke ngejaʹat ameʹ tupe? Tisen te akeʹ ikoʹ ini: ikoʹ iaʹ Buheʹ, iaʹ nai cen Allah.”

³⁵Penco Yesus penceng bali ina, kun dau ue: “Ayen pisiu. Nai ne kawang cen laki ini.” Kun bali nubang laki ina kata dulu diaʹ kadoʹ dina. Penco nai bali ina kawang cen dalem ia, abeʹ e ngejaʹat laki ina.

³⁶Tai salam ne ida dina mung. Un dau re neng ida selepeʹ: “Isiu kumpin ini tupe? Moʹ man penyukat ngan nyingan ne ia cuk bali dina tai kelap. Kelap pe ida puʹo.”

³⁷Tai libut ne denga puyan Yesus neng dale ina.

³⁸Uʹo tai Yesus mecin amin sebayang Yahudi ina, penco tai ie kaʹ amin Simun. Dalau ina, un ueʹ leto Simun ne kenyarem me mayung. Kun nte badaʹ ia me Yesus.

³⁹Tai Yesus nekejeng nusau kukoʹ o ken, penco ho mulen kayung ina. Beliʹau maget le ia. Penco kenai leto ina beteʹ tai pubo ida.

⁴⁰Dalau ketai lenca tau, mung dulu dalem lepoʹ ina diaʹ ban sakit neng pemanak de, kadoʹ naʹan penyakit de, diaʹ dulu nai ngkin kata Yesus. Kun ne napoʹ ujoʹ o neng ida, singket usa re, paget ida mung.

⁴¹Kadoʹ kenai bali kelap cen culu dalau ina, mentung bioʹ dau re ngelengap: “Ikoʹ ini atek Anak Allah.” Kun Yesus mulen ida pisiu, moʹ bali dina tisen ia Keristus iaʹ man pungu keniga udip.

⁴²Tading kenai dema, tai Yesus mecin lepoʹ ina, tai neng ca ukoʹ diaʹ lenga. Nai re dina mita ia pelaʹa. Uʹo re tegoʹ ia, ubaʹ de ke mapo ia ngelineʹ ngan nte kaʹ lepoʹ Kapernaum ina.

⁴³Di lareʹ un dau Yesus neng ida: “Abeʹ keʹ senteng abeʹ un ketai badaʹ Denga Injil neng puyan pengaren Allah kaʹ lepoʹ diaʹ ca, uban ne ina ne iaʹ tuman ukoʹ Allah ban cuk akeʹ nai are.”

⁴⁴Pekina tai ie penco katuk dalem singket amin sebayang Yahudi pa tipo tanaʹ Yudia.