Read Wahau Kenyah LUKAS 5 Bible Online

LUKAS 5 - Wahau Kenyah bible

LUKAS 5

¹Un ca liwai, dalau Yesus nekejeng kaʹ sada bahi leteng Genesarit, kadoʹ nai dulu pempun. Muʹo pesuntung ne ida ngesen ia kina, moʹ de ubaʹ ke ngeringa tiraʹ Allah.

²Kun Yesus naʹat idi dua re alut nasak kaʹ sada bahi leteng ina. Un dulu diaʹ gayeng nte mita atuk dina, lepa ne ida mecin alut de, dalau re muheʹ pukat de.

³Tai kun Yesus alaʹ alut Simun ngan ngedung kidi. Kun ne cuk Simun nyekang nge kaʹ beluaʹ, coʹ kediʹut de neng sada bahi. Kidi Yesus madung pekatuk dulu diaʹ kadoʹ dina.

⁴Lepa ha petiraʹ, kun ne pisiu Simun: “Meka alut ini kaʹ beluaʹ laʹa, kata diaʹ dalem, ngan naʹ ne pukat cem telu kina, idi hem ke alaʹ atuk ʹo.”

⁵Un dau Simun neng Yesus: “Ahaʹ Amai, lelat tekaʹ meʹ pegayeng utung alem tahup de, nyahut meʹ alaʹ ne. Mahoʹ dau hoʹ cuk pe sedeʹ, ameʹ ke naʹ lete pukat ini laʹa.”

⁶Uʹo re naʹ a, pasak kadoʹ atuk neng lekihuk ke, pekece ke berit pukat ina.

⁷Kun nte mayep ida diaʹ ngan nte, dalem ca alut dina, mengin ida nai mepo ida. Nai kun nte, sulo re nyangan alut dua dina man atuk. Pekece seʹ ke kaham, moʹ atuk dina kadoʹ.

⁸Dalau Simun Peterus taʹan puyan ina, penco ho muʹup sutlep nyeripa Yesus, kun dau ue: “Ahaʹ Tuhan, ngerada ne ikoʹ cen akeʹ, moʹ akeʹ ini sangan kuʹun penyalaʹ.”

⁹Tai salam ne Simun te ne, moʹ kadoʹ laleʹ atuk ban penalan nte.

¹⁰Pekina lete Yakup ngan Yaya anak Sapdi ne, diaʹ pemung pegayeng ngan Simun. Un dau Yesus neng Simun: “Ayen ncoʹ iʹut tawai. Cen naʹkini ne ikoʹ ketai nejalaʹ kelunan.”

¹¹Kun nte mihit alut dina kaʹ sada bahi, penco re mahung ketoʹ inu re dina, sulo tai re bayaʹ Yesus.

¹²Dalau Yesus neng ca lepoʹ, un ca laki iaʹ kenyarem sakit bekayen. Dalau ue taʹan Yesus, kun ne muʹup pa silung nge abeʹ kaʹ tanaʹ, moʹ o lemameʹ ke nyat maget. Dau ue: “Ahaʹ Tuhan, buk koʹ ubaʹ, sukat coʹ paget akeʹ.”

¹³Kun Yesus mencai ujoʹ o ngkang laki ina. Un dau ue: “Ubaʹ te akeʹ, maget ne ikoʹ.” Dalau ina lete, tai bekayen ne pesau.

¹⁴Un dau Yesus neng ia: “Ayen ncoʹ badaʹ puyan ini me dulu diaʹ ca ʹo. Di lareʹ tai ne ikoʹ, penco badaʹ usa hoʹ palaʹ diaʹ detaʹu dina, idi re taʹan diseʹ ban nai hoʹ maget. Uʹo ina hoʹ naʹ pengencai bayaʹ dau Musa cuk, apan mung dulu tisen ikoʹ ban buheʹ.”

¹⁵Naʹ pe Yesus mulen ia, tai libut kuʹo ke denga ha. Kadoʹ kenai dulu pempun, ubaʹ ke ngeringa dau ue, mentung nte cuk ia paget ida cen penyakit de.

¹⁶Naʹ pe Yesus kadoʹ gayeng nge, sematu ue ubaʹ tai ngelipau kukoʹ diaʹ lenga, moʹ o ubaʹ ke lemameʹ neng ata ha.

¹⁷Neng ca tau ue, kun Yesus pekatuk pelaʹa. Un palai mida diaʹ tuʹa re neng Adet Yahudi, ngadan nte Perisi, ngan un pe diaʹ guru adet dina, madung kina. Ban nai re cen singket lepoʹ kaʹ tanaʹ Galilia ngan Yudia, pekina pe cen Yerusalim. Ban penyukat Tuhan un tegoʹ ina, ina ukoʹ Yesus senteng ke paget diaʹ sakit.

¹⁸Nai dulu nekalang ngkin ca usa iaʹ sakit lemaʹ. Kun nte mita janan ketai ngkin ia kaʹ amin ina, moʹ de ubaʹ ke peken ia dudo Yesus.

¹⁹Moʹ o peseʹ laleʹ kuʹun dulu diaʹ kadoʹ dina, supeʹ de ketai ngkin laki ina kedalem. Ina ukoʹ de tai ngkin ia kempau kaʹ usun sapau te. Penco re lemera sapau batu ina, muno tekalang ina kentaʹ. Abeʹ ne ia neng beluaʹ mpun nte diaʹ nyeripa Yesus dina.

²⁰Dalau Yesus taʹan seʹ pengelan nte telu dina, un dau ue neng laki iaʹ sakit ina: “Ahaʹ cenganak, pesau ne penyalaʹ koʹ.”

²¹Ina tading dau guru Adet Yahudi dina, ngan diaʹ Perisi dina ngerebeng, kun dau re: “Aheʹ laki ini tupe? Adeʹ e pejaʹat Allah. Aheʹ ia senteng sau penyalaʹ buk are bang ca le, ina Allah?”

²²Tisen Yesus neng kimet de dina, kun ne mipa ida: “Moʹ inu pekina dau kimet cem tupe?

²³Iaʹ mpi melai ke badaʹ kuma ha: ‘Pesau ne penyalaʹ koʹ,’ buk are pekini: ‘Beteʹ ne, tai ne masat?’

²⁴Buk ke pekina, akeʹ ke peluhaʹ mikem tedanaʹ ban Anak Sio ini lan un penyukat kusun tanaʹ ini senteng sau penyalaʹ.” Un dau Yesus neng iaʹ sakit lemaʹ ina: “Dau heʹ mikoʹ, beteʹ ne, ngkin tekalang ngkoʹ, tai ne uleʹ kaʹ amin ncem te.”

²⁵Dalau ina lete, nai laki ina beteʹ. Penco ho ngayang ukoʹ o ken ina taʹan dulu mung kina, sulo tai ie uleʹ kaʹ amin nte, mentung nge pempau Allah.

²⁶Muʹo tai salam ne seʹ dulu mung, mentung nte pempau Allah. Tai bingaʹ ngan bisau seʹ de, kun dau re: “Tau ini ne ilu taʹan puyan iaʹ bulen diseʹ.”

²⁷Uʹo ina, dalau tai Yesus masat, kun ne taʹan ca laki iaʹ jaʹat baʹan dau dulu, moʹ o nemo pupu, ngadan ne Liwi, dalau Liwi madung kaʹ amin pupu ue. Un dau Yesus neng ia: “Baka nai hoʹ bayaʹ akeʹ.”

²⁸Penco kenai Liwi beteʹ, mahung ketoʹ inu ue dina, sulo tai ie bayaʹ Yesus.

²⁹Lepa ina nuʹo, kun Liwi uyan ca pemung mana iaʹ bioʹ dalem amin ne, moʹ o nyelama Yesus ne. Kina kadoʹ nai re diaʹ nemo pupu. Un pe dulu diaʹ ca diaʹ nai jahi ida kina.

³⁰Un diaʹ Perisi ngan diaʹ guru Adet Yahudi re kina, kuheng dau re neng diaʹ bayaʹ katuk Yesus ne, kun dau re: “Moʹ inu hem uman ngan nisep pemung ngan dulu diaʹ nemo pupu, ngan kelunan diaʹ jaʹat tupe?”

³¹Un dau Yesus mipa ida: “Kelunan diaʹ maget abeʹ de mita duktun, bang kelunan diaʹ sakit le.

³²Abeʹ e kenai heʹ mengin kelunan diaʹ teneng, bang kelunan diaʹ dulu kuma jaʹat le, apan nte nesen ngan nyepuleʹ kimet de.”

³³Un dau palai mida dina neng Yesus: “Un diaʹ bayaʹ katuk Yaya, tajen nte lemalan abeʹ un uman ngan lemameʹ. Pekina pe diaʹ bayaʹ katuk Perisi. Un sepe diaʹ bayaʹ katuk koʹ ne, uman nte, ngan nisep pe ida.”

³⁴Un dau yesus neng ida: “Kumpin buk le mengin dulu nai ngebangen diaʹ ke pepeto, sukat le ke pele ida abeʹ un uman baʹan ncem, petem un lepe laki iaʹ kenai ngan leto ina are? Naʹun, abeʹ sukat.

³⁵Ke un te tau ue ʹo, laki iaʹ kenai ngan leto ina ketai pagang cen ahang ida. Dalau ina, ina le ida ke lemalan abeʹ un uman ʹo.”

³⁶Un ca kata katuk Yesus badaʹ mida, pekini dau ue: “Abeʹ un aheʹ iaʹ ke lemerit sapai ie iaʹ mading man ne ke mimum sapai ie iaʹ puʹun, moʹ o miʹet ia, mading ina ke berit, ngan berit apeʹ iaʹ mading ina, abeʹ e pekuaʹ ngan iaʹ puʹun ina are.

³⁷“Ca laʹa, abeʹ un aheʹ iaʹ ke meseʹ telang anggur iaʹ mading kedalem bahan anit iaʹ puʹun, moʹ o malap telang anggur iaʹ mading ina ke mepak bahan anit ina. Penco telang anggur ina ke musa ngan bura, ngan bahan ne ke tai jaʹat pelaʹa.

³⁸Bang telang anggur iaʹ mading le, tekep ke meseʹ dalem bahan anit iaʹ mading.

³⁹Laʹa abeʹ un aheʹ iaʹ ban malai nisep telang anggur iaʹ puʹun ubaʹ ke nisep telang anggur iaʹ mading. ‘Tiga tekaʹ iaʹ puʹun ina,’ baʹan ne.”