Read Wahau Kenyah YAYA 10 Bible Online

YAYA 10 - Wahau Kenyah bible

YAYA 10

¹“Lan dau heʹ mikem, laki iaʹ abeʹ un nai kaʹ dalem liwang dumba cen pamen, un sepuʹo ia laket ceng bese, ina ne kelunan diaʹ bekelau ngan belase.

²Laki iaʹ tai kaʹ dalem liwang cen pamen, laki ina iaʹ tekep manan dumba dina,

³ngan laki iaʹ mengau pamen liwang ina pe mesik pamen mia. Kun dumba dina kenahan dau ue mengin ida, mentung pisiu ngadan singket usa re, penco ho tai ngkin dia kawang.

⁴Tegoʹ o ngkin ida kawang, ia tahaʹ tena mida, ngan ketoʹ dumba dina pe tai bayaʹ ia, uban nte nyituk dau isiu ue.

⁵Un sepuʹo abeʹ de ubaʹ tai bayaʹ diaʹ ca, tai re ngasa kelap cen ia, uban nte abeʹ un nyituk dau isiu ue.”

⁶Yesus badaʹ kata katuk ini mida, un sepuʹo abeʹ de tisen inu sen dau isiu iaʹ ia badaʹ mida.

⁷Un dau Yesus pisiu laʹa: “Lan dau heʹ mikem, akeʹ ne iaʹ pamen dumba.

⁸Ketoʹ diaʹ nai tahaʹ tena neng akeʹ are, ina ne kelunan bekelau ngan belase. Abeʹ dumba un ngeringa dau re.

⁹Akeʹ ne iaʹ pamen. Mele aheʹ diaʹ nai kaʹ dalem cen akeʹ, dina ne iaʹ ke un puyan iaʹ ke pudip ida. Ida senteng nai kaʹ dalem ngan tai kawang, ngan alaʹ penguman.

¹⁰Kelunan diaʹ bekelau nai kaʹ dalem, bang ubaʹ tai ngelau ngan lematai ngan ngasing. Un sepe akeʹ nai apan dumba dina ke un udip, ngan udip iaʹ ngelento.

¹¹“Akeʹ ne laki iaʹ manan dumba ngan puyan tiga. Laki iaʹ tiga puyan manan dumba dina tenup ne tekaʹ kimet te ke matai tuman dumba dina.

¹²Kelunan iaʹ ngimet metau ubaʹ alaʹ gaji, abeʹ e lan manan dumba dina, ngan abeʹ dumba dina anun ne. Tegoʹ o taʹan kenai asu lajam, penco ho ngasa kelap mahung dumba dina. Ina ukoʹ asu lajam ina penco nyepit dumba dina, muʹo purat ne ida.

¹³Ina ukoʹ laki iaʹ ngimet metau ubaʹ alaʹ gaji ina kelap. Uban ne bang pekimet ubaʹ alaʹ gaji tuaʹ le, ina ukoʹ o abeʹ un nyingo dumba dina.

¹⁴Akeʹ ne laki iaʹ tiga puyan manan dumba. Kuaʹ baʹan Amai Bioʹ tisen akeʹ, ngan akeʹ tisen Amai Bioʹ, pekina pe akeʹ tisen dumba heʹ, ngan pekina lete ida tisen akeʹ. Ngan akeʹ un tenup tekaʹ kimet ke matai tuman ida.

¹⁶Un te dumba diaʹ ca laʹa, diaʹ anun nceʹ, abeʹ de un kahum dalem liwang dumba ini lepe. Atek keʹ ngkin ida pe. Ida ke ngeringa dau heʹ, ngan tai nuyan ca le peng dumba dini, ngan ca lepe laki iaʹ manan ida.

¹⁷“Amai Bio iaʹ malaʹ neng akeʹ, uban nceʹ tenup tekaʹ kimet ke mencai udip keʹ apan nceʹ ke alaʹ a ngeliwet laʹa.

¹⁸Abeʹ un aheʹ iaʹ ke magang pengudip keʹ cen akeʹ, uban nceʹ mencai ie man tekaʹ pengubaʹ kimet ceʹ tengen. Un pe penyukat ceʹ ke naʹ a, ngan un pe penyukat ceʹ ke alaʹ a ngeliwet laʹa. Pekini ne puyan Amai heʹ cuk akeʹ uyan.”

¹⁹Tai bese dua pe kimet kelunan Yahudi laʹa uban kuʹun dau puyan isiu ini.

²⁰Kadoʹ de pisiu kuma: “Ia un bali. Buling nge ne. Inu adeʹ kem ngeringa dau ue ne?”

²¹Un pe diaʹ ca kuma ha: “Kelunan diaʹ un bali, abeʹ de senteng pisiu kuaʹ baʹan ini ne. Inu senteng bali mesik mata diaʹ butaʹ?”

²²Ngajan sengim awang kaʹ Yerusalim, tegoʹ kenai tau bioʹ Adet Bunut Muheʹ Umaʹ Palan Allah,

²³tai kun Yesus masat kaʹ use Suliman neng Umaʹ Palan ina.

²⁴Tegoʹ ina, kelunan Yahudi kelimpun neliling Yesus, ngan lemutu ia: “Kudaʹ majan ncoʹ ke piduk ameʹ? Badaʹ ne lan mameʹ: Ikoʹ Keristus iaʹ ngkang pungu udip mo?”

²⁵Un dau Yesus mipa ida: “Lepa ne akeʹ badaʹ mikem, ikem iaʹ abeʹ un ngelan akeʹ. Gayeng iaʹ akeʹ ti man penyukat Amai heʹ, iaʹ nugen badaʹ akeʹ.

²⁶Un sepuʹo abeʹ kem ngelan, uban abeʹ kem dumba heʹ.

²⁷Dumba heʹ iaʹ ubaʹ ngeringa dau heʹ. Akeʹ tisen ida, ngan ida pe nai bayaʹ akeʹ,

²⁸ngan akeʹ ke naʹ udip saheʹ kelineʹ iaʹ ngeriman mida. Nyahut de abeʹ un ke matai ne laʹa. Ngan abeʹ un aheʹ iaʹ senteng ke magang ida cen akeʹ.

²⁹Atek bioʹ ne puyan iaʹ Amai heʹ lepa nulat makeʹ, ngan abeʹ un aheʹ senteng ke munan ida cen gaham Amai heʹ.

³⁰Amai Bioʹ kuaʹ ca le ngan nceʹ.”

³¹Kun kelunan Yahudi penco alaʹ batu ca liwai laʹa, ubaʹ lemulo neng Yesus.

³²Dau Yesus neng ida: “Kadoʹ ne pemuyan iaʹ tiga akeʹ lepa peluhaʹ mikem cen kena, uban kuʹun pengecuk Amai Bioʹ neng akeʹ. Puyan iaʹ mpi iaʹ ukoʹ kem ubaʹ ke lemulo batu neng akeʹ tupe?”

³³Un dau diaʹ Yahudi mipa ia: “Abeʹ kuʹun pemuyan tiga iaʹ ukoʹ meʹ ubaʹ lemulo batu neng ikoʹ, un sepuʹo kuʹun ban puyan ncoʹ pejaʹat Allah. Ca kelunan tuaʹ le ikoʹ, belekaʹ koʹ loʹ uyan ikoʹ Allah.”

³⁴Un dau Yesus mipa: “Ini lepa senurat dalem Kitap Adet cem, dau Tuhan Allah kuma: ‘Ikem ne kelunan diaʹ seleket Allah.

³⁵Ilu tisen ne dau dalem Kitap iaʹ telit lan pa majan, ngan kelunan diaʹ alaʹ Katuk Adet te cen naʹa, Tuhan Allah pisiu ida kelunan diaʹ seleket Allah.

³⁶Ukoʹ baʹan akeʹ ne, Amai Bioʹ iaʹ lemileʹ akeʹ ngan cuk akeʹ nai kusun tanaʹ ini. Buk pekina, adeʹ kem kuma akeʹ pejaʹat Allah uban nceʹ badaʹ akeʹ iaʹ Anak Allah?

³⁷Buk lan nceʹ abeʹ un penco gayeng Amai heʹ, ayen ne ngelan akeʹ.

³⁸Un sepuʹo buk lan nceʹ penco gayeng Amai Bioʹ, kenuen pe ikem abeʹ un ngelan akeʹ, sukun ncem neglan gayeng ngkeʹ, apan ncem tisen ngan abeʹ un babak laʹa neng puyan Amai Bioʹ un dalem akeʹ, ngan akeʹ pe un dalem Amai Bioʹ.”

³⁹Un ca liwai laʹa ida ten ke mapo ia, un sepuʹo takau ue cen ujoʹ de.

⁴⁰Tai kun Yesus uleʹ laʹa kaʹ dipa sungai Yardin, iaʹ kukoʹ Yaya lepa ngebatis dulu cen kena. Kun en ngelineʹ kina.

⁴¹Kadoʹ dulu nai palaʹ ia. Un dau re: “Abeʹ un Yaya uyan puyan nyingan, un sepuʹo mung dau diaʹ ia badaʹ neng puyan laki ini ne iaʹ lan.”

⁴²Kadoʹ dulu kina ngelan neng ia.