Read Wahau Kenyah YAYA 12 Bible Online

YAYA 12 - Wahau Kenyah bible

YAYA 12

¹Nem tau kena Bunut Paska, tai kun Yesus kaʹ Bitani kukoʹ Lasarus mudip are, laki iaʹ Yesus pebeteʹ cen patai idai.

²Ngajan Lasarus madung ngan Yesus kaʹ bijaʹ, kun nte petenup penguman mia kina, ngan Marta iaʹ mepo mencai ie mia.

³Dalau ina ne Mariam alaʹ ca buhan kelaʹang iaʹ mahan suhaʹ a, kun ne mubeʹ e kaʹ taket Yesus, penco ho lemasa ha man puk ke. Pa libut amin tekaʹ kenai me baʹoʹ kelaʹang ina.

⁴Un ca usa me diaʹ bayaʹ katuk Yesus ne, ngadan ne Yudas Iskariut, ia iaʹ ke mencai Yesus me dulu diaʹ bunoʹ o.

⁵Un dau Yudas: “Uban inu abeʹ un matu kelaʹang ini ngan alaʹ suhaʹ a telu ato ligit, apan ligit, apan ligit ina ilu ke naʹ me dulu diaʹ kasip.”

⁶Ia pisiu pekini dau, abeʹ uban ne lesau keluan kasip, un sepuʹo ia iaʹ bekelau, iaʹ mampin buhan ligit de telu, ngan mentung nge ngutip palai ligit dina.

⁷Un dau Yesus mipa ida: “Talan ne leto ini tengen, inu puʹo ho pedemun kelaʹang iaʹ laʹa ne pa tau heʹ sihoʹ tanem ʹo.

⁸Lemuto kelunan kasip un ngan ncem lete, un sepuʹo abeʹ keʹ un lemuto ngan ncem.”

⁹Ca peng kelunan Yahudi iaʹ bioʹ le lepa kenahan dau denga Yesus un kaʹ lepoʹ Bitani, penco re tai kina. Abeʹ kuʹun Yesus tuaʹ le ida tai, ngan pelaʹa uban nte ubaʹ taʹan Lasarus iaʹ Yesus lepa meteʹ cen patai are.

¹⁰Ina ukoʹ detaʹu lataʹ dina peseket mita janan ke lematai Lasarus lete.

¹¹Uban kuʹun Lasarus ne ukoʹ kadoʹ kelunan Yahudi muau neng diaʹ pengelataʹ de, ngan ngelan neng Yesus.

¹²Kadoʹ kelunan diaʹ lepa nai kaʹ Yerusalim neng Bunut Paska ina. Neng kenempam me kadoʹ dulu diaʹ kenahan denga Yesus kenai kaʹ Yerusalim.

¹³Ina ukoʹ de alaʹ daʹan nanga, ngan tai kawang, penco nyelalang Yesus, mentung ngelalo kuma ha: “Pempau Allah, Allah iaʹ naʹ peniga me Laki iaʹ nai dalem ngadan Tuhan. Allah naʹ peniga ha me Laki Paren lepoʹ Israil.”

¹⁴Kun Yesus alaʹ ca pun keledai, penco madung kaʹ likut te, ukoʹ baʹan dau dalem Kitap kuma are:

¹⁵“Lepoʹ Siun, ayen takut, Ini kenai Paren ncem, Ia iaʹ ngedung kempau likut anak pun keledai ini.”

¹⁶Dalau ina, abeʹ diaʹ bayaʹ katuk ke tisen sen neng puyan ina. Neng kebayaʹ a, dalau Yesus lepa beteʹ neng serema peniga ha, ina le ida petawai dau dalem Kitap iaʹ badaʹ pekina puyan neng ia, ngan ida petawai lete puyan iaʹ ida lepa uyan neng ia ina are.

¹⁷Kelunan kadoʹ diaʹ lepa ngan Yesus tegoʹ o pisiu mengin Lasarus nai kawang cen liang ngan meteʹ ia cen patai ie, ida ne iaʹ pedenga puyan ina me dulu.

¹⁸Ina iaʹ ukoʹ ca peng bioʹ le nai palaʹ Yesus, uban nte kenahan dau ban denga ha lepa ti puyan nyingan iaʹ bioʹ ini.

¹⁹Penco dau diaʹ Perisi dina pisiu neng ida semaheʹ: “Ikem ngina, pabeʹ ca inu pe ilu abeʹ un senteng ke un usun. Ikem naʹat tuaʹ ne, mung dulu kusun tanaʹ ini ne diseʹ tai bayaʹ ia.”

²⁰Un palai kelunan Gerika kahang dulu diaʹ tai lemameʹ tegoʹ Adet Bunut kaʹ Yerusalim re.

²¹Nai kun nte palaʹ Pilipus, (laki iaʹ nai cen Bit-saida kaʹ tanaʹ Galilia,) un dau re: “Amai, ubaʹ meʹ taʹan Yesus.”

²²Penco ketai Pilipus badaʹ me Anderias, ngan mung nte dua tai badaʹ me Yesus.

²³Un dau Yesus mipa ida: “Lepa abeʹ ne jakaʹ iaʹ penekep Anak Sio ke alaʹ serema peniga ha iaʹ bioʹ.

²⁴Lan dau heʹ mikem, ukoʹ baʹan le ke pekata luang padai are. Ca bute padai ke nahung ca bute tuaʹ le, buk le abeʹ un lemahaʹ a kaʹ tanaʹ penco matai. Buk ke matai, ina le ia ke kadoʹ buʹan ne.

²⁵Aheʹ iaʹ malaʹ neng udip pe tengen kusun tanaʹ ini, ina iaʹ ke tepa neng udip lan ʹo. Aheʹ iaʹ miʹi neng udip pe tengen kusun tanaʹ ini, ina ia ke nalan udip pe saheʹ kelineʹ iaʹ ngeriman uʹo.

²⁶Aheʹ iaʹ badaʹ kimet te malaʹ akeʹ, atek ke nai bayaʹ akeʹ. Mele kempi ukoʹ keʹ, kina lete diaʹ pegayeng makeʹ un ngan nceʹ. Ngan Amai heʹ ke nyelama aheʹ iaʹ pegayeng makeʹ.”

²⁷“Naʹkini ngeligaʹ lan ne tekaʹ tawai heʹ, ngan inu ne iaʹ baʹan nceʹ? Senteng ngkeʹ pekini dau taʹin: ‘Amai, ayen pawang puyan ini nai nantaʹ akeʹ?’ Un sepuʹo ini pe iaʹ ukoʹ keʹ nai, apan nceʹ ke sihoʹ puyan keta ini.

²⁸Naʹun. Atek pekini dau heʹ, Amai peluhaʹ ne serema peniga neng ngadan ncoʹ.” Pelapa dau tuyau pisiu cen langit iaʹ kuma ha: “Lepa ne akeʹ nyerema peniga ngadan nceʹ, ngan atek keʹ ke ti ne laʹa ʹo.”

²⁹Kelunan kadoʹ diaʹ nekejeng kina ne kenahan dau isiu ina ngan kuma ha: “Dau gerem langit ina.” Un dau diaʹ ca kuma: “Dau melikat pisiu ngan ne ina.”

³⁰Penco dau Yesus neng ida: “Abeʹ tuman akeʹ ne dau isiu ini pisiu are, un sepuʹo tuman ikem ne dau isiu ini nai.

³¹Naʹkini ne kenai puyan iaʹ ke pebetep ukum kaʹ usun tanaʹ ini. Naʹkini lete ia iaʹ paren bioʹ kusun tanaʹ ini ke tai supeʹ ʹo.

³²Tegoʹ keʹ ke tai pejung kusun tanaʹ ini, atek keʹ ke menat kelunan mung nai palaʹ akeʹ.”

³³Man isiu ini Yesus peluhaʹ kumpin puyan ne ke matai ʹo.

³⁴Penco diaʹ kadoʹ dina nyakat ia: “Un dau neng Katuk Adet le iaʹ kuma Keristus, iaʹ ngkang pungu udip, ke mudip utung udip. Buk pekina, kumpin dau hoʹ kuma Anak Sio ke tai pejung kusun tanaʹ ne? Aheʹ iaʹ Anak Sio ini tupe?”

³⁵Dau Yesus mipa: “Kediʹut le laʹa un dema neng ahang ikem. Nudep ne peteneng udip kem dalau dema ne, apan ntem abeʹ un nai sebiʹen ikem ʹo. Uban aheʹ diaʹ masat dalau ntem, abeʹ de tisen kempi ketai re.

³⁶Ina ukoʹ ngelan ne ikem neng dema, apan ncem ke nuyan kelunan iaʹ dema ʹo.” Lepa Yesus pisiu ini, penco ketai ie mecin cen ina, ngan pekelem cen ida.

³⁷Naʹ pia lepa uban ti mung puyan nyingan ini kaʹ tena mata re are, abeʹ de ngelan neng ia.

³⁸Ina ukoʹ lan te dau pegawa Yesaya pisiu cen naʹaʹ are: “Tuhan, aheʹ diaʹ ngelan dau katuk iaʹ ilu lepa badaʹ are? Palaʹ aheʹ Tuhan ke peluhaʹ diseʹ penyukat te?”

³⁹Ini ne puʹun nte abeʹ un senteng ke ngelan, uban Yesaya pe pisiu lete:

⁴⁰“Allah lepa ngebutaʹ mata re, Ngan mekep kimet de, Apan nte abeʹ un senteng naʹat, Ngan kimet de pe abeʹ un tisen. Ngan laʹa dau Allah, abeʹ de ubaʹ mupa tahaʹ akeʹ Apan nceʹ ke paget ida.”

⁴¹Yesaya pisiu pekini dau uban ne lepa taʹan serema peniga Yesus, ngan penco badaʹ puyan ne.

⁴²Tegoʹ ina lete kadoʹ diaʹ lataʹ Yahudi ngelan neng Yesus, un sepuʹo kuʹun diaʹ Perisi dina, ina iaʹ ukoʹ de abeʹ un luhaʹ dau pisiu puyan ne, malap ida pesau cen amin sebayang.

⁴³Ida malaʹ puyan kelunan ke pada ida cen uʹo puyan Allah iaʹ ke pada ida.

⁴⁴Kun Yesus pisiu ngan bioʹ dau ue: “Aheʹ iaʹ ngelan neng akeʹ, abeʹ un ne ngelan neng akeʹ tuaʹ le, un sepuʹo ngelan lete neng ia iaʹ cuk akeʹ nai ne.

⁴⁵Aheʹ iaʹ taʹan akeʹ, ia taʹan lete ia iaʹ cuk akeʹ nai.

⁴⁶Akeʹ nai kusun tanaʹ ini ukoʹ baʹan ca dema, apan singket usa diaʹ ngelan neng akeʹ abeʹ un petem ngelineʹ dalau ntem.

⁴⁷Aheʹ diaʹ kenahan dau katuk keʹ, ngan abeʹ un ubaʹ bayaʹ a, abeʹ keʹ metep ukum neng ia. Akeʹ nai tuman ke pudip kelunan kusun tanaʹ ini, abeʹ e tuman nceʹ ke nai metep ukum kidi.

⁴⁸Aheʹ iaʹ nyekang akeʹ ngan abeʹ un alaʹ dau katuk keʹ, un lete ca iaʹ ke metep ukum neng ia. Isiu iaʹ akeʹ lepa badaʹ, ina iaʹ ke metep ukum neng ia tegoʹ tau iaʹ ke bayaʹ ʹo.

⁴⁹Lan te ia pekina uban abeʹ keʹ pisiu cen kimet ceʹ tengen. Amai Bioʹ iaʹ cuk akeʹ nai, ia iaʹ cuk akeʹ pisiu ngan naʹ isiu iaʹ akeʹ tekep ke penco.

⁵⁰Tisen te akeʹ ban pengecuk Amai Bioʹ iaʹ ke ngkin udip saheʹ kelineʹ ia ngeriman me kelunan. Ina ukoʹ mung isiu heʹ, ina ne isiu iaʹ Amai Bioʹ cuk akeʹ pisiu.”