Read Wahau Kenyah YAYA 14 Bible Online

YAYA 14 - Wahau Kenyah bible

YAYA 14

¹Kun Yesus badaʹ mida: “Ayen ncem mentam pekimet. Ngelan ne neng Allah, ngan ngelan pe neng akeʹ lete.

²Kadoʹ amin neng umaʹ Amai heʹ, ngan akeʹ iaʹ ketai petenup ca ukoʹ mikem. Abeʹ keʹ ke badaʹ ini mikem buk ke abeʹ un pe.

³Uʹo heʹ lepa tai petenup ca ukoʹ mikem ne, akeʹ te iaʹ kenai ngeliwet alaʹ ikem, apan ncem pemung ukoʹ ngan nceʹ.

⁴Tisen te ikem janan kukoʹ ketai heʹ ne.”

⁵Dau Tumas neng ia: “Tuhan, abeʹ meʹ tisen kempi ketai hoʹ. Kumpin meʹ ke tisen janan tai kina tupe?”

⁶Dau Yesus mipa ia: “Akeʹ ne iaʹ janan, ngan katuk iaʹ telit, ngan iaʹ atek udip. Abeʹ un aheʹ senteng tai palaʹ Amai Bioʹ buk ke abeʹ un kuʹun nceʹ.”

⁷Dau Yesus neng ida laʹa: “Naʹkini lepa ne ikem tisen akeʹ, ina ukoʹ kem ke tisen Amai heʹ lete. Uʹo ini ikem iaʹ tisen ia. Ikem iaʹ lepa taʹan ia.”

⁸Dau Pilipus neng ia: “Tuhan, peluhaʹ ne Amai Bioʹ mameʹ, ina le iaʹ atek pengubaʹ meʹ.”

⁹Dau Yesus mipa ia: “Majan ne akeʹ lepa ngan ncem mung. Inu adeʹ koʹ abeʹ un tisen akeʹ lepe Pilipus? Aheʹ iaʹ lepa taʹan akeʹ, ia lete lepa taʹan Amai Bioʹ. Buk pekina, inu adeʹ koʹ kuma: ‘Peluhaʹ Amai Bioʹ mameʹ.’

¹⁰Pilipus, kumpin ncoʹ, abeʹ koʹ ngelan akeʹ iaʹ un dalem Amai Bioʹ, ngan Amai Bioʹ iaʹ un dalem akeʹ mo?” Sulo dau Yesus neng mung diaʹ bayaʹ katuk ke dina: “Mung isiu diaʹ ban akeʹ lepa pisiu mikem, abeʹ un nai cen akeʹ tengen. Amai Bioʹ iaʹ mudip dalem akeʹ, ia iaʹ penco gayeng nge tengen.

¹¹Ngelan ne akeʹ iaʹ un dalem Amai Bioʹ, ngan Amai Bioʹ iaʹ un dalem akeʹ. Buk kem abeʹ un ngelan puyan ini, ngelan ne kuʹun puyan nyingan iaʹ ikem lepa taʹan akeʹ uyan.

¹²Lan dau heʹ mikem, aheʹ diaʹ ngelan neng akeʹ, ida ke ti lete pemuyan iaʹ kuaʹ baʹan akeʹ ti. Idi pe areʹ pelapa bioʹ cen ina pe ida ke ti, uban akeʹ iaʹ ke tai palaʹ Amai Bioʹ.

¹³Ngan akeʹ ke ti lete inu inu iaʹ ikem nyat dalem ngadan nceʹ, apan serema peniga Amai Bioʹ ke luhaʹ cen Anak ke.

¹⁴Buk kem nyat ca inu neng akeʹ dalem ngadan nceʹ, akeʹ ke ti lete.”

¹⁵“Buk kem malaʹ akeʹ, atek kem ke bayaʹ dau katuk ukum keʹ.

¹⁶Akeʹ ke nyat neng Amai Bioʹ, ngan ia ke naʹ ca laʹa iaʹ ke mepo ikem, ia ne Berua katuk telit iaʹ ke ngelineʹ ngan ncem putung udip.

¹⁷Dulu kusun tanaʹ ini abeʹ un senteng alaʹ ia, uban dulu abeʹ un senteng taʹan ia ngan tisen ia. Un sepuʹo ikem tisen ia, uban ia iaʹ ngelineʹ ngan ncem, ngan mudip dalem ikem.

¹⁸“Abeʹ keʹ un ke peterai ikem tengen. Atek akeʹ iaʹ ke nai ngeliwet palaʹ ikem.

¹⁹Abeʹ un majan dulu kusun tanaʹ ini ke taʹan akeʹ laʹa. Un sepuʹo ikem iaʹ ke taʹan akeʹ, ngan uban nceʹ mudip, ikem ke mudip lete.

²⁰Tegoʹ tau ina ke nai ʹo, ikem ke tisen akeʹ iaʹ un dalem Amai heʹ. Ngan ikem iaʹ ke un dalem akeʹ, ukoʹ baʹan nceʹ un dalem ikem.

²¹“Aheʹ iaʹ alaʹ dau katuk ukum keʹ ngan bayaʹ a, ia iaʹ malaʹ neng akeʹ. Atek Amai heʹ ke malaʹ neng ia iaʹ malaʹ neng akeʹ, ngan akeʹ lete ke malaʹ neng ia, ngan ke peluhaʹ akeʹ tengen neng ia.”

²²Yudas (abeʹ e Yudas Iskariut) iaʹ kuma ha: “Tuhan, inu senteng ngkoʹ ke peluhaʹ usa hoʹ tengen le neng ameʹ ngan abeʹ un neng dulu kusun tanaʹ ini?”

²³Dau Yesus mipa ia: “Aheʹ diaʹ malaʹ neng akeʹ, ia iaʹ ke bayaʹ dau katuk keʹ. Amai heʹ iaʹ ke malaʹ ia. Amai heʹ pemung ngan nceʹ ke nai palaʹ ia ngan mudip ngan ne.

²⁴Aheʹ iaʹ abeʹ un malaʹ neng akeʹ, abeʹ e bayaʹ isiu heʹ. Katuk diaʹ ikem lepa kenahan are, abeʹ e anun nceʹ, un sepuʹo nai ie cen Amai Bioʹ iaʹ cuk akeʹ.

²⁵“Lepa ne akeʹ badaʹ ini mikem ngajan nceʹ petem un ngan ncem re.

²⁶Ia iaʹ mepo ikem, ina ne Berua Buheʹ iaʹ Amai Bioʹ ke cuk nai dalem ngadan nceʹ, ia iaʹ ke pepo pekatuk ikem neng puyan inu inu, ngan uyan ikem ke petawai ketoʹ diaʹ akeʹ lepa badaʹ mikem.

²⁷“Akeʹ mahung denaʹ tawai ngan ncem. Pengedenaʹ tawai heʹ tengen iaʹ akeʹ naʹ mikem. Abeʹ keʹ un naʹ mikem kuaʹ baʹan usun tanaʹ ini ke naʹ mikem. Ayen ncem mentam pekimet, ngan ayen ncem takut.

²⁸Ikem iaʹ lepa kenahan dau heʹ pisiu neng ikem kuma ha, akeʹ iaʹ ketai mecin. Un sepuʹo atek keʹ ke nai ngeliwet palaʹ ikem laʹa. Buk kem malaʹ neng akeʹ, atek bangen ne tekaʹ kimet cem tisen akeʹ iaʹ tai palaʹ Amai Bioʹ, uban ia iaʹ pelapa bioʹ cen akeʹ.

²⁹Naʹkini akeʹ lepa badaʹ ini mikem kena mung puyan ini ke nuyan, apan tegoʹ puyan ini ke nuyan ʹo, atek kem ke ngelan.

³⁰Abeʹ keʹ un biʹen tekaʹ ke pisiu majan ngan ncem laʹa, uban iaʹ paren usun tanaʹ ini seʹ ke nai ne ia. Abeʹ un penyukat te neng usun akeʹ,

³¹un sepuʹo atek dulu kusun tanaʹ ini ke tisen akeʹ malaʹ neng Amai Bioʹ. Ina iaʹ ukoʹ keʹ ti mung pemuyan nceʹ bayaʹ dau ia iaʹ cuk akeʹ. “Nai ne, tai nilu puke cen ini.”