Read Wahau Kenyah YAYA 17 Bible Online

YAYA 17 - Wahau Kenyah bible

YAYA 17

¹Lepa Yesus muʹo pisiu ini, kun ne nekadaʹ kempau naʹat langit, ngan kuma ha: “Amai, lepa abeʹ ne jakaʹ idai. Naʹ ne serema peniga me Anak koʹ, idi Anak koʹ ke naʹ serema peniga mikoʹ.

²Ikoʹ iaʹ lepa naʹ penyukat me ia neng usun kelunan mung, apan ne sukat naʹ udip saheʹ kelineʹ iaʹ ngeriman me ketoʹ diaʹ ikoʹ naʹ mia.

³Ngan ini ne udip saheʹ kelineʹ iaʹ ngeriman: ina ne puyan kelunan ke tisen ikoʹ tuaʹ le ia atek Allah lan, ngan ke tisen Yesus Keristus iaʹ ikoʹ ban cuk nai ini.

⁴Akeʹ lepa peluhaʹ serema peniga hoʹ neng usun tanaʹ ini, ngan pelepa gayeng iaʹ ikoʹ cuk akeʹ ti are.

⁵Amai, naʹkini akeʹ nyeripa ngejuma ikoʹ. Naʹ ne serema peniga makeʹ, kuaʹ baʹan iaʹ akeʹ lepa un ngan ncoʹ kena usun tanaʹ ini ke nuyan are.

⁶“Lepa ne akeʹ petisen ikoʹ neng kelunan diaʹ ikoʹ lepa naʹ makeʹ cen ahang dulu kusun tanaʹ ini are. Ida diaʹ anun ncoʹ iaʹ ikoʹ lepa naʹ makeʹ, ngan ida bayaʹ lete isiu hoʹ.

⁷Naʹkini ida tisen ketoʹ inu iaʹ ikoʹ lepa naʹ makeʹ, luhaʹ uban ne nai cen ikoʹ.

⁸Ngan lepa pe akeʹ naʹ katuk iaʹ ikoʹ lepa naʹ makeʹ are me ida. Ida alaʹ lete dau ue, ngan tisen pe ida akeʹ iaʹ lan uban nai cen ikoʹ, ngan ida ngelan ikoʹ iaʹ lepa ban cuk akeʹ nai.

⁹“Akeʹ lemameʹ me ida. Abeʹ keʹ un lemameʹ me dulu mung kusun tanaʹ ini, bang me kelunan diaʹ ikoʹ naʹ makeʹ, uban ida diaʹ anun ncoʹ.

¹⁰Ketoʹ diaʹ akeʹ un, iaʹ anum, pekina pe ketoʹ diaʹ ikoʹ un, iaʹ anuk lete pe, ngan serema peniga heʹ iaʹ luhaʹ kuʹun nte.

¹¹Naʹkini ne akeʹ ke nai palaʹ ikoʹ. Abeʹ keʹ majan kusun tanaʹ ini laʹa, un sepuʹo ida diaʹ petem kusun tanaʹ ini. Amai iaʹ Buheʹ, petubo ne ida man penyukat ngadan ncoʹ, ina ne ngadan ncoʹ iaʹ ikoʹ lepa naʹ makeʹ are, apan nte ke pebulung neng ca le, kuaʹ baʹan tua pebulung neng ca le.

¹²Ngajan nceʹ un ngan nte are, lepa ne akeʹ petubo ida man penyukat ngadan ncoʹ, ina ne ngadan ncoʹ iaʹ ikoʹ lepa naʹ makeʹ are. Ngan akeʹ nubo lete ida. Ca usa pe abeʹ un durat mida, sematu bang ca le laki iaʹ ke durat, apan ketai nuyan lan ne dau Kitap.

¹³Ngan naʹkini akeʹ ke nai palaʹ ikoʹ. Dalau heʹ petem un kusun tanaʹ ini, akeʹ pisiu lete puyan ini, apan nte ke un pengebangen nceʹ sangan dalem kimet de.

¹⁴Lepa ne akeʹ naʹ katuk koʹ mida, ngan dulu kusun tanaʹ ini iaʹ miʹi neng ida, uban abeʹ de anun usun tanaʹ ini, kuaʹ baʹan nceʹ iaʹ abeʹ un anun usun tanaʹ ini.

¹⁵Abeʹ keʹ nyat ikoʹ ngelipau ida kusun tanaʹ ini, un sepuʹo akeʹ nyat ikoʹ menting ida cen Bali Jaʹat.

¹⁶Kuaʹ baʹan nceʹ iaʹ abeʹ un anun usun tanaʹ ini, pekina lete ida abeʹ un anun usun tanaʹ ini.

¹⁷Petengen ne ida mikoʹ, man sen katuk iaʹ telit lan. Isiu hoʹ iaʹ katuk telit.

¹⁸Akeʹ cuk ida tai kusun tanaʹ ini, kuaʹ baʹan ncoʹ lepa cuk akeʹ nai kusun tanaʹ ini.

¹⁹Ngan tuman ida pe akeʹ petengen usa heʹ me ikoʹ, apan ida lete iaʹ tengen diseʹ dalem katuk telit.

²⁰“Abeʹ keʹ un lemameʹ mida tuaʹ le. Un sepuʹo akeʹ lemameʹ pe me kelunan diaʹ ke ngelan neng akeʹ uban kuʹun tiraʹ de.

²¹Akeʹ lemameʹ mida apan mung nte pebulung neng ca le. Amai, sukun ne ida kahum dalem tua, kuaʹ baʹan ikoʹ kahum dalem akeʹ, ngan akeʹ pe kahum dalem ikoʹ, sukun ne ida pebulung neng ca le, apan dulu kusun tanaʹ ini ke ngelan ikoʹ iaʹ cuk akeʹ nai.

²²Lepa ne akeʹ naʹ serema peniga mida, iaʹ ikoʹ lepa naʹ makeʹ, apan nte senteng ke pebulung neng ca le, kuaʹ baʹan tua pebulung ca le.

²³Akeʹ iaʹ kahum dalem ida, ngan pekina pe ikoʹ iaʹ kahum dalem akeʹ, apan puyan nte pebulung neng ca le ke dengkep lan. Idi dulu kusun tanaʹ ini ke tisen ikoʹ iaʹ cuk akeʹ, ngan ikoʹ iaʹ malaʹ ida ukoʹ baʹan ncoʹ malaʹ neng akeʹ.

²⁴“Amai, lepa ne ikoʹ naʹ ida makeʹ, ngan akeʹ pe keloʹ ida pemung ngan nceʹ kaʹ ukoʹ keʹ, apan nte senteng taʹan serema peniga heʹ, ina ne serema peniga iaʹ ikoʹ lepa naʹ makeʹ, uban ikoʹ iaʹ malaʹ neng akeʹ kena usun tanaʹ ini ke nuyan are.

²⁵Amai iaʹ teneng, abeʹ dulu kusun tanaʹ ini tisen ikoʹ, bang akeʹ iaʹ tisen ikoʹ, ngan ida dina pe diaʹ tisen ikoʹ iaʹ cuk akeʹ nai.

²⁶Akeʹ lepa petisen ikoʹ neng ida, ngan atek keʹ ke uyan pekina lemuto lete, apan puyan pengemalaʹ koʹ neng akeʹ senteng un dalem ida, ngan akeʹ lete senteng un dalem ida pe.”