Read Wahau Kenyah YAYA 18 Bible Online

YAYA 18 - Wahau Kenyah bible

YAYA 18

¹Lepa Yesus pisiu dalem temameʹ e, tai kun ne mecin pemung ngan diaʹ bayaʹ katuk ke, tai tahaʹ dipa sungai iʹut ina iaʹ ngadan Kidrun, iaʹ kukoʹ un pula. Kina ketai Yesus pemung ngan diaʹ bayaʹ katuk ke ne.

²Yudas iaʹ mencai Yesus me bunoʹ o, ia iaʹ lepa tisen kukoʹ pula ina, uban tajen liwai ne Yesus lepa pempun ngan diaʹ bayaʹ katuk ke dina.

³Ina ukoʹ Yudas ngkin ca peng sedadu tai ngan ne kaʹ ukoʹ pula ina. Ngan un pe palai sedadu Umaʹ Palan, diaʹ detaʹu lataʹ ngan diaʹ perisi dina cuk nai, petem ngan gelam pepatai re, ngan kadoʹ naʹan titiu re.

⁴Lepa ne Yesus tisen inu iaʹ ketai nuyan neng ia, ina ukoʹ o tai kaʹ tena, mentung nge kuma neng ida: “Aheʹ iaʹ ikem pita ne?”

⁵Dau re mipa ia: “Yesus lepoʹ Nasarit.” Dau ue neng ida: “Akeʹ ne ia.” Un pe Yudas, iaʹ ke naʹ ia me diaʹ bunoʹ o ne, nekejeng ngan nte kina.

⁶Tegoʹ Yesus pisiu kuma ha neng ida ne: “Akeʹ ne ia,” tai kun nte ngedut, ngan penco uʹang kaʹ tanaʹ.

⁷Kun Yesus lemutu ida laʹa: “Aheʹ iaʹ ikem pita ne?” Dau re neng ia laʹa: “Yesus lepoʹ Nasarit.”

⁸Dau Yesus neng ida: “Lepa ne akeʹ badaʹ mikem kuma: ‘Akeʹ ne ia.’ Buk pekina, uban ncem pita akeʹ, talan ne diaʹ ca dini tai.”

⁹(Ia pisiu pekini apan inu iaʹ ia lepa pisiu ke nuyan lan: “Amai, pabeʹ ca pe diaʹ ikoʹ lepa naʹ makeʹ, abeʹ un durat.”)

¹⁰Un Simun Peterus iaʹ mampin bahing, penco ho menat te, mihau tahaʹ taʹu telinga ca ulaʹ laki Pengebioʹ Detaʹu dina. Un ngadan ulaʹ ina Malekus.

¹¹Dau Yesus neng Peterus: “Meseʹ ne bahng ngkoʹ ne kaʹ sua ha. Un ncoʹ pekimet kuma akeʹ ke abeʹ un nisep sawan penaru iaʹ Amai heʹ lepa naʹ makeʹ are mo?”

¹²Mpun sedadu pemung ngan diaʹ lataʹ de dina ngan pulis lepoʹ Yahudi pe tai mapo Yesus ngan lemeka ia.

¹³Penco tai re ngkin ia pabeʹ Anak ading. Anas iaʹ amai iban Kayapas iaʹ Pengebioʹ Detaʹu re uman ina.

¹⁴Kayapas ne iaʹ lepa pekatuk kelunan Yahudi kuma ha: “Tiga pulang ca usa kelunan matai saliu dulu mung.”

¹⁵Simun Peterus, ngan ca mida diaʹ bayaʹ katuk Yesus, tai bayaʹ ia. Laki iaʹ ca ina un malai ngan iaʹ Pengebioʹ Detaʹu ina. Ina ukoʹ o tai ngan Yesus kaʹ use laki Pengebioʹ Detaʹu ina.

¹⁶Un Peterus ina iaʹ ngelineʹ kata pamen liwang. Laki iaʹ ca are, iaʹ malai ngan laki Pengebioʹ Detaʹu ina, nai kun ne uleʹ kawang, penco ho pisiu ngan leto iaʹ ngkang alet pamen liwang ina, penco ngkin Peterus kaʹ dalem.

¹⁷Un dau leto iaʹ ngkang pamen ina neng Peterus: “Moʹ abeʹ tene ikoʹ re ca me diaʹ bayaʹ katuk laki ina mo?” Un dau Peterus mipa: “Naʹun, abeʹ keʹ un bayaʹ katuk ke.”

¹⁸Sengim ngajan ina, ina ukoʹ diaʹ ulaʹ ngan diaʹ mengau dina uyan luten man kayu arang, ngan nekejeng teliling nge uban nte mentu. Tai kun Peterus kempau, penco nekejeng mentu ngan nte.

¹⁹Iaʹ Pengebioʹ Detaʹu ina lemutu Yesus kumpin puyan diaʹ bayaʹ katuk ke, ngan kumpin puyan katuk ke ne.

²⁰Dau Yesus mipa: “Lemuto te akeʹ lepa pisiu neng peng dulu mung. Ketoʹ katuk keʹ lepa nuyan dalem amin sebayang, ngan dalem Umaʹ Palan, kukoʹ ketoʹ kelunan Yahudi malai nai pepeng are. Abeʹ keʹ un pisiu inu inu ne neng iaʹ suhuk.

²¹Buk pekina, inu adeʹ kem lemutu akeʹ? Lemutu ne dulu diaʹ lepa kenahan dau heʹ. Lemutu ida inu iaʹ akeʹ lepa badaʹ mida. Tisen te ida inu iaʹ baʹan nceʹ.”

²²Tegoʹ Yesus pisiu ini, kun ca pulis diaʹ kina ne nepap ia, ngan kuma ha: “Makang lan pe ikoʹ pisiu pekini dau neng Pengebioʹ Detaʹu ini.”

²³Dau Yesus mipa ia: “Buk keʹ pisiu inu iaʹ salaʹ, badaʹ ne me dulu mung inu iaʹ ban salaʹ. Un sepuʹo buk teneng iaʹ akeʹ lepa pisiu, inu adeʹ koʹ nyakit akeʹ?”

²⁴Uʹo ina Anas cuk ia tai palaʹ Kayapas iaʹ Pengebioʹ Detaʹu ina, petem pebeka lepe ujoʹ o.

²⁵Un lepe Peterus nekejeng kina, ina ukoʹ diaʹ ca kuma neng ia: “Moʹ abeʹ ikoʹ lete ca diaʹ bayaʹ katuk laki ina tupe?” Un sepuʹo dau Peterus nyepati ie, dau ue: “Naʹun, abeʹ keʹ un bayaʹ katuk ke.”

²⁶Un ca ulaʹ laki Pengebioʹ Detaʹu iaʹ pepanak ngan laki iaʹ Peterus mihau telinga idai, penco pisiu. Kun ne lemutu: “Lepa ne akeʹ taʹan ikoʹ pemung ngan ne kaʹ ukoʹ pula idai re taʹin?”

²⁷Dau Peterus kuma ha laʹa: “Naʹun, abeʹ e akeʹ.” Penco dau iap nekuʹuk.

²⁸Laho laho mempam, kun nte ngkin Yesus cen amin Kayapas, tai palaʹ amin Gebenur ina. Un kelunan Yahudi dina, abeʹ de un tai kaʹ dalem amin Gebenur ina uban nte malap sihoʹ kesa, apan nte senteng tai uman Bunut Paska ina.

²⁹Ina ukoʹ Pilauts tai kaʹ awang palaʹ ida, mentung nge lemutu ida: “Inu salaʹ iaʹ ikem mekem me laki ini?”

³⁰Un dau ipa re neng Pilatus: “Abeʹ meʹ ke ngkin ia palaʹ ikoʹ buk ke abeʹ un ti puyan iaʹ salaʹ.”

³¹Dau Pilatus kuma neng ida: “Tiga ne kem alaʹ ia, ngan pebetep ukum neng ia bayaʹ adet cem tengen.” Dau Yahudi dina mipa: “Abeʹ meʹ senteng naʹ ca kelunan neng ukum patai.”

³²Un pekina dau apan ke nuyan lan iaʹ baʹan dau Yesus cen kena are, tegoʹ o badaʹ puyan iaʹ ukoʹ o ke matai ʹo.

³³Tai kun Pilatus uleʹ liwet dalem amin Gebenur ina, pelapa mengin Yesus ngan lemutu ia: “Ikoʹ iaʹ paren bioʹ lepoʹ Yahudi tupe?”

³⁴Dau Yesus mipa ia: “Kumpin ne dau putu hoʹ ne, cen kimet coʹ tengen kenai ini, buk ke are nai cen dulu diaʹ ca iaʹ badaʹ puyan nceʹ mikoʹ?”

³⁵Dau Pilatus mipa: “Ban ncoʹ kuma akeʹ ca Yahudi mo? Lepoʹ koʹ loʹ lete ngan diaʹ detaʹu lataʹ de, ida iaʹ mencaʹ ikoʹ palaʹ akeʹ. Inu pemuyan ikoʹ lepa ti tupe?”

³⁶“Abeʹ puʹun pengaren nceʹ cen usun tanaʹ ini. Buk pengaren nceʹ un puʹun cen usun tanaʹ ini, kelunan diaʹ bayaʹ katuk keʹ ke nyakat apan kelunan Yahudi abeʹ un mapo akeʹ. Naʹun, abeʹ puyan pengaren nceʹ un nai cen usun tana ini.”

³⁷Ina ukoʹ Pilatus lemutu ia: “Buk pekina, paren bioʹ koʹ ne mo?” Dau Yesus mipa ia: “Ikoʹ kuma akeʹ ca paren bioʹ. Lan pe akeʹ pempet ngan nai kusun tanaʹ ini tuman ca le puyan, iaʹ ina badaʹ tugen neng katuk iaʹ telit. Aheʹ diaʹ ubaʹ alaʹ katuk iaʹ telit, ida iaʹ ngeringa dau heʹ.”

³⁸Dau Pilatus lemutu: “Inu iaʹ katuk telit tupe?” Uʹo ina tai kun Pilatus kawang palaʹ kelunan Yahudi dina, ngan kuma neng ida: “Abeʹ keʹ tisen inu iaʹ puʹun ukoʹ le ke pesalaʹ ia.

³⁹Un sepuʹo kelayan adet cem, akeʹ ke nakau ca usa mikem cen amin sepin tegoʹ Bunut Paska. Ubaʹ kem akeʹ ke nakau paren bioʹ lepoʹ Yahudi ini mikem mo?”

⁴⁰Lemikaʹ dau re mipa ia: “Naʹun, abeʹ e ia. Barabas ameʹ ubaʹ.” (Barabas ne ca kelunan kejamun.)