Read Wahau Kenyah YAYA 20 Bible Online

YAYA 20 - Wahau Kenyah bible

YAYA 20

¹Laho mempam Tau Mingku, petem mentem lepe, tai Mariam Madalina kaʹ liang. Kun ne taʹan batu idai lepa ban lubit ne cen paʹ liang ina.

²Tai kun ne ngasa palaʹ Simun Peterus ngan ca iaʹ bayaʹ katuk Yesus iaʹ Yesus malaʹ idai, penco badaʹ mida: “Lepa ne ida alaʹ Tuhan cen liang, ngan abeʹ le tisen kempi re mahung ia.”

³Penco ketai Peterus ngan iaʹ ca iaʹ bayaʹ katuk Yesus idai mecin, ngan penco tai palaʹ liang ina.

⁴Ngasa ketai re dua ne, un sepuʹo iaʹ ca idai muat ngasa neng ʹo Peterus, ina ukoʹ ia iaʹ ading abeʹ kaʹ liang.

⁵Kun ne muʹup ngan taʹan belasoʹ memut idai, abeʹ sepe ia un tai kaʹ dalem.

⁶Nai kun Simun Peterus bayaʹ ia laʹa, penco ketai ie kaʹ dalem liang. Ia taʹan diseʹ belasoʹ memut ina nahung kina.

⁷Ngan belasoʹ iaʹ bino ulu Yesus are, abeʹ un ne nahung ngan belasoʹ memut ina, un sepuʹo petem kelelen lepe uban ne.

⁸Un ca iaʹ bayaʹ katuk idai iaʹ ading abeʹ kaʹ liang are, tai pe ia kaʹ dalem. Kun ne taʹan, penco ngelan.

⁹Un sepuʹo petem lepe ida dua abeʹ un tisen sen dalem Kitap iaʹ kuma ha: “Atek ke kenai beteʹ cen patai ʹo.”

¹⁰Uʹo ina ketai diaʹ bayaʹ katuk dina uleʹ kumaʹ.

¹¹Un ne Mariam are nekejeng mentung nange kaʹ awang liang ina. Petem lepe ia nange, kun ne muʹup naʹat kaʹ dalem liang.

¹²Penco ho taʹan dua re melikat kina, un gelam puteʹ le, madung kukoʹ uban patai Yesus are, ca tahaʹ ulu, ca tahaʹ taket.

¹³Dau re lemutu ia: “Anak, inu adeʹ koʹ nange?” Dau ue mipa: “Lepa ne ida ngelipau Tuhan nceʹ. Abeʹ keʹ tisen kempi tai re mahung ia.”

¹⁴Tegoʹ o pisiu ini, kun ne pupa ngan taʹan Yesus nekejeng kina. Un sepuʹo abeʹ e tisen ina Yesus.

¹⁵Dau Yesus lemutu ia: “Anak, inu adeʹ koʹ nange? Aheʹ iaʹ ikoʹ pita ina?” Mariam kuma ia laki iaʹ mengau pula, ina ukoʹ o pisiu neng ia: “Amai, buk koʹ alaʹ ia, badaʹ ne makeʹ kempi hoʹ mahung ia, apan nceʹ tai alaʹ ia.”

¹⁶Dau Yesus pisiu ia: “Mariam.” Kun Mariam mupa sileʹ ia, penco ti isiu Iberani: “Rabi.” (Sen ini “Guru.”)

¹⁷Dau Yesus badaʹ mia: “Ayen mapo akeʹ, uban abeʹ un awai heʹ tai uleʹ palaʹ Amai Bioʹ lepe. Tai ne badaʹ me diaʹ cenganak keʹ te, akeʹ ke tai uleʹ palaʹ ia iaʹ Amai heʹ, ngan iaʹ Amai hem, iaʹ Allah heʹ, ngan iaʹ Allah hem, kun ncoʹ mida.”

¹⁸Tai kun Mariam Madalina ne badaʹ me diaʹ bayaʹ katuk Yesus dina uban ia lepa taʹan Tuhan, ngan penco dau iaʹ ia lepa badaʹ mia idai are.

¹⁹Tai tahup Tau Mingku, un diaʹ bayaʹ katuk Yesus dina un pempun dalem ca amin, ngan pamen ne pe tenalet uban nte takut kelunan lataʹ lepoʹ Yahudi. Nyeluman kenai Yesus nekejeng kahang ida. Un dau ue: “Denaʹ ne tawai hem.”

²⁰Lepa ha pisiu ni, kun ne peluhaʹ ujoʹ o ngan tegahang nge me ida. Pelapa bangen ne tekaʹ kimet diaʹ bayaʹ katuk ke dina taʹan Tuhan.

²¹Kun Yesus pisiu me dia laʹa: “Denaʹ ne tawai hem. Kuaʹ baʹan Amai Bioʹ lepa cuk akeʹ nai, pekina lete akeʹ cuk ikem tai.”

²²Lepa ha pisiu ina, kun ne ngelaset nyelempau neng ida, ngan kuma ha: “Alaʹ ne Berua Buheʹ.

²³Buk kem sau penyalaʹ kelunan, pesau te ia. Buk kem abeʹ un mesau ue, abeʹ e ke pesau.”

²⁴Un ca usa me diaʹ puloʹ dua diaʹ bayaʹ katuk Yesus dina, ngadan ne Tumas (iaʹ dulu kuma pepit) iaʹ abeʹ un ngan nte tegoʹ Yesus lepa nai.

²⁵Ina ukoʹ diaʹ ca bayaʹ katuk ke dina badaʹ mia: “Un meʹ taʹan Tuhan.” Dau Tumas neng ida: “Abeʹ keʹ ke ngelan buk keʹ abeʹ un taʹan uban ilak tapek neng ujoʹ o, ngan abeʹ un naʹ buaʹ ujoʹ keʹ neng ilak ina, ngan naʹ ujoʹ keʹ pe neng ilak tegahang nge.”

²⁶Ca mingku uʹo ina, diaʹ bayaʹ katuk dina tai pepeng dalem amin laʹa. Tumas pe un ngan nte. Tegoʹ ina petem palet pe pamen. Un sepuʹo kenai Yesus nekejeng kahang ida ngan kuma: “Denaʹ ne tawai hem.”

²⁷Un dau ue neng Tumas: “Naʹ buaʹ ujoʹ koʹ ne kini, ngan naʹat seʹ ujoʹ keʹ ne. Uʹo ina mejo ujoʹ koʹ ne ngan naʹ a kaʹ tegahang ngkeʹ. Ayen ncoʹ kawaʹ laʹa, bang ngelan ne.”

²⁸Dau Tumas mipa ia: “Dui, iaʹ Tuhan nceʹ, ngan Allah heʹ.”

²⁹Dau Yesus neng ia: “Un ncoʹ ngelan uban ncoʹ lepa taʹan akeʹ mo? Bioʹ ne pengebangen kelunan diaʹ ngelan petem nte abeʹ un taʹan akeʹ.”

³⁰Kadoʹ pe puyan nyingan diaʹ ca Yesus lepa ti kata diaʹ bayaʹ katuk ke, iaʹ abeʹ un senurat dalem Kitap ini.

³¹Un sepuʹo dini diaʹ lepa senurat apan ncem ke ngelan Yesus iaʹ atek Keristus iaʹ ngkang pungu udip, ngan iaʹ atek Anak Allah. Ngan kuʹun pengelan ncem ini pe ikem ke alaʹ udip dalem ngadan ne.