Read Wahau Kenyah YAYA 3 Bible Online

YAYA 3 - Wahau Kenyah bible

YAYA 3

¹Un ca laki, ngadan ne Nikudimus, ca iaʹ pengebioʹ lepoʹ Yahudi. Ia kenahum neng mpun diaʹ Perisi.

²Ca alem me Nikudimus tai palaʹ Yesus ngan kuma ha: “Guru, ameʹ tisen ikoʹ ca guru iaʹ nai kuʹun Allah. Abeʹ un aheʹ senteng ti puyan nyingan ukoʹ baʹan ncoʹ ti ne, buk Allah abeʹ un ngan ne.”

³Un dau Yesus mipa ia: “Akeʹ badaʹ mikoʹ lan: ca usa pe abeʹ senteng taʹan puyan pengaren Allah buk ke abeʹ un numpak ke pempet neng ca udip iaʹ mading.”

⁴Un dau Nikudimus lemutu Yesus: “Kumpin kelunan iaʹ lepa lataʹ senteng ke numpak pempet laʹa tupe? Atek abeʹ un nyatan kelunan senteng tai ngeliwet kaʹ dalem batek ueʹ e, numpak pempet ngedua liwai laʹa.”

⁵Un dau Yesus: “Akeʹ badaʹ mikoʹ lan, ca usa pe abeʹ un senteng tai kaʹ dalem puyan pengaren Allah buk ke abeʹ pempet kuʹun sungai ngan kuʹun Berua Tuhan pelaʹa.

⁶Singket usa kelunan iaʹ un usa un pempet cen tuʹa re, un sepuʹo singket diaʹ un udip berua nai pempet neng udip berua re kuʹun Berua Tuhan.

⁷Ayen ncem mateng tecu kuʹun dau heʹ badaʹ mikem: ‘Tekep lete ikem mung ke pempet neng ca udip ia mading.’

⁸Ilu pekata ukoʹ baʹan keput bahiu. Mele kempi ie ubaʹ tai, ikem kenahan dau tuyau ue. Un sepuʹo abeʹ kem tisen cen mpi kenai ie, ngan kempi ketai ie. Kuaʹ ngan ina lete puyan singket usa kelunan diaʹ pempet kuʹun Berua Tuhan.”

⁹Un dau Nikudimus lemutu: “Kumpin ne pekini tupe?”

¹⁰Un dau Yesus mipa ia: “Ikoʹ ca guru lepoʹ Israil, abeʹ pe ikoʹ tisen ini tupe?

¹¹Akeʹ badaʹ mikoʹ lan, ameʹ pisiu inu iaʹ ameʹ tisen, ngan ameʹ badaʹ inu iaʹ ameʹ taʹan. Naʹ pe pekina, pabeʹ ca usa mikem diaʹ lataʹ dina pe abeʹ un ubaʹ alaʹ dau katuk meʹ.

¹²Abeʹ kem un ngelan akeʹ dalau heʹ badaʹ mikem puyan katuk usun tanaʹ ini are. Buk pekina, abeʹ nyatan ncem ke ngelan dau heʹ buk keʹ ke badaʹ puyan surga mikem.

¹³Ngan abeʹ un aheʹ iaʹ lepa tai kaʹ surga lepe, bang Anak Sio iaʹ lepa nai cen surga.”

¹⁴Ukoʹ baʹan Musa mejung ncung ulai jangin kempau kayu tecek kaʹ tanaʹ lenga are, ngan pekina lete Anak Sio ketai pejung ʹo,

¹⁵apan ketoʹ dulu diaʹ ngelan neng ia setneng un udip saheʹ kelineʹ iaʹ ngeirman.

¹⁶Bioʹ puyan Allah malaʹ neng ilu kelunan kusun tanaʹ ini, ina ukoʹ o mencai Anak ke iaʹ bang ca ina le milu, apan mung kelunan diaʹ ngelan neng ia abeʹ un tai matai penco, un sepuʹo ida ke alaʹ udip saheʹ kelineʹ iaʹ ngeriman.

¹⁷Abeʹ Allah cuk Anak ke nai pebetep ukum kusun tanaʹ ini, un sepuʹo Allah uyan ia Laki iaʹ keniga udip kelunan kusun tanaʹ ini.

¹⁸Aheʹ diaʹ ngelan neng Anak ina, abeʹ un ukum penyalaʹ betep neng ia. Un sepuʹo aheʹ diaʹ abeʹ un ngelan, un ne ukum lepa betep neng ia uban ne are ngelan neng Anak Allah iaʹ bang ca ina le.

¹⁹Pekini ne puyan ukum nuyan: dema lepa nai kusun tanaʹ ini, un sepuʹo kelunan malaʹ aleʹ neng puyan iaʹ mentem cen ʹo iaʹ dema, uban pemuyan nte jaʹat.

²⁰Aheʹ aheʹ iaʹ ti puyan jaʹat, ia miʹi neng puyan dema, ngan abeʹ un ubaʹ nai palaʹ dema uban ne abeʹ un ubaʹ pemuyan iaʹ jaʹat ina luhaʹ neng dulu.

²¹Un sepuʹo aheʹ iaʹ ti puyan iaʹ telit lan, ia ubaʹ nai palaʹ dema apan dema ina ke peluhaʹ diseʹ pemuyan ne telit bayaʹ dau Allah.

²²Uʹo ina Yesus ngan diaʹ bayaʹ katuk ke tai masat kaʹ dale Yudia. Un pe kudaʹ kudaʹ majan ia ngelineʹ ngan nte kina, ngan ia ngebatis kelunan.

²³Un pe Yaya lete ngebatis kelunan kaʹ sungai Ainun, abeʹ un coʹ cen Salim, uban kadoʹ sungai kina, ngan kadoʹ pe kelunan tai palaʹ ia, ngan ia ngebatis ida.

²⁴Yaya pe abeʹ un awai sihoʹ sepin.

²⁵Un palai diaʹ bayaʹ katuk Yaya ne paseʹ ngan ca kelunan Yahudi, paseʹ kuaʹ baʹan adet de muheʹ inu re.

²⁶Sulo ketai re palaʹ Yaya ngan badaʹ mia: “Guru, masaʹ koʹ petawai laki iaʹ un ngan ncoʹ tahaʹ dipa Yardin are, iaʹ ikoʹ pisiu mameʹ de. Ia ngebatis kelunan naʹkini, ngan mung dulu tai palaʹ ia.”

²⁷Un dau Yaya mipa: “Aheʹ aheʹ pe milu kelunan ne, abeʹ un aheʹ senteng alaʹ gayeng buk Tuhan Allah abeʹ un naʹ a mia.

²⁸Usa hem tengen senteng nugen kumpin dau heʹ lepa badaʹ mikem: ‘Abeʹ keʹ Keristus iaʹ ngkang pungu udip, un sepuʹo Allah iaʹ cuk akeʹ nai tahaʹ tena neng ia.’

²⁹Seleket laki iaʹ metip leto ina, anun ne lete leto ina. Tuyang laki iaʹ metip leto ina are, nekejeng kata ia ngan ngeringa dau ue, ngan banget tekaʹ kimet te kenahan dau isiu laki iaʹ metip leto ina are. Pekin ane puyan bangen nceʹ tengen iaʹ tai daʹam lan.

³⁰Tekep lete Yesus tai bioʹ, ngan akeʹ ini iaʹ ketai iʹut.”

³¹Aheʹ iaʹ nai cen mpau, ia iaʹ bioʹ cen ʹo mung dulu. Aheʹ iaʹ nai cen tanaʹ, ia iaʹ bang pekimet usun tanaʹ, ngan pisiu puyan pengudip kusun tanaʹ tuaʹ le. Aheʹ iaʹ nai cen surga, ina iaʹ tahaʹ mpau neng dulu mung.

³²Ia badaʹ inu iaʹ ia taʹan ngan kenahan, un sepuʹo abe un aheʹ iaʹ alaʹ dau katuk ke.

³³Aheʹ iaʹ alaʹ dau katuk ke, ida iaʹ ke tisen lan, uban Allah iaʹ puʹun puyan iaʹ telit.

³⁴Laki iaʹ Allah lepa cuk nai are, ia iaʹ penco dau isiu Allah, uban Allah iaʹ lebang naʹ Berua ha mia.

³⁵Amai Bioʹ iaʹ malaʹ neng Anak ke ngan mahung ketoʹ inu dalem gaham penyukat te.

³⁶Aheʹ iaʹ ngelan neng Anak ina, ia lete iaʹ un udip saheʹ kelineʹ iaʹ ngeriman. Aheʹ iaʹ muau bayaʹ dau Anak ina, nyahut te senteng ke alaʹ udip ne, bang kenca Allah iaʹ ke pencit neng ia pabeʹ bayaʹ.