Read Wahau Kenyah YAYA 5 Bible Online

YAYA 5 - Wahau Kenyah bible

YAYA 5

¹Uʹo ina un ca adet bunut lepoʹ Yahudi, ngan tai ne Yesus kaʹ lepoʹ Yerusalim.

²Kaʹ Yerusalim un ca belau sungai nyeng kata Pamen Dumba. Pipa belau ina un lema re laga petem ngan sengau ue. Dulu pisiu belau ina kuma Bitisda.

³Kina un pe ca peng bioʹ kelunan diaʹ sakit, meken kempau laga ina — diaʹ butaʹ, diaʹ apet, ngan diaʹ lemaʹ. [Ida ngena sungai ina ke ngala,

⁴uban tahaʹ palai un ca melikat Tuhan tai kaʹ dalem belau ina, ngan nekibai sungai kaʹ dalem me. Aheʹ cen ahang ida diaʹ sakit dina iaʹ ading tai kaʹ dalem belau ina, lepa melikat ina nekibai ie, ida iaʹ maget laho cen inu iaʹ penyakit de.]

⁵Un ca laki kina iaʹ lepa sakit telu puloʹ aya uman pengemajan ne.

⁶Yesus taʹan ia meken kina ngan tisen ia ca laki iaʹ majan aleʹ sakit. Sulo dau Yesus neng ia: “Ubaʹ koʹ maget tupe?”

⁷Kun laki iaʹ sakit ina mipa ia: “Amai, abeʹ un aheʹ iaʹ ke mepo mahung akeʹ kaʹ dalem belau ini tegoʹ sungai ini ngala ne, uban ngajan nceʹ ke ngiaʹ ke tai kaʹ dalem, dulu diaʹ ca pe ading tai neng akeʹ.”

⁸Un dau Yesus neng ia: “Beteʹ ne, lemelen ngan ngayang pat coʹ, ngan tai masat.”

⁹Pelapa maget ne laki ina, Kun ne lemelen pat te, penco tai ie masat. Puyan ini nuyan tegoʹ Tau Kelineʹ.

¹⁰Ina ukoʹ diaʹ pengelataʹ adet lepoʹ Yahudi dina badaʹ me laki iaʹ lepa maget ina: “Ini ne Tau Kelineʹ, ngan puyan ncoʹ ngayang pat ina iaʹ ke ngesa adet le.”

¹¹Un dau laki ina mipa ida: “Laki iaʹ paget akeʹ ne, ia iaʹ cuk akeʹ ngayang pat ngan masat.”

¹²Kun nte lemutu ia: “Aheʹ laki iaʹ cuk ikoʹ ngayang pat ngan masat ina?”

¹³Un sepuʹo abeʹ laki iaʹ lepa maget ina tisen aheʹ e, uban kadoʹ dulu pempun kina, ngan Yesus pe lepa mecin ina.

¹⁴Uʹo ina Yesus taʹan ia kaʹ dalem Umaʹ Palan ngan kuma ha: “Naʹat ading, lepa tiga ne ikoʹ naʹkini udai. Pet mung ne puyan penyalaʹ koʹ, ayen ti ie laʹa malap puyan iaʹ pelapa jaʹat nai nantaʹ ikoʹ ʹo.”

¹⁵Penco tai laki ina mecin ngan badaʹ me diaʹ pengelataʹ adet lepoʹ Yahudi dina uban Yesus iaʹ lepa paget ia.

¹⁶Uban tuman ini ne tading nte keloʹ nyakit Yesus, uban Yesus paget laki ina tegoʹ Tau Kelineʹ.

¹⁷Un dau Yesus mipa ida: “Amai heʹ pesulo pegayeng, ngan akeʹ pe tekep pegayeng lete.”

¹⁸Kuʹun isiu ini ne diaʹ pengelataʹ lepoʹ Yahudi dina tai pareng kuʹo ke tekaʹ kimet de ubaʹ lematai Yesus. Lan pe ia ngesa Tau Kelineʹ; abeʹ kuʹun ina tuaʹ le, un sepuʹo ia badaʹ Allah iaʹ Amai ie tengen. Man puyan ini ne ia uyan usa ha loʹ pekuaʹ ngan Allah.

¹⁹Kun Yesus mipa ida: “Lan dau heʹ mikem, abeʹ Anak ini uyan inu man kimet te tengen, bang ia uyan ini iaʹ ia taʹan Amai ie uyan. Inu puyan iaʹ Amai ie uyan, atek Anak ke uyan lete.

²⁰Uban Amai ina malaʹ neng Anak ina, ngan peluhaʹ mia mung pemuyan iaʹ ia tengen ti. Atek ke ke peluhaʹ mia puyan iaʹ bioʹ cen ini iaʹ ia ke ti uʹo, ngan ikem mung iaʹ ke salam kuʹun ne.

²¹Ukoʹ baʹan Amai meteʹ kelunan diaʹ matai ngan naʹ udip mida, pekina lete Anak ke ke naʹ udip me kelunan diaʹ ia ubaʹ pudip.

²²Abeʹ Amai ina tengen pebetep ukum neng dulu aheʹ aheʹ pe, un sepuʹo ketoʹ penyukat iaʹ ke pebetep ukum ia naʹ me Anak ke,

²³apan mung kelunan ke selama neng Anak ina, kuaʹ baʹan seʹ puyan nte selama neng Amai ina. Aheʹ klunan diaʹ abeʹ un selama neng Anak ina, abeʹ de selama neng Amai iaʹ cuk ia nai ne.

²⁴“Lan dau heʹ mikem, aheʹ iaʹ kenahan dau tiraʹ keʹ ngan ngelan ia iaʹ cuk akeʹ nai, kelunan ina ne iaʹ lepa alaʹ udip saheʹ kelineʹ iaʹ ngeriman, ngan abeʹ e ke sihoʹ puyan betep ukum penyalaʹ laʹa, un sepuʹo lepa ne ia lapa cen patai tai palaʹ udip.

²⁵Lan dau heʹ mikem, jakaʹ iaʹ kenai tegoʹ kelunan diaʹ matai ke kenahan dau isiu Anak Allah, ngan aheʹ diaʹ kenahan dau isiu ina, ida iaʹ ke mudip. Jakaʹ ina lepa nai abeʹ naʹkini.

²⁶Ukoʹ baʹan Amai ina tengen iaʹ puʹun udip, kuaʹ ina lete ia uyan Anak ke iaʹ puʹun udip.

²⁷Ngan ia lepa naʹ me Anak ke penyukat iaʹ ke pebetep ukum, uban ia iaʹ Anak Sio.

²⁸Ayen tecu tekaʹ neng puyan ini, uban jakaʹ iaʹ kenai ʹo tegoʹ mung kelunan diaʹ ban matai diaʹ un kaʹ dalem liang ke kenahan dau isiu Anak ina,

²⁹ngan ida iaʹ ke nai kawang cen dalem liang nte. Aheʹ diaʹ lepa uban uyan iaʹ tiga, ida iaʹ ke beteʹ ngan penco tai palaʹ udip. Un sepuʹo aheʹ diaʹ lepa uban uyan puyan jaʹat, ida lete iaʹ ke beteʹ ngan penco lenca neng ukum.”

³⁰“Abeʹ keʹ senteng uyan inu man kimet ceʹ tengen. Akeʹ pebetep ukum bang bayaʹ dau Allah badaʹ makeʹ tuaʹ le. Ina ukoʹ teneng dau heʹ lemetep ukum, uban abeʹ keʹ uyan ne bayaʹ pengubaʹ kimet ceʹ tengen, un sepuʹo akeʹ bayaʹ dau pengubaʹ iaʹ cuk akeʹ nai ne.

³¹“Buk ke badaʹ tugen neng puyan usa heʹ tengen, abeʹ tekep dulu ke ngelan dau heʹ badaʹ ina.

³²Un sepuʹo un ca usa iaʹ badaʹ tugen neng puyan usa heʹ, ngan akeʹ tisen uban lan inu iaʹ ia pisiu neng akeʹ.

³³Lepa ne ikem cuk diaʹ lawa hem tai palaʹ Yaya, ngan ia iaʹ penco isiu neng iaʹ telit lan.

³⁴Naʹ pe akeʹ pekina dau, abeʹ e uban nceʹ abeʹ un senteng alaʹ tugen cen kelunan. Akeʹ pekina dau ne apan ncem senteng alaʹ udip iaʹ ke pudip ikem dalem Tuhan.

³⁵Yaya iaʹ kuaʹ baʹan ca titiu iaʹ tutung menyerema le diseʹ, ngan nuat le ikem ubaʹ ke bangen neng dema ha.

³⁶Un sepuʹo akeʹ un ca naʹan puyan iaʹ badaʹ tugen neng akeʹ, bioʹ cen uʹo tugen iaʹ Yaya badaʹ neng akeʹ. Pemuyan iaʹ akeʹ uyan, ina pemuyan iaʹ Amai heʹ cuk akeʹ uyan. Pemuyan dina iaʹ badaʹ tugen neng akeʹ, ngan peluhaʹ uban Amai Bioʹ iaʹ cuk akeʹ nai.

³⁷Ngan Amai iaʹ cuk akeʹ nai, ia lete iaʹ badaʹ tugen neng puyan usa heʹ. Nyahut cem senteng kenahan dau isiu ue, ngan pekina pe taʹan silu nge.

³⁸Ngan abeʹ kem peremun dau katuk ke kaʹ dalem kimet cem, uban abeʹ kem ngelan ia, iaʹ Allah cuk nai.

³⁹Ikem pekalai Kitap uban ncem kuma dalem surat dina hem ke alaʹ udip saheʹ kelineʹ iaʹ ngeriman, ngan surat dina tengen ke badaʹ tugen neng akeʹ.

⁴⁰Petem kem abeʹ un ubaʹ nai palaʹ akeʹ ke alaʹ udip.

⁴¹“Abeʹ keʹ un pita kelunan ke pada akeʹ.

⁴²Un sepuʹo akeʹ tisen ikem. Abeʹ kem un malaʹ neng Allah dalem kimet cem.

⁴³Akeʹ nai ngan penyukat Amai heʹ, un sepuʹo abeʹ kem ubaʹ alaʹ akeʹ. Tegoʹ ca usa nai ngan penyukat te tengen, ubaʹ kem alaʹ ia.

⁴⁴Uban ncem ubaʹ un pada cen ikem selepeʹ, un sepuʹo abeʹ kem un ubaʹ ke mita pada cen Allah iaʹ bang ca le ina. Buk pekina, abeʹ kem senteng ke ngelan.

⁴⁵Naʹ pe ia pekina, ayen ncem kuma akeʹ iaʹ ke mekem salaʹ mikem palaʹ Amai heʹ. Musa iaʹ ke mekem salaʹ mikem, Musa ina lete iaʹ ikem nebelum cen kena re.

⁴⁶Buk kimet cem lan ngelan Musa are, seʹ kem ke ngelan akeʹ lete ina, uban ia iaʹ lepa nyurat puyan nceʹ.

⁴⁷Un sepuʹo uban ncem abeʹ un ngelan puyan iaʹ Musa nyurat, abeʹ ne nyatan ncem ke ngelan dau inu iaʹ akeʹ pisiu.”