Read Wahau Kenyah YAYA 6 Bible Online

YAYA 6 - Wahau Kenyah bible

YAYA 6

¹Lepa ina Yesus tai uleʹ kaʹ dipa leteng Galilia, (ia lete leteng Tiberias).

²Un ca peng kelunan ia bioʹ le tai bayaʹ ia, uban nte lepa taʹan diseʹ puyan nyingan ne paget kelunan diaʹ sakit.

³Tai kun Yesus madung kusun ca mudung, pemung ngan diaʹ bayaʹ katuk ke.

⁴Adet Bunut Paska lepoʹ Yahudi kenai nyeng.

⁵Kun Yesus naʹat pipa ia ngan taʹan kenai ca peng kelunan iaʹ bioʹ le palaʹ ia. Un dau ue neng Pilipus: “Kempi le ke lemeli penguman iaʹ senteng lemakan kelunan dini mung?”

⁶Yesus pisiu ini uban ubaʹ ten Pilipus. Iaʹ lan ne, lepa tisen ne Yesus inu iaʹ ia ke ti.

⁷Un dau Pilipus mipa ia: “Naʹ pe ia tahaʹ dumit le singket usa re, ina ha ke suheʹ dua ato ligit suaʹ luteʹ ke senteng penguman nte lete.”

⁸Un ca laʹa me diaʹ bayaʹ katuk Yesus, Anderias iaʹ cenganak Simun Peterus, iaʹ kuma ha:

⁹Ini ca demanai iaʹ un lema re luʹung ruti paun, ngan dua re usa atuk. Un sepuʹo uyan inu le ini me kelunan kadoʹ dini tupe?”

¹⁰Kun Yesus badaʹ mida: “Cuk ne dulu madung ading.” Kadoʹ udu kina. Kun dulu madung ne. Pengekadoʹ laki kihoʹ kihoʹ lema ibu usa re.

¹¹Kun Yesus alaʹ ruti idai, penco ho nyuaʹ saheʹ kimet neng Allah, ngan patu ue me kelunan kadoʹ diaʹ madung kina ne. Pekina lete ia ti atuk didai, ngan alaʹ mele kumpin pengubaʹ de ne.

¹²Tegoʹ de beso mung ne, kun Yesus pisiu diaʹ bayaʹ katuk ke ne: “Nemo mung ne diaʹ laʹa re ne, ayen ngeburaʹ a.”

¹³Sulo re nemo ho mung, ngan nyangan puloʹ dua belatak man laʹa lema luʹung ruti paun didai, iaʹ kelunan dina lepa uman nte.

¹⁴Dalau kelunan dina taʹan diseʹ puyan nyingan iaʹ Yesus lepa ti, un dau re: “Masaʹ lan ini pegawa bioʹ iaʹ tekep nai kusun tanaʹ ne.”

¹⁵Lepa ne Yesus tisen kimet de ubaʹ nai alaʹ ia, uban nte ubaʹ mejen uyan ia iaʹ paren bioʹ, ina ukoʹ Yesus tai masat tengen kusun mudung.

¹⁶Tegoʹ tai tahup, kenai diaʹ bayaʹ katuk Yesus tai puno palaʹ leteng ina are,

¹⁷ngan tai dalem alut, penco tai uleʹ kaʹ dipa leteng nyeripa lepoʹ Kapernaum. Keno ketai mentem ne, jawa pe nai Yesus palaʹ ida.

¹⁸Sebiʹen kenai ca layam kasa ne, ngan leteng ina pe luyak aleʹ.

¹⁹Dalau diaʹ bayaʹ katuk Yesus lepa lemesai kihoʹ kihoʹ telu batu, buk are pat batu pengecoʹ o, kun nte taʹan Yesus masat kempau sungai, nai nyeng kata alut, ngan daram tekaʹ de. Un dau Yesus mida:

²⁰“Ayen daram. Akeʹ ini.”

²¹Ubaʹ ne ida alaʹ ia ngan nte kaʹ alut. Ngan tegoʹ ina, beliau dapit ne alut nte neng tanaʹ iaʹ kukoʹ de ketai ne.

²²Neng kenempam me, un dulu diaʹ kadoʹ diaʹ petem ngelineʹ kaʹ dipa leteng ina taʹan bang ca le alut nahung laʹa. Ida lepa tisen ne Yesus abeʹ un tai dalem alut ngan diaʹ bayaʹ katuk ke, ban ida tengen ne tai mecin Yesus are.

²³Nai alut diaʹ ca cen Tiberias nyekakan kata kina, nyeng kukoʹ dulu uman ruti paun tegoʹ Yesus lepa nyuaʹ saheʹ kimet are.

²⁴Kun dulu diaʹ kadoʹ dina taʹan Yesus ngan diaʹ bayaʹ katuk ke abeʹ un kina, penco re ngedung kalut ngan tai kaʹ Kapernaum, tai mita Yesus.

²⁵Kun nte taʹan ia kaʹ dipa leteng ina. Un dau re neng ia: “Guru, midan ban nai hoʹ kini tupe?”

²⁶Dau Yesus mipa: “Lan dau heʹ mikem, iaʹ ukoʹ kem nai pita akeʹ, abeʹ uban ncem tisen puyan nyingan nceʹ ina, un sepuʹo uban ncem lepa beso uman ruti, pa ina lene kimet cem.

²⁷Ayen bang pegayeng mita penguman iaʹ luhaʹ jaʹat, un sepuʹo pegayeng ne mita penguman iaʹ majan neng udip saheʹ kelineʹ iaʹ ngeriman. Peguman ini atek Anak Sio ke naʹ mikem, uban Allah, Amai Bioʹ iaʹ lepa nedanaʹ ia iaʹ tekep ke man puyan ini.”

²⁸Kun nte lemutu ia: “Inu puyan iaʹ ameʹ senteng ti apan meʹ ke mejo gayeng Allah?”

²⁹Un dau Yesus mipa: “Ini ne gayeng iaʹ Allah ubaʹ ikem ti: ngelan ne neng ia iaʹ Allah cuk nai ne.”

³⁰Dau re mipa: “Inu puyan nyingan iaʹ ikoʹ ti apan meʹ taʹan ne, ina le ameʹ ke ngelan ikoʹ? Inu iaʹ ikoʹ ke uyan tupe?

³¹Un tepun meʹ cen naʹaʹ are lepa uman ruti kaʹ tanaʹ lenga, iaʹ kuaʹ baʹan dau dalem Kitap: ‘Cen surga ha naʹ ruti ida uman.’ ”

³²Un dau Yesus mida: “Lan dau heʹ mikem, inu iaʹ Musa lepa naʹ mikem cen naʹaʹ, abeʹ ina ruti cen surga. Amai heʹ iaʹ ke naʹ ruti lan mikem cen surga ʹo.

³³Uban ruti iaʹ Allah ke naʹ, ia ne iaʹ nai kentaʹ cen surga, ngan naʹ udip milu kelunan kusun tanaʹ.”

³⁴Kun nte lemutu ia: “Amai, pesulo ne naʹ ruti ini mameʹ.”

³⁵Kun Yesus pisiu mida: “Akeʹ ne iaʹ ruti pengudip. Aheʹ kelunan diaʹ nai palaʹ akeʹ, abeʹ lan nte ke laʹu. Ngan aheʹ kelunan diaʹ ngelan neng akeʹ, abeʹ lan nte ke muʹang.

³⁶Naʹkini akeʹ badaʹ mikem, ngan ikem lepa taʹan akeʹ, un sepuʹo abeʹ kem ubaʹ ngelan.

³⁷Singket usa kelunan, aheʹ diaʹ Amai heʹ naʹ makeʹ, atek de nai palaʹ akeʹ. Abeʹ keʹ ke nyekang aheʹ iaʹ ke nai palaʹ akeʹ,

³⁸uban akeʹ nai kentaʹ cen surga ke ti pengubaʹ ia iaʹ cuk akeʹ nai. Abeʹ keʹ ti pengubaʹ keʹ tengen.

³⁹Ia, iaʹ cuk akeʹ nai, ubaʹ akeʹ ti puyan pekini apan nceʹ ke petubo mung diaʹ ia naʹ makeʹ, ngan abeʹ un buhaʹ ca usa durat. Un sepuʹo ia ubaʹ akeʹ beteʹ ida mung neng udip tegoʹ tau iaʹ ke kuʹo ho.

⁴⁰Pekini ne puyan Amai heʹ ubaʹ apan mung aheʹ kelunan diaʹ taʹan ngan ngelan Anak ini, ida iaʹ senteng alaʹ udip saheʹ kelineʹ iaʹ ngeriman, ngan akeʹ ke pebeteʹ ida neng udip tegoʹ tau iaʹ ke kuʹo ho ʹo.”

⁴¹Ina ne tading kelunan Yahudi kuheng dau neng Yesus, uban ne badaʹ: “Akeʹ ini ne ruti iaʹ nai cen surga.”

⁴²Ina ukoʹ de pekini dau: “Laki ini ne iaʹ Yesus anak Yusup sedeʹ? Ilu tisen amai ie ngan ueʹ e. Naʹkini kumpin puyan ne kuma ia nai cen surga?”

⁴³Un dau Yesus mipa ida: “Pekenaʹ ne nguheng kahang ikem selepeʹ.

⁴⁴Abeʹ un aheʹ senteng nai palaʹ akeʹ buk abeʹ un kimet te pihit kuʹun Amai Bioʹ iaʹ cuk akeʹ nai ne, ngan akeʹ ke pebeteʹ ia neng udip tegoʹ tau iaʹ ke kuʹo ho ʹo.

⁴⁵Un diaʹ pegawa cen naʹaʹ de nyurat: ‘Allah iaʹ pekatuk mung kelunan.’ Aheʹ aheʹ diaʹ kenahan dau Amai, ngan pekalai cen ia, ida iaʹ ke nai palaʹ akeʹ.

⁴⁶Abeʹ un nceʹ kuma ha ca usa iaʹ lepa taʹan Amai. Ia iaʹ nai cen Allah, bang ia tengen le iaʹ lepa taʹan Amai.

⁴⁷“Lan dau heʹ mikem, aheʹ diaʹ ngelan, ida iaʹ un udip saheʹ kelineʹ iaʹ ngeriman.

⁴⁸Akeʹ ne iaʹ ruti pengudip.

⁴⁹Cen naʹaʹ diaʹ tepun ncem uman ruti manaʹ kaʹ tanaʹ lenga are, un sepuʹo matai ne ida.

⁵⁰Ca naʹan pe ruti iaʹ nai cen surga. Aheʹ diaʹ uman ne, abeʹ de ke matai.

⁵¹Akeʹ ne ruti pengudip iaʹ lepa nai cen surga. Buk aheʹ aheʹ iaʹ uman ruti ini, ia iaʹ ke mudip pabeʹ bayaʹ. Ruti iaʹ akeʹ ke naʹ, ina ne usa heʹ iaʹ akeʹ mencai ke uyan udip kusun tanaʹ ini.”

⁵²Ini ne penading iaʹ uyan kelunan Yahudi miʹa ngan paseʹ neng ahang ida selepeʹ. Dau re lemutu: “Inu senteng laki ini ke naʹ usa ha ilu uman?”

⁵³Un dau Yesus mida: “Lan au heʹ mikem, buk kem abeʹ un uman usa ngan nisep dahaʹ Anak Sio ini, abeʹ udip ke un neng ikem.

⁵⁴Aheʹ diaʹ uman usa heʹ ngan nisep dahaʹ keʹ, ida iaʹ un udip saheʹ kelineʹ iaʹ ngeriman, ngan akeʹ iaʹ ke pebeteʹ ia palaʹ udip tegoʹ tau iaʹ ke kuʹo ho ʹo.

⁵⁵Uban usa heʹ iaʹ atek ca penguman, ngan dahaʹ keʹ iaʹ atek ca tisep lan.

⁵⁶Aheʹ iaʹ uman usa heʹ ngan nisep dahaʹ keʹ, ia iaʹ mudip neng akeʹ, ngan akeʹ pe mudip neng ia.

⁵⁷Amai iaʹ mudip, iaʹ cuk akeʹ nai. Uban kuʹun ne lete akeʹ mudip ne. Pekina ne puyan aheʹ kelunan diaʹ uman akeʹ, ida lete iaʹ ke mudip kuʹun nceʹ.

⁵⁸Ini ne ruti iaʹ nai cen surga, abeʹ un kuaʹ baʹan ruti iaʹ tepun ncem lepa uman cen naʹaʹ de, penco matai. Un sepuʹo aheʹ iaʹ uman ruti iaʹ nai cen surga ini, ina iaʹ ke mudip pabeʹ bayaʹ.”

⁵⁹Yesus pisiu ini dalau ue pekatuk dulu kaʹ dalem amin sebayang, kaʹ lepoʹ Kapernaum.

⁶⁰Kadoʹ diaʹ bayaʹ katuk Yesus kenahan ini ngan pisiu: “Mahan aleʹ dau katuk ini. Aheʹ iaʹ senteng ke ngeringa dau ue tupe?”

⁶¹Abeʹ un aheʹ iaʹ badaʹ me Yesus. Naʹ pe pekina, lepa tisen ne ia uban diaʹ bayaʹ katuk ke nguheng dau neng idi. Ini ukoʹ o pisiu mida: “Ini iaʹ uyan kimet cem tai luʹap tekaʹ tupe?

⁶²Buk pekina, kumpin ne puyan ncem buk kem ke taʹan ketai Anak Sio ini tai uleʹ kukoʹ o cen kena are?

⁶³Berua Allah iaʹ naʹ udip me kelunan. Penyukat usa kelunan abeʹ un inu iaʹ bang nge. Un sepuʹo ketoʹ tiraʹ diaʹ akeʹ lepa pisiu mikem, ina iaʹ atek Berua ngan udip.

⁶⁴Petem palai mikem abe un ngelan ne.” (Cen kena lene Yesus tisen aheʹ iaʹ abeʹ un ubaʹ ngelan, ngan aheʹ iaʹ ke naʹ ia me bunoʹ o.)

⁶⁵Kun dau ue laʹa: “Ini ne tuman nceʹ iaʹ akeʹ lepa badaʹ mikem are: abeʹ un aheʹ iaʹ senteng nai palaʹ akeʹ buk Amai Bioʹ abeʹ un pawang ukoʹ kenai re.”

⁶⁶Uban kuʹun ini ne kadoʹ diaʹ bayaʹ Yesus tai ngeliwet laʹa. Abeʹ de ubaʹ tai tugung ia laʹa.

⁶⁷Ina ukoʹ Yesus pisiu me diaʹ puloʹ dua usa diaʹ bayaʹ katuk ke ne: “Kumpin ncem tupe? Ubaʹ kem tai mecin akeʹ mo?”

⁶⁸Kun dau Simun Peterus mipa ia: “Ahaʹ Tuhan, palaʹ aheʹ meʹ ketai laʹa? Ikoʹ iaʹ mampin isiu iaʹ naʹ udip saheʹ kelineʹ iaʹ ngeriman.

⁶⁹Naʹkini ameʹ ngelan ngan tisen ikoʹ iaʹ atek buheʹ iaʹ nai cen Allah.”

⁷⁰Un dau Yesus mipa ida: “Lan lete akeʹ iaʹ lemileʹ ikem diaʹ ca puloʹ dua usa dini, belekaʹ uban un pe ca usa mikem iaʹ nuyan bali jaʹat.”

⁷¹Dau ue pisiu pekina marung neng Yudas anak Simun Iskariut. Naʹ pe kenuen Yudas ne ca usa me diaʹ puloʹ dua bayaʹ katuk Yesus ne, ia iaʹ ke naʹ Yesus palaʹ diaʹ bunoʹ o.