Read Wahau Kenyah YAYA 8 Bible Online

YAYA 8 - Wahau Kenyah bible

YAYA 8

¹[ Lepa ina mung dulu tai uleʹ kaʹ amin nte. Un sepuʹo Yesu tai palaʹ mudung Buaʹ Ampang.

²Mempam neng ke nempam me, tai Yesus uleʹ palaʹ Umaʹ Palan Allah. Mung dulu diaʹ kadoʹ dina nai pempun teliling ia. Penco ho madung ngan pekatuk ida.

³Diaʹ guru adet ngan diaʹ Perisi ngkin ca leto iaʹ ida lepa alaʹ dalau ue pemung nyelem ngan ca laki. Kun nte pejeng ia tahaʹ tena ida mung.

⁴Un dau re neng Yesus: “Leto ini iaʹ ameʹ mapo dalem me pemung nyelem ngan ca laki.

⁵Dalem adet le un Musa naʹ ca ukum adet iaʹ cuk ilu mukum leto iaʹ pekini puyan. Ilu lemulo ia man batu pa ha matai. Kumpin baʹan ncoʹ?”

⁶Ida pisiu pekini uban nte ten ke makui tiraʹ neng ia, apan ukan nte ke mekem salaʹ me ia. Kun Yesus nuheng penco ngalung man ujoʹ o kaʹ tanaʹ.

⁷Dalau re nekejeng kina ngan lemutu lemutu ia, penco kenai Yesus beteʹ ngan kuma ha neng ida: “Aheʹ iaʹ nyahut abeʹ un uyan penyalaʹ mikem, ia iaʹ senteng nading lemulo batu neng ia.”

⁸Kun ne nuheng pelaʹa, penco ngalung kaʹ tanaʹ.

⁹Tegoʹ de kenahan dau ini, ketoʹ de tai mecin petiyo petiyo ketai re. Un iaʹ bioʹ mida ina iaʹ ading tai. Yesus tengen lene nahung ngan leto ina pe petem nekejeng kina.

¹⁰Penco kenai ie beteʹ ngan kuma ha neng leto ina: “Kempi ne ida dai? Abeʹ un ca usa pe iaʹ un nahung ke metep ukum neng ikoʹ?”

¹¹Un dau leto ina mipa ia: “Pabeʹ ca pe abeʹ un amai.” Dau Yesus neng ia: “Buk pekina, abeʹ pe akeʹ ke metep ukum neng ikoʹ. Tai ne, ngan ayen kanyam ti penyalaʹ laʹa.”]

¹²Kun Yesus pisiu mida laʹa: “Akeʹ ne iaʹ ngedema usun tanaʹ ini. Aheʹ iaʹ bayaʹ akeʹ, ia iaʹ ke un dema iaʹ ngkin udip mia ngan nyahut te abeʹ un ke masat dalau ntem ne laʹa.”

¹³Dau diaʹ Perisi neng ia: “Ikoʹ badaʹ tugen neng puyan ncoʹ loʹ, abeʹ e un lan.”

¹⁴Dau Yesus mipa ida: “Naʹ pe akeʹ badaʹ tugen neng usa heʹ loʹ, atek lan dau heʹ uban nceʹ tisen cen mpi kenai heʹ ngan kempi ketai heʹ. Abeʹ kem tisen cen mpi kenai heʹ ngan kempi ketai heʹ.

¹⁵Ikem metep tiraʹ bayaʹ puyan kelunan tuaʹ le, un sepuʹo akeʹ, abeʹ keʹ metep tiraʹ neng aheʹ aheʹ pe.

¹⁶Buk keʹ metep ca tiraʹ, puyan tiraʹ keʹ un lan, uban abeʹ keʹ tengen iaʹ ti ie. Amai Bioʹ iaʹ cuk akeʹ nai, ia iaʹ un ngan nceʹ.

¹⁷Dalem Katuk Adet cem ne ina lepa senurat, buk dua usa kelunan diaʹ nugen ca puyan, ngan kuaʹ dau re nugen ne, senteng ngkem ngelan dau re.

¹⁸Akeʹ nugen neng puyan nceʹ tengen, ngan laʹa Amai iaʹ cuk akeʹ nai, ia pe badaʹ tugen neng puyan nceʹ lete.”

¹⁹Dau re lemutu ia: “Kempi amai hoʹ tupe?” Kun Yesus mipa ida: “Abeʹ pe ikem tisen akeʹ. Amai heʹ pe ikem abeʹ un tisen. Buk ne ikem tisen akeʹ, ikem tisen lete Amai heʹ.”

²⁰Yesus pisiu dini mung dalau ue penco katuk kaʹ dalem Umaʹ Palan, dalem amin iaʹ kukoʹ buhan pencai ina. Ngan ca usa pe abeʹ un mapo ia, uban jakaʹ iaʹ penekep pe abeʹ melai nai lepe.

²¹Dau Yesus neng ida laʹa: “Tai heʹ ke mecin ne ini. Ikem ke pita heʹ ʹo, un sepuʹo ikem ke matai lenca dalem penyalaʹ kem. Abeʹ kem senteng tai kukoʹ keʹ ne.”

²²Ina ukoʹ diaʹ lataʹ Yahudi kuma ha: “Dau ue: ‘Abeʹ le senteng tai kukoʹ o,’ baʹan ne. Inu iaʹ sen isiu ue ne tupe? Uban ne ubaʹ ke lematai ia loʹ taʹin?”

²³Un dau Yesus mipa: “Ikem nai cen ini, tahaʹ ntaʹ, un sepuʹo akeʹ iaʹ nai cen mpau. Ikem iaʹ puʹun udip kusun tanaʹ ini, un sepuʹo abeʹ puʹun udip keʹ kusun tanaʹ ini.

²⁴Ina iaʹ ukoʹ keʹ badaʹ mikem, ikem ke matai lenca dalem penyalaʹ kem. Buk kem abeʹ un ngelan ‘Akeʹ Iaʹ Lemuto Un’, ikem lete iaʹ ke matai lenca dalem penyalaʹ kem ʹo.”

²⁵Kun nte lemutu ia: “Aheʹ koʹ ne?” Dau Yesus mipa: “Ukoʹ baʹan dau heʹ mikem cen kena re.

²⁶Kadoʹ naʹan tiraʹ iaʹ tekep akeʹ ke badaʹ mikem, ngan metep ukum neng idi. Un sepuʹo ia iaʹ cuk akeʹ nai, ia iaʹ telit lan. Ngan inu iaʹ akeʹ lepa kenahan cen ia, bang ina le iaʹ akeʹ badaʹ mikem kusun tanaʹ ini.”

²⁷Abeʹ de tisen ia pisiu puyan Amai Bioʹ neng ida.

²⁸Ina ukoʹ Yesus kuma ha neng ida: “Tegoʹ kem ke mejung Anak Sio ini, ikem ke tisen ‘Akeʹ Iaʹ Lemuto Un’. Ina ukoʹ tegoʹ ina hem ke tisen abeʹ keʹ uyan inu man kimet ceʹ tengen, un sepuʹo bang akeʹ badaʹ inu iaʹ Amai Bioʹ pekatuk akeʹ le.

²⁹Ngan ia iaʹ cuk akeʹ nai, un pemung ngan nceʹ. Abeʹ e mahung akeʹ tengen, uban nceʹ lemuto uyan inu iaʹ sihoʹ neng pengubaʹ a.”

³⁰Kadoʹ diaʹ lepa kenahan dau Yesus pisiu ini, ina ukoʹ de penco ngelan neng ia.

³¹Ina ukoʹ Yesus pisiu me kelunan Yahudi diaʹ ngelan neng ia: “Buk kem bayaʹ dau katuk keʹ, ikem ne iaʹ atek kelunan diaʹ bayaʹ katuk keʹ lan ʹo.

³²Ikem ke tisen katuk iaʹ telit, ngan katuk iaʹ telit ina lete iaʹ ke nakau ikem.”

³³Dau re mipa Yesus: “Ameʹ ne iaʹ atek mela Ibrahim, ngan nyahut meʹ abeʹ un ulaʹ dulu ne. Inu iaʹ sen isiu hoʹ mameʹ kuma ha: ‘Ikem ke takau’?”

³⁴Kun Yesus pisiu mida: “Akeʹ badaʹ mikem lan, aheʹ aheʹ diaʹ uyan penyalaʹ, ida iaʹ ulaʹ penyalaʹ.

³⁵Abeʹ iaʹ ulaʹ lemuto un neng amin ne, un sepuʹo anak ke iaʹ lemuto un kidi pa majan.

³⁶Buk Anak Sio ini ke nakau ikem, ina le ikem ke takau lan.

³⁷Tisen te akeʹ ikem mela Ibrahim. Un sepuʹo ubaʹ kem mita janan man lematai akeʹ uban ncem abeʹ un ubaʹ alaʹ dau katuk keʹ.

³⁸Akeʹ penco neng puyan iaʹ Amai heʹ lepa peluhaʹ me akeʹ, ngan ikem ti puyan iaʹ amai hem lepa badaʹ mikem.”

³⁹Dau re mipa Yesus: “Ibrahim ia amai meʹ.” Un dau Yesus mipa ida: “Buk kem atek anak Ibrahim, ikem ti ne puyan kuaʹ baʹan iaʹ ia lepa ti ne.

⁴⁰Bang ca le puyan nceʹ neng ikem cen kena, badaʹ katuk iaʹ telit iaʹ akeʹ lepa kenahan cen Allah, un sepuʹo ubaʹ kem mita janan man lematai akeʹ. Abeʹ Ibrahim ti puyan pekini.

⁴¹Naʹkini ikem ti puyan iaʹ amai hem lepa ti cen kena.” Dau re mipa Yesus: “Bang Allah tengen iaʹ Amai meʹ. Ameʹ diaʹ anak ke lan.”

⁴²Un dau Yesus mipa ida: “Buk lan Allah iaʹ amai hem, seʹ kem malaʹ neng akeʹ lete, uban akeʹ iaʹ lepa nai cen Allah, ngan naʹkini akeʹ lepa un kini. Ngan laʹa abeʹ keʹ un nai man pengubaʹ kimet ceʹ tengen. Ia iaʹ cuk akeʹ nai.

⁴³Uban inu adeʹ kem abeʹ un tisen sen isiu heʹ tupe? Ina ne uban abeʹ un metem seʹ kem ngeringa dau katuk keʹ.

⁴⁴Ikem iaʹ anak amai hem bali Sitan ina, ngan ikem iaʹ ubaʹ bayaʹ pengubaʹ amai hem, uban cen naʹaʹ ne ia ubaʹ lematai kelunan. Nyahut te abeʹ un pepo neng katuk iaʹ telit ne, uban ca bute katuk telit pe abeʹ un neng ia. Tegoʹ o badaʹ palo, ina ne sematu puyan ne, uban ia iaʹ atek puʹun palo, ngan ia pe iaʹ tuʹa mung palo ne.

⁴⁵Akeʹ pisiu iaʹ telit lan, ina iaʹ ukoʹ kem abeʹ un ngelan akeʹ.

⁴⁶Aheʹ mikem iaʹ senteng nugen inu iaʹ ke pedapit penyalaʹ neng akeʹ? Buk keʹ penjo isiu iaʹ telit lan, uban inu adeʹ kem abeʹ un ngelan akeʹ?

⁴⁷Aheʹ iaʹ nai cen Allah, ia ngeringa dau isiu Allah. Un sepuʹo ikem dini abeʹ kem nai cen Allah, ina ukoʹ kem abeʹ un ngeringa dau isiu heʹ.”

⁴⁸Un dau kelunan Yahudi mipa Yesus: “Lan te dau meʹ ading de kuma ikoʹ lepoʹ Samaria iaʹ un bali.”

⁴⁹Dau Yesus mipa ida: “Abeʹ keʹ un bali. Akeʹ nyelama Amai heʹ, un sepuʹo muau hem neng akeʹ.

⁵⁰Abeʹ keʹ pita selama me akeʹ tengen. Un ca iaʹ mita selama me akeʹ, ngan ia iaʹ ke metep tiraʹ mayo neng akeʹ.

⁵¹Lan dau heʹ mikem, aheʹ iaʹ bayaʹ dau katuk keʹ nyahut te abeʹ un matai ne.”

⁵²Un dau kelunan Yahudi neng ia: “Naʹkini ne ameʹ tisen lan, ikoʹ atek un ca bali. Ibrahim pe lepa matai, ngan diaʹ pegawa pe lepa matai. Belekaʹ dau hoʹ kuma ha: ‘Aheʹ diaʹ bayaʹ katuk keʹ nyahut de abeʹ un ke matai ne.’

⁵³Amai meʹ Ibrahim lepa matai. Kumpin, uban ncoʹ kuma ikoʹ pelapa bioʹ cen Ibrahim taʹin, ngan diaʹ pegawa pe lepa matai lete? Ikoʹ kuma aheʹ koʹ ne tupe?”

⁵⁴Dau Yesus mipa: “Buk keʹ ke nyelama usa heʹ tengen, tai pelolo ne puyan selama ina. Amai heʹ iaʹ nyelama akeʹ, ia lete iaʹ ikem kuma Allah hem ne.

⁵⁵Nyahut cem abeʹ un tisen ia lepe. Akeʹ iaʹ tisen ia. Buk keʹ badaʹ akeʹ abeʹ un tisen ia, diseʹ keʹ ke palo ukoʹ baʹan ikem ne ina. Un sepuʹo tisen nceʹ ia, ngan akeʹ bayaʹ pe dau isiu ue.

⁵⁶Amai hem Ibrahim saheʹ tekaʹ a pekimet ke taʹan tegoʹ udip keʹ, penco ho taʹan ne ngan bangen.”

⁵⁷Dau kelunan Yahudi neng ia: “Pabeʹ koʹ abeʹ un tai lema puloʹ uman pe. Un ncoʹ taʹan Ibrahim tupe?”

⁵⁸Un dau Yesus mipa: “Lan dau heʹ mikem, kena Ibrahim pempet are, un ne akeʹ.”

⁵⁹Kun nte alaʹ batu ke lemulo neng ia, un sepuʹo tai kun Yesus nyuhuk ia loʹ, penco ho mecin Umaʹ Palan.