Read Wahau Kenyah YAYA 9 Bible Online

YAYA 9 - Wahau Kenyah bible

YAYA 9

¹Tai kun Yesus masat, penco kun ne taʹan ca kelunan iaʹ pempet butaʹ.

²Kun diaʹ bayaʹ katuk ke lemutu ia: “Guru, penyalaʹ aheʹ iaʹ ukoʹ laki ini pempet butaʹ ne tupe? Penyalaʹ a tengen, buk ke are penyalaʹ diaʹ tuʹa?”

³Un dau Yesus mipa: “Puyan ini abeʹ un sihoʹ ngan penyalaʹ a, pekina pe penyalaʹ diaʹ tuʹa. Uban ia butaʹ ne, apan puyan nyingan Allah kenai luhaʹ neng ia.

⁴Atek le ke mejo gayeng Amai Bioʹ, ia iaʹ cuk akeʹ nai sukun ne tau ini caʹ dema. Buk ntem iaʹ kenai ʹo, abeʹ un aheʹ senteng pegayeng.

⁵Uban ngajan nceʹ un kusun tanaʹ ini, akeʹ iaʹ ngedema usun tanaʹ ini.”

⁶Lepa ha pekini dau, kun Yesus nunyai tanaʹ man julaʹ a, penco ngasaʹ kaʹ mata laki ina,

⁷ngan badaʹ mia: “Tai ne muheʹ silung ngkoʹ ne kaʹ belau Siluam ina.” (Sen ngadan ini “Lepa Cuk.”) Penco ketai laki ina muheʹ silung nge, ngan nai uleʹ pelapa taʹan.

⁸Kun diaʹ penyeng ngan ne, ngan dulu diaʹ malai taʹan ia bang nyat tuaʹ le cen kena kini are, lemutu ida selepeʹ: “Moʹ abeʹ laki ini iaʹ malai adung nyat tuaʹ idai?”

⁹Dau palai: “Ia ne ini.” Un sepuʹo dau diaʹ ca laʹa: “Naʹun, abeʹ ini ia. Diseʹ layan ne le iaʹ ukoʹ diseʹ ia re.” Ina ukoʹ laki ina loʹ ne pisiu: “Akeʹ te ini.”

¹⁰Kun nte lemutu ia: “Kumpin ban ketai mata hoʹ ne pesik udai?”

¹¹Dau laki ina mipa laʹa: “Un ca laki ngadan Yesus, ia iaʹ nunyai tanaʹ ngasaʹ kaʹ mata heʹ, ngan badaʹ makeʹ: ‘Tai ne muheʹ silung ngkoʹ ne kaʹ belau Siluam ina.’ Penco ketai heʹ, ngan selaho uʹo heʹ lepa muheʹ e akeʹ senteng naʹat.”

¹²Dau re lemutu: “Kempi laki ina?” Kun ne mipa: “Awai, abeʹ keʹ tisen.”

¹³Kun nte ngkin laki iaʹ lepa butaʹ ina are palaʹ diaʹ Perisi.

¹⁴Tegoʹ Yesus nunyai tanaʹ ngasaʹ kaʹ mata laki ina are, Tau Kelineʹ uban ne.

¹⁵Kun diaʹ Perisi dina lemutu laki ina laʹa kumpin uban puyan ne paget mata ha. Kun laki ina badaʹ mida: “Ia naʹ tunyang kaʹ mata heʹ. Kun nceʹ muheʹ silung ngkeʹ. Na, naʹkini akeʹ senteng naʹat.”

¹⁶Dau palai Perisi dina kuma: “Laki iaʹ ti puyan pekini, abeʹ e nai cen Allah, uban ne abeʹ un bayaʹ adet Tau Kelineʹ.” Un dau diaʹ ca: “Buk pekina, inu senteng ca kelunan penyalaʹ ti puyan nyingan kuaʹ baʹan ini ne?” Ina ukoʹ tai bese dua ne kimet de kahang ida.

¹⁷Ina ukoʹ diaʹ Perisi dina lemutu laki ina ca liwai laʹa: “Adeʹ koʹ kuma ia mesik mata hoʹ. Kumpin kimet coʹ neng ia?” Dau laki ina mipa: “Ia ne iaʹ pegawa Tuhan.”

¹⁸Un sepuʹo kelunan lataʹ Yahudi dina, abeʹ de ngelan laki ina un butaʹ cen kena ngan ia iaʹ senteng taʹan naʹkini, pa re mengin diaʹ tuʹa ha.

¹⁹Kun nte lemutu ida dua peto: “Anak kem dua ini tupe? Caʹ kem kuma ia pempet butaʹ are? Kumpin uban ne senteng naʹat ne udai?’

²⁰Un dau diaʹ tuʹa mipa: “Tisen te ameʹ ia anak meʹ, ngan laʹa ameʹ tisen pe ia pempet butaʹ.

²¹Un sepuʹo abeʹ meʹ tisen kumpin puyan ne senteng naʹat naʹkini. Ngan laʹa, abeʹ pe ameʹ tisen aheʹ iaʹ mesik mata ha. Lemutu ia sedeʹ. Bioʹ ne ia ne, mencam mipa me ia tengen.”

²²Ina ukoʹ diaʹ tuʹa pekini dau, uban nte takut kelunan lataʹ lepoʹ Yahudi, diaʹ lepa pekuaʹ ayo metep tiraʹ iaʹ kuma ha: “Aheʹ iaʹ teto ngahaʹ kuma Yesus ina Keristus iaʹ ngkang pungu udip, ida iaʹ ke pesau cen amin sebayang.”

²³Ina iaʹ ukoʹ tuʹa laki ina re kuma ha: “Bioʹ ne ia ne, mencam mipa me ia tengen, lemutu ia sedeʹ.”

²⁴Kedua liwai ida numpak pe mengin laki iaʹ pempet butaʹ ina re laʹa, ngan kuma neng ia: “Teto dau hoʹ nyeripa Allah, badaʹ iaʹ lan mameʹ. Ameʹ tisen laki ini ca kelunan penyalaʹ.”

²⁵Dau laki ina mipa: “Awai, abeʹ pe akeʹ tisen mele ca kelunan penyalaʹ pe ia. Bang ca le iaʹ akeʹ tisen: ban cen kena re akeʹ butaʹ, belekaʹ naʹkini akeʹ taʹan.”

²⁶Kun nte lemutu ia pelaʹa: “Kumpin puyan ne mesik mata hoʹ, ngan inu ia ti neng ikoʹ?”

²⁷Dau ue mipa ida: “Lepa ne akeʹ badaʹ mikem. Ikem iaʹ abeʹ un kenahan dau heʹ. Inu adeʹ kem ubaʹ ngeringa ha pelaʹa? Mele uban ncem ubaʹ ke bayaʹ katuk ke lete ina taʹin?”

²⁸Sakit ne tekaʹ kimet de neng ia, penco dau re: “Ikoʹ bayaʹ katuk laki ina. Ameʹ bayaʹ katuk Musa,

²⁹ban meʹ tisen Allah lepa pisiu ngan Musa. Ukoʹ baʹan puyan laki ina re, pabeʹ meʹ abeʹ un tisen cen mpi kenai ie pe.”

³⁰Un dau laki ina mipa: “Muʹo ne tawai heʹ, ikem abeʹ un tisen cen mpi kenai ie, buk ia iaʹ mesik mata heʹ ne re.

³¹Ilu pe tisen Allah abeʹ un ngeringa dau kelunan penyalaʹ, un sepuʹo ia ke ngeringa dau diaʹ tunuk neng ia, ngan tudep uyan inu iaʹ pengubaʹ a.

³²Cen tading udip kusun tanaʹ ini nyahut le abeʹ un kenahan dau ca usa iaʹ mesik mata kelunan iaʹ pempet butaʹ pe.

³³Buk laki ini abeʹ un nai cen Allah, abeʹ e senteng ke ti ca inu puyan.”

³⁴Kun nte nyakat ia: “Ikoʹ pe pempet ngan sangan kuʹun penyalaʹ, belekaʹ ikoʹ iaʹ pekatuk ameʹ.” Penco re pet ia tahaʹ awang amin sebayang.

³⁵Yesus kenahan dau denga re pet ia kawang, penco ha tai naʹat ia. Kun ne tegoʹ ia, un dau ue neng ia: “Un ncoʹ ngelan neng Anak Sio tupe?”

³⁶Dau laki ina mipa ia: “Ahaʹ amai, badaʹ makeʹ apan nceʹ senteng ngelan neng ia.”

³⁷Dau Yesus neng ia: “Lepa ne ikoʹ taʹan ia. Ia ne iaʹ pisiu ngan ncoʹ naʹkini.”

³⁸Dau laki ina: “Ahaʹ Tuhan, akeʹ ngelan.” Penco ho sutlep nyelama Yesus.

³⁹Un dau Yesus: “Akeʹ nai kusun tanaʹ ini ke pasat ukum iaʹ telit apan diaʹ butaʹ ke taʹan, ngan diaʹ taʹan ke tai butaʹ.”

⁴⁰Un palai Perisi diaʹ un ngan ne kina ne kenahan dau ue pisiu ini ngan lemutu ia: “Moʹ abeʹ koʹ kuma ameʹ ke butaʹ pe?”

⁴¹Kun Yesus mipa ida: “Buk berua hem butaʹ, abeʹ penyalaʹ ke dengkep neng ikem. Un sepuʹo uban ncem kuma ikem senteng taʹan, ina uban penyalaʹ petem dengkep neng ikem.”