Read Wahau Kenyah PEMUYAN 1 Bible Online

PEMUYAN 1 - Wahau Kenyah bible

PEMUYAN 1

¹Palaʹ cenganak keʹ Tiupilus: Neng surat ceʹ iaʹ ading ading are, lepa ne akeʹ ti neng mung pemuyan Yesus iaʹ ia ban lepa uyan, ngan katuk ke cen penading gayeng nge,

²pa abeʹ tai tau ue pejung kaʹ surga. Kena ketai Yesus pejung, ia pekatuk dau man penukat Berua Buheʹ me kudaʹ usa laki, diaʹ ia ban lemileʹ tai nuyan lawa Injil e didai are.

³Dalem pat puloʹ tau majan ne cen uʹo ho lepa matai are, un pe kudaʹ kudaʹ liwai kenai ie luhaʹ palaʹ ida. Atek luhaʹ ban ne mudip, moʹ un diaʹ lawa dina taʹan ia, ngan ia pekatuk ida neng puyan pengaren Allah ngaren ilu kelunan.

⁴Dalau Yesus pempun ngan diaʹ lawa ha dina, kun ne pekatuk ida: “Ayen mecin Yerusalim, bang pekena ne pengencai iaʹ Amai heʹ lepa petuket ke naʹ mikem. Lepa ne akeʹ badaʹ a mikem cen kena.

⁵Yaya lepa ngebatis kelunan man sungai, un sepuʹo ikem dini iaʹ Allah ke ngebatis man Berua Buheʹ, abeʹ e ke kudaʹ tau majan ne laʹa.”

⁶Tegoʹ diaʹ lawa Injil dina kelimpun ngan Yesus, kun nte lemutu ia: “Tuhan, un ncoʹ ke naʹ pengaren uleʹ me lepoʹ Israil naʹkini tupe?”

⁷Un dau Yesus neng ida: “Abeʹ Amai heʹ ke badaʹ mikem midan ngan jakaʹ iaʹ lepa Amai heʹ peteneng dalem penyukat te tengen.

⁸Un sepuʹo ke sangan ncem kuʹun penyukat te tegoʹ Berua Buheʹ kenai mesun neng ikem, ngan ikem iaʹ ke tai nuyan kelunan diaʹ ke badaʹ tugen neng akeʹ kaʹ Yerusalim, pekina pe pa tipo tanaʹ Yudia, ngan kaʹ tanaʹ Samaria, pabeʹ libut usun tanaʹ ne.”

⁹Lepa ha pisiu pekina, tai ie pejung kaʹ surga, ngan ida naʹat lepe ia pa kenai ca abun ngelinget ia neng penaʹat de.

¹⁰Dalau re naʹat ketai ie kaʹ langit, beliʹau un le dua usa diaʹ un sapai puteʹ nekejeng dudo ida.

¹¹Kun dau re dua: “Ikem lepoʹ Galilia, inu hem nekejeng naʹat kaʹ langit tupe? Un Yesus iaʹ tai pejung kaʹ surga, iaʹ ikem taʹan ini, ke pekina lete kenai ie kentaʹ laʹa ʹo, koʹ baʹan ncem taʹan ketai ie kaʹ surga ne.”

¹²Lepa ne ina ʹo, ketai re diaʹ lawa Injil uleʹ kaʹ Yerusalim, mecin mudung iaʹ ngadan ne Mudung Ampang ina, iaʹ kihoʹ kihoʹ ceng kelelat coʹ o neng lepoʹ ina.

¹³Sulo tai re kedalem lepoʹ Yerusalim, penco tai re pejakaʹ kaʹ amin iaʹ ban kukoʹ de are. Un pe Peterus, ngan Yaya, ngan Yakup, ngan Anderias, ngan Pilipus, ngan Tumas, ngan Batulumius, ngan Matius, ngan Yakup anak Alpius, ngan Simun laki ia sanget neng pulitik cen naʹaʹ are, ngan Yudas anak Yakup.

¹⁴Mung nte lemuto pempun ke lemameʹ neng ca le penawai re. Un pe kudaʹ usa leto ngan nte. Un pe Mariam ueʹ Yesus, ngan diaʹ sadin laki neng Yesus.

¹⁵Kudaʹ tau pe ʹo ina, kenai re pempun mung diaʹ ngelan Tuhan, kihoʹ kihoʹ ca ato dua puloʹ usa kadoʹ de. Dalau ina kenai Peterus nekejeng. Un dau ue:

¹⁶“Ahaʹ cenganak keʹ mung, un dau isiu dalem Kitap Tuhan iaʹ sihoʹ neng puyan Yudas, iaʹ nai ngkin dulu dakep Yesus are, koʹ baʹan dau isiu Berua Buheʹ iaʹ nekena badaʹ neng puyan Yudas ne cen paʹ Daut cen naʹa are. Ina ukoʹ abeʹ e are senteng ketai palup dau Kitap Tuhan ini.

¹⁷Yudas lepa sihoʹ cap ngan le uban Tuhan lepa lemileʹ ia alaʹ tulat neng gayeng le.”

¹⁸(Un ban ligit iaʹ suaʹ puyan jaʹat te, kun Yudas lemeli ca kelimeng tanaʹ. Neng tanaʹ ina ha laboʹ matai pa pempe tenaʹi ie.

¹⁹Tai tisen ne lepoʹ Yerusalim neng puyan ina, ina ukoʹ de uyan ngadan tanaʹ ina neng isiu re tengen, Akal-dama, sen ne “Tanaʹ Jaka.”)

²⁰Kun dau Peterus pelaʹa: “Moʹ un dau Daut dalem Kitap Kentau Masmur: ‘Talan ne amin ne tai lenga. Ayen buhaʹ ca kelunan tai ngelineʹ dalem me laʹa.’ Un pelaʹa: ‘Talan ne dulu diaʹ ca tai saliu ia, ngkang gayeng nge.’

²¹“Moʹ ina, tekep ca usa nai pit ameʹ ke badaʹ tugen neng Tuhan Yesus nai numpak mudip cen patai. Tekep lete ia causa iaʹ ban pemung ngan meʹ dalem ngajan Yesus masat ngan meʹ are,

²²cen tading ban Yaya ngebatis Yesus, pabeʹ tau tai Yesus pejung kaʹ surga mecin ameʹ.”

²³Penco re pekenyeng dua usa kata ida: Yusup iaʹ dulu naʹ Barsabas, (iaʹ un ngadan ketelu Yustus), ngan Matias.

²⁴Kun nte lemameʹ, un dau re: “Ahaʹ Tuhan, ikoʹ iaʹ tisen kimet kelunan mung. Tiga hoʹ badaʹ cen dua usa dini, iaʹ mpi ikoʹ lemileʹ,

²⁵iaʹ ke nyeliwa nuyan lawa hoʹ neng gayeng iaʹ ban Yudas mahung ini, moʹ Yudas tai kaʹ ukoʹ tekep ketai ie.”

²⁶Kun nte uyan tenung me ida dua dina. Un Matias, ia iaʹ sihoʹ o. Ia ne iaʹ sihoʹ cap ngan lawa Injil diaʹ puloʹ ca dina.