Read Wahau Kenyah PEMUYAN 14 Bible Online

PEMUYAN 14 - Wahau Kenyah bible

PEMUYAN 14

¹Kuaʹ koʹ baʹan puyan ina are pelaʹa kaʹ lepoʹ Ikunium. Tai Paulus de dua Barnabas kedalem amin sebayang Yahudi. Kun nte dua penco pekatuk kidi. Kadoʹ dulu nai ngelan Tuhan, un pe Yahudi, pekina pe lepoʹ diaʹ ca.

²Un palai lepoʹ Yahudi diaʹ abeʹ un ubaʹ ke ngelan dina, kun nte pekana dulu diaʹ ca, ngan pesakit kimet de, apan nte ke nyakat diaʹ cenganak le dalem Tuhan dina.

³Majan diaʹ lawa Injil dina ngelineʹ kaʹ Ikunium ne, ngan tempa dau re badaʹ tiraʹ Tuhan. Tuhan iaʹ peluhaʹ ban lan dau katuk de neng pengelesau ue, ina ukoʹ Tuhan naʹ penyukat man nte uyan puyan nyingan ngan tedanaʹ bulen.

⁴Mung dulu diaʹ dalem lepoʹ ina pebese dua re. Un pe ceng bese mayo diaʹ tahaʹ lepoʹ Yahudi, un ceng bese pelaʹa mayo diaʹ lawa Injil dina.

⁵Uʹo ina pelaʹa tai peseket ne palai lepoʹ Yahudi, ngan diaʹ ca dina, peging ngan pengelataʹ lepoʹ de, ubaʹ ke ngejaʹat ngan ke lemulo batu neng Paulus ngan Barnabas, diaʹ lawa Injil dina.

⁶Tai tisen ne ida dua neng puyan ina, penco ketai re dua kelap kaʹ lepoʹ Listera ngan Derbe kaʹ tanaʹ Likunia, ngan dale teliling lepoʹ dina.

⁷Kaʹ ina te pelaʹa, kun nte badaʹ Denga Injil ina.

⁸Kaʹ lepoʹ Listera kina un ca usa iaʹ lemaʹ taket te, ngan madung tuaʹ le ia, ban apet te cen tading kenai pempet. Nyahut te tisen tai masat ne.

⁹Kun ne ngeringa dau tiraʹ Paulus. Tisen ban Paulus seʹ laki ina ngelan, idi ukoʹ o senteng kenai maget.

¹⁰Pekina Paulus nekeneng ia, penco bioʹ dau ue pisiu kuma ha: “Nekejeng ne, telit le taket coʹ.” Nepecau ne kun ne, idi ne tading tai ie masat.

¹¹Tegoʹ dulu mung taʹan puyan Paulus ina, kun nte lemikaʹ dau man isiu lepoʹ Likunia: “Kenai bali palaʹ ilu kentaʹ ne ini ngaliu kelunan.”

¹²Un Barnabas, Bali Sius baʹan dulu neng ia, ngan un Paulus, Bali Hermis baʹan dulu neng ia, moʹ o tipan petiraʹ.

¹³Kun laki bioʹ detaʹu iaʹ putung ngan Bali Sius ne, tai cen amin palan Bali Sius iaʹ si leʹ tahaʹ lepoʹ ina, kenai ie ngkin kudaʹ kadoʹ sapi manai, ngan pempun piu kaʹ pamen kerahan lepoʹ. Kina ha ubaʹ ke pemung ngan dulu, uyan ca liwa me Paulus de dua Barnabas.

¹⁴Dalau re dua kenahan dau puyan ina, penco re dua lemerit sapai re dua, mentung nte ngasa dalau mpun dulu kina ngan lemikaʹ.

¹⁵Kun dau re dua: “Ahaʹ amai amai, inu adeʹ kem uyan puyan ini tupe? Kelunan tuaʹ lete ameʹ dini, koʹ baʹan ikem ne. Nai meʹ badaʹ Denga Injil mikem, apan ncem ke lepo puyan iaʹ abeʹ un tuman tuman ini ʹo, ngan nai piwaʹ palaʹ Allah iaʹ atek mudip, iaʹ uyan langit, ngan tanaʹ, ngan banget, ngan ketoʹ diaʹ kedalem me.

¹⁶Cen naʹaʹ Allah pedayo mung dulu tai bayaʹ pengubaʹ de tengen.

¹⁷Naʹ pia pekina, lemuto Tuhan Allah peluhaʹ seʹ kimet te man puyan ne iaʹ tiga: ia naʹ ujan mikem cen langit, ngan ia naʹ padai mikem bayaʹ bulan iaʹ teneng. Kun ne naʹ penguman mikem, ngan naʹ bangen dalem penawai hem.” Pekina dau Paulus de dua Barnabas.

¹⁸Naʹ pe pekina dau re dua pisiu, pekece kesupeʹ lawa Injil dina ke mulen dulu kina mencai liwa palaʹ ida dua.

¹⁹Nai pelaʹa lepoʹ Yahudi cen Antiukia iaʹ kaʹ tanaʹ Pisidia are, abeʹ kaʹ ina. Penco re pekana dulu kina ke lemulo Paulus, sulo re mihit ia kawang lepoʹ. Ida kenaʹ matai ne ia.

²⁰Un sepuʹo, uʹo kenai diaʹ ngelan Tuhan dina ngelimpun keliling ia, kenai Paulus beteʹ. Tai ie kedalem lepoʹ laʹa. Neng kenempam me, tai ie pemung ngan Barnabas kaʹ lepoʹ Derbe.

²¹Kun Paulus de dua Barnabas pedenga Denga Injil kedalem lepoʹ Derbe. Kadoʹ dulu diaʹ nai ngelan bayaʹ katuk Tuhan. Uʹo ina, tai re dua ngeliwet kaʹ Listera, ngan kaʹ Ikunium, ngan Antiukia tanaʹ Pisidia are.

²²Mentung nte nyalet penawai dulu diaʹ lepa bayaʹ katuk Tuhan, ngan petagen ida ke tudep dalem pengelan nte. Pekini dau katuk de dua: “Ilu diaʹ tisen puyan pengaren Allah ngaren ilu, abeʹ senteng le are ke bayaʹ janan iaʹ un kadoʹ penaru lete.”

²³Ida dua pedengkep kudaʹ usa diaʹ ke tuʹa re neng singet singket Mpun diaʹ ngelan Tuhan. Mentung nte lemameʹ ngan lemalan abeʹ un uman. Kun nte pelek ida dina palaʹ Tuhan, iaʹ ukoʹ de lepa napi tebelum nte.

²⁴Pelapa ne lawa Injil dina neng tanaʹ Pisidia, abeʹ ne ida dua kaʹ tanaʹ Pampilia.

²⁵Kun nte badaʹ katuk Tuhan kaʹ lepoʹ Perga, penco tai re puno kaʹ lepoʹ Atalia.

²⁶Cen ina re dua ngedung neng kapen, penco re puke tai kaʹ lepoʹ Antiukia tanaʹ Siria are, kukoʹ Mpun diaʹ ngelan Tuhan iaʹ ban pelek ida dua palaʹ pengelesau Allah tuman gayeng iaʹ ida dua lepa ban pesukung ina.

²⁷Lepa re abeʹ kaʹ lepoʹ Antiukia ina, kun nte pempun dulu diaʹ ngelan Tuhan kina. Penco re badaʹ mung ban pemuyan Allah kanan ida dua, ngan badaʹ ban kumpin diseʹ Allah mawang janan me dulu diaʹ tahaʹ awang Yahudi, apan nte nai ngelan Tuhan.

²⁸Majan nte dua ngelineʹ kina pemung ngan nte diaʹ ngelan Tuhan kina.