Read Wahau Kenyah PEMUYAN 17 Bible Online

PEMUYAN 17 - Wahau Kenyah bible

PEMUYAN 17

¹Ketai Paulus de dua Silas pelapa dalau lepoʹ Apipulis, ngan lepoʹ Apulunia, abeʹ ne ida dua kaʹ lepoʹ Tesalunika. Kaʹ ina un amin sebayang Yahudi.

²Koʹ baʹan kelayan ne, tai Paulus kedalem pemung ngan nte kina. Dalem telu mingku, singket Tau Kelineʹ, Paulus pata petiraʹ ngan nte, mentung nge badaʹ katuk cen isiu dalem Kitap Tuhan.

³Kun Paulus peluhaʹ sen ngan peluhaʹ katuk cen Kitap ina iaʹ badaʹ kumpin ban Laki iaʹ ngkang pungu udip tekep ke sihoʹ tuyen, ngan numpak mudip cen patai. Un dau ue laʹa: “Yesus ia akeʹ badaʹ mikem ne, ia lete Laki iaʹ ngkang pungu udip.”

⁴Un palai cen ahang ida dina ubaʹ ke kanan dau ue, penco re pepanak ngan Paulus de dua Silas. Pekina pe kadoʹ kenai lepoʹ Gerika diaʹ temek lemameʹ Allah bayaʹ Katuk Adet Musa, ngan pekina pe kadoʹ leto diaʹ mencam peteneng dalem lepoʹ nai ngelan.

⁵Un sepuʹo, miʹi tekaʹ lepoʹ Yahudi. Kun nte mengin palai dulu diaʹ jaʹat diaʹ mukoʹ bareng ngalang pasen dina, sulo re pepeng ida nuʹo. Kun nte pebingaʹ lepoʹ ina, mentung nte nyudup amin Yasun ke mita Paulus ngan Silas, moʹ de ubaʹ ke ngkin ida kawang palaʹ mpun lepoʹ.

⁶Naʹ pe pekina, abeʹ de petegoʹ ngan Paulus de dua Silas. Kun nte mihit Yasun pemung ngan palai cenganak le dalem Tuhan tai nyeripa perinta lepoʹ ina, mentung nte ngelengap, kun dau re: “Dini kelunan diaʹ lepa ngasing usun tanaʹ ini, un pe kenai re abeʹ kaʹ lepoʹ ilu ne.

⁷Yasun iaʹ ban alaʹ ida ngan ne neng amin ne. Un nte dini, ida nyarat dau katuk adet Laja Kaisar, moʹ de kuma ha un te laja diaʹ ca, ngadan ne Yesus.”

⁸Pekina dau re pebingaʹ dulu peging perinta lepoʹ ina.

⁹Kun perinta cuk Yasun ngan diaʹ ngan ne naʹ ligit nyeluk perinta, uʹo ina le dulu sau ida.

¹⁰Kiʹan ketai tahup kun diaʹ cenganak le dalem Tuhan dina cuk Paulus ngan Silas tai kaʹ lepoʹ Beria. Dalau tai re abeʹ kaʹ Beria, penco ketai re kedalem amin sebayang Yahudi.

¹¹Un dulu diaʹ kina, tiga ban saheʹ de neng ʹo ida diaʹ kaʹ Tisalunika didai are, moʹ pesik ban penawai re. Ida ngeringa ngan alaʹ tiraʹ Tuhan ngan bangen tawai re. Singket tau ne ida nudep baca isiu dalem Kitap Tuhan, nugen buk lan dau ban Paulus ne.

¹²Kadoʹ de nai ngelan, un pe leto Gerika iaʹ kayaʹ, ngan kadoʹ pe laki re nai.

¹³Un sepuʹo dalau lepoʹ Yahudi iaʹ kaʹ Tisalunika ne tisen ban Paulus iaʹ badaʹ tiraʹ Allah kaʹ Beria, nai kun nte kaʹ ina. Penco re ngasing kimet dulu ngan pebingaʹ lepoʹ ina.

¹⁴Nyangkit kun diaʹ cenganak le dalem Tuhan dina cuk Paulus puke, tai kaʹ sada bahi banget. Un Silas ngan Timutius, ngelineʹ de dua kaʹ Beria.

¹⁵Ida diaʹ tai matet Paulus dina, tai ngan ne pa abeʹ lepoʹ Atina. Uʹo ina kenai re uleʹ kaʹ lepoʹ Beria ngkin tiraʹ Paulus iaʹ ke cuk Silas ngan Timutius sangkit tai ngan ne.

¹⁶Jinan Paulus pekena kenai Silas de dua Timutius kaʹ Atina, janga kaʹ penawai ie taʹan lepoʹ ina kadoʹ de ban ngelan neng uyat.

¹⁷Ina ukoʹ Paulus pata petira dalem amin sebayang Yahudi me lepoʹ Yahudi ngan dulu diaʹ ca diaʹ temek lemameʹ palaʹ Allah bayaʹ Katuk Adet Musa. Pekina pe kenai ie petiraʹ kaʹ pasen, singket tau ne tai ie ngejahi dulu, mele aheʹ nai ngan ne.

¹⁸Un palai diaʹ guru katuk Ipikuri ngan diaʹ guru katuk Stuiki nai paseʹ ngan Paulus, kun dau re: “Inu baʹan dau laki iaʹ tipan petiraʹ ini nuran nuran dau pisiu tupe?” Un dau diaʹ ca pelaʹa: “Masaʹ kenai ie pelibut denga bali uyat dulu diaʹ cen coʹ taʹin.” Ida pekina dau moʹ Paulus pedenga Yesus ngan puyan kelunan diaʹ matai nai numpak mudip.

¹⁹Kenai re ajak Paulus ngkin iaʹ kaʹ Arupagus, ca amin kukoʹ dulu pempun. Un dau re neng ia: “Seʹ meʹ ubaʹ ke ngetisen katuk iaʹ mading, iaʹ ikoʹ badaʹ ini pekele.

²⁰Moʹ koʹ nai ngkin tiraʹ iaʹ bulen ameʹ kenahan dau, ina ukoʹ meʹ ubaʹ ketisen inu sen puyan tiraʹ ini.”

²¹(Dulu lepoʹ Atina, peging ngan dulu diaʹ nai nyakai kina, abeʹ de pesingo inu inu diaʹ ca ne, bang kepisiu ngan kengeringa inu diaʹ nai mading tuaʹ ne ida.)

²²Nai Paulus nekejeng nyeripa mpun kelunan kaʹ Arupagus ina, kun dau ue: “Ahaʹ lepoʹ Atina, kempi kempi ketai taʹat ceʹ, tisen nceʹ diseʹ kem lase laleʹ neng adet cem.

²³Moʹ dalau ketai heʹ masat ngalang lepoʹ kem are, akeʹ taʹan mung inu iaʹ ukoʹ kem ban naʹ temameʹ kem. Un pe akeʹ tegoʹ ca padung liwa iaʹ un surat pekini dau ue: ‘Palaʹ Allah iaʹ ilu abeʹ un tisen.’ Inu iaʹ ikem lemameʹ ngan abeʹ un tisen ina, idi iaʹ akeʹ ubaʹ ke penco badaʹ mikem.

²⁴Tuhan Allah iaʹ uyan tanaʹ ini ngan mung inu iaʹ un dalem me. Ia ne iaʹ Tuʹa neng usun langit ngan tanaʹ. Abeʹ e ngelineʹ neng umaʹ palan uyat iaʹ ban kelunan uyan.

²⁵Abeʹ Allah tepa neng ca inu, abeʹ e ke nebelum ilu kelunan petubo ia man ujoʹ le. Moʹ Allah tengen iaʹ naʹ udip, ngan laset, ngan mung inu ne me mung kelunan pe.

²⁶Allah uyan mung naʹan kelunan nai mudip ban cen ca le usa puʹun le, ngan cuk ilu ngelepoʹ pa tipo usun tanaʹ ne. Ia petuket toʹ majan kelunan mudip, ngan peteneng sahang kukoʹ de ngelineʹ.

²⁷Ngan pekina ban Allah uba kelunan ke mita ia, un baʹan le ida lemagap pe pa re tegoʹ ia. Iaʹ lan ne, moʹ abeʹ Allah coʹ neng ilu, singket usa le.

²⁸Koʹ baʹan dau palai mikem iaʹ mencam mipet are: ‘Dalem Allah lete ilu mudip, ngan ngala, ngan un.’ Un pelaʹa dau re: ‘Moʹ ilu iaʹ uban mela cen Allah lete.’

²⁹Moʹ Allah iaʹ ban uyan ilu, abeʹ le tekep ke ngihoʹ Allah un tepatung usa koʹ baʹan uyat iaʹ ban kelunan uyan bayaʹ penudi ngan pengencam nte cen mat, pekina pe pirak, ngan batu.

³⁰Toʹ ngajan kelunan turan mudip are, abeʹ Allah un situk kidi. Un sepuʹo, naʹkini Allah cuk mung kelunan kempi kempi ke nesen ngan nyepuleʹ kimet de cen puyan jaʹat de.

³¹Moʹ lepa ne Allah petuket ca tau kukoʹ o ke pebetep ukum bayaʹ ban peneneng nge neng mung kelunan kusun tanaʹ ini. Allah ke kanan ca kelunan iaʹ lepa ia lemileʹ. Allah peluhaʹ milu mung ban lan ne lepa lemileʹ ia, moʹ o pudip ia cen ban patai ie are.”

³²Dalau re kenahan dau Paulus badaʹ neng puyan kelunan matai ban nai numpak mudip ne, un palai petawa ngetepet ia. Ngan un palai diaʹ ca pelaʹa kuma ha: “Ubaʹ meʹ ke kenahan dau hoʹ badaʹ puyan ini ca liwai laʹa ʹo.”

³³Ngan puyan pekina, sulo kenai Paulus mecin ida.

³⁴Un pe palai dina nai ngejahi Paulus, sulo re ngelan Tuhan. Neng ahang ida dina, un Dunisius ca diaʹ lataʹ Arupagus. Un pe ca usa leto, ngadan ne Damaris. Un palai diaʹ ca laʹa nai ngelan.