Read Wahau Kenyah PEMUYAN 2 Bible Online

PEMUYAN 2 - Wahau Kenyah bible

PEMUYAN 2

¹Tegoʹ tau tai sihoʹ neng adet Pentakusta, ketoʹ diaʹ ngelan Tuhan pempun pebulung neng ca le ukoʹ de.

²Belekaʹ nai dau ca liʹu cen langit, koʹ baʹan dau bahiu kasa iaʹ bioʹ dau ue, nai nyangan amin kukoʹ de madung.

³Belekaʹ nai luhaʹ koʹ baʹan aʹang luten, iaʹ nai neng ida, iaʹ tai pigai ngedung neng usun ida, singket singket usa re.

⁴Mung nte tai sangan kuʹun Berua Buheʹ, sulo re pisiu neng naʹan naʹan dau isiu, bayaʹ ban puyan Berua Buheʹ iaʹ nai mesun neng ida cuk ida pisiu.

⁵Un pelaʹa kudaʹ usa lepoʹ Yahudi diaʹ nai nyakai kaʹ Yerualim, diaʹ caʹ ban kanan adet de, diaʹ nai cen mung naʹan lepoʹ kusun tanaʹ ne.

⁶Dalau sakai dina kenahan dau liʹu ina, tai kun ne pempun. Salam kaʹ de, moʹ de diaʹ ngelan Tuhan dina tisen pisiu neng isiu naʹan naʹan lepoʹ diaʹ ban nai pempun dina.

⁷Mung nte salam ngan meba, penco dau re: “Mabeʹ lepoʹ Galilia mung nte diaʹ pisiu dini tupe?

⁸Moʹ inu mencam nte pisiu isiu lepoʹ ilu tupe? Singket usa re pisiu neng isiu le, kaʹ ukoʹ le ban musang are.

⁹Ilu dini cen lepoʹ Partia, ngan Media, lepoʹ Ilam, ngan dulu diaʹ cen Mesuputami, ngan Yudia, ngan Kapadukia, ngan Puntus, ngan Asia,

¹⁰ngan Perigia, ngan Pampilia, ngan Masir, ngan diaʹ cen dale Libia iaʹ nyeng ngan Kirini. Ngan un palai milu dini cen lepoʹ Rum,

¹¹pekina pe lepoʹ Yahudi, ngan diaʹ ca diaʹ alaʹ adet Yahudi. Un pe lepoʹ Keriti, ngan lepoʹ Arap. Mung le kenahan dau re pisiu neng isiu le selepeʹ, ban puyan Allah iaʹ bioʹ ina.”

¹²Mung nte meba ngan muʹo tawai. Un dau re lemutu ida selepeʹ kuma: “Inu tuman ne pekini taʹin?”

¹³Un dau palai diaʹ ca ngetepet dau neng diaʹ ngelan Tuhan dina kuma: “Seʹ kelunan dini mabuk pekele.”

¹⁴Nai Peterus nekejeng pemung ngan diaʹ puloʹ ca usa diaʹ lawa dina, penco bioʹ dau ue: “Ahaʹ cenganak keʹ lepoʹ Yahudi, mung ngkem diaʹ ngelineʹ kaʹ Yerusalim tiga hem ngeringa dau heʹ ini, ngan petawi ne dau tiraʹ keʹ.

¹⁵Moʹ mung dini, abeʹ de mabuk koʹ baʹan dau hem ne, moʹ laho lepe jam piʹen mempam.

¹⁶Bang ini le dau tiraʹ pegawa Yuil iaʹ lepa ia badaʹ are:

¹⁷‘Un dau Allah: Pekini puyan nceʹ ʹo, tegoʹ ketai kebayaʹ udip. Akeʹ ke mubeʹ Berua heʹ neng usun mung kelunan, diaʹ anak laki hem, ngan diaʹ anak leto hem. Ida iaʹ ke badaʹ kimet Allah. Un diaʹ demanai hem, ida ke taʹan kudaʹ naʹan penaʹat, Un diaʹ lataʹ kem, ida ke ngenupi naʹan naʹan kenupi.

¹⁸Ngan akeʹ ke mubeʹ Berua heʹ neng usun diaʹ ulaʹ keʹ, inu pia laki ngan leto pe. Dalau ina ida ke badaʹ kimet ceʹ.

¹⁹Akeʹ ke uyan puyan nyingan neng usun langit, ngan tedanaʹ bulen kusun tanaʹ. Un pe musa dahaʹ, un pe luten, un pe tasap sap.

²⁰Mata tau ke pekaliu mentem. Ngan bulan ketai pekaliu bala koʹ baʹan dahaʹ, kena ha ke abeʹ Tau Tuhan. Tau ina ne tau bioʹ ngan tau selawan.

²¹Un dalau ina sepe, aheʹ diaʹ lemameʹ Tuhan dalem ngadan ne, ia le iaʹ ke un udip iaʹ ke pudip ia dalem Tuhan.’ Pekina dau Allah dalem surat Yuil.”

²²Sulo dau Peterus laʹa: “Ahaʹ mung cenganak keʹ lepoʹ Israil, kudaʹ pe ikem ngeringa dau isiu heʹ ini. Un ban Yesus, lepoʹ Nasarit idai, ca laki iaʹ Allah atek ban naʹ mikem. Un iaʹ peluhaʹ Yesus, ina puyan penyukat bioʹ, ngan puyan nyingan, ngan tedanaʹ bulen, iaʹ Allah lepa ban uyan kuʹun Yesus ina. Ikem tengen iaʹ tisen kidi, moʹ mung puyan ina lepa luhaʹ neng ahang ikem.

²³Ban Yesus lete, Allah ban naʹ palaʹ ikem bayaʹ pengubaʹ kimet te, ngan penisen ne tengen. Lepa ne ikem lematai ia, moʹ ikem iaʹ cuk dulu diaʹ pepuk kuʹun penyalaʹ napek ia neng kayu tecek.

²⁴Kun Allah pudip Yesus cen patai ie. Allah iaʹ sau ia cen tuyen patai, moʹ naʹ pe ke kumpin kumpin, abeʹ e ketai supeʹ kuʹun patai.

²⁵Un dau Daut badaʹ neng Yesus, pekini dau ue: ‘Akeʹ lemuto taʹan Tuhan kata akeʹ, moʹ Tuhan un tahaʹ taʹu akeʹ, apan abeʹ un inu iaʹ ke ngeliung tawai heʹ.

²⁶Ina ukoʹ saheʹ tekaʹ tawai heʹ, ngan bangen dau isiu heʹ. Naʹ pe akeʹ un tepatung usa ini, ina denaʹ tekaʹ keʹ neng tebelum keʹ lete.

²⁷Moʹ abeʹ koʹ ke peterai berua heʹ kedalem tanaʹ diaʹ matai, ngan abeʹ koʹ pedayo ulaʹ penyelum koʹ ketai madam.

²⁸Lepa hoʹ badaʹ janan udip makeʹ. Ikoʹ iaʹ un ngan nceʹ, idi heʹ tai bangen tekaʹ kuʹun ncoʹ.’ Pekina dau Daut badaʹ neng puyan Yesus.”

²⁹Un dau Peterus laʹa: “Ahaʹ cenganak keʹ mung, melai melai dau heʹ pisiu ikem neng puyan tepun le Daut. Lepa ne ia matai. Lepa dulu nanam ne ia. Liang nge un ngan le pabeʹ tau ini ne.

³⁰Ia ne ca pegawa Tuhan iaʹ tisen inu iaʹ Allah lepa petuket neng ia. Allah petuket ke naʹ ca usa iaʹ ke nai cen mela Daut bayaʹ. Ia ke nuyan paren bioʹ kuaʹ Daut ne.

³¹Daut iaʹ tisen neng puyan iaʹ Allah ke uyan ʹo: Daut iaʹ ading badaʹ neg puyan Laki iaʹ ngkang pungu udip kenai numpak mudip laʹa. Un dau ue: ‘Abeʹ Allah dayo ia peterai dalem tanaʹ diaʹ matai. Abeʹ usa ha ketai madam.’

³²Atek Yesus ina lete iaʹ ban Allah lepa pudip neng ca udip iaʹ tumpak laʹa. Neng puyan ne, mung meʹ dini diaʹ badaʹ tugen kidi.

³³Lepa ne Yesus tai pejung kaʹ ukoʹ tahaʹ taʹu Allah, sulo Allah naʹ Berua Buheʹ mia, koʹ baʹan dau Amai ie lepa ban petuket mia are. Ngan puyan ini iaʹ ikem taʹan ngan kenahan naʹkini, ini pengencai ie, iaʹ ia mubeʹ neng ameʹ.

³⁴Moʹ abeʹ e Daut iaʹ tai kaʹ surga. Ia tengen iaʹ kuma ha pekini dau: ‘Tuhan Allah iaʹ ban cuk Tuhan nceʹ: Madung ne ikoʹ kini tanaʹ taʹu akeʹ,

³⁵pa heʹ ke cuk mung bunoʹ koʹ ke tunuk palaʹ ikoʹ, ke nuyan koʹ baʹan nten me taket coʹ.’ Pekina dau Daut.

³⁶Un dau Peterus metuk isiu ue: “Ban atek Yesus lete ini, iaʹ ikem lepa napek neng kayu tecek are. Yesus lete iaʹ Allah lepa uyan Tuhan, Laki iaʹ ngkang pungu udip. Awaʹ ne mung diaʹ lepoʹ Israil ke tisen lan.”

³⁷Tegoʹ mung kelunan dina kenahan dau Peterus ne, tai kesuk ne tekaʹ kimet de, penco dau re neng Peterus ngan lawa Injil diaʹ ca dina: “Kumpin ne cenganak, inu iaʹ ameʹ ke uyan tupe?”

³⁸Un dau Peterus neng ida: “Nesen ne, ngan nyepuleʹ kimet cem cen penyalaʹ kem singket usa hem te, ngan tai alaʹ batis neng ngadan Yesus Keristus. Ina janan ke sau penyalaʹ kem, idi hem alaʹ pengencai Allah, atek Berua Buheʹ ina.

³⁹Moʹ palaʹ ikem lete Allah lepa petuket ini, ngan palaʹ anak kem, ngan pekina pe palaʹ mung kelunan diaʹ coʹ, mele kudaʹ kadoʹ iaʹ Tuhan Allah le ke mengin nai palaʹ ia.”

⁴⁰Pekesihoʹ ne dau tiraʹ Peterus neng ida. Ngan kadoʹ tiraʹ diaʹ ca laʹa, seʹ Peterus ten ke payo ida dina, kun dau ue: “Pudip ne usa hem cen ukum iaʹ ke sihoʹ lepoʹ iaʹ jaʹat ini.”

⁴¹Kadoʹ de kina diaʹ ngelan dau katuk ke, sulo re alaʹ batis nuʹo. Tegoʹ tau ina, kadoʹ de, kihoʹ kihoʹ telu ibu usa, iaʹ nai ngepit neng mpun nte.

⁴²Ida dina tudep tai pekalai ngan diaʹ lawa Injil dina, ngan kenahum neng udip iaʹ pebeka penawai, pekina pe dalem puyan nte pemung uman ngan lemameʹ palaʹ Tuhan.

⁴³Kadoʹ puyan nyingan ngan tedanaʹ bulen diaʹ ban nuyan kuʹun lawa Injil dina, ina iaʹ uyan dulu kina mung tai salam tekaʹ.

⁴⁴Mung diaʹ ngelan Tuhan dina tudep seʹ de neng udip de, tai pebulung ne ida, ngan mung inu re ida un pemung.

⁴⁵Kun nte pebeli galen ngan inu re, sulo re petulat ligit ban beli ie mida dina mung, bayaʹ neng seʹ penepa singket singket usa re.

⁴⁶Singket tau ne, tudep seʹ de tai pempun kaʹ Umaʹ Palan Allah, ngan ca le penawai re. Kun nte pemung uman kedalem amin nte, mentung nte uman ngan bangen saheʹ ngan libaʹ seʹ kimet de,

⁴⁷mentung nte pempau Allah, ngan sihoʹ neng pengubaʹ lepoʹ ina mung. Singket tau ne Tuhan ngepit Mpun nte kuʹun dulu diaʹ tisen puyan iaʹ pudip ida dalem Tuhan.