Read Wahau Kenyah PEMUYAN 21 Bible Online

PEMUYAN 21 - Wahau Kenyah bible

PEMUYAN 21

¹Kun meʹ badaʹ nyaheʹ tawai mida dina, penco meʹ mecin Militus tai tugung kapen kaʹ tanaʹ Kus, ngan neng kenempam me, abeʹ meʹ kaʹ lepoʹ Rudus, cen ina laʹa kaʹ lepoʹ Patara.

²Kaʹ ina meʹ taʹan ca kapen iaʹ ubaʹ ketai pelawat kaʹ tanaʹ Penisia. Tai meʹ ngedung neng kapen ina, penco tai meʹ puke.

³Ameʹ taʹan tanaʹ Siperus tahaʹ kabing ameʹ, penco tai meʹ kaʹ tanaʹ Siria, pejakaʹ kaʹ lepoʹ tirus. Moʹ kina kapen ina ke muai galen ne.

⁴Kina meʹ petegoʹ ngan diaʹ ngelan Tuhan, ngan ngelineʹ meʹ ngan nte kina pa dalem tujoʹ tau. Un palai mida diaʹ pisiu kuʹun Berua Buheʹ, ida iaʹ badaʹ me Paulus mulen ia ketai kaʹ Yerusalim.

⁵Uʹo sukung tau meʹ ngelineʹ kina, tai meʹ ngeliwet kaʹ kapen idai pelaʹa. Mung nte, peging anak ngan leto re, nai matet ameʹ tai tahaʹ awang lepoʹ. Mung meʹ pat sutlep kaʹ sada bahi, sulo meʹ lemameʹ Tuhan.

⁶Lepa ina, kun meʹ ti nyaheʹ neng ameʹ peselepeʹ apan, penco tai meʹ telu ngedung kaʹ kapen, ngan ida pe tai uleʹ kaʹ amin nte.

⁷Uʹo meʹ puke cen lepoʹ Tirus, tai meʹ abeʹ kaʹ lepoʹ Tulemais, penco tai meʹ badaʹ kaʹ saheʹ meʹ me diaʹ cenganak dalem Tuhan kina, sulo meʹ ngelineʹ ngan nte dalem ca tau.

⁸Neng kenempam me laʹa, tai meʹ puke abeʹ kaʹ lepoʹ Kaisaria, penco tai meʹ kedalem amin Pilipus, guru Injil ina, sulo ngelineʹ ngan ne. Laki ina ca usa neng ahang diaʹ tujoʹ usa diaʹ dulu lemileʹ kaʹ Yerusalim didai are.

⁹Un anak ke, pat de dekiʹit leto iaʹ mencam badaʹ seluhan isiu cen Allah.

¹⁰Majan uʹo lepa meʹ pat ngelineʹ kina, jinan ina kenai ca usa pegawa Tuhan, ngadan ne Agabus, nai cen tanaʹ Yudia.

¹¹Nai Agabus palaʹ ameʹ pat, kun ne alaʹ seketeng Paulus, lemeka seketeng Paulus neng taket te tengen ngan neng ujoʹ o, un dau ue: “Pekini dau isiu Berua Buheʹ: ‘Uban un laki iaʹ un seketeng ini ʹo, pekini te diseʹ lepoʹ Yahudi ke lemeka ia kaʹ Yerusalim ʹo, ngan ke naʹ ia palaʹ dulu diaʹ ca ʹo.”

¹²Dalau meʹ kenahan dau pekina, toʹ meʹ peging ngan nte diaʹ lepoʹ Kaisaria ina, naten ke mapo Paulus, mulen ia tai kaʹ Yerusalim.

¹³Un dau Paulus: “Inu hem nange ngan ngelemaʹ tekaʹ penawai heʹ tupe? Lepa tenup ne akeʹ talan ne dulu lemeka akeʹ kaʹ Yerusalim. Naʹ pe akeʹ matai, tenup ne akeʹ moʹ tuman ban Tuhan Yesus.”

¹⁴Tisen ne ameʹ, abeʹ senteng ke payo kimet Paulus ngan meʹ, pekenaʹ ne ameʹ ʹo. Un dau meʹ: “Mele baʹan kimet Tuhan ne sedeʹ.”

¹⁵Kudaʹ tau uʹo ina, lepa meʹ pedepa, sulo tai meʹ pukat kaʹ Yerusalim.

¹⁶Un palai diaʹ bayaʹ katuk Tuhan cen lepoʹ Kaisaria nai tugung ameʹ, penco ketai re ngkin ameʹ pejakaʹ kaʹ amin Manasun, moʹ kina meʹ pekimet ke ngelineʹ. Laki ina cen tanaʹ Siperus, iaʹ serengan ngan diaʹ ading ban bayaʹ katuk Tuhan are.

¹⁷Tagoʹ meʹ abeʹ kaʹ Yerusalim, mung diaʹ cenganak dalem Tuhan dina alaʹ ameʹ ngan bangen tawai re.

¹⁸Neng kenempam me ketai Paulus ngkin ameʹ naʹat Yakup. Mung diaʹ tuʹa Mpun diaʹ ngelan Tuhan un kina.

¹⁹Kun Paulus badaʹ saheʹ tawai ie palaʹ ida, penco ho nepuʹun badaʹ tahaʹ ca tahaʹ ca, mung puyan iaʹ Allah uyan cen ban gayeng nge neng ahang dulu diaʹ tahaʹ awang Yahudi.

²⁰Lepa re kenahan dau puyan ina, penco re pempau Allah. Kun dau re neng Paulus: “Ahaʹ cenganak, tisen ne ikoʹ ban kudaʹ ibu diaʹ lepoʹ Yahudi diaʹ lepa ngelan Tuhan Yesus di lareʹ mung nte caʹ tudep lepe ida kanan Katuk Adet Musa.

²¹Tisen ne ida dau denga hoʹ ban pekatuk mung lepoʹ Yahudi iaʹ mudip kaʹ lepoʹ diaʹ ca, ban cuk ida lepo Katuk Adet Musa, ngan mulen ida nyunat anak de, ngan mulen ida tai bayaʹ Adet Yahudi laʹa.

²²Atek ke tisen te ida ikoʹ ban nai abeʹ kini. Ke kumpin ne puyan le ʹo tupe?

²³Tiga hoʹ bayaʹ dau meʹ iaʹ ameʹ ke badaʹ mikoʹ ini. Un pat usa diaʹ ngan meʹ kini, iaʹ lepa ban sebayang patek tuket ngan Allah.

²⁴Tai ne ikoʹ ngan nte te, uyan ne adet man ncoʹ muheʹ usa hoʹ pemung ngan nte. Ngan ikoʹ naʹ beli ie man nte nguluk ulu re peging ngan ncoʹ. Idi dulu mung ke tisen ban neng puyan ncoʹ iaʹ ban ida kenahan, toʹ o abeʹ e ban lan, moʹ ikoʹ tengen pe bayaʹ Katuk Adet Musa ne.

²⁵Un sepuʹo, neng dulu diaʹ tahaʹ awang Yahudi diaʹ ngelan Tuhan, lepa ne ameʹ naʹ surat pebetep dau, mulen ida uman penguman diaʹ liwa iaʹ ban dulu mencai me bali, pekina pe dahaʹ, ngan pun diaʹ matai kalen dahaʹ, ngan pekina pe ngecoʹ usa re cen pemung nyalem.”

²⁶Penco Paulus ngkin ida pat tugung ia, ngan neng kenempam me ia uyan adet muheʹ usa pemung ngan nte pat dina. Penco tai ie kedalem Umaʹ Palan Allah, badaʹ toʹ majan ban ne uyan adet muheʹ usa pa re mencai ca pengencai, singket singket usa re.

²⁷Dalau ketai nyeng kesukung tujoʹ tau majan Paulus muheʹ usa ha, nai kun diaʹ lepoʹ Yahudi cen Asia. Ida taʹan Paulus un kedalem Umaʹ Palan Allah ina. Kun nte pebingaʹ dulu, penco re dakep Paulus,

²⁸mentung nte lemikaʹ kuma ha: “E mung lepoʹ Israil, baka, mepo meʹ ading. Ini ie iaʹ pekatuk mung dulu kempi kempi, iaʹ pejaʹat lepoʹ Israil ini peging ngan Katuk Adet Musa, pekina pe Umaʹ Palan Allah ini. Un naʹkni, un pe ia ngkin palai lepoʹ Gerika kedalem Umaʹ Palan ini, nai ngederam kukoʹ iaʹ buheʹ ini.”

²⁹(Ina ukoʹ de pekina dau, moʹ un nte taʹan Terupimus lepoʹ Ipesus ban pejahi ngan Paulus are kedalem lepoʹ ina. Tekaʹ kimet de un Paulus ban ngkin Terupimus kedalem Umaʹ Palan Allah ina.)

³⁰Tai bisau ne ketoʹ diaʹ dalem lepoʹ ina. Penco re ngasa tai pempun, ngan dakep Paulus, mihit ia kaʹ awang cen Umaʹ Palan ina. Sangkit seʹ de mekep pamen Umaʹ Palan ina.

³¹Dalau ina tai kun palai pisiu mayur sedadu Rum, ngan badaʹ mung lepoʹ Yerusalim seʹ ketai kasing, moʹ kadoʹ dulu kina ubaʹ ke lematai Paulus.

³²Un mayur sedadu ina sangkit ngkin palai sedadu ngan kaptin nte, puno nai ngasa palaʹ mpun dulu kina. Dalau re taʹan seʹ kenai mayur ina peging sedadu ue, pekenaʹ ne ida nyakit Paulus.

³³Penco kenai mayur sedadu ina ngenyeng ngan dakep Paulus, tai cuk dulu lemeka ia man dua re beka ampit malat. Kun mayur ina lemutu, un dau ue: “Aheʹ laki ini tupe? Inu ban pemuyan ne are?”

³⁴Un palai mida ngelengap badaʹ pekini, un pe palai badaʹ pekina. Moʹ o maho laleʹ, abeʹ mayur ina tisen iaʹ mpi iaʹ lan, ina ukoʹ o cuk ida ngkin Paulus kedalem amin sedadu.

³⁵Uʹo re abeʹ kaʹ can, un palai sedadu mejung ia, moʹ dulu muʹo seʹ ke pampo ia.

³⁶Mung dulu kina nai lemikaʹ bayaʹ ida, kun dau re: “Lematai ne ia.”

³⁷Kena re ke ngkin ia kedalem amin sedadu ina, kun Paulus pisiu mayur sedadu ina: “Ahaʹ amai, senteng ngkeʹ ke pisiu ngan ncoʹ ading tupe?” Un dau mayur mipa: “Adeʹ ban tisen ncoʹ isiu Gerika?

³⁸Buk ke pekina, abeʹ koʹ lepoʹ Masir iaʹ ban cen naʹaʹ ke ten ke ngasing dalem lepoʹ, ngan iaʹ ngkin pat ibu usa diaʹ bekelau kaʹ tanaʹ lenga are tupe?”

³⁹Kun dau Paulus: “Akeʹ ini ca lepoʹ Yahudi cen lepoʹ Tarsus kaʹ dalem Kilikia, ca lepoʹ dulu pedenga. Akeʹ nyat lesau neng amai, pawang ngkeʹ pisiu me lepoʹ ini ading.”

⁴⁰Mayur sedadu ina pedayo ho pisiu. Tai Paulus nekejeng kaʹ ulu can, seʹ e pekata man ujoʹ o me lepoʹ ina. Uʹo tai ie belinga, kun ne pisiu man isiu Iberani, kun dau ue: