Read Wahau Kenyah PEMUYAN 23 Bible Online

PEMUYAN 23 - Wahau Kenyah bible

PEMUYAN 23

¹Kun Paulus nekeneng naʹat Mpun diaʹ Lataʹ dina, kun dau ue: “Ahaʹ amai, ngan cenganak keʹ mung, akeʹ ne mudip neng juma Allah peging dema tekaʹ kimet penawai heʹ pa abeʹ tau ini ne.”

²Kun Ananias, Pengebioʹ Detaʹu ina, cuk diaʹ nekejeng nyeng kata Paulus nepap paʹ Paulus.

³Un dau Paulus neng ia: “Allah iaʹ ke nepap ikoʹ puʹo, E nting iaʹ kadeng puteʹ. Seʹ koʹ madung kini ke ngukum akeʹ bayaʹ Katuk Adet Musa petem pe ikoʹ tengen ngesa Katuk Adet Musa ne, moʹ koʹ cuk dulu nepap akeʹ.”

⁴Un dau laki iaʹ nekejeng dudo Paulus ina: “Seʹ koʹ pejaʹat Pengebioʹ Detaʹu tupe?”

⁵Un dau Paulus: “Ahaʹ cenganak keʹ, abeʹ keʹ tisen buk ban ia Pengebioʹ Dataʹu, moʹ un dau dalem Kitap Tuhan: ‘Ayen ncem pejaʹat dau neng tuʹa lepoʹ kem.’ ”

⁶Dau Paulus taʹan palai mida dina diaʹ ban Seduki ngan un pe diaʹ Perisi, bioʹ dau ue pisiu kuma ha: “Ahaʹ amai, ngan cenganak keʹ mung, akeʹ ne ca diaʹ Perisi lete, ca anak ban mela Perisi. Moʹ ban nceʹ un tebelum kelunan matai ke nai numpak mudip laʹa, ina iaʹ ukoʹ dulu kini ke petugen akeʹ.”

⁷Uʹo Paulus pekina dua, tai paseʹ ne dau re diaʹ Perisi ngan nte diaʹ Seduki dina. Un mpun dina tai bese dua re.

⁸(Moʹ un nte diaʹ Seduki, abeʹ de ngelan diaʹ matai kenai numpak mudip laʹa, ngan abeʹ pe ida ngelan un melikat ngan un berua. Un sepuʹo ida diaʹ Perisi ngelan mung nte dina.)

⁹Tai bioʹ kuʹo ke dau re pesakat neng ahang ida. Un palai diaʹ guru Katuk Adet Musa diaʹ ban sekula Perisi dina, nai re beteʹ, pali dau re mepo diaʹ pesakat dina. Un dau re: “Tegoʹ ameʹ dini, nyahut laki ini un ca puyan iaʹ jaʹat ne. Masaʹ un ca puyan berua, buk are ca melikat pe iaʹ pisiu ia?”

¹⁰Dalau ketai ie kenyarem dau re pekenca, un mayur sedadu ina tai takut ne ia, malap dulu ke pesepit Paulus. Kun ne cuk sedadu dina puno nai alaʹ Paulus cen ahang mpun ina, penco ngkin ia kaʹ amin sedadu.

¹¹Neng alem iaʹ uʹo ina, nai kun Tuhan nekejeng dudo Paulus, kun dau ue: “Bawaʹ ne ading Paulus, moʹ lepa ne ikoʹ badaʹ ban ncoʹ tugen neng akeʹ kaʹ lepoʹ Yerusalim, pekina pelaʹa atek koʹ ke tai lete badaʹ ban ncoʹ tugen neng akeʹ kaʹ lepoʹ Rum laʹa ʹo.”

¹²Kenai dema neng kenempam me, un lepoʹ Yahudi peseket ngkang ca santet kuma: “Abeʹ meʹ ke uman, pekina pe nisep, buk meʹ abeʹ un ke lematai Paulus ading.”

¹³Lapa pat puloʹ usa kadoʹ de iaʹ peseket man santet ina.

¹⁴Mung nte dina tai palaʹ diaʹ detaʹu lataʹ kina, pemung ngan diaʹ lataʹ lepoʹ ina, kun dau re: “Lepa ne ameʹ man ca santet iaʹ bioʹ, moʹ abeʹ meʹ ubaʹ ke uman ca inu kena meʹ ke lematai Paulus.

¹⁵Ina ukoʹ o naʹkini tiga hem pemung ngan Mpun diaʹ Lata dina, katu tiraʹ me mayur sedadu ina apan ne ngkin Paulus puno palaʹ ikem. Lemalo diseʹ kem badaʹ ikem ubaʹ ke nyituk ngetisen neng puyan Paulus pelaʹa. Un meʹ sepuʹo ke mabang petenup ke lematai ia kena ha kenai abeʹ kini ʹo.”

¹⁶Un sadin Paulus ca leto, un anak laki ie, ia kenahan dau peket dulu ina, penco ketai ie kedalem amin sedadu, badaʹ isiu ini me Paulus.

¹⁷Kun Paulus mengin ca usa kaptin sedadu, un dau ue: “Ngkin ne demanai ini palaʹ mayur hem, moʹ un ca tiraʹ ia ubaʹ ke badaʹ mia.”

¹⁸Kun sedadu ina ngkin demanai ina palaʹ mayur. Un dau ue: “Ban Paulus, laki iaʹ sihoʹ sepin ina, mengin akeʹ, cuk akeʹ nai ngkin demanai ini palaʹ amai, moʹ un ca tiraʹ ia ubaʹ ke badaʹ me amai.”

¹⁹Kun mayur ina ajak ujoʹ demanai ina, ngkin ia tengen tai ceng bese, un dau ue: “Inu iaʹ ikoʹ ubaʹ ke badaʹ makeʹ tupe?”

²⁰Un dau demanai ina: “Un lepoʹ Yahudi lepa peseket ke nyat neng amai, nempam ke ngkin Paulus tai puno nyeripa Mpun diaʹ Lataʹ, seʹ de ke lemalo badaʹ ida ubaʹ ke nyituk ngetisen neng puyan Paulus pelaʹa.

²¹Ayen amai alaʹ dau re, moʹ suheʹ pat puloʹ usa re diaʹ ke mabang Paulus. Lepa ne ida uyan santet abeʹ un ubaʹ ke uman ngan nisep, buk de abeʹ un ke lematai Paulus ading baʹan dau re. Naʹkini, lepa ne ida petenup ke pekena ikoʹ ke ngahaʹ ia nai kawang.”

²²Un dau mayur sedadu ina: “Ini hoʹ badaʹ a makeʹ ne, ayen ncoʹ badaʹ a me dulu laʹa ʹo ko.”

²³Penco mayur sedadu ina mengin dua usa kaptin dina, un dau ue: “Petenup ne dua ato sedadu iaʹ ke tai kaʹ Kaisaria, ngan tujoʹ puloʹ usa diaʹ ngedung neng kuda, ngan dua ato usa diaʹ ngkang nyatap, petenup ne tai puke jam piʹen alem ini.

²⁴Ngan petenup pe me Paulus ca kuda, ukoʹ o ngedung, ngan tai re ngkin ia tiga le palaʹ Pilik, gebenur ina.”

²⁵Kun mayur ina nyurat neng ca suart iaʹ pekini dau ue:

²⁶“Dau heʹ badaʹ tiga kimet ceʹ, Keludius Lisias, palaʹ iaʹ paren bioʹ, Pilik gebenur.

²⁷Ban lepoʹ Yahudi dakep laki ini, ubaʹ ke lematai ia. Nai heʹ peging ngan sedadu heʹ, sau ia, moʹ keʹ kenahan dau ue ca anak lepoʹ Rum.

²⁸Moʹ keʹ ubaʹ ke ngetisen inu tuman nte mekem salaʹ mia, ina ukoʹ ke ngkin ia puno palaʹ Mpun diaʹ Lataʹ de.

²⁹Tisen nceʹ ia abeʹ un ca inu puyan iaʹ tekep ukoʹ o ke sihoʹ ukum patai ngan sepin. Un iaʹ ukoʹ de ban ke pesalaʹ ia sihoʹ neng pemuyan adet de tengen.

³⁰Nai luhaʹ ne palaʹ akeʹ ban nte peseket ke ngejaʹat laki ini. Ina ukoʹ keʹ teto tekaʹ pekimet ke naʹ ia palaʹ ikoʹ. Akeʹ cuk mung diaʹ peneti ngan ne nai nyeripa ikoʹ.”

³¹Ina ukoʹ sedadu dina ngkin Paulus koʹ baʹan dau mayur re cuk ida are. Penco re ngkin ia ngahu kaʹ lepoʹ Antipatis.

³²Neng kenempam me, un diaʹ lepat dina nai re ngeliwet kaʹ lepoʹ Yerusalim kaʹ amin nte ne. Un diaʹ ngedung neng kuda dina, ida diaʹ tai penco tugung Paulus.

³³Uʹo re abeʹ kaʹ Kaisaria, kun nte mencai surat ina palaʹ gebenur, mentung nte naʹ Paulus palaʹ ia.

³⁴Kun gebenur baca surat ina, penco ho lemutu tanaʹ cen mpi ukoʹ o. Tegoʹ o tisen ban Paulus ne ca laki cen tanaʹ Kilikia,

³⁵penco dau ue neng Paulus: “Ubaʹ keʹ ke ngeringa dau hem buk mung diaʹ ti ngan ncoʹ nai abeʹ kaʹ ini ʹo.” Kun ne cuk ida meput Paulus dalem amin sepin kaʹ amin Paren Bioʹ Herudis.