Read Wahau Kenyah PEMUYAN 26 Bible Online

PEMUYAN 26 - Wahau Kenyah bible

PEMUYAN 26

¹Un dau Ageripa neng Paulus: “Tiga pe ikoʹ badaʹ ban pemuyan ncoʹ naʹkini.” Penco Paulus ngayang ujoʹ o ke mipa, kuma:

²“Ahaʹ amai Laja Ageripa, tiga lan ne ini neng akeʹ, moʹ asin tau ini un awang keʹ nyeripa ikoʹ ke badaʹ dau heʹ mipa neng puyan lepoʹ Yahudi diaʹ naʹ akeʹ salaʹ.

³Lapa saheʹ pe tekaʹ keʹ pelaʹa moʹ koʹ tisen laleʹ neng adet ngan tikung tiraʹ Yahudi. Ina ukoʹ keʹ nyat ikoʹ pedenaʹ tawai ke ngeringa dau heʹ ʹo.

⁴“Mung lepoʹ Yahudi tisen ne ida ban puyan udip keʹ cen dalau iʹut ceʹ te. Ida tisen pe ban tading tading keʹ mudip kaʹ tanaʹ meʹ, ngan uʹo ina kenai heʹ kaʹ Yerusalim ne.

⁵Moʹ tisen ne ida cen kena, buk de ubaʹ, senteng nte peluhaʹ ban lan seʹ keʹ mudip tangen bayaʹ adet iaʹ tuping laleʹ, ina jo adet Perisi.

⁶Naʹkini heʹ nekejeng kini, iaʹ ukoʹ dulu mekem salaʹ makeʹ, moʹ keʹ nebelum neng tiraʹ iaʹ Allah lepa petuket me tepun meʹ mung cen naʹaʹ.

⁷Neng puyan dau petuket ini, mung diaʹ puloʹ dua naʹan lepoʹ Yahudi caʹ nebelum lepe kidi, mentung nte lemameʹ palaʹ Allah singket tau ngan singket alem ne. Ban kuʹun tebelum ini sedeʹ, ahaʹ amai iaʹ laja heʹ, idi ukoʹ lepoʹ Yahudi naʹ akeʹ salaʹ.

⁸Moʹ inu hem lepoʹ Yahudi abeʹ un kimet ke ngelan ban Allah iaʹ pudip kelunan matai?

⁹“Lan ne cen naʹaʹ akeʹ pekimet tekep tekaʹ keʹ naten ke pebunoʹ ngan dulu diaʹ ngelan neng ngadan Yesus lepoʹ Nasarit ina.

¹⁰Atek pekina puyan nceʹ kaʹ Yerusalim are. Tai heʹ palaʹ diaʹ detaʹu lataʹ, alaʹ surat penyukat ceʹ ketai nyepin dulu diaʹ anun Allah. Dalau re sihoʹ ukum patai are, payo pe akeʹ ngan dulu diaʹ ti ida.

¹¹Kudaʹ liwai ne akeʹ nyakit ida kedalem singket amin sebayang Yahudi. Naten kun nceʹ cuk ida pejaʹat pengelan nte neng Keristus. Akeʹ iaʹ pasak buseʹ neng ida, ina ukoʹ o pa abeʹ lepoʹ diaʹ ca te ketai heʹ pabat ida, moʹ keʹ ke nyakit ida.”

¹²Sulo dau Paulus laʹa: “Dalem pemuyan ia pekina, nengangan ketai heʹ kaʹ Damsik are. Kun nceʹ ngkin surat penyukat ceʹ cen diaʹ detaʹu lataʹ diaʹ ban cuk akeʹ tai dina.

¹³Ahaʹ amai, dalau beluaʹ tau kaʹ janan ina, idi heʹ taʹan ca serutang dema cen langit, iaʹ dema laleʹ diseʹ e neng dema mata tau. Serema ina sihoʹ akeʹ peging ngan dulu diaʹ serengan masat ngan nceʹ dina.

¹⁴Sulo mung meʹ tai pengkup kaʹ tanaʹ. Uʹo ina heʹ kenahan dau ca isiu iaʹ pisiu akeʹ man isiu Iberani. Un dau ue neng akeʹ: ‘Saul, Saul, moʹ inu hoʹ nyakit akeʹ tupe? Tiwet neng ikoʹ, ikoʹ te ikoʹ nyakit, koʹ baʹan ca sapi iaʹ apik tusuk kelunan iaʹ jagaʹ ia are.’

¹⁵Un dau heʹ: ‘Aheʹ koʹ, Tuhan?’ Un dau Tuhan ne: ‘Akeʹ lete Yesus iaʹ ikoʹ nyakit ini.

¹⁶Beteʹ ne, ngan nekejeng telit le. Tuman nceʹ nai peluhaʹ palaʹ ikoʹ, moʹ keʹ ke uyan ngan nyalet ikoʹ ulaʹ keʹ iaʹ ke badaʹ tugen neng akeʹ, idi hoʹ ketai badaʹ me kelunan neng puyan ncoʹ ban taʹan akeʹ tau ini, pekina pe neng puyan iaʹ akeʹ ke peluhaʹ palaʹ ikoʹ bayaʹ ʹo.

¹⁷Akeʹ ke ngelidung ngkoʹ neng puyan lepoʹ Israil, pekina pe neng puyan lepoʹ diaʹ ca pe, moʹ akeʹ iaʹ cuk ikoʹ ketai palaʹ ida.

¹⁸Ikoʹ iaʹ ke mesik mata re, ngan pupa ida cen ntem, cuk ida sileʹ tahaʹ dema, pekina pe sau ida cen penyukat gaham Sitan iaʹ tuʹa bali, paso ida kedalem gaham Allah, idi penyalaʹ de pesau moʹ kuʹun pengelan nte neng akeʹ, pekina pe un ukoʹ de nai pebulung ngan kelunan diaʹ Allah ban lemileʹ.’ ” Pekina dau Yesus me Paulus.

¹⁹Sulo dau Paulus laʹa: “Ahaʹ amai heʹ Laja Ageripa, abeʹ keʹ muau neng penaʹat ceʹ iaʹ tengangan nai luhaʹ cen surga ina.

²⁰Ading ketai heʹ badaʹ denga ina palaʹ lepoʹ Damsik, uʹo ina tai heʹ palaʹ lepoʹ Yerusalim, uʹo ina pelaʹa tai heʹ pa tipo tanaʹ Yudia nuʹo. Ngan palaʹ dulu diaʹ tahaʹ awang Yahudi pe ketai heʹ badaʹ a, apan nte nesen ngan nyepuleʹ kimet de, ngan pupa palaʹ Tuhan Allah, ngan uyan puyan tiga iaʹ ke badaʹ diseʹ ban nte nesen ngan nyepuleʹ kimet de.

²¹Ban suaʹ puyan pekina, ina ukoʹ lepoʹ Yahudi ban dakep akeʹ dalem Umaʹ Palan Allah are. Kun nte ten ke lematai akeʹ.

²²Naʹ pe pekina, Allah mepo heʹ pa abeʹ tau ini ne. Ina ukoʹ keʹ jeng kini, kebadaʹ ban nceʹ tugen neng Yesus palaʹ mung dulu, diaʹ iʹut ngan pekina pe neng diaʹ bioʹ. Mung dau isiu heʹ ini, abeʹ e tekajaʹ ngan dau isiu diaʹ pegawa cen naʹaʹ, ngan dau isiu Musa pe.

²³Palup ne dau re badaʹ ban Keristus iaʹ ngkang pungu udip atek ke ke sihoʹ tuyen, ngan ia ading kenai numpak mudip cen patai, ke penco badaʹ udip dema me mung lepoʹ Yahudi ngan diaʹ tahaʹ awang Yahudi pe.”

²⁴Dalau Paulus pisiu pekina dau, sulo Pistus ngelengap: “Buling ngkoʹ Paulus, moʹ pelapa laleʹ mpau sekula hoʹ, idi iaʹ pebuling ikoʹ ne.”

²⁵Kun dau Paulus: “Ahaʹ amai Pistus, abeʹ keʹ un buling. Sebelang lan dau heʹ pisiu iaʹ teneng ngan iaʹ un tuman ini.

²⁶Ahaʹ Laja Ageripa, tuman nceʹ tempa pisiu ngan ncoʹ, moʹ malai ne ikoʹ neng mung puyan diaʹ pekina. Atek tisen lete ikoʹ kidi. Moʹ abeʹ puyan ina ca puyan iaʹ suhuk koʹ baʹan inu iaʹ suhuk neng ca tikung are.

²⁷Ahaʹ amai Laja Ageripa, un ncoʹ ngelan neng diaʹ pegawa Tuhan cen naʹaʹ tupe? Tisen nceʹ atek ngelan lete ikoʹ.”

²⁸Kun dau Ageripa neng Paulus: “Nuat dau hoʹ ke menat kimet ceʹ ketai Keristin ne?”

²⁹Kun dau Paulus: “Naʹ pe ia ke nuat, inu pe ia ke majan, akeʹ lemameʹ Allah, abeʹ e bang amai tuaʹ le, di pareʹ mung ngkem diaʹ kenahan dau heʹ tau ini, awaʹ ne ikem ban ngelan koʹ baʹan akeʹ are, bang beka ampit ini le iaʹ are kahum kidi.”

³⁰Dalau ina, kenai laja ina beteʹ, pekina pe gebenur, peging Berniki ngan mung dulu diaʹ madung ngan nte kina.

³¹Uʹo ketai re ngerada, kun nte pisiu neng ida selepeʹ, un dau re: “Laki ini abeʹ un ca inu puyan ukoʹ o ke sihoʹ ukum patai, ngan inu iaʹ ukoʹ o ban sihoʹ sepin.”

³²Un dau Ageripa neng Pistus: “Senteng ne nakau laki ini buk ke are nyat ketai pebetep pe kata Laja Kaisar.”