Read Wahau Kenyah PEMUYAN 27 Bible Online

PEMUYAN 27 - Wahau Kenyah bible

PEMUYAN 27

¹Uʹo re pebetep dau ke cuk ameʹ ketai tugung kapen kaʹ tanaʹ Italia, kun nte naʹ Paulus me Yulius, ca tuʹa sedadu Rum cen mpun sedadu Kaisar. Un pe palai dulu diaʹ ban sepin pemung ngan ne.

²Tai kun meʹ puke, ngedung neng ca kapen iaʹ cen Adamitium, iaʹ ketai masat tahaʹ tanaʹ Asia. Un Aristakus, ca usa Makedunia cen lepoʹ Tesalunika, ia iaʹ nai serengan ameʹ.

³Neng kenempam me, ketai meʹ nyabeʹ kaʹ lepoʹ Sidun. Un Yulius ne, un saheʹ seʹ e neng Paulus. Ia pedayo ho tai pekajaʹ palaʹ diaʹ cenganak dalem Tuhan, apan nte petubo ia.

⁴Puke pe ameʹ cen ina laʹa, pebing pebing tai meʹ moʹ kasa bahiu, ina ukoʹ penco tai meʹ nyebahi alaʹ lidung tanaʹ Siperus.

⁵Uʹo meʹ pelawat banget temping tanaʹ Kilikia ngan Pampilia, penco meʹ abeʹ kaʹ lepoʹ Mira kaʹ tanaʹ Likia.

⁶Kina tuʹa sedadu ina alaʹ ca kapen iaʹ ban cen lepoʹ Alik-sandaria, iaʹ ubaʹ ketai tahaʹ tanaʹ Italia. Penco ho cuk ameʹ tai paso ngedung neng kapen ina.

⁷Un kudaʹ tau majan tai meʹ masat keno keno ke. Ngan taru taru diseʹ ketai meʹ abeʹ kaʹ lepoʹ Kenidus. Abeʹ meʹ senteng ketai tahaʹ tai kina laʹa moʹ meʹ selalang bahiu kasa. Ketai meʹ piwaʹ pelapa incui tanaʹ Salmune, sulo meʹ nyebahi alaʹ lidung tanaʹ Keriti.

⁸Ngan keta laleʹ ketai meʹ nyebahi tanaʹ ina. Abeʹ ne ameʹ kaʹ ukoʹ kapen ngelineʹ, ngadan kina Tuhun Selawan, nyeng kaʹ lepoʹ Lasia.

⁹Majan laleʹ meʹ ngelineʹ kina, moʹ buk meʹ ketai puke, ke taru meʹ, moʹ lepa lapa ne tau adet bioʹ sebayang un liwa ina. Ina ukoʹ Paulus mulen ida ke masat.

¹⁰Un dau ue neng ida: “Ahaʹ cenganak, tisen nceʹ neng asat le ini ke sihoʹ taru le ʹo. Galen le, kapen ini, peging ngan usa kelunan ke tampan uʹo.”

¹¹Di le ʹo, abeʹ tuʹa sedadu ina ngelan dau Paulus ne, padan ne ngelan dau kaptin kapen ina, ngan laki iaʹ un kapen ina.

¹²Moʹ naʹ pareʹ, abeʹ Tuhun Selawan ina tiga kukoʹ de ke ngelineʹ ngajan ne sengim ne. Kadoʹ pe ida dina ubaʹ ke puke cen ina, mele ne kumpin ketai re kaʹ lepoʹ Penik, moʹ kina un ca tikung banget neng sada bahi tanaʹ Keriti iaʹ nyeripa tahaʹ ketai tau lenca. Kina iaʹ tiga kukoʹ de ke ngelineʹ ngajan sengim, baʹan tekaʹ de.

¹³Dalau tading kenai bahiu keno keno kenai ie cen kabing asat tau, un tekaʹ de, ida kuma ketai ie ke tiga nuʹo. Sulo re menat ujem kapen ina, penco tai meʹ puke nusau tanaʹ Keriti.

¹⁴Abeʹ lepe majan uʹo ina, kenai ca bahiu kasa pelayam ameʹ, nai ie cen usun tanaʹ ina, ngadan bahiu ina Yurakulun.

¹⁵Ketai kun kapen ke nyelalang bahiu ina, abeʹ senteng. Ina ukoʹ meʹ pagang kuʹun bahiu. Kun meʹ pedayo kapen tai matung matung tuaʹ le nuʹo.

¹⁶Kun meʹ alaʹ lidung, tai tahaʹ kabing asat tau, nusau ca tanaʹ iʹut le, ngadan ne Kauda. Kaʹ ina meʹ taru tekaʹ ke mejung alut neng usun kapen.

¹⁷Uʹo re mejung alut ina, seʹ de nebeseng kapen ina man tali. Takut de ketai pampe neng ahit kaʹ sada bahi tanaʹ Libia, idi ukoʹ de muno ngan lemelen apeʹ tantaʹ bahiu iaʹ pasat kapen ina. Uʹo ina bang pele bahiu ne ida ketai ngkin kapen ina.

¹⁸Pasak laleʹ ne tekaʹ kapen meʹ ngelubet kuʹun banget iaʹ abeʹ un tai pekenaʹ, ina ukoʹ neng kenempam me kun nte pet galen kaʹ banget.

¹⁹Neng kenempam me pelaʹa kun nte pet senganan kapen ina man ujoʹ de tengen.

²⁰Dalau ina un kudaʹ tau majan meʹ abeʹ un taʹan mata tau ngan betuʹen. Puto laleʹ ne kenai bahiu kasa neng ameʹ. Ketai kuʹo ho, abeʹ meʹ un tekaʹ tebelum ke mudip laʹa.

²¹Majan laleʹ ne ida dina abeʹ un uman. Kenai Paulus nekejeng neng ahang ida. Un dau ue: “Ahaʹ cenganak, awaʹ pe ikem ngeringa dau tiraʹ keʹ dalau idai are, iaʹ mulen ilu kenai puke cen Keriti are. Buk ke ina ilu kanan are, abeʹ le ke sihoʹ taru ngan ngebura inu le.

²²Naʹ pia pekina sedeʹ, naʹkini heʹ nyat ikem ngahing tekaʹ tawai hem, ayen ncem tai iʹut tawai. Nyahut ca usa me tepat ke matai ne, bang kapen ini tuaʹ le iaʹ ke kaham ʹo.

²³Uban un alem tahup de, nai ca usa melikat palaʹ akeʹ cen Tuhan Allah. Allah ina iaʹ un akeʹ: palaʹ ia heʹ lemameʹ. Un dau melikat ina neng akeʹ:

²⁴‘Ayen ncoʹ takut Paulus. Atek koʹ ketai nekejeng lete nyeripa Kaisar ʹo. Ban kuʹun ncoʹ, kenai peniga Allah iaʹ ke pudip mung nte diaʹ serengan ngan ncoʹ.’

²⁵Ahaʹ cenganak, moʹ pekina dau melikat makeʹ, ngahing ne tekaʹ tawai hem. Akeʹ ngelan Allah. Mung dau isiu ue ina atek ketai nuyan lete ʹo.

²⁶Inu pia pekina, atek le ketai pampe neng ca musang tanaʹ ʹo.”

²⁷Ketai ie abeʹ neng alem iaʹ kepuloʹ pat tau ue ina, caʹ tai lepe kapen meʹ suntung kuʹun bahiu kaʹ banget Aderia. Kihoʹ kihoʹ dalau beluaʹ alem, un diaʹ kuli kapen dina, un dau re: “Masaʹ kenyeng ne ilu kaʹ sada bahi.”

²⁸Kun nte pelaboʹ tali iaʹ un mahaʹ neng bulan ne, man nte ten dalem me, ina re tisen dua puloʹ depa dalem me. Abeʹ lepe majan uʹo ina, kun nte pelaboʹ tali ina pelaʹa ke ten dalem me, ina re tisen puloʹ lema depa.

²⁹Moʹ de takut kapen meʹ ketai sekakan neng usun batu, ina ukoʹ de pelaboʹ pat de ujem cen mudi ie, mentung nte lemameʹ apan ne nyelarai kenai dema.

³⁰Un diaʹ kuli kapen dina ten pekimet ke kelap kapen ina. Tai re muno alut kaʹ banget ngan lemalo diseʹ de ke muno ujem kapen cen julung.

³¹Kun dau Paulus neng tuʹa sedadu ngan diaʹ sedadu dina: “Buk abeʹ kuli kapen dini ke ngelineʹ kaʹ kapen, nyahut cem ke mudip ne.”

³²Penco tai sedadu dina metep tali alut ina, pelaboʹ o kaʹ sungai.

³³Kena ke kenai ie dema, kun Paulus naten mengin ida dina mung cuk ida ke uman, un dau ue: “Ini ne puloʹ pat tau ue ne ikem pekena layam ini ketai nteng. Laʹu ne ikem moʹ abeʹ un ca inu inu ikem uman.

³⁴Ina ukoʹ keʹ naten mengin ikem uman, apan ncem tai tiga tekaʹ ʹo. Koʹ bioʹ ca uhat puk pe abeʹ kem ketai pebareng.”

³⁵Lepa ha pekina dau, kun ne alaʹ ruti ngan nyuaʹ tiga saheʹ palaʹ Allah nyeripa ida mung, kun ne mepeʹ e, sulo ho uman ne.

³⁶Cen uʹo ina, luhaʹ tai ie un seʹ tawai re, penco re uman.

³⁷Un toʹ kadoʹ meʹ dalem kapen ina dua ato tujoʹ puloʹ nem usa.

³⁸Uʹo meʹ beso mung, kun nte ke ngenyiʹan kapen ina, pet jelai gandum kaʹ banget.

³⁹Uʹo kenai ie tiga dema, ida taʹan te ca tikung iaʹ ahit sada bahi ie, di lareʹ abeʹ de tisen tanaʹ kempi kina. Pelaseʹ diseʹ de, apan tung nte senteng tai napi kaʹ ina.

⁴⁰Kun nte metep mung tali ujem ina, seʹ e pelek kina ne kaʹ banget, mentung nte mubai beka mudi ina. Kun nte mejung apeʹ tantaʹ bahiu iaʹ tahaʹ julung, sulo re petelit kapen tai kaʹ sada bahi ina.

⁴¹Belekaʹ tai kapen ina nantaʹ ahit iaʹ libau, penco ho sekakan kidi. Julung nge tanem, abeʹ senteng ke ngala laʹa. Un mudi ie pasi kuʹun pali luyak nantaʹ a.

⁴²Sulo sedadu dina peseket ubaʹ ke lematai mung nte diaʹ sepin, malap ca usa ketai nyatung, penco kelap.

⁴³Un tuʹa sedadu ina ubaʹ a ke pudip Paulus, idi ukoʹ o mulen ida keti puyan pekina. Kun ne cuk mung nte diaʹ mencam nyatung petuhun kaʹ sungai, tai kaʹ sada bahi ading.

⁴⁴Un pe diaʹ ca dina, tai re bayaʹ ida, un palai ngkang uʹu, ngan un palai ngkang ban tisai kapen. Ngan puyan pekina, mung meʹ abeʹ kaʹ sada bahin ngan tiga.