Read Wahau Kenyah PEMUYAN 3 Bible Online

PEMUYAN 3 - Wahau Kenyah bible

PEMUYAN 3

¹Tai kun Peterus de dua Yaya lemameʹ kaʹ Umaʹ Palan Allah tegoʹ jam telu tai tahup.

²Kaʹ lung pamen iaʹ ngadan ne “Pamen Selawan” un ca kelunan iaʹ apet cen dalau kenai ie pempet, iaʹ lemuto nyat tuaʹ neng dulu diaʹ tai kedalem Umaʹ Palan Allah ina. Singket tau ne nai dulu nekalang ia, mahung ia kaʹ lung pamen ina.

³Kun ne taʹan Peterus ngan Yaya tai kedalem, kun ne nyat neng ida dua.

⁴Kun Peterus de dua Yaya nekeneng naʹat ia. Un dau Peterus: “Ikoʹ naʹat meʹ dua.”

⁵Kun ne naʹat seʹ de dua, mentung nge un tekaʹ nebelum ke alaʹ ca inu cen ida dua.

⁶Un dau Peterus: “Abeʹ un ligit neng akeʹ. Un sepuʹo inu iaʹ un neng akeʹ, idi te iaʹ akeʹ kenaʹ mikoʹ ini: kuʹun ngadan Yesus Keristus kelunan Nasarit ina, masat ne ikoʹ.”

⁷Sulo Peterus man ujoʹ taʹu ue, cuk ia nekejeng. Tegoʹ ina lete, pali ne taket te ngan buku taket te.

⁸Sulo ho nepecau ngan tai masat. Uʹo ina, tai ie kedalem Umaʹ Palan Allah pemung ngan nte dua, tai masat ngan nepecau pe ia, mentung nge pempau Allah.

⁹Mung dulu kina taʹan ia masat ngan pempau Allah.

¹⁰Moʹ kelayan nte taʹan ia madung nyat tuaʹ le kaʹ lung “Pamen Selawan” Umaʹ Palan ina. Mung nte dina salam ngan meba, moʹ kuʹun puyan iaʹ lepa nuyan neng laki ina.

¹¹Dalau laki ina ngedipet neng Peterus de dua Yaya, nai lepoʹ ina mung ngasa pempun kaʹ use iaʹ ngadan “Use Suliman,” ngan salam laleʹ tekaʹ de.

¹²Dalau Peterus taʹan seʹ mpun dulu kina, penco ho pisiu ida: Un dau ue: “Ahaʹ cenganak keʹ lepoʹ Israil, inu iaʹ ukoʹ kem tai salam neng seʹ puyan laki ini tupe? Ngan inu adeʹ kem nekeneng naʹat ameʹ tupe? Ayen kuma ban penyukat meʹ ngan pengebuheʹ adet meʹ iaʹ ban cuk laki ini senteng masat.

¹³Ban Allah iaʹ anun Ibrahim ngan Isak ngan Yakup, ina Allaj iaʹ anun tepun le pe, lepa naʹ pengaren me Yesus iaʹ anak ke, iaʹ ikem dini ban naʹ palaʹ perinta. Tegoʹ Pilatus ban pekimet ubaʹ ne nakau Yesus are, ikem iaʹ nyekang ia.

¹⁴Yesus iaʹ atek buheʹ ngan teneng, un sepuʹo ikem nyekang nge. Kun ncem nyat lesau neng Pilatus, apan kelunan iaʹ ban lematai nai pesau.

¹⁵Pekina puyan ncem lematai Yesus iaʹ atek puʹun udip. Un sepuʹo ban Allah iaʹ pudip ia cen patai. Neng puyan ne ina, ameʹ dini ne diaʹ badaʹ tugen kidi.

¹⁶Ban kuʹun penyukat dalem ngadan Yesus, ina iaʹ lepa puhat laki ini. Puyan laki apet, iaʹ ikem taʹan ngan tisen ini, lepa nuyan ban kuʹun pengelan kedalem ngadan Yesus ne. Ban pengelan neng Yesus iaʹ paget ia lan, kata ikem mung.”

¹⁷Sulo dau Peterus laʹa: “Ahaʹ cenganak keʹ mung, akeʹ tisen ban puyan ncem ini dalau hem turan are, pekina lete diaʹ tuʹa hem pe.

¹⁸Uban cen naʹaʹ Allah badaʹ isiu ue man mung pegawa ha, kumpin seʹ puyan kenai Laki iaʹ ngkang pungu udip, iaʹ Allah naʹ milu, iaʹ atek ke ke sihoʹ tuyen lete ʹo. Pekina lete ban tai ie palup.

¹⁹Moʹ ina, nesen ne, ngan nyepuleʹ kimet cem palaʹ Allah, idi ie ke musoʹ sau penyalaʹ kem. Laʹa idi hem ke un ca iaʹ ke nyengim udip kem, iaʹ ban nai cen juma Tuhan.

²⁰Ngan laʹa idi Allah ke cuk Yesus nai, iaʹ ngkang pungu udip, iaʹ Allah ban lemileʹ ke naʹ mikem.

²¹Un te ia pekena kaʹ surga pa tegoʹ mung inu ke nuyan mading. Pekina dau tiraʹ Allah iaʹ ia ban badaʹ cen naʹaʹ man isiu pegawa ha diaʹ buheʹ didai.

²²“Lan Musa lepa badaʹ a kuma: ‘Un Tuhan Allah hem ne ke cuk nai ca pegawa, nai palaʹ ikem koʹ baʹan Allah cuk akeʹ nai palaʹ ikem are. Cen ahang ikem panak ke nai ie ʹo. Neng ia, tiga hem ngeringa mung inu iaʹ ia badaʹ mikem ʹo.

²³Aheʹ iaʹ abeʹ un ubaʹ ngeringa dau pegawa Allah ina, ia ke pesau tai tahaʹ awang neng kelunan diaʹ anun Allah, pa ha tai tasaʹ ʹo.’ Pekina dau Musa.

²⁴“Ngan pekina dau diaʹ pegawa Allah mung cen Samuil, peging ngan pegawa diaʹ bayaʹ, ketoʹ diaʹ penco tiraʹ Allah are, mung nte iaʹ ban badaʹ neng sun udip ini.

²⁵Moʹ ban mikem Allah lepa naʹ tuket iaʹ ia petuket man pegawa ha are. Ikem diaʹ kahum dalem tuket iaʹ Allah nyalet me tepun le. Koʹ baʹan dau ue neng Ibrahim: ‘Ban kuʹun mela hem dini, akeʹ ke naʹ peniga heʹ me mung lepoʹ kusun tanaʹ ini.’

²⁶Pekina ban Allah pudip anak ke Yesus ina neng ca udip iaʹ tumpak, ngan cuk ia nai palaʹ ikem ading, apan ne ke naʹ peniga mikem, iaʹ ukoʹ kem mung ke nyepuleʹ kimet cen pemuyan jaʹat cem.”