Read Wahau Kenyah PEMUYAN 5 Bible Online

PEMUYAN 5 - Wahau Kenyah bible

PEMUYAN 5

¹Un laʹa ca laki ngadan ne Ananias, un iaʹ leto Sapira. Kun laki ina pebeli ca tanaʹ kelimeng nte.

²Kun ne mapo palai ban ligit beli tanaʹ ina, ngan ida dua peto le tisen kidi. Kun ne ngkin palai le, naʹ a me diaʹ lawa Injil dina.

³Un dau Peterus: “Ahaʹ Ananias, moʹ inu hoʹ pedayo Sitan iaʹ tuʹa bali ngkang kimet coʹ, pa hoʹ lemalo Berua Buheʹ? Inu hoʹ mapo palai beli tanaʹ kelimeng ina tupe?

⁴Moʹ kena hoʹ ke pebeli ie, anun ncoʹ tengen lete. Lepa ne ikoʹ pebeli ie ʹo, ina beli ie dalem ikoʹ lepe. Moʹ inu hoʹ ban metep kimet ini kedalem penawai hoʹ tupe? Abeʹ seʹ koʹ lemalo neng kelunan, un sepuʹo seʹ koʹ lemalo Allah.”

⁵Dalau Ananias kenahan dau tiraʹ ina, belekaʹ tai ie pengkup, penco berua ha pesau cen ia. Bioʹ laleʹ le takut neng dulu mung diaʹ kenahan dau puyan ina.

⁶Un demanai diaʹ un kina, kenai re lemino ia, penco nekalang ia kawang, ngan tai nanem ia.

⁷Kihoʹ kihoʹ telu jam ʹo puyan ina, kenai iaʹ leto pelaʹa kedalem. Abeʹ e tisen neng inu iaʹ lepa nuyan kina.

⁸Un dau Peterus neng ia: “Tiga hoʹ badaʹ makeʹ, lan te tupe pekini kadoʹ beli ie iaʹ ikem dua lepa pebeli ina are?” Un dau leto ina: “Lan pekina te toʹ kadoʹ beli ie.”

⁹Un dau Peterus neng ia: “Ban inu adeʹ kem dua mung peseket uyan pengeten me Berua Tuhan tupe? Naʹat, ina dulu diaʹ lepa tai nanem laki hoʹ, ina re kaʹ lung pamen ne, ida iaʹ ke tai nekalang ikoʹ kawang ʹo.”

¹⁰Belekaʹ tai Sapira pengkup dalau ina, dudo taket Peterus, penco ho matai. Nai demanai dina kedalem, taʹan leto ina lepa matai. Tai re nekalang ia kawang, ngan nanem ia petemping ngan laki ie.

¹¹Mung Mpun diaʹ ngelan Tuhan dina takut laleʹ ne tekaʹ de, pekina pe mung dulu diaʹ kenahan denga puyan ina.

¹²Kadoʹ ne tedanaʹ bulen ngan puyan nyingan diaʹ lawa Injil dina uyan neng ahang dulu. Mung nte diaʹ ngelan Tuhan, tai re kelimpun ngan ca le penawai re kaʹ dalem Use Suliman.

¹³Dulu diaʹ ca, abeʹ de makang pekelet ngan nte kina, naʹ pe dulu pada ida.

¹⁴Keno ketai kadoʹ dulu nai ngepit Mpun nte. Kadoʹ lan ne laki, pekina pe leto diaʹ ngelan Tuhan.

¹⁵Ketai dulu ngkin kelunan sakit kawang kaʹ janan, mahung ida peging ngan pat de. Un pe palai neng uʹu, kukoʹ tekalang nte, idi buk Peterus nai lapa ida apan lingai ie tai sihoʹ mele pe aheʹ neng ahang ida.

¹⁶Kadoʹ dulu diaʹ teliling lepoʹ Yerusalim nai ngkin diaʹ sakit, ngan dulu diaʹ bali nelasek. Mung nte dina maget pelaʹa.

¹⁷Kenai Pengebioʹ Detaʹu ina pemung ngan diaʹ ngan ne iaʹ cen mpun kelunan Seduki, moʹ miʹet laleʹ tekaʹ kimet de.

¹⁸Sulo re dakep diaʹ lawa Injil dina, penco naʹ ida dalem amin sepin lepoʹ ina.

¹⁹Un sepuʹo tegoʹ alem ina, nai kun ca melikat Tuhan mesik pamen amin sepin ina, penco ngkin ida kawang, mentung dau ue neng ida:

²⁰“Tai ne ikem nekejeng kedalem Umaʹ Palan Allah. Badaʹ me kelunan mung, tiraʹ neng udip mading ini.”

²¹Lepa re kenahan pekina dau, tai re kedalem Umaʹ Palan dalau kenai kedema neng kenempam, penco re pekatuk kidi. Kenai Pengebioʹ Detaʹu ina, peging dulu diaʹ ngan ne, mengin mung pengelataʹ lepoʹ Israil, moʹ de ke pempun mung diaʹ lataʹ. Uʹo ina kun nte cuk dulu tai kaʹ amin sepin, alaʹ mung lawa Injil dina.

²²Un dulu diaʹ ida cuk tai dina, abeʹ de taʹan diaʹ lawa Injil kedalem amin sepin ne. Sulo tai re ngeliwet, badaʹ a kaʹ Mpun diaʹ Lata kuma:

²³“Ameʹ taʹan amin sepin ina un alet ngan salet. Diaʹ jagaʹ amin sepin ina, un te ida nekejeng tahaʹ awang pamen ina, un sepuʹo lepa meʹ mesik ke, abeʹ meʹ taʹan ca kelunan kedalem me laʹa.”

²⁴Un pengebioʹ iaʹ jagaʹ Umaʹ Palan ina ngan diaʹ detaʹu lataʹ dina, uʹo re kenahan dau iaʹ pekina, miat tekaʹ de pekimet kempi ketai diaʹ lawa Injil didai.

²⁵Nai kun ca usa pisiu ida: “Ngeringa hem ading. Un diaʹ ikem naʹ kedalem amin sepin didai, ina te ida nekejeng kedalem Umaʹ Palan, seʹ de pekatuk dulu.”

²⁶Penco tai pengebioʹ Umaʹ Palan ina pemung ngan diaʹ jagaʹ a, tai alaʹ diaʹ lawa Injil dina. Abeʹ de alaʹ ida ngan buseʹ, moʹ de takut lepoʹ ina ke lemulo ida man batu.

²⁷Kun nte ngkin diaʹ lawa Injil dina tai nyeripa Mpun diaʹ Lataʹ. Sulo Pengebioʹ Detaʹu ina nugen lemutu ida,

²⁸kuma: “Lepa ne ameʹ mulen ikem pekatuk man ngadan Yesus ina, adeʹ kem pelibut katuk kem pelaʹa pa tipo lepoʹ Yerusalim ne. Seʹ kem ubaʹ ke ngkin dahaʹ kelunan ina nyalit neng ameʹ.”

²⁹Un dau Peterus ngan diaʹ lawa Injil dina mipa ia: “Tekep lete ameʹ bayaʹ Allah. Abeʹ meʹ bayaʹ kelunan.

³⁰Un Allah iaʹ anun tepun le, lepa pudip Yesus cen patai uʹo hem lepa ngediding lematai ia neng kayu tecek are.

³¹Ia lete Allah ban ngayang cuk ia tai tahaʹ taʹu ue, moʹ o cuk ia ketai Tuʹa le, ngan Keniga Udip le, iaʹ ke mawang ukoʹ lepoʹ Israil ke nesen, alaʹ nyepuleʹ kimet de, ngan ke sau penyalaʹ de.

³²Ameʹ dini diaʹ badaʹ tugen neng mung puyan ina, pekina pe Berua Buheʹ iaʹ Allah kenaʹ me mung kelunan iaʹ tudep bayaʹ dau ue.”

³³Kun Mpun diaʹ Lataʹ diaʹ pempun kina kenahan dau tiraʹ ina, buseʹ laleʹ ne tekaʹ kimet de, mentung nte ubaʹ ke lematai diaʹ lawa Injil dina.

³⁴Un ca usa diaʹ lataʹ kina, ca kelunan Perisi, ngadan ne Gamalil, ca guru Katuk Adet Musa iaʹ paren neng lepoʹ ina. Nai kun ne beteʹ nekejeng neng ahang mpun ina. Kun ne cuk ida tai ngkin diaʹ lawa Injil dina kawang nuat le.

³⁵Penco dau ue neng Mpun diaʹ Lataʹ kina: “Ahaʹ lepoʹ Israil, pekimet tiga tiga le ikem kena hem ti ca inu neng ida dini.

³⁶Moʹ cen naʹaʹ nai beteʹ ca laki iaʹ ngadan ne Tidas. Ia badaʹ ia paren bioʹ. Un pe tai dulu mayo ia, kihoʹ kihoʹ pat ato laki pengekadoʹ de. Kun dulu lematai ia, ngan kudaʹ kadoʹ dulu diaʹ bayaʹ ia tai pasi. Abeʹun ca inu inu ue laʹa.

³⁷Uʹo ina nai pelaʹa Yudas, ca lepoʹ Galilia, beteʹ dalau dulu pecap kelunan are. Kun ne mihit diaʹ kadoʹ tai mayo ia. Ia ca dulu lematai pelaʹa, ngan kudaʹ kadoʹ diaʹ lepa bayaʹ ia tai pasi puʹo.

³⁸Naʹkini akeʹ badaʹ mikem, ayen ti ca inu neng ida dini. Talan pe ida pekina. Buk katuk de ngan gayeng nte puʹun ne ban cen kelunan, atek ke salai te ʹo.

³⁹Un sepuʹo buk puʹun ne cen Allah, abeʹ kem senteng ke pesupeʹ ida, di lareʹ seʹ kem pebunoʹ ngan Allah.”

⁴⁰Mung Mpun diaʹ Lataʹ dina ngahaʹ dau Gamalil. Penco re mengin diaʹ lawa Injil dina nai kedalem laʹa. Kun nte lemeta ida, mentung nte mulen ida ayen peletoʹ ke pisiu man ngadan Yesus laʹa. Uʹo ina kun nte pawang ida tai.

⁴¹Kenai diaʹ lawa Injil dina mecin kukoʹ Mpun diaʹ Lataʹ dina ngan bangen tawai re, moʹ Tuhan kuma ha tekep de sihoʹ saʹe kuʹun ngadan Yesus ne.

⁴²Sulo tai re pekatuk singket tau kedalem Umaʹ Palan, pekina pe ngalang amin dulu. Abeʹ de beto tai pedengan ban Yesus iaʹ atek ngkang pungu udip.