Read Wahau Kenyah RUM 10 Bible Online

RUM 10 - Wahau Kenyah bible

RUM 10

¹Ahaʹ cenganak keʹ, mele pe mung tekaʹ kimet ceʹ, akeʹ ubaʹ lepoʹ keʹ ke un udip iaʹ ke pudip ida dalem Tuhan. Ina ukoʹ keʹ ngelapen dau lemameʹ Allah mida lete,

²apan akeʹ iaʹ badaʹ tugen mida, idi re sanget lemameʹ palaʹ Allah. Un sepuʹo abeʹ penyanget de pesente neng penisen iaʹ teneng,

³moʹ abeʹ de tisen janan Allah ke peteneng kelunan tai teneng ngan ne. Ida iaʹ naten uyan janan mida tengen, ina ukoʹ de abeʹ un tunuk bayaʹ janan peneneng Allah.

⁴Moʹ Keristus iaʹ atek pedaʹam Katuk Adet apan singket usa diaʹ ngelan Keristus tai teneng ngan Allah.

⁵Pekini dau Musa nyurat neng puyan kelunan tai teneng buk de bayaʹ Katuk Adet, kuma ha: “Aheʹ diaʹ bayaʹ neng mung Katuk Adet ina, ida iaʹ un udip kuʹun ne.”

⁶Pekini dau surat neng puyan kelunan diaʹ tai teneng kuʹun pengelan sepuʹo: “Ayen un dalem kimet cem iaʹ kuma ha: Aheʹ iaʹ ketai kempau kaʹ surga ke mita Keristus ngan ngkin ia kentaʹ?

⁷Un pelaʹa, ayen un dalem kimet cem iaʹ kuma ha: Aheʹ iaʹ ketai kentaʹ kedalem lubang malep ke mita Keristus ngan ngkin ia kempau cen lepoʹ patai?”

⁸Pekini iaʹ baʹan dau surat ina ne: “Nyeng le katuk Allah kata ikem, un neng paʹ kem, un pe kedalem penawai hem.” Pekina lete dau katuk neng pengelan iaʹ ameʹ pedenga ini.

⁹Moʹ buk man isiu hoʹ, ikoʹ teto ke ngahaʹ Yesus ina iaʹ Tuʹa hoʹ, ngan ngelan dalem penawai hoʹ ban Allah iaʹ pudip Yesus cen patai ie, atek koʹ ke un udip iaʹ ke pudip ikoʹ dalem Tuhan.

¹⁰Moʹ dalem penawai le ilu ngelan, ina ukoʹ le penco tai teneng ngan Allah. Man isiu le ilu teto ke ngahaʹ, ina ukoʹ le penco un udip iaʹ ke pudip ilu dalem Tuhan.

¹¹Moʹ un dau dalem Kitap: “Singket usa diaʹ ngelan neng laki ini, abeʹ de tai pebahoʹ.”

¹²Tiraʹ ina sihoʹ neng ilu mung, moʹ abeʹ un ca tekajaʹ lepoʹ Yahudi ngan lepoʹ diaʹ tahaʹ awang Yahudi ne laʹa. Allah ina, bang ia le Tuʹa neng ilu mung, kuaʹ lete ia mencai peniga neng mung diaʹ lemameʹ ia.

¹³Koʹ baʹan dau Kitap: “Singket usa kelunan, mele aheʹ diaʹ lemameʹ dalem ngadan Tuhan, ida iaʹ ke un udip iaʹ ke pudip ida dalem Tuhan.”

¹⁴Kumpin nte ke lemameʹ Tuhan buk abeʹ lepe ida ngelan? Ngan kumpin nte ke ngelan ia buk abeʹ lepe ida kenahan dau denga katuk ke? Ngan kumpin nte ke kenahan ne buk abeʹ un aheʹ diaʹ tai pedenga katuk ina mida?

¹⁵Kumpin katuk ina ke tai denga buk abeʹ un aheʹ lawa iaʹ ilu cuk ke tai pedenga ha tupe? Koʹ baʹan dau Kitap Tuhan: “Selama laleʹ le dulu neng kenai asat aheʹ diaʹ pedena denga tiga.”

¹⁶Abeʹ e mung dulu diaʹ ubaʹ ngeringa dau Denga Injil ina sepuʹo. Moʹ pekini dau Yesaya: “Ahaʹ Tuhan, aheʹ iaʹ ngelan dau ketai meʹ badaʹ katuk ini?”

¹⁷Moʹ ina, luhaʹ ban pengelan nai buk dulu kenahan dau katuk. Ngan dau katuk ina nai buk un aheʹ iaʹ ke pedenga Keristus.

¹⁸Un dau heʹ ʹo: Lan te taʹin lepoʹ Israil abeʹ un kenahan dau katuk Keristus ina lepe? Kenahan lete ida, koʹ baʹan dau Kitap: “Dau isiu re lepa ne ketai pasi pa tipo usun tanaʹ. Ngan tiraʹ de lepa tai pa abeʹ sada tanaʹ.”

¹⁹Un pe dau heʹ pelaʹa: Moʹ abeʹ lepoʹ Israil tisen katuk Keristus tupe? Musa tengen iaʹ ading badaʹ ban melai le dulu tisen, koʹ baʹan dau ue penco dau Allah: “Akeʹ ke beteʹ iʹet cem neng lepoʹ diaʹ abeʹ un ngadan. Ngan akeʹ ke beteʹ iʹa hem neng lepoʹ diaʹ untau.”

²⁰Tempa kuʹo ke Yesaya penco dau Allah kuma ha: “Aheʹ diaʹ abeʹ un mita akeʹ, ida diaʹ ban petegoʹ ngan nceʹ. Lepa ne akeʹ luhaʹ palaʹ ida diaʹ abeʹ un lemutu mita akeʹ.”

²¹Un sepuʹo dau tiraʹ Allah neng lepoʹ Israil, kun Yesaya penco ho, un dau ue: “Utung tau heʹ mencai ujoʹ keʹ palaʹ ca lepoʹ iaʹ muau, ngan iaʹ pesakat ngan nceʹ.”