Read Wahau Kenyah RUM 13 Bible Online

RUM 13 - Wahau Kenyah bible

RUM 13

¹Singket usa le tekep le tunuk neng perinta iaʹ man ilu. Moʹ abeʹ perinta ke un buk Allah abeʹ un mayo ho. Mung perinta iaʹ ban un, Allah iaʹ pejeng nge.

²Aheʹ iaʹ nyakat perinta, seʹ e nyakat ca puyan iaʹ Allah ban pejeng. Aheʹ iaʹ pekina puyan ne, tiwet neng ia tengen ke sihoʹ ukum.

³Moʹ dulu diaʹ ngkang perinta, abeʹ de petakut kelunan diaʹ menco puyan tiga. Bang ida petakut kelunan diaʹ menco puyan iaʹ jaʹat. Kumpin, ubaʹ kem are takut neng dulu diaʹ ngkang perinta tupe? Buk ke pekina, menco ne puyan iaʹ tiga, idi ie pada ikem uʹo.

⁴Moʹ aheʹ iaʹ ngkang perinta, ia ca panyen Allah iaʹ uyan tiga mikem. Buk kem uyan iaʹ jaʹat, tekep te ikem takut ia, moʹ abeʹ e pelo-lo le ngkang penyukat ukum ina. Moʹ ia ca panyen Allah iaʹ ke pabeʹ kenca Allah neng aheʹ iaʹ uyan jaʹat.

⁵Abeʹ e kuʹun kenca Allah ina tuaʹ le iaʹ ukoʹ kem ke tunuk neng perinta, di pareʹ kuʹun tekaʹ kimet dalem penawai hem lete.

⁶Ina tuman ncem naʹ pupu sedeʹ. Moʹ aheʹ iaʹ ngkang perinta, seʹ de mejo gayeng Allah buk de teneng pasat gayeng nte.

⁷Nyuaʹ ne mung utang ngkem neng ida, pupu usa hem, ngan pupu inu hem. Ngan libaʹ kimet cem nyelama ida mung.

⁸Ayen ncem un utang, mele neng aheʹ pe. Malaʹ ne ikem neng ahang ikem selepeʹ. Bang ina le utang iaʹ ikem supeʹ ke nyuaʹ. Aheʹ iaʹ malaʹ neng kelunan, seʹ e ban tunuk bayaʹ Katuk Adet.

⁹Moʹ mung katuk ukum Tuhan lepa pabung dalem ca le tiraʹ ini, iaʹ pekini dau ue: “Malaʹ ne kelunan diaʹ penyeng ngan ncem, koʹ baʹan ncem malaʹ usa hem tengen.” Kelunan diaʹ pekina, ida diaʹ atek bayaʹ katuk ukum iaʹ kuma ha: “Ayen ncem pemung nyelem; ayen ncem lematai kelunan; ayen ncem ngelau; ayen ncem kaseng neng inu dulu.”

¹⁰Moʹ aheʹ iaʹ malaʹ neng diaʹ penyeng ngan ne, nyahut te uyan jaʹat neng ida. Buk pekina, puyan malaʹ ina ke pekuaʹ te ngan puyan le tunuk bayaʹ mung Katuk Adet.

¹¹Tekep kem kanan dau puyan ina, moʹ tisen te ikem ngajan inu naʹkini: sihoʹ ne tuket te, tekep kem taga ne cen luntoʹ kem. Moʹ naʹkini un puyan iaʹ ke pudip ilu un nyeng laleʹ ne ia cen ʹo tading le ngelan are.

¹²Ban kenai ie dema ne ini, nyeng ne kenai selat tau. Tiga le pet mung puyan iaʹ mentem. Kanan senganan cen dema, man ncem pepatai ngan iaʹ jaʹat.

¹³Peteneng ne penyaheʹ le bayaʹ iaʹ tekep neng ilu diaʹ mudip dema koʹ baʹan naʹ tau are: abeʹ un amak ngan mabuk: abeʹ un pemung nyelem ngan selabu: abeʹ un ketiʹet ngan pekenca ne laʹa.

¹⁴Di lareʹ alaʹ Tuhan Yesus Keristus seleket gelam ngkem neng pengudip kem. Ayen puai penyaheʹ kem iaʹ un baloʹ jaʹat, ina iaʹ ketai ngkin ikem bayaʹ pengubaʹ usa hem ʹo.