Read Wahau Kenyah RUM 2 Bible Online

RUM 2 - Wahau Kenyah bible

RUM 2

¹Kumpin ncem cenganak, un ncem pebetep dau neng kelunan diaʹ ca tupe? Buk kem pebetep dau neng dulu diaʹ ca mentung ngkem uyan puyan koʹ baʹan ida are lete, seʹ kem mekem salaʹ neng usa hem tengen te ina. Nyahut cem un ukan ke mipau dau Allah laʹa, mele aheʹ aheʹ lene.

²Tisen te ilu ban Allah teneng buk ke pebetep dau ukum neng kelunan diaʹ pekina puyan.

³Ahaʹ buk pekina, moʹ inu hem pebetep dau neng dulu diaʹ pekina puyan petem pe ikem caʹ uyan puyan diaʹ pekina lete? Kumpin baʹan tekaʹ kem: un ncem kuma ha ikem ca diaʹ takau cen ukum Allah tupe?

⁴Pamoʹ pe ikem pesingo neng pengelesau iaʹ Allah lebang naʹ milu, ngan dadoʹ saheʹ e, ngan denaʹ tawai ie. Tekep kem tisen inu ukoʹ Allah ban lesau ikem, moʹ o ten ke ngkin ikem nyepuleʹ kimet cem cen penyalaʹ kem.

⁵Un sepuʹo caʹ mahing ngan sepati seʹ kimet cem. Neng puyan iaʹ pekina, seʹ kem mepit ukum neng usa hem tegoʹ Tau ia, ke peluhaʹ kenca Allah ngan ukum me iaʹ teneng ina.

⁶Allah ke nyuaʹ kelunan bayaʹ ban pemuyan nte, singket usa re.

⁷Aheʹ kelunan diaʹ tudep uyan tiga, ngan mita peniga ngan tiga saheʹ cen Allah, mentung mita udip iaʹ abeʹ un ketai salai, palaʹ ida lete Allah ke naʹ udip saheʹ kelineʹ iaʹ ngeriman ʹo.

⁸Aheʹ kelunan diaʹ lemuto malaʹ neng pengubaʹ usa re tengen, ngan nyekang inu iaʹ teneng apan nte bayaʹ pemuyan iaʹ salaʹ ina, palaʹ ida dina Allah ke mubeʹ kenca ngan iaʹ ha.

⁹Penuyen ngan penaru ke sihoʹ singket usa kelunan diaʹ uyan jaʹat, iaʹ ading nge lepoʹ Yahudi, pekina lete laʹa ʹo neng lepoʹ diaʹ ca puʹo.

¹⁰Di lareʹ Allah ke naʹ peniga ha, ngan tiga saheʹ e, ngan udip iaʹ tadan palaʹ mung kelunan diaʹ uyan tiga, iaʹ ading nge lepoʹ Yahudi, pekina lete neng lepoʹ diaʹ ca pe.

¹¹Moʹ abeʹ Allah selepeʹ neng kelunan.

¹²Dulu tahaʹ awang lepoʹ Yahudi, abeʹ de un Katuk Adet Musa. Buk de uyan penyalaʹ, durat ne berua re tahaʹ awang neng Katuk Adet Musa. Lepoʹ Yahudi diaʹ mampin Katuk Adet Musa, buk de uyan penyalaʹ, Katuk Adet Musa iaʹ ke pebetep dau mida.

¹³Moʹ abeʹ kelunan ke nuyan teneng ngan Allah buk de bang ke ngeringa dau Katuk Adet Musa tuaʹ le. Bang ida diaʹ kanan dau Katuk Adet Musa ne, ida le iaʹ ke nuyan teneng.

¹⁴Kelunan diaʹ tahaʹ awang Yahudi diaʹ abeʹ un Katuk Adet Musa ina, buk un kimet de tengen ubaʹ ke uyan koʹ baʹan Katuk Adet Musa ne, baloʹ ban nte dina un katuk adet cen uban penawai re tengen, naʹ pe ida abeʹ un Katuk Adet Musa.

¹⁵Moʹ kuʹun seʹ pemuyan nte dina iaʹ peluhaʹ ban inu iaʹ Katuk Adet Musa cuk, lepa un senurat dalem penawai re. Moʹ tekaʹ kimet dalem penawai re iaʹ badaʹ ban pemuyan nte ina teneng. Uban kimet de tahaʹ palai badaʹ ida salaʹ, un pe tahaʹ palai ie kimet de iaʹ badaʹ ida teneng.

¹⁶Pekina lete tegoʹ Tau Bioʹ ʹo, Allah ke kanan Yesus Keristus ngan ke pebetep dau neng mung kimet selem kelunan ʹo. Pekuaʹ ngan dina lete dau Denga Injil iaʹ akeʹ badaʹ ini.

¹⁷Kumpin ncem diaʹ un ngadan Yahudi tupe? Ikem diaʹ nebelum neng Katuk Adet Musa. Jum dau hem badaʹ ikem ban tisen neng Allah.

¹⁸Tisen ne ikem inu iaʹ pengubaʹ Allah, ngan mencam pe ikem lemileʹ iaʹ teneng, moʹ kem ban pekalai neng Katuk Adet Musa ne.

¹⁹Teto dau hem badaʹ ikem mencam ajak diaʹ butaʹ, ngan naʹ dema me dulu diaʹ dalau ntem.

²⁰Ngan mencam pe ikem pekatuk dulu diaʹ untau, ngan ikem pe tai guru me anak. Ikem diaʹ pampin puʹun penisen, ngan katuk iaʹ telit dalem Katuk Adet Musa ina, kaʹ baʹan ncem.

²¹Lan te ikem pekatuk dulu diaʹ ca, moʹ inu hem are pekatuk usa hem tengen ading tupe? Kun ncem pekatuk mulen dulu ngelau, kumpin, abeʹ kem ban ngelau ne laʹa mo?

²²Kun ncem mulen dulu pemung nyelem, kumpin, abeʹ kem ban pemung nyelem mo? Ikem diaʹ miʹi neng uyat, kumpin, abeʹ kem ban ngelau padau dulu mencai me uyat mo?

²³Jum dau hem badaʹ ikem ban mampin Katuk Adet Musa, kumpin, abeʹ kem ban pesaʹe Allah tegoʹ kem ngesa adet te mo?

²⁴Moʹ ban un dalem Kitap Tuhan Allah pekini dau ue: “Dulu diaʹ tahaʹ awang Yahudi pejaʹat dau neng ngadan Allah ban kuʹun puyan ncem lepoʹ Yahudi.”

²⁵Buk kem temek bayaʹ dau Katuk Adet Musa ina neng puyan adet sunat cem, un te bang nge lete. Un sepuʹo buk kem ngesa Katuk Adet Msua ina, puyan adet sunat ina abeʹ un atang nge.

²⁶Dulu tahaʹ awang Yahudi diaʹ are un adet sunat ina, buk de temek bayaʹ mung dau Katuk Adet Musa ina, moʹ abeʹ pekuaʹ koʹ baʹan diaʹ ban un adet sunat dina lete Allah ke pekimet ida tupe?

²⁷Tuman ina ikem lepoʹ Yahudi iaʹ ke sihoʹ ukum kuʹun lepoʹ diaʹ ca ʹo, uban ikem iaʹ ngesa katuk adet, naʹ pe ikem ban mampin surat adet ina mentung ngkem ti sunat. Un sepuʹo ida byaʹ dau katuk adet naʹ pe ida abeʹ un ti sunat.

²⁸Aheʹ iaʹ atek lepoʹ Yahudi lan, ngan aheʹ iaʹ atek un adet sunat lan tupe? Ida diaʹ ngadan nte Yahudi bang cen seʹ penaʹat tuaʹ le, abeʹ de Yahudi lan. Pekina pe sunat iaʹ bang neng usa re le, abeʹ ina sunat iaʹ lan.

²⁹Bang Yahudi iaʹ atek lan, ia ne Yahudi dalem kiemt de, iaʹ nyunat penawai re: sen ne pet iaʹ jaʹat. Bang Berua Tuhan iaʹ uyan pekina; abeʹ e adet cen surat iaʹ uyan pekina. Ida diaʹ koʹ baʹan ina are, abeʹ e cen kelunan iaʹ ke pada ida, di lareʹ cen Allah kenai ie.